Roma 9 - Nouveau Testament en Ngienboum

E Ssé pɔ́ nò pʉ̀a pie à la tsɔ́’

¹ Anò gie n ge gɔɔn áa nénʉ́. Pá’ mèŋ n déen ńda nnɛ́ ná Kristo la, mèŋ n tě ńgee shwóŋ cÿɔ̌ nò wɔ́. A Zẅìge Ndʉalʉ̌a ne ńgÿo ntʉ́m wɔ̀ɔn shwóŋó wɔ̀ɔn ngie nò gie mèŋ n gɔɔn áa nénʉ́.

² Yɛ̌ nò áa ngie mèŋ n neŋé lê kwà’ lemÿɔ́g, ḿbiŋ ne ńjú’u kékáŋ ntʉ́m mèŋ fʉ̀’ ntsèm ńtí mefɛ́ pɔ́ɔn pà Yuda.

³ Pega pɔ̌ ee tà’ ngẅɛ̀. Á laa gie ńgwɔ́ mánzsè gwɔ́ wó légwɔ́ gie Ssé ge gwá’a wɔ̀ɔn peg Kristo piŋ fege, tà á gwɔ́ gie mefɛ́ pɔ́ɔn pà Yuda ge cʉa mǒ é zsé nyìŋ gẅie Kristo aa wɛ̌, mbà à lɔɔn ńgwɔ́ n de lʉ’.

⁴ Pɔ́ ée pʉ̀a Israel. Mbà Ssé la kaŋa wɔ́b ńdɔgɔ wɔ́b ńgÿo púɔ pé, ńnyɛɛ wɔ́b legú’ we, ńgÿo pâ pɔ̌ gwâ *kʉ̀a, á ná *lepʉ̌ sé né pɔ́b, éshwóŋó wɔ́b ntí gie pɔ́ ge lɔg gu’te yé, ńka’ menò mbwo pɔ́b tà é gyɔ́ɔn gyɔ̌ɔn.

⁵ Pà mangʉa njʉ’ pɔ́b la kẅɛɛ nà ngẅɛ̀ Ábalam. Kristo gẅie aa Ssé, la gÿo ńkẅɛ yé nà yɛ̌ ngẅɛ̀, á fʉ̀’ gie mé la zyé yé á gwɔ́ nyìŋ mesoŋ. À pǔ ńcʉa kɔ̀ɔkɔ́ɔ. Mbʉ́lè gwɔ́ ná yé mengù’u mengù’. *Amen.

⁶ Pɔ́ tsɛ ne ḿmoŋe Kristo, tá ńgwɔ́ n de gɔɔn ngie anò gie e Ssé la ka’a mbwo pʉ̀a Israel la tè kẅɛɛ nò wɔ́ wɔ́. Á nue á zɔɔn ńgwaa gwɔ́, pʉ̀a pie ée nà ngẅɛ̀ Israel, lelÿò tè kwà’ pʉ̀a Israel wɔ́,

⁷ ḿbiŋ ńgwɔ́ mé le gɔɔn ngie pɔ́ ée ngẅɛ̀ Ábalam pé’è ńdɔgɔ ńgwɔ́ kwà’ púɔ Ábalam wɔ́. Á nue e Ssé la gɔɔn né Ábalam ngie: «Epʉ̀a pie mé ge lá’ tóŋ ngie ngẅɛ̀ jù, é gwɔ́ pɔ́ pie é ge lá’ gwɔ́ zyé Esâg»

⁸ Yɔɔn nò lɔgɔ ńgɔɔn ngie: Epúɔ pie mámbàŋa pɔ́ manzwě kwǒŋ kwoŋ ńzyé, é té púɔ Ssé wɔ́. Epúɔ pie mé la zyé wɔ́b ná pá’ Ssé la ka’ zɔ̌ lɔgɔ ńgwɔ́ púɔ Ssé.

⁹ Pi kímte pá’ Ssé la ka’a mbwo Ábalam ngie: «Mèŋ n ge lá’ gíŋ gwɔ́ tó ntyě fʉ̀’ɔɔn á fʉ̀’ pá’ɔɔn, nzwě gù Sara gẅiin múɔ mbàŋa».

¹⁰ Etsɔ̌ fʉ̀’ giŋé ńgwɔ́ wó, ńgwɔ́ Rebéka pá’ pɔ́ mangʉa njʉ’ wege Esâg la zyé mefág mbàŋa yépʉ́a.

^11-12 E Ssé la gɔɔn mbwo Rebéka ngie, mvfò múɔ ge gÿo fa’a mbwo nzèm. E Ssé la gwɔ́ gɔɔn pá’ɔɔn, má wɔ́b nyé pɔ́ shwòŋ pɔ́b, mbà à kaa zyé wɔ́b tà pɔ́ zsé nò mbòŋo kà ye tepòŋ wɔ́ wɔ́. E Ssé la gÿo pá’ɔɔn lélɔg ńnyɛ ngie à ńnéŋe ńgÿo pɔ́ mmó gie yé Ssé ne ńkwoŋo. À gwɔ́ gʉa nùɔ pʉ̀a é tsɔ́’ɔ nyìŋ we, à tè fó pɔ́ nà nò mbòŋo gie ngàŋ gÿǒ wɔ́.

