1 Jon 3 - Aŋwaʼanayn Uso Fey

Buŋ Nwiye

¹ Mbən zən umugə Mbaʼ wuʼe ngwa kwaʼa azəd. Zigə si ghəy umbə tiya ngwa kwi buŋ Nwiye. Mba mə kaŋa úŋwən. Aton zənə cha isəg kyay ma ngwa amə kwi cha idi kyay ma uŋwən.

² Umbəŋ uzi nu a wuʼi kwaʼa azəd, akinine, mba mə buŋ Nwiye. Anigə, inji zənə mba mi məŋi amaʼazənə Kristo mi wene zaʼa amə anó nu cha wa di si kyay. Anó zənə mba kyay amə kwi, amaʼazənə Kristo mi wene zaʼa, mba yi chomo nə uŋwən damugə mba yi zən uŋwən numugə uməŋi.

³ Anigə ba jum mbənə u zi fiŋ mə nəmə Kristo umbi siy inyo ma izayn zayn anji zənə uŋwən mə nibə zayn.

⁴ Wa ŋunə u ghəy anó iboŋ, yə gow ikɨy damugə anó iboŋ amə anó ni gow ikɨy.

⁵ Mbən kyay kwi Kristo zaʼa da iniy ikay unó iboŋ igun ina. Mbən nibi kyay kwi cha uŋwən di ghəy ma anó iboŋ.

⁶ Ka wa ŋunə umə akə anó feyn nə uŋwən ŋuw ma imbey imə ghəy unó iboŋ. Cha atəw wa ŋunə umə ŋuw imbey imə ghəy unó iboŋ di si kwaʼa zayn ma da uŋwən. Cha u di si kaŋa kyay ma uŋwən anji chuŋ.

⁷ Umbəŋ buŋ, ka mbən beni ngwən kwi, wa moʼ tama ngwən. Wa ŋunə u ghəy unó mbənə u koʼoro, yə təm koʼoro numugə Kristo nibi təm ikoʼoro.

⁸ Wa ŋunə umə ghəy unó iboŋ amə wa debere, damugə debere ti mə ghəy unó iboŋ inoʼ amaʼazənə Nwiye tana isəg. Aton zənə Ŋwə̂ Wa amə da iniy afaʼa debere.

⁹ Cha wa ŋunə amə wa Nwiye mi ŋuw ma imbey imə ghəy unó iboŋ damugə inji unó Nwiye yə ungɨŋ ma. Cha umi mə gha ghəy ma unó iboŋ damugə úŋwən mə ba Nwiye.

¹⁰ Inji zənə ba mi kyay ba mbənə amə buŋ Nwiye nə u mbənə amə buŋ debere amə kwi: Wa ŋunə cha umə ghəy ma unó mbənə ukoʼoro kə uŋunə cha u wuʼi ma unya ma, mə ma wa Nwiye.

Mbən wuʼe ngwən umbən umbən

¹¹ Ukən ŋunə mbən zəw iti amaʼazənə mbən beni Kristo amə kwi: Mbən wuʼ itən inyo umbən umbən.

¹² Ka mbən chomo ngwən ni kayin nu amə ŋwə̂ Wa iboŋ. Yə́ zwere unya anom ma Abel. Yə́ zwere uŋwən da ngiya? Yə zwere uŋwən damugə ighəy unó ma ibɨy, iti unya anom ma boŋ.

¹³ Umbəŋ unya, ka mbən mə məŋərə ngwən á ngwən kwi ba ungɨŋ isəg mbə bana ngwən.

¹⁴ Mba kyay kwi, mba chomo ni uwu ba. Asɨmə akinine mba si jəg itəni. Mba kyay nigə damugə mba wuʼ umba unya. Wa ŋunə cha umə wuʼe ma unya ma, u mbə bugə chomo nə uwu ba.

¹⁵ Wa ŋunə umə bana unya ma, amə a zwere ba. Mbən nibi kyay kwi cha a zwere ba mi jəgə ma itəni nu cha imi noʼo mey.

¹⁶ Inji zənə amə ghəy mba kyay iwuʼ ba umbi amə kwi, Yeso ku da umba utəw. Anigə mba yi nibi ku da utəw umba unya.

¹⁷ Wa moʼ ŋunə umə ni imbon mi ghayn ngiya kwi, yə wuʼe Nwiye nu u zən unya ma u bəw ghəy moʼ asɨmə cha u were ma uŋwən?

¹⁸ Umbəŋ buŋ, ka mba wuʼe ngwa ba aba akə inayn foro akə uchəw. Mbən tey akə unó mbənə mbən mə ghəy foro akə asiʼ ŋunə mba ghayn mba wuʼ úŋwən.

¹⁹ Amə anji zənə mba mi kyay kwi, mba mə ba mbənə umə ghayn asiʼ. Zəŋ, ayi ghəy kwi ita fiŋ zure ifigi Nwiye.

²⁰ Akə umaʼ ujum mbənə ita fiŋ mə saʼa ngwa, mba kyay kwi Nwiye chigə ita fiŋ. Mba nibi kyay kwi uŋwən kyay unó ujum.

²¹ Umbəŋ unya nu a wuʼi azəd, abə mə kwi cha ita fiŋ mə saʼa ma ngwa, nji yə tey kwi mba təm nu cha igoro ifigi Nwiye.

²² Uŋwən yi naʼ u ghəy ujum mbənə mba biri abú uŋwən. U yi ghəy nigə damugə mba yə siyə ikɨy ma nibə ghəy unó mbənə u boŋo abú uŋwən.

²³ Ukɨy ŋunə Nwiye naʼa ina amə kwi, mba beni Ŋwə̂ ma Yeso Kristo nibi wuʼe umba unya. Mba ghəy nigə aba numugə Kristo si ghayn ina.

²⁴ Ba jum mbənə u num ikɨy Nwiye, u mbə akə anó feyn nə uŋwən. Uŋwən yə nibə akə anó feyn nə úŋwən. Anji zəŋ, mba kyay kwi uŋwən yə akə anó feyn nə umba anjim azugə zənə yə́ naʼa ina.