1 Korintiyans 11 - Aŋwaʼanayn Uso Fey

¹ Mbən num itəŋ inya ughəw aba anji zənə anum inya ughəw Kristo.

Anó imə kəbərə atəw ki sə iwumini Nwiye

² Ayə yere ngwən damugə mbən yə kono aŋu akə amaʼ ujum. Ayə nibə beni ngwən kwi mbən yə ghəy aba anji zənə mə́ taʼa ngwən.

³ Ayə kaba kwi mbən kyay kwi atəw igun anom ujum amə Kristo, ikyay kwi atəw igun ayey amə unom ma nibi kyay kwi atəw igun Kristo amə Nwiye.

⁴ Anom ŋunə uzi ghəy moʼ ikəbərə atəw ma amaʼazənə umə chaʼara Nwiye kə amaʼazənə umə ghayn ukən Nwiye, yə tebe Kristo ŋunə amə atəw igun ma.

⁵ Ayey ŋunə cha u kəbərə ma atəw amaʼazənə umə chaʼara Nwiye kə amaʼazənə umə ghayn ukən Nwiye yə tebe unom ŋunə amə atəw igun ma. Amə ichin ichin umugə u shira atəw ma.

⁶ Ayey bə ki kaba ma i kəbərə atəw ma, u shira. Umugə amə indere atəw abú ayey shira atəw ma kə i poro, uni kəbərə atəw ma.

⁷ Ka anom kəbərə ma atəw ma damugə yə chomo ni Nwiye. U yə nibə itey iwumini zənə imə abú Nwiye. Asɨmə, ayey yə tey amə iwumini zənə imə abú anom.

⁸ Cha Nwiye dí num ma asin inyo ayey amaʼazənə yə mə tana anom. Yə num asin inyo anom amaʼazənə yə mə tana ayey.

⁹ Cha Nwiye di tana ma anom da ayey, yə tana ayey da anom.

¹⁰ Ayey mə nə ghəy moʼ ikəbərə atəw ma, da itey kwi iyə aton unom ma, foro da mugə mbə angəd mbə iney unó mbənə umə ghəy.

¹¹ Asɨmə, umugə mba mə akə anó feyn nə Asɨyisəg, cha ayey akə ighari ma nu cha anom. Cha anom akə ighari ma fən nu cha ayey.

¹² Umugə mbə num asin inyo anom i tana ayey, anigə amə ayey u bə́ anom. Unó mbəŋ ujum mbə noʼo abú Nwiye.

¹³ Mbən kono akə umbən atəw kwi, yə waʼa iboŋ kwi, ayey chaʼara Nwiye nu cha u kəbərə atəw ma?

¹⁴ Aka inji zənə Nwiye siy unó ungɨŋ isəg itey inen kwi, amə indere atəw abú anom isiy inyoŋ atəw sá.

¹⁵ Asɨmə, ayey bə́ mə́ nə inyoŋ atəw sá, amə iwumini abú uŋwən, damugə Nwiye na inyoŋ atəw sá abú uŋwən kwi u kəbərə atəw ma awu.

¹⁶ Wa moʼ bə kaba itaŋ anó zəŋ, uŋwən kyay kwi, cha ngwa kə ufere ba Nwiye, mə uma nə inji chini imə ighəy unó chigə akə zəŋ.

Inji zənə mba mi mə jəgə Itara Asɨyisəg

¹⁷ Akə anó zənə amə kaba ighayn inen, cha ami beni aŋu kwi, mbən yə ghəy unó nu ukoʼoro. Ungɨŋ injən ibumi, mbən yə ghəy amə unó mbənə umə zaʼa nə ingəʼ, akə ma u mbənə umə zaʼa nə ichuŋ.

¹⁸ Anó imbey amə kwi, mə si zəw kwi, ungɨŋ ungwən ufere ba Kristo, aghaba yə duw injən akaʼa. Ayə kaba imə beni kwi amə asiʼ.

¹⁹ Mə kyay kwi aghaba yi du injən akaʼa da mba kyay ba Kristo asiʼ.

²⁰ Amaʼazənə mbən bumə, akə ma Itara Asɨyisəg mbən mə jəgə.

²¹ Amaʼazənə mbən mə jəgə, wa feyn feyn injən akaʼa yə ŋuw imbey da jəg ijəg ma. Amaʼa nwi, ba moʼ mbə chomo injəy u chini si nugə ibigə.

²² Ingiya! Cha na inen imə jəgə nugə ungɨŋ? Kə mbən mə kaba ichiŋe ufere ba Nwiye anigə itebe ba mbənə cha ghəy moʼ abú úŋwən? Mbən bə kaba kwi a beni kwi anó zənə mbən mə ghəy yə iboŋ? Indəʼ cha ami beni!

²³ Anó zənə amə zəw abú Asɨyisəg amə aŋwən zənə amə ghayn inen. Anó wu amə kwi, afəb zənə mbə́ fənə Asɨyisəg Yeso yə num abimə ingəŋ.

²⁴ Amaʼazənə yə si chaʼara Nwiye, yə bɨʼiri ghayn kwi, “Zəŋ amə inyi nyə̂ inyo nu mə naʼa da umbən utəw, mbən sə ghəy ney ikono aŋu.”

²⁵ Amə ichin ichin amaʼazənə mbə́ si jəg imara, yə num itoʼ unoʼ ghayn kwi, “Itoʼ unoʼ zəŋ mə usəw fey ŋunə mə siŋ akə inyi anəm. Umaʼ ujum mbənə mbən mə nugə ungɨŋ itoʼ zəŋ, mbən sə ghəy nigə ikono aŋu.”

²⁶ Anigə amə kwi, umaʼ ujum mbənə mbən mə jəgə ingəŋ zəŋ nibə nugə ungɨŋ itoʼ zəŋ mbən ni ghayn anó da iwu Asɨyisəg. Mbən ni ghəy nigə iŋu pey anəy zənə umi wene izaʼa.

²⁷ Anigə, wa moʼ ŋunə u jəgə ingəŋ zəŋ kə i nugə ungɨŋ itoʼ Asɨyisəg akə inji zənə iki koʼoro ma, yə gow umugə u ghəy anó iboŋ akə nyə̂ inyo Asɨyisəg foro akə anəm ma.

²⁸ Wa feyn feyn kyiʼi inyo ma ki sə jəgə ingəŋ wu nibi kyiʼi inyo ma ki sə nugə ungɨŋ itoʼ wu.

²⁹ Wa moʼ ŋunə u jəgə ingəŋ wu nibi nugə unoʼ wu nu tebe aton ijəg nibi nugə nyə̂ inyo Asɨyisəg, uyə jəgə nibə nugə amə indon igun ma.

³⁰ Amə aton zənə ba nanaʼ injən akaʼa mə ibó nibə isɨgə, umoʼ si nibi ku.

³¹ Mba bə kaŋa kyiʼi ita inyo, cha Nwiye mi zi ma usaʼa igun ina.

³² Amaʼazənə Asɨyisəg bə saʼa ngwa, izi ingəʼ igun ina, u yə ghəy kwi mba təm ikay, da ka zi ma usaʼa igun ina anəy zənə umi saʼa isəg.

³³ Anigə unbəŋ unya, amaʼazənə mbən bə bumə ijəg itara, mbən nəmə ba umbi.

³⁴ Injəy bə mə zaŋa abú wa moʼ, u jəgə a na ma. Da amaʼazənə mbən bumə, ka Nwiye zi ma usaʼa igun inen. Akə unó mbənə ubuʼe, a yi ghayn anó zənə mbən ni ghəy amaʼazənə ami zaʼa.