1 Korintiyans 6 - Aŋwaʼanayn Uso Fey

Anó da ba Kristo mbənə umə inum uchini iŋuw ana usaʼa

¹ Aton zənə wa moʼ injən akaʼa bə́ mə nə usaʼa ni wa Kristo chini, u yə num ŋuw abú ba mbənə cha umə wumine uma Nwiye amə da ngiya? Nji ka yə mi num uŋwən iŋu amə abú ba Nwiye?

² Cha mbən kyay ngwən kwi amə ba Nwiye umi isaʼa isəg zənə? Abə mə kwi amə umbən mi isaʼ isəg zəŋ, anigə mbəŋ ki kyay ngwən umugə ni isaʼ buŋ isaʼa?

³ Mbən ki kyay ngwən kwi amə umba mi saʼ mbə angəd? Abə mə nigə, mba yi nibi saʼ unó da itəni zəŋ.

⁴ Anigə, mbən bə mə́ ni ikudi isaʼa itəŋ, mbən mə choʼo ba mbənə cha umə naʼa uma iwumini abú úŋwən ungɨŋ ufere kwi usaʼa unó wu da ngiya?

⁵ Amə indere atəw inen. Zigə yə tey kwi, cha wa moʼ injən akaʼa u kaŋa mə ni ŋwə̂ iwe nu amə ghəy usaʼa ba Kristo?

⁶ Asɨmə wa Kristo yə num wa Kristo chini u ŋu ifigi ba mbənə akə ma ba Kristo kwi usaʼa úŋwən!

⁷ Anó imə nə usaʼa injən akaʼa tey kwi cha mbən mə ghəy unó ni ba Kristo. Ka yə mi iboŋ amə kwi ughəy unó iboŋ amə injən akaʼa? Ka yə mi mə kwi ngwə amə ngwən?

⁸ Asɨmə mbən yə ghəy unó iboŋ wa yə nibə iguwə unya ma ungɨŋ ufere.

⁹ Akə asiʼ mbən kyay kwi, cha ba mbənə umə ghəy unó iboŋ umi ijəg anó ufon Nwiye. Ka wa moʼ tama ngwən; cha ba mbənə umə ghəy ufibiri unó mi noʼo ijəg uma anó ufon Nwiye, kə u mbənə umə iwumini unwiye ibuw ibuw, kə ba mbənə umə num iyey kə inom ba chini, kə anom mbənə umə neŋe anom chini,

¹⁰ kə iji kə ba mbənə umə woboro u ghəy kə ba mbənə umə ibigə unoʼ kə ba mbənə umə chiŋe ikum ba.

¹¹ Ba moʼ injən akaʼa mə ghəy unoʼ mbəŋ, asɨmə Asɨyisəg Yeso Kristo nə Azugə Nwiye si səw ngwən nibi ghəy mbən zayn itəm ikoʼoro ifigi Nwiye.

Mbən num itən nyə̂ inyo iwumini Nwiye awu

¹² Wa moʼ injən akaʼa yi ghayn kwi, “Mə kyay umugə ighəy unó ujum.” Amə nigə, asɨmə akə ma unó ujum amə ghəy uwere ayə. Mə kyay kwi, ayi ghəy unó ujum. Asɨmə cha ami beni aŋu kwi unó ujum ghəy aŋu akə isob.

¹³ Wa chini yə ghayn kwi, “Ughəy mbənə wa mə jəgə umbə chigə iŋuw ungɨŋ ibum foro kwi, ibum yə awu da iyimə u ghəy jəgi.” Amə nigə, asɨmə Nwiye yi izi inwi akə anó mbəŋ. Cha mba mi num nyə̂ inyo ni ghəy amə ufibiri unó awu. Mba yi num ifaʼ amə abú Nwiye. Amə Asɨyisəg umə nəmə nyə̂ inyo.

¹⁴ Nwiye ŋunə yə zəmə Asɨyisəg yi nibi zəmə ngwa akə ikay ma.

¹⁵ Cha mbən kyay kwi, ita nyə̂ inyo amə aba akə nyə̂ inyo Kristo? Anigə ami num aba akə nyə̂ inyo Kristo ibumə aboʼo nyə̂ inyo ajəgi isəg? Chama anəy!

¹⁶ Cha mbən di kyay kwi anom ŋunə umə foro inyo ma nə ajəgə isəg si beŋe akə nyə̂ inyo feyn ni uŋwən? Ayə ungɨŋ Aŋwaʼanayn Nwiye kwi, “Úŋwən uma bigə mbə bumə siy nyə̂ inyo feyn.”

¹⁷ Asɨmə wa ŋunə uforo inyo ma nə Asɨyisəg, azugə ma nə azugə Asɨyisəg si məŋə azugə feyn.

¹⁸ Mbən ton ufibiri unó. Cha unó iboŋ chini mbənə ba mə ghəy mə bira ma nyə̂ inyo, asɨmə wa ŋunə umə ghəy ufibiri unoʼ, u yə ghəy unó iboŋ nə nyə̂ inyo ma.

¹⁹ Cha mbən di kyay kwi, itən nyə̂ inyo amə imbəŋ abú Azugə zayn zayn zənə amə ungɨŋ inen nu Nwiye naʼa inen? Akaʼa ma itən nyə̂ inyo amə iti Nwiye.

²⁰ Nwiye si zon ngwən akə ukab nanaʼ, anigə mbən num itən nyə̂ inyo wumini Nwiye awu.