¹³ Á lɔgɔ ḿbumte ná nò gie mé la ŋwe’e tsɛ̀ɛ ŋwà’ne Ssé ngie: «Mèŋ n kwoŋó Yakwɔ́b, ḿbe’e Esaẅi»

¹⁴ Á lɔgɔ pú’u, ńgɔɔn ngie kɔ́? Ńgie Ssé tè ndʉŋ ndʉŋ wɔ́ keen. Ngǎŋ á té pú’u wɔ́.

¹⁵ Á nue à la gɔɔn mbwo Mǒsê ngie: «Yé Ssé ge gÿo tsɔ́ɔn mezìŋe nyìŋ gẅie yé gyǎ ngie à ge tsɔ́ɔn, é gÿo nò mbòŋo ná nyìŋ gẅie yé gyǎ ngie à ge gÿo ná yé»

¹⁶ Pege lɔgɔ ńgyá ngie e Ssé gwɔ́ tsɔ́’ɔ nyìŋ à tè fó pɔ́ ná pá’ ngàŋ kwǒŋ wɔ́, ńké tè fó ná pá’ ngàŋ kǎg tʉ̀ ńgÿo tsɔ́ mmó wɔ́, á fó pɔ́ ná pá’ yé Ssé tsɔ́ɔn mezìŋe ngàŋ.

¹⁷ Áa tsɛ̀ɛ ŋwà’ne Ssé, mbà mé la zɔɔn ńŋwe’e ngie: E Ssé gɔ̌ɔn né fùɔ Faraon ngie: Mèŋ n da lɔgɔ gú ńgÿo fùɔ légwɔ́ gie n ge nyɛɛ gú mmó, epʉ̀a fó mǒ ńgyá pá’ n tʉ pú’u, tá mé lêen ńké ńzsé lezíŋ sɔ́ɔn ájʉ’ ntsèm ndùmo ssé tsetsá’.

¹⁸ Á lɔgɔ pú’u, ńgwɔ́ ngie e Ssé gÿo nyìŋ gẅie yé Ssé gyǎ ngie ngàŋ ge tʉʉ twó mbwo yé á tʉʉ twó, ńtsɔ́ɔn mezìŋe nyìŋ gẅie yé Ssé gyǎ ngie à ge tsɔ́ɔn mezìŋe ngàŋ.

Anò nà Ssé légyáŋa lóŋ mbɔɔ nà pá’ à tsɔ́ɔn mezìŋe pú’u

¹⁹ Ndyɛ̌’ nyìŋ jú’ pá’ɔɔn tà ńzɛ́te wɔ̀ɔn ngie á lɔɔn ńgwɔ́ pú’u, e Ssé gíŋe ńkaga nyìŋ ná nò mélà’a kɔ́, pá’ tsɔ̌ nyìŋ tè ku’u légÿo mmó té gwɔ́ gie áa gie yé Ssé la záb ngie ngàŋ ge gÿo wɔ́?

²⁰ Gù nyìŋ mesoŋ, ɔ̀ lɔɔn ńzɛ́te pú’u, mbà ɔ́ɔ wɔ̌ tà Ssé gɔɔn nò ɔ̀ pʉŋe? Ngwɔ́ sɔ́’ zɛ́te mbwòon tsǎ’a ngie, ɔ̀ la pwóon wɔ̀ɔn ná yɔɔn ntí pá’ɔɔn mélà’a kɔ́ wɔ́?

²¹ Ambwòon tsǎ’a, à píi tsǎ’ ńdɔg ḿbwóon mmó nà ntí gie à kwǒŋ. À lɔg pɔ́ tà’a tsǎ’ ḿbwóon sɔ́’ gẅie nzẅìŋ ée mǒ, ńgíŋ ńdɔg pɔ́ yɛ̌ ḿbwóon gẅie nzẅìŋ ku’ ku’.

²² Áa ndʉŋ ndʉŋ pá’ e Ssé gÿo nà pʉ̀a mesoŋ. À la kwoŋo lényɛ ngie lóŋ we ne ńgyáŋa ná menò mie pʉ̀a mesoŋ gÿo, mé fó mǒ ńgyá pá’ à tʉ pú’u. Tá, mbà á la gʉa nà pʉ̀a pie, à lɔ̌ɔn ge gyáŋa lóŋ ná pɔ́b, á ke ńdɔg pɔ́ kwɔ́gɔ nnɛ́ éshÿɔg shÿɔg. Tá mbà á la gwaa gwɔ́, mbà pɔ́ kǔ’ pá’ à ge pyága wɔ́b pyág.

²³ Tá e Ssé lɔ̌ɔn ńgíŋe ńkwoŋo lényɛ nzẅìŋ fù’ gie áa tsɛ̀ɛ legú’ we, ńgwɔ́ gie à náa mbwo pʉ̀a pie à tsɔ̌ɔn mezìŋe mɔ́b, é pʉ̀a pie à la lá’ ntʉ́ njÿó ńcwoŋo wɔ́b ńtÿɔ́g, á légẅiin legú’ we ŋwɛ́.

