1 Korintiyans 10 - Aŋwaʼanayn Uso Fey

Anó imə chaʼara unwiye ibuw ibuw

¹ Umbəŋ unya, ayə kaba kwi mbən kono anó zənə yə́ ghəy abú umba mbaʼ imbey amaʼazənə mbə́ mə́ iyeŋ nə Mose. Úŋwən uma ujum mə́ iyeŋ aton ipaʼ anigə ikwene ungɨŋ iba baŋa.

² Úŋwən uma ujum num uney numugə mbə́ mə́ iyeŋ aton ipaʼ ikweme ungɨŋ iba. Iniŋe anjim Mose.

³ Úŋwən uma ujum jəg ukudu ijəg feyn. Amə Nwiye yə́ naʼ ukudu ijəg wu abú úŋwən.

⁴ Úŋwən uma ujum nibi nugə une nu Nwiye naʼa abú úŋwən, Mbə nugə une nu u duw akə ukob nu Nwiye naʼa abú úŋwən. Ukob wu mə iyeŋ nə úŋwən. Ukob wu amə Kristo.

⁵ Ka di ba nigə, cha fiŋ Nwiye mə boŋo ma ni ba nanaʼ akaʼa úŋwən. Mbə ku anigə uwu uma saŋa ungɨŋ imbayn zomo.

⁶ Anó zəŋ amə anwini ina akinine da mba kweme anó awu kwi, ka mba mə zaŋa ngwa injey ighəy unó iboŋ numugə úŋwən ghəy.

⁷ Ka mbən mə wumini ngwa unwiye ibuw ibuw numugə úŋwən uma moʼ mə wumini. Ayə ungɨŋ Aŋwaʼanayn Nwiye kwi, “Ba wu chomo asey ni jəgə nibə nugə. Mbə ghəy nigə noʼ ki gha bine ghəy ufibiri unó.

⁸ Ka mba mə ghəy ngwa anó imə jəgə isəg, anji zənə úŋwən uma moʼ mə ighəy. Anigə úŋwən ichuʼ ighum ibigə cho ta ku igun aney feyn.

⁹ Ka mba mə kwaʼara ngwa Asɨyisəg numugə úŋwən uma moʼ mə kwaʼara, anigə, ijugə zwere úŋwən.

¹⁰ Ka mba mə ghama ngwa numugə úŋwən uma moʼ mə ghama. Anigə Nwiye cha angəd ŋunə umə zwere ba kwi uŋuw zwere úŋwən.”

¹¹ Anó zəŋ ghəy abú úŋwən itey anwini abú ba chini. Mbə́ nibi ŋwaʼanayn chide ngwa umba mbənə mba mə ikay akə amaʼazənə nu isəg mə sə baʼa ŋu nwi.

¹² Anigə wa moʼ ŋunə u kono kwi yə təm inji chuŋ, u num azom kwi ka u gow ma.

¹³ Cha anó moʼ mi kwaʼara ma ngwən nu cha adi si kwaʼara ma ba chini. Nwiye yə ghəy anó zənə u kaʼa. Anigə cha umi sayn ma kwi, anó moʼ kwaʼara ngwən chigə injən ikay. Amaʼazənə anó moʼ kwaʼara ngwən, u yi tey inji inen ichigə akwaʼara wu.

¹⁴ Umbəŋ unya nu a wuʼi kwaʼa azəd, mbən ton anó imə iwumini unwiye ibuw ibuw.

¹⁵ Ayə inayn inen nə ba umə nə iwe kwi, mbən kono umbən utəw da anó zənə amə ghayn inen.

¹⁶ Itoʼ zənə mba mə nugə ungɨŋ amaʼazənə mba mə jəgə Itara Asɨyisəg anigə inaʼ yə beni ayə abú Nwiye, aka ama kwi umba jum mba yə nugə anəm Asɨyisəg? Ingəŋ zənə mba mə bəʼere ijəgə aka amə kwi umba jum mba yə koro nyə̂ inyo Kristo?

¹⁷ Abimi ingəŋ aba feyn anigə umba jum mba yə jəgə aba abimi ingəŋ wu feyn. Yə tey kwi mba mə nyə̂ inyo feyn.

