1 Korintiyans 1 - Aŋwaʼanayn Uso Fey

¹ Amə umbugə Pol nə ungwa unya anóm Sostenes mba ŋwaʼanayn aŋwaʼanayn zəŋ. Nwiye tiya aŋu akə inji zənə yə kaba kwi amə wa tom Yeso Kristo.

² Mba yə ŋwaʼanayn abú ufere ba Nwiye ŋunə umə Koren, nu amə ba mbənə Nwiye aghəy kwi uzayn akə anji zənə umə akə anó feyn nə Kristo nu Nwiye tiya úŋwən kwi amə ba ma. A yə nibə ŋwaʼanayn abú ba ujum mbənə umə wumine Asɨyisəg Yeso Kristo usin ujum. Uŋwən mə Asɨyisəg uma foro ni ngwa.

³ Nwiye Mbaʼ nə Asɨyisəg Yeso Kristo aghəy ichuŋ inen nibi naʼ aborobod inen.

Pol naʼ yə beni ayə abú Nwiye

⁴ A yə naʼa yə beni ayə abú Nwiye ighari ujum da ichuŋ zənə u chigə anjim Yeso Kristo ighəy inen.

⁵ Uyə naʼ ifuŋi inen akə inji ujum akə nji zənə mbən mə akə anó feyn nə Kristo. Yə si naʼ iwe inen ikyay unó da uŋwən anigə nibi ni ghayn unó da uŋwən.

⁶ Zəŋ ayə tey inen kwi unó mbənə mba mə ghayn da Kristo amə unó asiʼ.

⁷ Anigə cha mbən bəw ngwən uneʼe moʼ ŋunə Azugə Nwiye naʼa, umugə mben zi itəni fiŋ jum kwi ungwa Asɨyisəg Yeso Kristo yi wene izaʼa.

⁸ Uŋwən yi aghəy kwi mbə təm ikay iŋu pey akə inwi, da cha umi zən ma anó iboŋ moʼ igun inen anəy zənə umi wene izaʼa.

⁹ Nwiye yi aghəy anó zənə u kaʼa. Nwiye ŋunə yə tiya ngwən kwi mbən chomo akə anó feyn ni Ŋwə̂ ma Yeso Kristo ungwa Asɨyisəg.

Aghaba zənə amə ungɨŋ ufere ba Kristo

¹⁰ Umbuŋ unya, ayə boʼo ubugə inen akə ukum ungwa Asɨyisəg Yeso Kristo kwi mbən chomo akə anó feyn da ka aghaba nyi ma injən akaʼa. Asɨmə, mbən zi itən fiŋ aba akə anó feyn, anigə ibeni aba akə uchəw feyn.

¹¹ Umbəŋ unya, ayə ghayn ney damugə ba moʼ ungɨŋ unebey Klo ghayn iniŋ kwi mbən yə akə ataŋa.

¹² Anó zənə amə ghayn amə kwi, ba moʼ injən kaʼa yə ghayn kwi, “Mə niŋe anjim Pol,” Uchini ghayn kwi, “Mə niŋe anjim Apolo,” Uchini ghayn kwi, “Mə niŋe anjim Pita,” Anigə uchini nibi ghayn kwi, “Mə niŋe anjim Kristo.”

¹³ Anigə mbə ighaba Kristo? Amə umbugə Pol mbə́ komo azad baʼara da uŋwən? Kə mbə́ waʼa naʼa une inen akə ukum?

¹⁴ Ayə naʼa yə beni ayə abú Nwiye kwi cha mə́ di naʼa aŋu une abú wa moʼ injən akaʼa ichigə akə Krispus nə Gayus.

¹⁵ Anigə cha wa moʼ awu amə ghəy u ghayn kwi yə num une akə uŋu ukum.

¹⁶ Mə kono kwi mə nibi naʼ une abú Stefana nə unebey ma. Nji chigə akə ba mbəŋ, cha adi ni kono aŋu kwi mə naʼ une abú wa chini.

¹⁷ Cha Kristo di cha ma aŋu kwi a zaʼa naʼa une. Yə tom aŋu amə kwi a ghayn ukən uchuŋ, akaʼa ma akə inayn nəmənəm kə iwe wa nyoŋ atəw nji cha anó zənə mba mə ghayn da Yeso ŋune wə́ ku azad abaʼaray mi mə ma ni ikay.

