1 Korintiyans 3 - Aŋwaʼanayn Uso Fey

Ba faʼa Nwiye

¹ Umbəŋ unya, cha ami nayn inen numugə ami nayn abú ba mbənə Azugə Nwiye mə ungɨŋ fiŋ uma. Ayə inayn inen ni ba mbənə umə akə ungɨŋ isəg, kə ni kwi mbən mə buŋ ubó akə anó Kristo.

² Mə́ mə naʼa ibən inen akaʼa ma ijəg kaka, damugə cha mbən di koʼ ijəg ijəgə kaka. Kaba kinine, cha mbən di si koʼ ijəg.

³ Ayə ney damugə mbən yə ghəy nó ni ba mbənə umə ungɨŋ isəg. Amaʼazənə mbən mə́ ghəy imbəw nibə taŋara, aka mbən mbə́ ghəy numugə ba ungɨŋ isəg mə ghəy? Ka mbən mə ighəy ni ba mbənə cha u di kyay Kristo?

⁴ Wa moʼ injən akaʼa bə ghayn kwi, “Mə niŋe anjim Pol.” Wa chini bə ghayn kwi, “Mə niŋe anjim Apolo” Aka mbən mə ghəy ni ba nu cha u kyay Kristo?

⁵ Apolo mə ngwa? Pol mə ngwa? Úŋwən mə́ aba ba faʼa mbənə mbən chigə anjim uma ibeni Yeso Kristo. Wa feyn feyn inja akaʼa yə faʼa afaʼa zənə Asɨyisəg naʼa abú uŋwən kwi ufaʼa.

⁶ Mə kon itɨŋ, Apolo neb, asɨmə amə Nwiye ghəy kwi ughəy wu kuwəy.

⁷ Cha wa ŋunə ukono kə wa ŋunə u unebey mə ma wa mo, wa ŋunə u chigə ba jum amə Nwiye ŋunə u ghəy kwi ughəy wu ukwey

⁸ Wa ŋunə u kono ni wa ŋunə unebey mbə ghəy aba anó feyn, asɨmə Nwiye yi tu wa feyn feyn akaʼa úŋwən akə inji zənə u faʼa

⁹ Mba mə ba nu mba mə foro faʼa abú Nwiye. Mbən mə imbayn ma, mbən mə nibə ina nu Nwiye chimi.

¹⁰ Ajim ichuŋ zənə Nwiye ghəy iniŋ, mə chim na ichomo nu wa u ikyayn afaʼa ni ichim na anji chuŋ. Wa chini yə chimə igun ati ghəy wu. Asɨmə wa feyn feyn yi num ama akə nji zənə umə chimə igun ati wu,

¹¹ damugə cha ati na chini umi zi nu achigə akə zənə Nwiye si zi. Ati na wu amə Yeso Kristo.

¹² Wa moʼ yi chi igun ati wu akə gol, kə siriva, kə atəy aka unun. U moʼ u mbi chim akə ubwayn, umoʼ akə ichəw, umoʼ akə uzad.

¹³ Umbi zən afaʼa wa feyn feyn anji zənə u chimi, anəy zənə Kristo mi wene zaʼa pey yi saʼa isəg, ayi tey ukoro na ŋunə wa wu chimi. Uwəd yi zweʼe afaʼa wa feyn feyn. Uwəd wu yi toʼoro ukudu afaʼa ŋunə wa feyn feyn faʼa.

¹⁴ Ghəy zənə yə chimi igun ati ghəy wu bə́ ki ifə ma, wa wu yi num choʼo afaʼa.

¹⁵ Ghəy zənə wa wu chimi bə fə, u yi nim uchoʼo afaʼa. Uŋwən yi du angəʼ aba numugə wa duw ungɨŋ uwəd.

¹⁶ Mbən ki kyay ngwən kwi mbən mə ambəŋ Nwiye foro kwi Azugə Nwiye yə ungɨŋ inen?

¹⁷ Wa moʼ bə chiŋi imbəŋ Nwiye, Nwiye yi nibi chiŋi uŋwən, damugə imbəŋ Nwiye zayn. Mbən mə imbəŋ Nwiye wu.

¹⁸ Ka wa tama ma inyo ma. Wa moʼ injən kaʼa bə kono kwi imə wa iwe anji zənə ba ungɨŋ isəg kyay ba iwe, u beŋe akə aneŋ da imə nə iwe zənə Nwiye naʼa.

¹⁹ Ayə ney damugə anó zənə ba ungɨŋ isəg kono kwi amə anó iwe, Nwiye zən kwi amə aneŋ anó. Ayə ungɨŋ Aŋwaʼanayn Nwiye kwi, “Nwiye yə ibiya ba mbənə u kono kwi umbə ni iwe aba anjim iwe uma.”

²⁰ Mbə nibi ŋwaʼanayn ungɨŋ Aŋwaʼanayn Nwiye kwi, “Asɨyisəg kyay kwi ba mbənə u kono kwi umbə ni iwe amə utəw ukow.”

²¹ Anigə ka wa moʼ komo ma iguwə kwi iyə beni aboʼo wa nyoŋ atəw moʼ damugə Nwiye si naʼ u ghəy ujum inen.

²² Kə amə Pol, kə amə Apolo, kə amə Pita, kə isəg zəŋ, kə itəni, kə iwu, kə akinine, kə amaʼazənə ami zaʼa, Nwiye si naʼ u ghəy mbəŋ ujum inen.

²³ Mbən mə ba Kristo, Kristo mə nibə wa Nwiye.