1 Jon 2 - Aŋwaʼanayn Uso Fey

Kristo mə ungwa wa were

¹ Unbəŋ buŋ nu awuʼi kwaʼa azəd, ayə ŋwaʼanayn unó mbəŋ inen da ka mbən ghəy ngwən anó iboŋ. Asɨmə wa moʼ bə ghəy anó iboŋ, mba yə nə wa moʼ nu umə boʼo ubugə abú Mbaʼ igun umba utəw. Uŋwən amə Yeso Kristo wa nu umə ghəy unó mbənə ukoʼoro.

² Uŋwən amə ghəy ifaʼ zənə Nwiye chigə anjim ma iwaʼ uma unó iboŋ. Cha umi waʼ aba umba unó iboŋ, u yi nibi waʼ umbi ba jum mbənə umə ungɨŋ isəg.

³ Mba bə mə siyə ikɨy Nwiye, nji yə tey kwi mba kyay uŋwən.

⁴ Wa moʼ ŋunə u ghayn kwi, “Yə kyay uŋwən, asɨmə cha umə siyə ma ikɨy ma, uŋwən amə afigə unó. Cha asiʼ ungɨŋ unó mbənə umə ghayn.

⁵ Wa moʼ ŋunə umə ghəy unó mbənə umə ungɨŋ ikɨy ma, anigə amə kwi iwuʼi da Nwiye sugi ungɨŋ fiŋ ma. Amə nji zənə atey kwi mba yə akə ibumi ni uŋwən,

⁶ Wa moʼ ŋunə u ghayn kwi i yə akə ibumi nə Nwiye, u ni yeŋ aba akə inya aghəw Yeso Kristo.”

Ukɨy fey

⁷ Umbəŋ unya nu a wuʼi kwaʼa azəd, cha ukɨy ŋunə amə ŋwaʼanayn inen mə ma ukɨy fey. Amə anum ukɨy nu mbən kyay iti amaʼazənə mbən beni Kristo. Anun ukɨy uŋu mə inayn zənə mbən si zəw.

⁸ Asɨmə, ukɨy ŋunə amə ŋwaʼanayn inen amə kwaʼa ukɨy fey. Ba mbi zən asiʼ ŋunə umə ungɨŋ ukɨy ŋunə anji zənə Kristo mə́ ghəy unó foro akə inji zənə mbən mə ghəy unó. Ayə ghayn ney damugə, imbiri sə chigə anigə Nwiye si ghəy, uzayn zayn asiʼ yə sə itey.

⁹ Wa ŋunə ughayn kwi iyə ungɨŋ u zayn zayn anigə u yə bana unya ma, u yə bugə ungɨŋ imbiri izaʼa pey akinine.

¹⁰ Wa ŋunə u wuʼi unya ma, u yə ungɨŋ u zayn zayn. Anigə, cha anó moʼ ungɨŋ ma amə ghəy aghəy kwi u gow anó.

¹¹ Asɨmə, wa ŋunə u bana unya ma u yə bugə ungɨŋ imbiri. Uŋwən yə yeŋ ungɨŋ imbiri anigə cha u kyay ma asin zənə umə ŋuw awu, damugə imbiri ghəy kwi ka umə zən ma usin.

¹² Umbəŋ buŋ nu a wuʼi kwaʼa azəd, ayə ŋwaʼanayn inen damugə Nwiye si wa umbən unó iboŋ da Kristo.

¹³ Umbəŋ mbaʼ, ayə ŋwaʼanayn inen damugə mbən kyay uŋwən ŋunə yə mə awu ki Nwiye sə tana isəg. Ayə ŋwaʼanayn inen igwaʼ ba damugə mbən si chigə wa unó iboŋ.

¹⁴ Umbəŋ buŋ, ayə ŋwaʼanayn inen damugə mbən kyay mbaʼ. Umbəŋ mbaʼ, ayə ŋwaʼanayn inen damugə mbən kyay uŋwən ŋunə yə mə awu ki Nwiye sə tana isəg. Ingwaʼ ba, ayə ŋwaʼanayn inen damugə mbən yə ni ikay, inayn Nwiye yə ungɨŋ inen. Mbən si chigə wa iboŋ.

