1 Korintiyans 12 - Aŋwaʼanayn Uso Fey

Ineʼe tənə Azugə zayn zayn mə naʼa

¹ Umbəŋ unya, akinine ayə kaba kwi mbən kyay asiʼ da ineʼe tənə Azugə zayn zayn mə naʼa.

² Mbən kyay kwi amaʼazənə cha mbən di si beni ngwən Nwiye, mbə́ mə́ iburə ngwən kwi mbən ki wumine unwiye nu cha umə inayn.

³ Ayə kaba kwi mbən kyay kwi cha wa moʼ awu umə ghayn inayn nu Azugə Nwiye naʼa abú uŋwən amə ghəy ughayn kwi, “Indon nyi igun Yeso.” Ayə nibə kaba kwi mbən kyay kwi, cha wa moʼ awu umə ghayn kwi Yeso mə Asɨyisəg nu akə ma Azugə zayn zayn ghəy kwi ughayn nigə.

⁴ Ineʼe tə́ awu ikudikud, asɨmə aba Azugə zayn zayn amə naʼa ineʼe wu.

⁵ Ufaʼa mbə awu ikudikud, asɨmə aba Asɨyisəg feyn mə naʼa ufaʼa wu.

⁶ Inji ni ifaʼ itə awu ikudikud, asɨmə aba Nwiye feyn mə ghəy kwi ba jum faʼa afaʼa zənə u naʼa abú úŋwən.

⁷ Nwiye yə tey kwi Azugə yə ungɨŋ wa feyn feyn da iwere ba jum ungɨŋ ufere.

⁸ Nwiye yə naʼa Azugə zənə amə ghəy kwi ba ghayn inayn iwe abú ba moʼ, u yə nibə chigə aba anjim azugə wu ighəy kwi wa chini ghayn inayn nu itey kwi yə kyayn anó.

⁹ Nwiye yə ghəy kwi wa moʼ mə nə ibeni fiŋ anjim azugə moʼ, u yə nibə chigə anjim azugə wu inaʼ uneʼe izwey wa abú wa chini.

¹⁰ Nwiye yə naʼa ikay abú wa moʼ ighəy uyere unó, u yə naʼa uneʼe abú wa chini ighayn ukən uchuŋ. Abú wa chini, u yə naʼa uneʼe kwi u kyay ikyaba akaʼa ineʼe tənə imə noʼo abú Azugə zayn zayn foro itənə akə ma Azugə zayn zayn mə naʼa. U yə naʼa uneʼe abú wa moʼ inayn akə inayn isoʼ, u yə nibə inaʼ uneʼe abú wa moʼ itoʼoro anó zənə u ghayn akə inayn isoʼ.

¹¹ Unó mbəŋ ujum, aba azugə feyn mə ghəy. Azugə wu yə naʼa uneʼe abú wa feyn feyn akə nji zənə Azugə wu kaba.

Nyə̂ inyo feyn nə usin inyo nanaʼ

¹² Numugə nyə̂ inyo aba feyn si mə nə usin inyo nanaʼ, anigə usin inyo wu kanə umə nanaʼ, abə ma nyə̂ inyo feyn. Amə nigə nyə̂ inyo Kristo məŋi.

¹³ Mba num uney anjim azugə feyn. Anigə mba si bumə akə nyə̂ inyo feyn. Nwiye zi aba Azugə feyn ungɨŋ ita fiŋ, Kə mba mə ba Jû, kə ba mbənə akaʼa ma ba Jû. Kə mba mə sob, kə ba mbənə akə ma sob.

¹⁴ Cha nyə̂ inyo mə ma nə asin inyo aba feyn. Iyə nə usin inyo nanaʼ.

¹⁵ Aghəw bə ghayn kwi, “Numugə akə aŋu abugə, cha amə aŋu aba moʼ akə nyə̂ inyo.” Cha zigə mi ghəy ma kwi, cha uŋwən mə ma aba akə nyə̂ inyo.

