1 Jon 5 - Aŋwaʼanayn Uso Fey

Ba mbənə u beni Ŋwə̂ Nwiye si chigə isəg

¹ Wa ŋunə u beni kwi Yeso mə wa ŋunə Nwiye zoʼo, amə wa Nwiye. Wa ŋunə u wuʼi mbaʼ yə nibi wuʼe ŋwə̂ mbaʼ fən.

² Inji zənə mba kyay kwi mba wuʼe buŋ Nwiye amə kwi, mba wuʼe Nwiye nibi siy ikɨy ma.

³ Iwuʼe Nwiye amə kwi mba siy ikɨy ma. Cha ikɨy wu mə ikay ma ina isiy,

⁴ damugə buŋ Nwiye ujum siy chigə isəg. Mba chigə isəg anjim inja ibeni fiŋ.

⁵ Amə ngwa amə ghəy u chigə isəg? Aba wa ŋunə u beni kwi Yeso mə Ŋwə̂ Nwiye.

Ba mbənə u beni kwi Yeso mə Ŋwə̂ Nwiye

⁶ Amaʼazənə Yeso Kristo zaʼa, yə́ tey kwi imə Ŋwə̂ Nwiye anji zənə yə́ num unəy foro anji zənə yə chew anəm azad abaʼaray. Cha yə num ma aba unəy, yə num unəy nibi chew anəm. Azugə zayn zayn ghayn kwi anó zəŋ amə anó asiʼ, damugə Azugə yə ghayn amə anó asiʼ.

⁷ Úzənə uta umbi ghayn kwi anó zəŋ amə anó asiʼ.

⁸ Úzənə mbəŋ amə, Azugə Nwiye, une foro anəm. Úzənə mbəŋ uta umbə ghayn aba anó feyn.

⁹ Ba nyoŋ atəw umbə ghayn anó zənə u zən ə mba yə beni, asɨmə a zənə Nwiye ghayn ikwey chigə iyi uma. Anigə Nwiye ghayn anó zəŋ da Ŋwə̂ ma.

¹⁰ Wa ŋunə u beni Ŋwə̂ Nwiye si nibi beni anó zənə Nwiye ghayn. Wa ŋunə cha udi beni ma anó zənə Nwiye ghayn da Ŋwə̂ ma, yə ghayn kwi Nwiye mə wa figə unó. Yə ghayn ney damugə, cha u di beni ma anó zənə Nwiye ghayn da ŋwə̂ ma.

¹¹ Anó zənə u ghayn da ŋwə̂ ma amə kwi, Nwiye aghəy kwi mba jəg itəni nu cha imi noʼo imey, anigə amə ŋwə̂ ma umi naʼa itəni wu ina.

¹² Wa ŋunə umə akə anó feyn nə ŋwə̂ ma yi jəg itəni wu. Wa ŋunə cha akə anó feyn nə ŋwə̂ ma, cha umi jəg ma itəni wu.

Itəni nu cha imi noʼo nwi

¹³ A yə ŋwaʼanayn anó zəŋ inen umbən mbənə mbən beni Ŋwə̂ Nwiye da mbən kyay kwi mbən yi jəg itəni nu cha imi noʼo imey.

¹⁴ Aton zənə cha mba mə goro Amaʼazənə mba mə chaʼara Nwiye amə damugə mba si kyay kwi uŋwən yə zəw unó mbənə mba biri akə nji zənə u mə kaba.

¹⁵ Umugə mba kyay kwi, uŋwən yə zəw ngwa Amaʼazənə mba biri anó moʼ abú uŋwən, anigə mba nibi kyay kwi uŋwən yə naʼa u aghəy mbənə mba biri abú uŋwən.

¹⁶ Wa moʼ bə izən unya ma Amaʼazənə umə aghəy anó iboŋ zənə cha ami aghəy ma kwi u ku nim, u chaʼara Nwiye kwi, u naʼa itəni abú uŋwən. A yə ghayn amə u mbənə umə aghəy unó iboŋ mbənə cha u mi aghəy ma kwi u ku nim. Anó iboŋ moʼ yə awu amə aghəy kwi ba ku nim. Cha adi ghayn aŋu kwi, mbən chaʼara Nwiye igun ba mbənə u mə aghəy ukudu unó iboŋ wu.

¹⁷ Unó ujum mbənə cha u di ikoʼoro amə unó iboŋ. Asɨmə, unó iboŋ moʼ mbə awu nu cha umə aghəy ma kwi wa ku nim.

¹⁸ Mba kyay kwi cha wa Nwiye moʼ awu nu umə ŋuw imbey imə aghəy unó iboŋ. Ŋwə̂ Nwiye yə nəmə úŋwən, anigə cha inji amə aghəy wa iboŋ aghəy anó iboŋ abú úŋwən.

¹⁹ Mba kyay kwi mba mə ba Nwiye, mba nibi kyay kwi isəg ujum yə aton wa iboŋ.

²⁰ Mba kyay kwi Ŋwə̂ Nwiye si zaʼa. Yə sí aghəy kwi mba kyay anó, da mba kyay Nwiye ŋunə amə Nwiye asiʼ. Mba yə akə anó feyn nə Nwiye ŋunə amə Nwiye asiʼ. Mba yə nibə akə anó feyn nə ŋwə̂ ma Yeso Kristo. Uŋwən amə Nwiye asiʼ ŋunə umə aghəy kwi ba jəg itəni nu cha imi noʼo imey.

²¹ Umbuŋ buŋ nu a wuʼi kwaʼa azəd, ka mbən mə ngwən nə anó moʼ ighəy nə unwiye ibuw ibuw.