1 Korintiyans 14 - Aŋwaʼanayn Uso Fey

Uneʼe ni ighayn ukən Nwiye nə uneʼe ni nayn akə inayn isoʼ

¹ Mbən kaŋa ghəy kwi iwuʼi amə ghəy zənə amə tinə ngwən iŋuw imbey. Mbənə tana kab amə uneʼe ŋunə Azugə zayn zayn naʼa, amara amə uneʼe imə ghayn ukən Nwiye.

² Cha wa moʼ ŋunə umə nayn akə inayn isoʼ mə nayn ma abú ba, u yə nayn amə abú Nwiye damugə cha wa chini mə kyay ma anó zənə umə ghayn. Amə Azugə zayn zayn aghəy kwi u ghayn unó mbənə unoy.

³ Wa ŋunə umə ghayn ukən Nwiye u yə ghayn amə abú ba da u təm ikay. Ukən wu yə naʼa ikay abú úŋwən ni boro fiŋ uma.

⁴ Wa ŋunə umə nayn akə inayn isoʼ u yə ywere aba inyo ma. Asɨmə, wa ŋunə umə ghayn ukən uchuŋ u yə ywere ufere ba Kristo.

⁵ Mə iwuʼ kwi, umbən ujum mbən nayn akə inayn isoʼ asɨmə anó zənə iwuʼ chigə amə kwi, mbən ghayn ukən Nwiye. Wa ŋunə umə ghayn ukən Nwiye chigə wa ŋunə umə nayn inayn isoʼ nigə kwi wa moʼ yə awu u mə itoʼoro inayn wu. U yi toʼoro da ami ywere ufere ba Kristo ujum.

⁶ Umbuŋ unya, abə zaʼa inen akinine pey sə nayn akə inayn isoʼ, zigə mi ywere ngwən akə ngiya? Inigə kwi a ghayn amə anó moʼ nu Nwiye tey iniŋ. Kə anó ni Nwiye kaba kwi mbən kyay kə anó moʼ ukən Nwiye mə itey inen, kə anó moʼ Nwiye kaba kwi a tey inen.

⁷ Ubə num u ghəy mbənə cha ikay nu umə ibiya abin awu ni inoŋo kə andura, wa mi kyay ukyi ŋunə umə ibiya ingiya nu cha umə ghama uma anji chuŋ?

⁸ Itaŋa mbə naʼa igəg nu cha ba tana ikyay, amə ngwa mi mə tana inyo iŋu maʼa berd?

⁹ Amə ichin ichin nə umbən. Mbən bə ghayn inayn nu cha izayn, wa mi si chigə ingiya ki kyay anó zənə mbən ghayn? Mbən bə mə aghəy nigə, nji mbən yə ghayn amə abú imbayn ika.

¹⁰ Amə asiʼ kwi ikudi inayn nanaʼ itə ungɨŋ isəg asɨmə cha imoʼ awu nu cha ba mə zəw unó mbənə umə ghayn.

¹¹ Abə ki kyay aŋu inayn abey nu wa moʼ mə inayn, nigə amə wa isoʼ abú uŋwən. Uŋwən mə nibə wa isoʼ iniŋ.

¹² Umugə mbən mə kaŋa kaba imi mə nə uneʼe ŋunə Azugə zayn zayn mə naʼa, anigə mbən kaŋa izən kwi mbən mə nə uneʼe ŋunə umi ghəy kwi ufere ba Kristo ni kwey ŋuw imbey.

¹³ Anigə wa ŋunə u nayn inayn isoʼ, u chaʼara Nwiye kwi u naʼa ikay abú uŋwən kwi u toʼoro unó mbənə u ghayn.

¹⁴ Ayə ney damugə, abə sə chaʼara Nwiye akə inayn isoʼ, inyi azugə ayə chaʼara fən asɨmə cha inyi atəw akə anó zənə amə aghayn.

¹⁵ Anigə amə ghəy ni ingiya? Ayi chaʼara Nwiye akə inyi azugə nibi chaʼara akə nji zənə ba mi zəw utəw ma zayn. Ayi kyugə ikyi iyere Nwiye akə inyi azugə nibi kyugə iyere uŋwən akə inji zənə ba mbə zəw utəw ma zayn.

¹⁶ Ngwə bə sə chaʼara Nwiye naʼa yə beni ayə abú uŋwən amə ungɨŋ injə azugə, anigə wa ŋunə u zaʼa amə zaʼa mi si ghayn ingiya kwi, “Amə nigə” Akə anó zənə ngwə mə ghayn nu cha umə zəw ma anó zənə ngwə mə ghayn?

¹⁷ Ighari moʼ, ngwə yə naʼa yə beni ayə abú Nwiye akə nji zənə ikoʼoro asɨmə cha amə ywere ma wa chini ŋunə umə awu akə aghəy moʼ.

¹⁸ Ayə naʼa yə beni ayə abú Nwiye kwi ayə nayn inayn isoʼ chigə ngwən umbən ujum.

¹⁹ Asɨmə ungɨŋ ufere ba Kristo, mə iwuʼ kwi a ghayn unó itɨŋ ikɨy ba da ubə zəw utəw ma zayn chigə umugə ami ghayn unó ichuʼ ighum akə inayn isoʼ.