¹⁶ Atoŋ bə ghayn kwi, “Numugə cha amə aŋu aghɨ, cha imə ayi aba akə nyə̂ inyo.” Cha zigə mi ghəy ma kwi cha uŋwən mə ma aba akə nyə̂ inyo.

¹⁷ Nyə̂ inyo ujum di mə ighɨ, nji imə zəw anó ingiya? Nyə̂ inyo ujum di mə atoŋ nji imə nyoʼoro ghəy ingiya?

¹⁸ Umugə a məŋi, Nwiye tana nyə̂ inyo nə usin inyo nanaʼ. Anigə i zi asin inyo feyn feyn igun nyə̂ inyo wu aba anji zənə yə kaba.

¹⁹ Usin inyo ujum di mə aba nyə̂ inyo feyn, nji nyə̂ inyo ujum mi məŋi ingiya?

²⁰ Anji zənə a məŋi, usin inyo nanaʼ mbə awu asɨmə nyə̂ inyo aba feyn.

²¹ Anigə cha amə ghəy ighɨ ghayn abú abugə kwi, “Cha amə kaba aŋu ayə.” Cha amə ghəy atəw ghayn abú ughəw kwi, “Cha amə kaba aŋu ayə.”

²² Anó zənə amə awu amə kwi, cha nyə̂ inyo mi faʼ anji chuŋ nu cha usin moʼ awu umə ibó.

²³ Usin inyo mbənə cha ba mə ney uma kwi amə ghəy moʼ, amə usin mbənə umə tana ipara. Umbənə cha umə boŋo izən, amə u mbənə umə tana iney.

²⁴ Cha ba mə tana iney uma usin inyo mbənə umə boŋo izən, asɨmə Nwiye bumə usin inyo ujum akə ghəy feyn, anigə inaʼ iwumini kyayn abú usin inyo mbənə cha ba mə ney kwi amə ghəy moʼ.

²⁵ Yə ghəy nigə boʼo ka aghaba du ma akaʼa usin nyə̂ inyo. Yə kaba kwi, usin nyə̂ inyo ujum ney unya ma.

²⁶ Asin nyə̂ inyo moʼ bə sə zəw ingəʼ, usin inyo mbi ujum zəw ingəʼ aboʼo uŋwən. U bə naʼa iwumini abú asin inyo moʼ, usin inyo mbi ujum wuʼe uma ni uŋwən.

²⁷ Anigə, mbən mə nyə̂ inyo Kristo, anigə wa feyn feyn injən akaʼa amə aba akə nyə̂ inyo wu.

²⁸ Nwiye si choʼo ba ungɨŋ ufere ba Kristo. Mbi imbey mə ba tom, u mbənə uŋu pey akə ubigə amə ba ukən Nwiye, u mbənə u ŋu pey akə uta amə mbə taʼa ba. Umbənə u niŋe akuŋ amə ba mbənə umə ghəy uyere unó, iniŋe akuŋ amə ba mbənə umə izwey ba, iniŋe akuŋ amə ba mbənə umə iywere ba chini, iniŋe akuŋ amə ba mbənə umə tana inji zənə unó mə iyeŋ iŋu akə ba mbənə umə nayn akə inayn isoʼ.

²⁹ Cha ba jum mə uma ba tom. Cha ba jum mə uma ba ukən Nwiye. Cha ba jum mə uma ba umə ghəy uyere unó. Cha ba jum mə uma ba umə taʼa ba.

³⁰ Cha ba jum mə uma ba umə izwey ba. Cha ba jum mə uma ba umə nayn akə inayn isoʼ. Cha ba jum mə uma ba umə itoʼoro inayn isoʼ wu.

³¹ Mbən kaŋa kab amə uneʼe ŋunə u chigə iti. Ayi tey inji inen nu iboŋo chigə inji ujum.