1 Korintiyans 5 - Aŋwaʼanayn Uso Fey

Ufibiri unó mbənə umə ungɨŋ ufere ba Kristo

¹ Mə si kwaʼa izəw kwi, ba mbə ghayn kwi ufibiri unó umbə injən akaʼa. Kwi mbə si məŋi akə nji zənə cha wa moʼ mə nə zən ma kwi amə anó iboŋ. Ukudu ŋunə cha umə aghəy uma kaba akaʼa ba mbənə cha udi kyay uma Nwiye. Mə nibi zəw kwi anóm moʼ mbə neŋe uyey mbaʼ ma.

² Mbən si mə beʼere inyo da ngiya? Nji akənə mi sugi ungɨŋ itən fiŋ anigə mbən chiyə anóm ŋunə umə aghəy unó mbəŋ injən akaʼa.

³ Ka di mə kwi cha aŋu injən akaʼa, asɨmə inyi azugə yə nə umbən. Mə num kwi ayə injən akaʼa. Mə si sob usaʼa igun wa ŋunə umə aghəy unó mbəŋ

⁴ akə ukum Asɨyisəg Yeso Kristo. Amaʼazənə mbən fere asin feyn ayə nə umbən akə azugə nə ikay Asɨyisəg Yeso yə nə umbən

⁵ mbən sayn anóm wu inya ubugə Satan kwi u chiŋe nyə̂ inyo ma da azugə ma mi du angəʼ anəy zənə Asɨyisəg Yeso mi zaʼa.

⁶ Cha adi iboŋ kwi mbən ni beʼere inyo. Mbən ki kyay ngwən kwi aba ŋwə̂ mbin akə aforo ayə noʼo injəŋ ujum?

⁷ Mbən chiyə anun aforo unó iboŋ zənə amə inen da mbən mi chomo ni ingəŋ fiy zənə cha aforo ungɨŋ. Numugə akyayn kwi amə nigə mbən məŋi, damugə Nwiye naʼa Kristo akə aghəy ifá igun ba unó iboŋ. Yə chomo ni ŋwə̂ injəg ŋunə ba Jû mə kyeme anəy Ufere Izaʼara Chigə Igun.

⁸ Anigə ka mba jəg ngwa ufere wu nə ingəŋ zənə imə nə anun aforo ungɨŋ. Aforo wu amə anó ni ighəy unó iboŋ nə imə kyugə. Asɨmə, mba jəg ufere wu akə ingəŋ zənə cha aforo. Mba jəgə ni ingəŋ zənə cha aforo nu ingəŋ wu amə fiŋ zayn zayn anigə sə aghəy unó asiʼ.

⁹ Mə́ ŋwaʼanayn inen kwi ka mbən mə jəgə ngwə azi ni ba mbənə umə aghəy ufibiri unó.

¹⁰ Cha mə́ mə ghayn aŋu amə da ba ungɨŋ isəg mbənə umə aghəy ufibiri unó, kə u mbənə umə wuboro ughəy, kə u mbənə umbə jəgə isəg, kə u mbənə umə ijiyə, kə u mbənə umə wumini unwiye ibuw ibuw. Mbən bə kaba ighəy ney, nji ayi tey kwi mbən du akə ungɨŋ isəg.

¹¹ Asɨmə anó zənə mə́ mə ghayn amə kwi, ka mbən jəg ngwən azi ni wa moʼ ŋunə ughayn kwi yə beni Kristo anigə ni aghəy ufibiri unoʼ, kə jəgə isəg, kə wuboro u aghəy, kə iwumini unwiye ibuw ibuw, kə chiŋe ikum ba, kə uji, kə nugə ibigə. Ka mbən mə jəgə ngwən nə ikudi ba itəŋ.

¹² Cha ikay iniŋ imə saʼa ba mbənə cha ungɨŋ ufere ba Kristo, damugə mba yə saʼa amə ba mbənə umə ungɨŋ ufere ba Kristo.

¹³ Amə Nwiye mi saʼa ba mbənə cha ungɨŋ ufere ba Kristo. Ayə ungɨŋ Aŋwaʼanayn Nwiye kwi, “Mbən fuw uzəg ŋunə umə injən akaʼa.”