1 Korintiyans 4 - Aŋwaʼanayn Uso Fey

Ba-tom Kristo

¹ Mbən ki zən ə ngwa kwi, mba mə ba faʼa Kristo foro ni ba mbənə Nwiye aghəy kwi uni ghayn anó zənə yə paʼa da Nwiye abú ba.

² Anó zənə Nwiye kaba abú ba mbənə u zi unó ungɨŋ ikyi ubugə uma amə kwi u ni faʼa ni fiŋ uma ujum.

³ Akaʼa ma anó moʼ iniŋ kwi mbən saʼa aŋu kə kwi wa nyoŋ atəw saʼ aŋu. Cha amə saʼa aŋu inyi inyo.

⁴ Cha adi kyay aŋu anó iboŋ moʼ zənə aghəy. Asɨmə, cha zigə di tey ma kwi cha adi si noʼo ighəy aŋu anó iboŋ. Aba Asɨyisəg umi saʼa aŋu.

⁵ Anigə, ka mbən sob ngwən u saʼa igun wa moʼ kə amaʼ sə koʼo. Mbən nəmə ipey Amaʼazənə Asɨyisəg mi zaʼa. Uyi tey unó mbənə ba mə aghəy ungɨŋ imbiri, nibi tey ikono tənə imə ungɨŋ fiŋ ba. Akə amaʼa wu, Nwiye yi naʼ yə beni ayə abú ba ma ujum akə inji zənə ikoʼoro abú wa feyn feyn.

⁶ Umbuŋ unya, unó mbənə amə ghayn da aŋu foro Apolo ayə ghayn nigə da iywere ngwən. Mbən kweme anó akə inayn zənə imə ghayn kwi, “Mbən aghəy aba unó mbənə umə ungɨŋ Aŋwaʼanayn Nwiye.” Mbən aghəy nigə boʼo ka wa moʼ mə komo ma iguwə ghayn kwi yə wuʼe wa moʼ chigə wa chini.

⁷ Amə ngiya amə inen itey kwi mbən chigə ba umbi? Amə ngiya amə inen nu akə ma Nwiye naʼa inen? Yə bə naʼa u aghəy inen nji aton nu mbən mə komo iguwə á chomo ni kwi akə uŋwən umə naʼa u aghəy inen amə da ngiya?

⁸ Mbən si məŋə nə ughəy ujum mbənə mbən mə kaba. Mbən si məŋə nə imbon, Mbən yə ghəy ni kwi mbən si məŋe ifon, ka di ma kwi cha ba mə ngwa ifon. Ayə kaŋa kaba kwi mbən mi mə ifon da mba mi mə ifon nə umbən.

⁹ Yə chomo iniŋ kwi Nwiye num ngwa umba ba tom kwi mba mə ba mba nwi akə uwayn da ba zən ngwa. Mba chomo ni ba mbənə u si sob usaʼa kwi umbi zwere úŋwən damugə isəg yə ney ngwa, mbə angəd mbə iney ngwa, ba nyoŋ atəw mbə iney ngwa.

¹⁰ Mba mə uneŋ damugə mba mə faʼa abú Kristo. Asɨmə mbən mə ba iwe damugə mbən mə akə anó feyn nə Kristo. Mba yə ibó, asɨmə mbən yə ika. Ba mbə itebe ngwa, asɨmə umbə wumine ngwən!

¹¹ Izaʼa pey akinine, mba yə chomo injəy, adoʼ zomo ina, mba yə zi uchara ndwi, ba somo ngwa, cha asin chomo ina.

¹² Mba yə faʼa ni ikay akə umba ubugə. Amaʼazənə ba bə jimə ngwa, mba yi naʼa aborobod abú úŋwən. Amaʼazənə ba mə nwine ita inya ughəw, ba yə koro fiŋ.

¹³ Amaʼazənə ba mə chiŋe ita ikum, mba yə ywiri akə inayn chuŋ. Mba chomo ni indoro akə ungɨŋ isəg. Izaʼa pey akinine, ba num ngwa mba chomo ni ba iboŋ.

Pol boʼo ubugə nibi chere ba

¹⁴ Cha amə ŋwaʼanayn ŋu anó mbəŋ inen da inaʼ idere atəw inen. Ayə ŋwaʼanayn da itaʼa ngwən numugə mbən mə umbəŋ buŋ nu awuʼi kwaʼa ingəʼ.

¹⁵ Ka di ma kwi mbən yə ni achuʼ ba ighum nu umə nəmə ngwən damugə mbən mə ba Kristo, cha mbaʼ inen unanaʼ. Akə umugə mbən mə akə anó feyn ni Yeso Kristo, amə ungwən mbaʼ numugə mə num ukən uchuŋ zaʼa ghayn inen.

¹⁶ Anigə ayə boʼo ubugə inen kwi mbən num itɨŋ inji.

¹⁷ Amə aton zənə amə tomo Timoti inen. Uŋwən amə uŋu ŋwə̂ nu a wuʼi kwaʼa azəd. Uŋwən yə faʼa abú Asɨyisəg nə fiŋ ma ujum. Uŋwən yi beʼere umbən utəw da unó mbənə mə́ mə aghəy Amaʼazənə mə́ beni Yeso Kristo, nu amə unó mbənə amə itey ungɨŋ ufere ba Kristo usin ujum.

¹⁸ Ba moʼ injən akaʼa mbə beʼere inyo damugə mbə kono kwi cha ami gha wene izaʼa aŋu inen.

¹⁹ Asɨmə Nwiye bə beni, a yi yabi wene izaʼa inen. Abə zaʼa, ayi pey yi nwine unó mbənə ba mbənə umə beʼere inyo umə ghayn, nibi nwine ikay zənə imə abú úŋwən.

²⁰ Cha anó ufon Nwiye mə ma anó da inayn, amə anó da ikay ni aghəy anó zənə Nwiye mə kaba.

²¹ Amə zayn mbən mə kaba? Mbən mə kaba kwi a zaʼa inen ni igwayn kə kwi a zaʼa ni iwuʼi foro azugə boroboro?