1 Jon 4 - Aŋwaʼanayn Uso Fey

Ikyaba zənə imə akə Azugə Nwiye nə azugə wa bana Kristo

¹ Umbuŋ uzi nu a wuʼi kwaʼa azəd, ka mbən beni ngwən ba ujum mbənə ughayn kwi Azugə Nwiye yə ungɨŋ uma. Asɨmə mbən zweʼe uzugə ujum wu izən kwi mbə noʼ abú Nwiye kə indəʼe. Ayə ghayn ney damugə ba ukən Nwiye afigə unó unanaʼ si saŋa ungɨŋ isəg.

² Inji zənə ngwə mi kyay Wa ŋunə Azugə Nwiye mə ungɨŋ ma amə kwi: Wa ŋunə u beni kwi Yeso Kristo zaʼa ungɨŋ isəg ni wa nyoŋ atəw, Azugə Nwiye yə ungɨŋ ma.

³ Cha Azugə Nwiye ungɨŋ wa ŋunə cha u di beni ma Yeso. Azugə zənə amə ungɨŋ ma zaʼa abú wa bana Kristo. Mbən si zəw kwi azugə wu ayi zaʼa. Akinine, yə si məŋe ungɨŋ isəg.

⁴ Umbuŋ buŋ nu a wuʼi kwaʼa azəd, mbən mə ba Nwiye anigə mbən si ikay chigə ba ukən Nwiye figə unó wu. Ayə nigə damugə Azugə zənə amə ungɨŋ inen chigə azugə zənə amə ungɨŋ isəg.

⁵ Ba ukən Nwiye figə unó wu amə ba ungɨŋ isəg. Anigə, unó mbənə umə ghayn amə unó ungɨŋ isəg. Isəg yə zwaray unó mbənə umə ghayn.

⁶ Mba mə ba Nwiye. Anigə, wa moʼ ŋunə u kyay Nwiye yi zwaray unó mbənə mba mə ghayn. Cha wa ŋunə akə ma wa Nwiye mi zwaray ma unó mbənə mba mə ghayn. Zəŋ amə nji zənə mba mi kyay ikyaba akə azugə zənə aghəy kwi mba kyay asiʼ foro azənə amə tama ba.

Nwiye wuʼe ba ma, mba nibi iwuʼ ita inyo umba umba

⁷ Umbəŋ unya nu a wuʼi kwaʼa azəd, mba ŋuw imbey ni wuʼe umba unya, damugə amə Nwiye mə ghəy kwi ba ni wuʼe unya uma. Wa ŋunə u wuʼi unya uma, amə wa Nwiye. Anigə uŋwən kyay Nwiye.

⁸ Cha wa ŋunə u ki wuʼe ma unya ma di kyay ma Nwiye. Mba kyay kwi Nwiye yə wuʼe ba.

⁹ Nwiye tey umugə u wuʼi ngwa anji zənə yə cha Ŋwə̂ ma ŋunə aba feyn ungɨŋ isəg da mba mi chigə anjim ma ijəg itəni nu cha imi noʼo mey.

¹⁰ Zəŋ amə kwaʼa iwuʼi asiʼ. Akaʼa ma kwi mbá wuʼe Nwiye, asɨmə kwi uŋwən wuʼe ngwa anigə icha Ŋwə̂ ma kwi u zaʼa ni aghəy ifaʼ zənə umi chigə anjim ma iwaʼ umba unó iboŋ.

¹¹ Umbəŋ unya nu awuʼi azəd, abə mə akə nji zəŋ nu Nwiye wuʼe ngwa, nji mba nibi wuʼ ita inyo umba umba.

¹² Cha wa moʼ di si noʼo zən ma Nwiye. Asɨmə mba bə wuʼ ita inyo umba umba, nji Nwiye yi mə akə anó feyn nə umba. U bə aghəy nigə, iwuʼi yi sugi ungɨŋ ita fiŋ.

¹³ Nwiye si naʼa Azugə ina, anigə zigə aghəy mba kyay kwi uŋwən yə akə anó feyn nə umba, ba nibi kyay kwi, mba yə akə anó feyn nə uŋwən.

¹⁴ Mba si zən, anigə mba yə ghayn abú ba umbi kwi, Mbaʼ cha Ŋwə̂ ma kwi amə wa umi chi isəg ujum angəʼ.

¹⁵ Wa ŋunə u beni kwi Yeso mə Ŋwə̂ Nwiye, u yə akə anó feyn nə Nwiye. Nwiye yə nibə akə anó feyn nə uŋwən.

¹⁶ Anigə mba kyay nibi beni kwi, Nwiye wuʼe ngwa. Nwiye wuʼe ba anigə wa ŋunə u wuʼi unya ma, u yə akə anó feyn nə Nwiye. Nwiye yə nibi akə anó feyn nə uŋwən.

¹⁷ Umugə amə nigə, iwuʼi yi sugi ungɨŋ ita fiŋ da cha mba mi mə goro ngwa anóʼ moʼ anəy zənə Nwiye mi saʼa isəg. Cha mba mi god damugə ita itəni ungɨŋ isəg chomo ni iyi Kristo.

¹⁸ Cha igoro ungɨŋ asin zənə iwuʼi mə awu. Iwuʼi bə sugi ungɨŋ fiŋ wa iyə fuw igoro, damugə ba mbə goro amə ingəʼ zənə Nwiye mi isaʼa isəg izi igun ba.

¹⁹ Mba wuʼe Nwiye damugə uŋwən dey wuʼe ngwa.

²⁰ Wa moʼ bə ghayn kwi, yə wuʼe Nwiye asɨmə iban unya ma, uŋwən mə wa figə unó. Ayə ney damugə, cha wa mi iton iwuʼ unya ma nu umə zən, ə mi iwuʼi Nwiye nu cha umə zən ə.

²¹ Ukɨy ŋunə Nwiye naʼa amə kwi, wa ŋunə u wuʼi uŋwən u nibi wuʼ unya ma.