²⁰ Umbuŋ unya, ka itən ikono mə uma ni buŋ kuŋe. Mbən chomo ni buŋ kuŋe mbənə cha ukyay ighəy uma unó iboŋ. Asɨmə mbən mə ni ikono ba ukay

²¹ Ayə ungɨŋ Aŋwaʼanayn Nwiye kwi, “Asɨyisəg ghayn kwi, Ayə chigə anjim ba mbənə umə nayn inayn isoʼ Nibi chigə anjim ichəw ba isoʼ inayn abú ba mbəŋ. Asɨmə cha umi zwaray anó zənə amə ghayn.”

²² Anigə, anó ni nayn akə inayn isoʼ amə anwini abú ba mbənə cha u di beni Kristo, akə ma abú ba mbənə u beni Kristo. Asɨmə anó ni ghayn ukən Nwiye amə abú ba mbənə u beni Kristo, akə ma abú ba mbənə cha udi beni ma Kristo.

²³ Amaʼazənə ba jum ungɨŋ ufere ba Kristo zaʼa bumə, anigə ba jum ki nayn inayn isoʼ, ba mbənə cha akə ufere wu kə u mbənə cha u beni ma Kristo zaʼa nyi, ka umi ghayn kwi mbən si bigə?

²⁴ Asɨmə, ba ujum bə sə ghayn ukən Nwiye anigə wa nu cha u beni Kristo, kə wa nu cha uŋwən aboʼo ufere ba Kristo zaʼa nyi, ba ujum mbi aghəy u kyay kwi iyə aghəy anó iboŋ, anigə unó ujum mbənə umə ghayn umbi saʼ uŋwən.

²⁵ Unó mbənə umə inoy ungɨŋ fiŋ ma umbi du asaŋ. Anigə yi gune sə wumine Nwiye ghayn kwi, “Amə asiʼ kwi Nwiye yə akəŋ aboʼo injən.”

Inji zənə unó mi mə iyeŋ ungɨŋ ufere ba Kristo

²⁶ Umbuŋ unya, mba ghayn kwi ngiya? Amaʼazənə mbən bumə, wa moʼ naʼa ukyi, wa chini tey unó, wa chini ghayn anó zənə Nwiye ghayn abú uŋwən, wa chini nayn inayn isoʼ, wa chini toʼoro inayn wu. Mbən sə aghəy unó ujum da umbən ujum təm ikay.

²⁷ Ba moʼ mə kaba nayn akə inayn isoʼ, abə ma ba ubigə ubə naʼ amə ba uta u nayn. Wa feyn feyn nayn inaʼ apan abú wa chini. Wa chini toʼoro inayn wu.

²⁸ Abə mə kwi cha wa moʼ itoʼoro inayn wu, wa ŋunə umə inayn chuʼ izey ungɨŋ ufere. U nayn aba abú inyo ma foro abú Nwiye.

²⁹ Ba ukən Nwiye ubigə kə uta u nayn. Abuʼə ba tana kono utəw ma da anó zənə umə ghayn.

³⁰ Nwiye bə ghayn anó abú wa moʼ ŋunə u chomo asey wa ŋunə yə təm atəy mə inayn chuʼ izey.

³¹ Akə inji zəŋ umbən ujum, mbən yi mə ghayn ukən Nwiye wa feyn feyn da ba ujum kweme anó moʼ. Zigə ayi aghəy kwi mbən zi ikay abú umbən unya.

³² Ba mbənə umə ghayn ukən Nwiye, u tana inji zənə umi mə ghayn awu akə uwaŋ.

³³ U ghəy nigə damugə cha Nwiye mə ma Nwiye ŋunə umə bure. Uŋwən amə Nwiye ŋunə umə kaba aborobod. Anji zənə amə ungɨŋ ufere ba Nwiye ujum.

³⁴ Mbə ayey chuʼ izey ungɨŋ ufere. Cha u di beni ma kwi úŋwən nayn. Asɨmə uni zwaray amə zwaray anji zənə amə ungɨŋ unoʼo Mose.

³⁵ Ubə mə kaba ikyay anó moʼ, U biri abú inom uma ana, damugə amə indere atəw abú ayey inayn ungɨŋ ufere ba Kristo.

³⁶ Inayn Nwiye waʼa noʼo inen? Kə awaʼa kwi aba inen nu yə si pey?

³⁷ Wa moʼ bə kono kwi, imə wa ukən Nwiye, kə kwi uneʼe ŋunə Azugə zayn zayn naʼa u yə ungɨŋ wa wu. U yi kyay kwi anó zənə amə ŋwaʼanayn inen amə ikɨy Nwiye.

³⁸ Wa moʼ bə ki beni ma unó mbəŋ, ka mbən beni ngwən uŋwən.

³⁹ Anigə umbəŋ unya, mbən zi utəw imə ghayn ukən Nwiye asɨmə ka mbən ton ngwən anó imə nayn inayn isoʼ.

⁴⁰ Mbən aghəy unó ujum akə nji zənə ikoʼoro nibi aghəy akə uwaŋ unó.