Nwiye chigə anjim Kristo itey ikay ma nibi itey iwe ma

¹⁸ Inayn damugə Yeso ku azad abaʼaray amə aneŋ anó abú ba mbənə umə nimi. Asɨmə abú ba mbənə Nwiye mə chiyə angəʼ, inayn wu yə tey umugə Nwiye mə ni ikay.

¹⁹ Ayə ungɨŋ Aŋwaʼanayn Nwiye kwi, “Ayi tey abú ba mbənə u kono kwi umbə nə iwe kwi úŋwən mə uneŋ. Ayi tey abú ba mbənə umə kono kwi mbə kyay anó, kwi cha udi kyay una anó moʼ.”

²⁰ Abə mə ney, nji u mi siy wa ŋunə ukono kwi iyə ni iwe aŋwayn? Isiy wa ŋunə umə itey ikɨy aŋwayn? Isiy wa ŋunə umə taŋa anó aki isəg aŋwayn? Nwiye si aghəy kwi iwe ba igun isəg beŋe akə unó aneŋ.

²¹ Nwiye num iwe ighəy kwi ka ba num uma iwe ba nyoŋ atəw kyay uŋwən. Anigə yə boŋ abú uŋwən kwi u chiyə ba angəʼ anjim umugə u beni anó aneŋ zənə mba mə ghayn.

²² Ba Jû mbə kaba izən unwini unó itey kwi anó zənə mba ghayn amə anó asiʼ. Ba mbənə akaʼa ma ba Jû mbə kaba kwi mba ghayn anó zənə iwe mə ungɨŋ.

²³ Asɨmə mba yə ghayn da Kristo nu mbə komo azad abaʼaray. Cha ba Jû wuʼ izəw anó zəŋ, amə nibə anó aneŋ abú ba mbənə akaʼa ma ba Jû.

²⁴ Asɨmə abú ba mbənə Nwiye tiya akə ba uma akaʼa ba Jû foro akaʼa ba mbənə akaʼa ma ba Jû, Kristo mə wa ŋunə Nwiye chigə anjim ma itey ikay ma nibi itey iwe.

²⁵ Ba moʼ mbə kono kwi umugə Nwiye aghəy u kom Kristo azad abaʼaray amə aneŋ anó. Asɨmə anó zəŋ yə nə iwe ungɨŋ chigə iwe ba nyoŋ atəw. Ba moʼ mbə kono kwi umugə Nwiye aghəy u komo Kristo, yə tey kwi Nwiye ibó. Asɨmə anó zəŋ yə nə ikay ichigə ikay ba nyoŋ atəw.

²⁶ Umbəŋ unya, mbən kono inji zənə mbən məŋi amaʼazənə Nwiye tiya ngwən kwi mbən mə umbi ba. Cha umbən u moʼ mə ngwən nə iwe anji zənə ba ungɨŋ isəg mə nəy ba mbənə umə ni iwe. Amə cha umbən mbi moʼ mə ngwən nə usin kyayn ungɨŋ Abey, amə cha umbən mbi moʼ mə ni mbon.

²⁷ Asɨmə Nwiye choʼo ba mbənə ba kono kwi amə uneŋ da inaʼ idere atəw abú ba mbənə u kono kwi umbə nə iwe. Nwiye choʼ ba mbənə ba kono ungɨŋ isəg kwi umbə́ ibó da inaʼ idere atəw abú ba mbənə ukono kwi umbə nə ikay.

²⁸ Nwiye choʼ ba mbənə ba mə́ tebe uŋwən kwi akə ma ba moʼ aki isəg, u mbənə ba kono kwi amə ikow, da iniy ba mbənə ukono kwi mbi mə ba kyayn.

²⁹ Yə ghəy nigə boʼo ka wa moʼ komo ma iguwə ifigi ma.

³⁰ Amə Nwiye aghəy kwi mbən mə akə anó feyn ni Yeso Kristo. Uŋwən amə wa ŋunə Nwiye aghəy kwi mba chigə anjim ma mə ni iwe. Yə aghəy kwi mba təm ikoʼoro ifigi Nwiye, aghəy mba zayn nibi ziya umba utəw.

³¹ Anigə ayə ungɨŋ Aŋwaʼanayn Nwiye kwi, “Wa ŋunə umə kaba ikom igwə, ukomo igwə da anó zənə Asɨyisəg u aghəy.”