Titus 2 - Nouveau Testament en Ngienboum

Lezi’í nò Yěsô Kristo ndʉŋ ndʉŋ ná mà mbòŋo

¹ Tá ńgʉa ná gù, ké ne ńzí’i pʉ̀a mmó à pumo pɔ́ nà nò nénʉ́ gie mé zí’i pʉ̀a ná Yěsô Kristo.

² Gɔɔn né mbàŋa gie é zẅǐŋ ngie tà pɔ́ gÿo tsɔ́ mmo tà á cʉa, ńgie pɔ́ gwɔ́ pʉ̀a mekù’, ńgie pɔ́ gwɔ́ pʉ̀a pie é sáŋa nò tá ńgÿo. Pɔ́ gíŋ ńzáb ntʉ́m nà Ssé tà ńzáb, ńnéŋe ńkwoŋo pʉ̀a tà ńkwoŋo, éshÿɔgɔ menò tà shÿɔgɔ.

³ Á gíŋ ńgwɔ́ pɔ́ ndʉŋ ndʉŋ pá’ ɔ̀ ge gɔɔn lé pànzwě pie é zẅǐŋ ngie pɔ́ gẅiin mà gẅie à poŋ Ssé, ngie tà pɔ́ shwóŋte nà mezíŋ pʉ̀a, ńgie tà pɔ́ ma’ mbùm yɔb nà melù’. Á zɛ́te ngie pɔ́ nyɛɛ mà mbòŋo,

⁴ ńzsé ngie pɔ́ ge nyɛ pànzwě pie é nyé ńzɔ́’ɔ pá’ wɛ̌wɛ̌ wɔ́ à ge kwoŋo ndǔm we mbɔɔ penkʉ́ pé,

⁵ é gwɔ́ manzwě gẅie à sáŋa nò tá ńgÿo, é gwɔ́ manzwě gẅie à zsě pɔ́ ndà’ ndǔm we, éfa’ mefà’ ndá mé mboŋó, é gwɔ́ manzwě gẅie mé kwoŋo nò yé, é gwɔ́ manzwě gẅie à jú’ ncwò ndǔm we. Pɔ́ lɔɔn ńgÿo pú’u, nyìŋ léshwóŋe té poŋ nà nò Ssé wɔ́.

⁶ Á gíŋ ńgwɔ́ pɔ́ ndʉŋ ndʉŋ pá’ ɔ̀ ge kẅiŋte pûɔ mbàŋa lésáŋa nò fʉ̀’ ntsèm tá ńgÿo.

⁷ Kwà’ gù tyé nà kɔ́ wɔ́, ńnyɛ́ pɔ́ fʉ̀’ʉ mmó mbòŋo. Ɔ̀ lɔɔn ne ńzí’i pʉ̀a mmó, ɔ̀ zí’i wɔ́b pɔ́ ndà’ nò gie áa nénʉ́, ḿbiŋ ńzí’i tà ńzsé mmó gie ɔ̀ zí’i yɛ̌.

⁸ Gɔɔn nò à tyé ndʉŋ ndʉŋ, á gie à lɔɔn ńgwɔ́ mé lezoŋ, ńzsé ngie pʉ̀a pie é lʉ’ʉ nò gie ɔ̀ gɔɔn, ge zág sóon gie pɔ́ ge zába nà pege, éshʉ́ kúu wɔ́b.

⁹ Gɔɔn né mekwɔɔn ngie, pɔ́ jú’ ncwò pʉ̀a pie é gẅiin wɔb, tà mbɔɔ nà kɔ̀ɔkɔ́ɔ, ńgie pɔ́ fa’ shÿó ńgÿo mmó gie á poŋ pʉ̀a pie é gẅiin wɔ́b, ńgie tà pɔ́ zoŋo nò ncwò pɔ́b,

¹⁰ ńgie tà pɔ́ jʉ shúm pʉ̀a pie pɔ́ gẅiin wɔ́b. Tà ńcʉ́’ pú’u, pɔ́ nyɛ ngie pɔ́ kwa’ ńgwɔ́ nzèm pɔ́b. Pɔ́ lɔɔn ńgÿo pá’ɔɔn, mbà pʉ̀a ge gẅiin shwóŋè mbòŋo nà menò mie pege zí’i ná Ssé gẅie à gÿo pege tsẅɛ́ɛ.

¹¹ Áa pá’ pʉ̀a Ssé gẅiin légÿo, á nue e Ssé la kwà’ nyɛɛ mbwo pʉ̀a ngie à kwoŋó wɔ́b, ńcÿó gʉm yɔ́b, tà ńgÿo légwɔ́ gie ńgwɔ́ pɔ́b métsèm tsẅɛ́.

¹² Yɛ̌ ntí nkwòŋe ne ńzí’i wege légwá’a mà gẅie à tè Ssé poŋ mbɔɔ pá’ pege tè gíŋe ńgÿo shúm sie ntʉ́m wege tsóte wege ngie pege gÿo wɔ́. Pege cʉ́’ ńgwɔ́ tsɛ̀ɛ yɔɔn njÿó, ńgwɔ́ pʉ̀a pie é sáŋa nò tá ńgÿo, ńgÿo pɔ́ menò mie é tyé ndʉŋ ndʉŋ, ḿbiŋe ńjú’u pɔ́ ndà’ ncwò Ssé.

¹³ Á gíŋe ńgwɔ́ mbɔɔ pá’ pege ne ńzwí’te máa maa lyɛ’ɛ́ lá’ gie Yěsô Kristo ge lá’ nyɛɛ legú’ we. Yé zɔɔ Ssé yege yé lÿò, à gÿo pege tsẅɛ́ɛ.

¹⁴ Kwà’ yé à la náa twó yé ńtí wégè, lélɔg cu’u wégè mbwo menò tepòŋ mégè ntsèm. À la nyɛ́te wégè, pege cʉ́’ pʉ̀a pé, ńgwɔ́ pà tè *lɔ̌’, ńcʉ́’ ńnéŋe twó ńgÿo pɔ́ shúm sie ée mbòŋ.

¹⁵ Mɔɔn ée menò mie ɔ̀ gẅiin léke ńgɔɔn mbwo pʉ̀a gɔɔn, ńgẅiin lékẅiŋte wɔ́b, ńnyɛɛ nyìŋ mmó gie à fʉ̌a. Gÿo mɔɔn menò tà ńzsé ngie ɔ̀ lɔgɔ pɔ́ metʉ̀ Ssé ńgÿo. Tè cʉ́’ nyìŋ gwága gú.