1 Korintiyans 16 - Aŋwaʼanayn Uso Fey

Anó da ichobo ukab da iywere ba Nwiye a Yerusanem

¹ Akinine, ayə kaba ghayn da anó ni ichob ukab da iywere ba Nwiye. Mbən ghəy anó zənə mə ghayn abú ifere ba Kristo tənə imə Galesiya.

² Anó wu amə kwi, uney Sonde ujum, wa feyn feyn injən akaʼa chiyə unun ukab moʼ akaʼa ŋunə yə faʼa isiy akə inji zənə inji ka tey da amaʼazənə ami zaʼa cha umi gha mə chobo ukab wu.

³ Amaʼazənə ami zaʼa, ayi ŋwaʼanayn aŋwaʼanayn inaʼ abú ba mbənə mbən mi choʼ anigə itom úŋwən a Yerusanem kwi u ŋuw inaʼ ukab ŋunə mbəŋ chobo awu.

⁴ Yə bə tey kwi a nibi ŋu, umbi yeŋ aboʼo inyi.

Pol tana kwi iyi ŋuw Koren

⁵ A yi zaʼa inen amaʼazənə asi chigə a Masedoniya damugə mə si tana kwi a yi chigə a Masedoniya.

⁶ Ighari moʼ ayi chomo nə u mbən akə ŋwə̂ maʼa moʼ, ighari moʼ ayi chomo uchi jum. Boʼo mbən were cha aŋu asin zənə ami ŋu.

⁷ Cha amə kaba izən aŋu ngwən nu amə chigə amə chigi. Nwiye bə beni, ayə kaba ichomo nə umbən anji chuŋ.

⁸ Asɨmə, akinine ayi mə dey chomo Efesus pey anəy ufere Pentakos.

⁹ Ayi chomo awu damugə apan chuŋ du iniŋ kwi a faʼa afaʼa kyayn. Asɨmə cha ba nanaʼ mə kaba ma kwi a faʼa afaʼa wu.

¹⁰ Timoti yə zaʼa inen, mbən ghəy u chomo uchuŋ uchuŋ injən akaʼa. Uŋwən yə faʼa abú Asɨyisəg numugə amə faʼa.

¹¹ Ka wa moʼ tebe ma uŋwən, mbən were uŋwən kwi u yeŋ akə aborobod, u faʼa afaʼa ma inji chuŋ da umi gha wene izaʼa iniŋ. I yə nəmə uŋwən nə unya anom mbi.

¹² Abə mə da ungwa unya Apolos, ayə ghayn abú uŋwən kwi uŋwən zaʼa ichaʼara ngwən nə unya chini. Asɨmə, cha umə kaba izaʼa ma akinine. U yi zaʼa akə amaʼazənə umi mə nə apan.

Inayn Nwi

¹³ Mbə num azom. Mbən zi fiŋ nə ikay igun Kristo ka mbən ibó ngwən, mbən təm akə ikay.

¹⁴ Mbən ghəy unó ujum ni iwuʼi.

¹⁵ Umbəŋ unya, mbən kyay kwi unebey Stefana mə unebey imbey ibeni Kristo á Akayiya. Mbə́ si sayn inyo ma ifaʼ abú ba Nwiye. Anigə ayə boʼo ubugə inen kwi,

¹⁶ mbən ki zəw ukudu ba mbəŋ. Nibi zəw ba jum mbənə umə faʼa nə úŋwən.

¹⁷ A yə kaŋa wuʼ aŋu damugə Stefana nə Fotunatus foro Akayikus umbə zaʼa. Mbə́ faʼ afaʼa zənə mbən mi mə faʼa.

¹⁸ Mbə́ ghəy inyi fiŋ zuti numugə mbə nibi ghəy itən fiŋ zuti. Yə boŋ kwi ba kyay kwi úŋwən mbə́ faʼa afaʼa chuŋ.

¹⁹ Ifere ba Kristo tənə imə aba abey Esiya itə chaʼara ngwən. Akwila nə Prisila foro ufere ba Kristo ŋunə umə nyi ungɨŋ na uma nibi chaʼara ngwən kwaʼa uchuŋ chuŋ akə ukum Asɨyisəg.

²⁰ Ba jum mbənə u beni Kristo nibi chaʼara ngwən. Mbən chaʼara wa feyn feyn kwaʼa uchuŋ chuŋ. Mbən chaʼara nigə i tey iwuʼi zənə imə akaʼa ba Kristo.

²¹ Amə mugə Pol a kaŋa iŋwaʼanayn achaʼara zəŋ akə umbəŋ ubugə.

²² Abə mə kwi cha wa moʼ wuʼ ma Asɨyisəg, indoŋ mə atəw ma. Ungwa Asɨyisəg zaʼa!

²³ Asɨyisəg Yeso ghəy ichuŋ inen.

²⁴ Mə wuʼ ngwən umbən ujum numugə mba mə akə bumi nə Yeso Kristo. Amə nigə.