1 Korintiyans 13 - Aŋwaʼanayn Uso Fey

Anó da iwuʼi

¹ A bə mə nayn akə inayn ba nyoŋ atəw, kə akə inayn mbə angəd, asɨmə cha adi iwuʼe ba, mə chomo ni ikəŋ tənə imə joʼo, kə chomo ni ugoŋ ŋunə umə gweʼe.

² Abə mə ni uneʼe ighayn ukən Nwiye, nibi kyay unó ujum mbənə cha ba kyay, nibi mə nə iwe ujum, abə mə nə ibeni fiŋ ujum zənə amə aghəy a nayn ugum sam, asɨmə cha a wuʼe ba, amə aghəy ibuw.

³ Abə naʼa u aghəy ujum mbənə umə iniŋ abú ba ukwaŋ, nibi na kaba inyi inyo kwi u toŋe, asɨmə cha a wuʼe ba, cha ami jəg aghəy moʼ awu.

⁴ Iwuʼi yə ghəy kwi wa yimə fiŋ, iyə nibi ghəy kwi wa ghəy ichuŋ. Cha iwuʼi mə ghəy ma kwi wa ghəy adey, kə kwi wa komo iguwə, kə ibeʼere inyo.

⁵ Cha iwuʼi mə aghəy ma kwi wa swene adoʼ, kə kwi wa kaba aghəy aba abú nyə̂ inyo ma, kə kwi wa sey itəm, kə kwi wa num unó iboŋ ujum mbənə umə ghayn da uŋwən.

⁶ Cha iwuʼi mə aghəy ma kwi, ba aghəy unó iboŋ. I yə kaba amə kwi ba aghəy unó mbənə ukoʼoro.

⁷ Iwuʼi yə kaba kwi, ba yimə fiŋ akə unó ujum. Iyə aghəy kwi ba zi fiŋ inyo Nwiye. Iyə aghəy kwi ba niŋi ikono ba ujum igun unó mbənə ubeni, iwuʼ yə aghəy kwi ba num inyo asəy.

⁸ Cha iwuʼ mi noʼo nwi, Cha imə ma da unó ni ghayn ukən Nwiye nu ami nwi, Cha imə ma da anó ni nayn akə inayn isoʼ nu ami nwi, cha imə ma mə da anó imə nə iwe nu ami nwi

⁹ Iwe zənə imə ina iyə aba atin atin, mba yə nibə ghayn ukən Nwiye aba atin atin.

¹⁰ Amaʼazənə ghəy zənə aboŋo chigə abə zaʼa, ghəy zənə amə aba atin atin ayi nim.

¹¹ Amaʼazənə mə́ mə ŋwə̂ kuŋe, mə́ mə nayn, kono unó nibə mə ni iwe aba ni ŋwə̂ kuŋe. Amaʼazənə mə́ kwey siy wa ukay, mə waʼ unó buŋ kuŋe.

¹² Ghəy zənə mba mə zən ə akinine a chomo ni kwi amə aziŋ ungɨŋ maneŋ, Asɨmə akə amaʼazənə Kristo mi wene izaʼa, mba yi zəŋ uŋwən akə ifigi. Akinine, mba kyay Nwiye amə atin atin. Asɨmə amaʼazənə Kristo mi wene izaʼa, mba yə kyay uŋwən imara, aba nji zənə uŋwən mi kyay ngwa imara.

¹³ Anigə unó mbəŋ uta tənə koŋ. Amə anó ni zi fiŋ igun Kristo, anó ni isey iti ikono ni nəmə unó zənə ngwə beni, nə anó mi iwuʼ ungwə unya. Asɨmə anó zənə achigə umbi amə anó ni iwuʼ ungwə unya.