²⁴ Pɛ̌ pʉ̀a lɔgɔ ńgwɔ́ pɔ́ wégè wɔɔn, á wégè gẅie à tsɔ’ɔ́ nùɔ pà Yuda mbɔɔ nùɔ pʉ̀a pie é té pà Yuda wɔ́.

²⁵ Á gwɔ́ kwà’ mmó gie à la gɔ́ɔn tsɛ̀ɛ ŋwà’ne Ozé ngie: Epʉ̀a pie é la tè pʉ̀a pɔ́ɔn mɔ́, Mèŋ n ge gÿo tóŋo wɔ́b lê pʉ̀a pɔ́ɔn. Epʉ̀a lá’ gie n dɔ̌ɔn tě ńnyɛɛ ngie n kwoŋo wɔ́b gwɔ́ Mèŋ n ge gÿo tóŋo wɔ́b lê pʉ̀a pie n kwoŋo wɔ́b tɛ’.

²⁶ A gwɔ́ pú’u, ajʉ’ gie pɔ́ lɔ́ɔn ńtyé wó mé gɔɔn né pɔ́b ngie pɔ́ té pʉ̀a pɔ́ɔn mɔ́, pɔ́ ge gÿo tyé jʉ’ó, mé gɔɔn né pɔ́b ngie: Pi ee púɔ Ssé gẅie aa ntentʉ́.

²⁷ *ntsẅì nkʉ̀ Ssé Esǎya la tʉ́ njÿó ńgɔɔn yé ngie: Epúɔ pà Israel lɔɔn fó ńgyɔ́ɔn tà ńgwɔ́ pɔ́ pá’ saŋasáŋá gie áa ngʉ̀ŋe ntse té pàa, mbà mbɔ́ ntá’ ndà’ zɔ̌ ge gÿo gʉa mǒ tsẅɛ́.

²⁸ Á nue Cʉ̀apʉ̀a ge gÿo lwo pú gÿo mmó gie à la ka’a légÿo ndùmo ssé tsetsá’.

²⁹ Esǎya la gíŋe ńtʉ́ njÿó ńgɔɔn ngie: «Cʉ̀apʉ̀a gẅie à pǔ sá’a shúm ntsèm tsɛ̀ɛ njÿó la gwé’e pé’è à tè nyé tsɔ́ mbɔ́ ntá’ nà ngẅɛ̀ yege á mbwo pege wɔ́, mbà pege léen ńcʉ́’ pá’ tÿǒsoŋo Sodom kà pɔ́ pá’ ye Gomor wɔ́.»

Anò nkʉ̀ mbòŋo mbwo pà Yuda

³⁰ Pege fó ná yɔɔn nò ńgyá ngie kɔ́? Pege gyá ngie tà mbɔɔ pá’ pʉ̀a pie é té pà Yuda wɔ́ la tè ne fa’a shÿó légwɔ́ pʉ̀a pie ée ndʉŋ ndʉŋ mvfò Ssé wɔ́, eshÿó la kẅɛɛ mbwo pɔ́b. Á gwɔ́ pá’ pɔ́ la záb ntʉ́m wɔ́b ná Kristo, e Ssé cʉ́’ ńdíe wɔ́b pɔ́ gwɔ́ pɔ́ ndʉŋ ndʉŋ mvfò yé,

³¹ ńké ńgʉa ná pʉ̀a Israel pie pɔ́ la ne fa’a léfó pɔ́ nà leku’té *lepʉ̌ Mǒsê ńgwɔ́ pʉ̀a pie ée ndʉŋ ndʉŋ mvfò Ssé, mbà pɔ́ la tè ku’, wɔb mánzsè pɔ́ we nkẅɛ̌ ndá *lepʉ̌ é la tè pumte.

³² Pɔ́ lɔɔn tě ńku’u wɔ́ mélà’a kɔ́? Á laa nue pɔ́ la tè ne ńkwaŋa ngie pɔ́ ge záb ntʉ́m wɔ́b nà Ssé tá yé zɔ gÿo pɔ́ gwɔ́ ndʉŋ ndʉŋ mvfò yé wɔ́, pɔ́ la ne ńkẅii kẅi ngie pɔ́ ge gwaa gwɔ́ ndʉŋ ndʉŋ mvfò Ssé, é cʉa pɔ́ nà mefà’ mɔ́b. Pɔ́ gÿo pú’u, ńdeen ńké ńtúu kwò yɔ́b ná tóon gẅie mé kwɔɔnte mǒ ńgwe ssé.

³³ Aa tóon gẅie mé la ŋwe’e nò mǒ tsɛ̀ɛ ŋwà’ne Ssé ngie: Ssé gɔ̌ɔn ngie: Mèŋ n ně ńnuŋe tà’ tóon á tÿǒsoŋo Sioŋ, Á gwɔ́ gẅie mé ge kwɔɔnte mǒ. Á máamáa tóon gẅie à ge gÿo mé gwe. Tá’ nyìŋ gẅie à ge záb ntʉ́m wé ná yé, eshʉ́ té ge lá’ kúu yé wɔ́.