1 Korintiyans 2 - Aŋwaʼanayn Uso Fey

Anó da Kristo ŋunə mbə́ komo azad abaʼaray

¹ Umbuŋ unya, Amaʼazənə mə́ zaʼa inen, cha mə ighayn aŋu unó mbənə unoy da Nwiye inen akə inayn kyayn kə akə iwe kyayn.

² Amaʼazənə mə́ mə ni umbən, mə num ungɨŋ inyi fiŋ kwi cha ami ghayn anó chini chigə akə anó da Yeso Kristo foro anó da umugə mbə́ komo uŋwən azad abaʼaray.

³ Umugə mə́ zaʼa inen, mə́ bó. Anigə ibó wu aghəy angəd kwi cha mə kyay ifaʼ inyi afaʼa anji chuŋ.

⁴ Amaʼazənə mə́ mə ghayn inayn Nwiye inen, cha mə di num aŋu iwe nə inayn nəmə ni ghayn wu. Mə́ mə ghayn amə anó zənə Azugə Nwiye naʼa ikay iniŋ kwi aghayn.

⁵ Mə́ mə ghəy nigə da mbən zi injən ibeni fiŋ amə igun ikay zənə Nwiye naʼa, akə ma igun iwe ba nyoŋ atəw.

Iwe zənə Nwiye naʼa

⁶ Amaʼazənə mba mə́ akaʼa ba Kristo mbənə u si tən anji chuŋ akə anó Nwiye, mba yə ghayn inayn iwe. Akaʼa ma iwe zənə imə abú ba mbənə umə aki ungɨŋ isəg, kə abú ba mbənə ikay umə tumə isəg zəŋ nu ikay ma mi imey.

⁷ Mba yə inayn amə da iwe zənə Nwiye naʼa, iwe wu paʼa nu cha ba kyay. Ki Nwiye sə ŋu tana isəg, yə si ghəy kwi i yi chigə anjim iwe wu ighəy kwi mba mə nə iwumini.

⁸ Cha wa moʼ akaʼa ba mbənə umə tumə isəg zəŋ akinine kyay uma anó zəŋ. Adi mə kwi mbə́ kyay, nji cha mbi di komo ma Asɨyisəg ŋunə mba naʼa iwumini abú uŋwən.

⁹ Ayə ungɨŋ Aŋwaʼanayn Nwiye kwi, “Anó zənə cha ighɨ di si noʼo izən, kə atoŋ zəw, Kə kwi wa noʼ kono ungɨŋ fiŋ, Amə azənə Nwiye si tana isiy abú ba mbənə ú wuʼi uŋwən”.

¹⁰ Asɨmə Nwiye si tey unó mbəŋ ina anjim Azugə zayn zayn. Azugə Nwiye wu yi kyiʼi unó ujum, kaba unó mbənə mbə́ noy da Nwiye.

¹¹ Amə ngwa kyay ikono wa chigə akə azugə zənə amə ungɨŋ ma? Amə nibə umugə cha wa moʼ kyay ikono Nwiye chigə akə Azugə Nwiye.

¹² Cha azugə zənə amə ungɨŋ isəg mə ma ungɨŋ ina, amə azugə zənə Nwiye naʼa amə ungɨŋ ina da mba kyay unó ujum mbənə Nwiye naʼa ina ibuw.

¹³ Cha mba mə ghayn ngwa unó mbəŋ akə inayn wa nyoŋ atəw. Mba yə ghayn amə akə inayn nu Azugə Nwiye naʼa ina. Mba yə num inayn wu itoʼoro asiʼ da Azugə Nwiye abú ba mbənə Azugə Nwiye mə ungɨŋ uma.

¹⁴ Cha wa ŋunə cha Azugə Nwiye ungɨŋ fiŋ ma mi beni ma unó asiʼ mbənə Azugə Nwiye naʼa damugə amə anó aneŋ abú uŋwən. Cha umi kyay ma unó wu damugə aba Azugə Nwiye mi aghəy kwi u kyay.

¹⁵ Wa ŋunə Azugə Nwiye mə ungɨŋ fiŋ ma, u yi zən unó ujum atəw ma zayn. Asɨmə, cha atəw wa chini mi zayn da unó mbənə ughayn.

¹⁶ Ayə ungɨŋ Aŋwaʼanayn Nwiye kwi, “Amə ngwa u kyayn unó mbənə Nwiye mə kono Da ikɨy uŋwən? Asɨmə mba kyay unó wu damugə anó zənə Kristo mə kono ayə ungɨŋ ita fiŋ.”