¹⁵ Ka mbən wuʼi ngwən isəg kə iwuʼ u ghəy mbənə umə ungɨŋ isəg. Wa moʼ bə wuʼ isəg anigə cha u di wuʼ ma Mbaʼ.

¹⁶ Ughəy ujum mbənə umə akə ungɨŋ isəg, nu u ghəy mbənə nyə̂ nyoŋ mə kaba, u ghəy nu aghɨ mə wuʼe izən, u ghəy mbənə umə komo iguwə da uŋwən, cha u ghəy wu di noʼo ma amə abú Mbaʼ, amə u ghəy aki ungɨŋ isəg.

¹⁷ Isəg nə u ghəy ujum mbənə umə awu ungɨŋ nu ba mə kaba umbə chigə amə chigi, asɨmə wa ŋunə u ghəy anó zənə Nwiye kaba uyi tənə koŋ.

Uchere da ba bana Kristo

¹⁸ Umbəŋ buŋ, inwi isəg si tinə. Mbən si zəw kwi, wa ŋunə u bana Kristo u yi zaʼa. Akinine, ba bana Kristo nanaʼ si zaʼa. Zəŋ si ghəy mba kyay kwi amaʼazənə isəg mi nwi si tinə.

¹⁹ Ba bana mbəŋ mə́ inja akaʼa, asɨmə cha mbə di koʼoro ma iməŋi aboʼo inja, nji mbə́ mi chomo nə umba. Asɨmə bə du da a du zayn kwi cha úŋwən ungɨŋ ungwa ufere.

²⁰ Amə umbən, wa zayn zayn si zoʼ ngwən umugə u naʼa Azugə zayn zayn inen, anigə umbən ujum si kyay asiʼ.

²¹ Cha amə ŋwaʼanayn aŋu inen damugə cha mbən di kyay asiʼ. Ayə ŋwaʼanayn amə damugə mbən si kyay asiʼ nibi kyay kwi cha unó figi mə du ma akə asiʼ.

²² Wa unó figi asi mə ngwa? Amə wa ŋunə u ghayn kwi Yeso aka ma wa ŋunə Nwiye zoʼo. Wa ŋunə u ton Mbaʼ nibi ton Ŋwə̂ amə wa bana Kristo.

²³ Wa ŋunə u ton Ŋwə̂ yə nibi ton Mbaʼ. Wa ŋunə u beni Ŋwə̂ yə nibi beni Mbaʼ.

²⁴ Unó mbənə mbən zə́w iti amaʼazənə mbən beni Kristo, mbən num ungɨŋ itən fiŋ. Mbən bə num unó wu, nji mbən yi mə akə anó feyn nə Ŋwə̂ foro nə Mbaʼ.

²⁵ Ghəy zənə Kristo si kaʼ kwi iyi naʼ ina amə itəni nu cha imi noʼo mey.

²⁶ Ayə ŋwaʼanayn anó zəŋ inen da ba mbənə umə kaba itama ngwən.

²⁷ Amə da ngwən, Azugə zənə Kristo inaʼ inen si tənə ungɨŋ inen. Umugə azugə tənə ungɨŋ inen, cha mbən mə kaba ngwən wa chini kwi u tey anó moʼ inen, damugə wu yi itey unó ujum inen. Anó zənə amə itey inen amə unó asiʼ nu cha unó figi awu. Mbən ghəy unó wu anigə ichomo akə anó feyn nə Kristo.

²⁸ Akinine umbəŋ buŋ, mbən chomo akə anó feyn nə uŋwən da amaʼazənə umi wene zaʼa, cha mbən mi igod. Cha indere atəw ni ghəy ma kwi mba paʼa abú uŋwən.

²⁹ Mbən bə kyay kwi Kristo yə ghəy unó mbənə ukoʼoro, nji mbən yi nibi kyay kwi wa ŋunə umə ghəy unó mbənə ukoʼoro amə Ŋwə̂ Nwiye.