¹⁸ Mbən ney ba Izre, aka ba mbənə umə jəgə u ghəy mbənə umə naʼa akə u ghəy ifá si foro nə ba u mbənə umə naʼa u ghəy ifá abú Nwiye ijəgə?

¹⁹ Anigə amə́ ghayn kwi ngiya? Cha amə ghayn aŋu kwi u ghəy mbənə umə naʼa akə u ghəy ifá abú unwiye ibuw ibuw mə u ghəy moʼ, kə kwi unwiye ibuw ibuw amə ghəy moʼ.

²⁰ Indəʼ, ayə ghayn amə kwi, ba mbənə cha umə wumine Nwiye, umbə naʼa u ghəy ifaʼ amə abú uzugə iboŋ akə ma abú Nwiye. Cha amə kaba aŋu kwi mbən bumə ni uzugə iboŋ.

²¹ Cha amə ghəy mbən nugə akə itoʼ Asɨyisəg igha nugə akə itoʼ uzugə iboŋ. Cha amə ghəy mbən jəg igun agayi Asɨyisəg igha jəg igun agayi uzugə iboŋ.

²² Mba mə kaba kwi Asɨyisəg isɨy itəm? Mba waʼa ikay chigə uŋwən?

²³ Ba moʼ mbə ghayn kwi, “Mba yə ghəy unó ujum” Amə asiʼ. Asɨmə, akə ma unó ujum umə were. Mba yə ghəy unó ujum anji zənə mba wuʼi. Asɨmə, akə ma unó ujum mbənə mba mə ghəy u mə were.

²⁴ Ka wa moʼ kaba ma aba unó mbənə u boŋo abú uŋwən. U kaba amə u mbənə u boŋo abú ba chini.

²⁵ Mbən kod u ghəy ujum mbənə umə fənə iyuŋ nyə̂, mbən ibiri ngwən anó moʼ zənə ami ghəy kwi itən fiŋ saʼa ngwən.

²⁶ Ayə ungɨŋ Aŋwaʼanayn Nwiye kwi, “Isəg nə u ghəy mbənə umə awu ungɨŋ ujum mə umbi Asɨyisəg.”

²⁷ Wa moʼ ŋunə cha udi beni ma Kristo mbə num yə kwi mbə ŋuw ijəg, anigə ngwə bə beni iŋu, pey yi jəg ghəy zənə u sey inji figi ibiri ayə anó moʼ. Zigə, ayi ghəy kwi ka injə fiŋ saʼa ma ayə.

²⁸ Asɨmə wa moʼ bə ghayn inigə kwi, “Mbə si naʼ u ghəy mbəŋ akə u ghəy ifaʼ abú unwiye ibuw ibuw, ka mbə jəg ngwən u ghəy wu da wa ŋunə u ghayn anó wu inen. Ka mbən jəg ngwən da ka fiŋ saʼa ma wa moʼ.

²⁹ Ayə ghayn amə fiŋ wa ŋunə yə ghayn anó wu inen. Wa moʼ yi biri kwi, aton zənə fiŋ wa chini mi mə saʼa ghəy zənə a jəgə kə ghəy zənə cha adi jəg amə da ngiya?

³⁰ Abə naʼa yə beni ayə abú Nwiye anigə jəg ijəg wu nji aton nu ba mi mə inayn da ghəy zənə a naʼa yə beni ayə abú Nwiye ki jəg amə da ngiya?”

³¹ Anigə, kə ngwə jəg, kə ngwə nugə, kə ngwə ghəy anó moʼ, ghəy unó wu ujum da iwumini Nwiye.

³² Mbən iwe ngwən kwi ka mbən ghəy ngwən anó zənə ami ghəy kwi ba Jû kə ba mbənə akaʼa ma ba Jû kə ba ungɨŋ ufere ba Nwiye ka kən ma úŋwən kwi ka ukyay uma unó Nwiye.

³³ Mbən ghəy aba nə umugə damugə ayə kaba kwi fiŋ ba jum boŋo anji zənə amə ghəy unó ujum. Cha amə kaba ghəy aŋu aba unó mbənə u boŋo iniŋ. A yə kaba ghəy amə u mbənə u boŋo abú ba nanaʼ da amə ghəy Nwiye chi úŋwən angəʼ.