Roma 8 - Nouveau Testament en Ngienboum

Legwɔ́ gẅie à Zẅìge Ndʉalʉ̌a náa mbwo pʉ̀a

¹ Á lɔgɔ ńgwɔ́ ngie pʉ̀a pie é la nnɛ́ ná Yěsô kristo, é té ge lá’ gíŋe gwe ntsaŋ wɔ́,

² mélà’mie nyìŋ zɔɔn ńgwɔ́ tà ńda nnɛ́ ná Yěsô Kristo *lepʉ̌ sie é cʉ́’ʉ sá’a yé gwɔ́ pɔ́ se Zẅìge Ndʉalʉ̌a gie á gÿo mé gwɔ́ wó. Sɛ̌ *lepʉ̌ léen ńkẅé wɔ̀ɔn mbwo *lepʉ̌ sie ée se nò tepòŋ, ńgwɔ́ sie é gÿo mé kwé.

³ *Lepʉ̌ Mǒsê la tè ku’u légÿo yɛ̌ mmó wɔ́, á nue nyìŋ mesoŋ la lɔg pá’ à fege fege, ńtáte. Tá Ssé la ké ńgÿo yɛ̌ mmó, ńcʉ́’ʉ légÿo, ńtúmo kwà’ Míŋ we á sele ńcʉ́’ʉ nyìŋ mésoŋ, á nyìŋ mesoŋ gẅie aa ngàŋ mefʉa légwɔ́ gie à ge kẅile nyìŋ mesoŋ tsɛ̀ɛ nò tepòŋ. E Ssé la lɔg pú’u, ńzẅé metʉ̀ nò tepòŋ gie á sá’a pʉ̀a mesoŋ.

⁴ À la gÿo pú’u, légwɔ́ gie pege ge ku’u léńnéŋe ná ntí gie *lepʉ̌ ne ńzɛ́te. Mèŋ n gɔɔn wégè pie pege cʉ́’ʉ́ ńgiŋe ná ntí gie mbùm yege ne ńtsóte wégè wɔ́, pege cʉ’ʉ́ ńgiŋe pɔ́ nà ntí gie Zẅìge Ndʉalʉ̌a ne shwóŋó wégè.

⁵ Pʉ̀a pie pɔ́ zɔɔn ńnéŋe pɔ́ nà ntí gie mbùm yɔb ne shwóŋó wɔ́b, tÿɔ́g ntʉ́m wɔ́b pɔ́ nà mmó gie mbùm yɔb ne ńkwoŋo, tá pʉ̀a pie pɔ́ ńnéŋe nà ntí gie Zẅìge Ndʉalʉ̌a ne shwóŋó wɔ́b tÿɔ́g ntʉ́m wɔ́b pɔ́ nà mmó gie Zẅìge Ndʉalʉ̌a ne ńkwoŋo.

⁶ Nyìŋ lɔg pɔ́ ntí gie mbùm ye ne shwóŋó yé ńdɔg ńnéŋe, mbà ngàŋ aa ná mánzsè legwé. Tá nyìŋ gẅie à lɔg ntí gie Zẅìge Ndʉalʉ̌a ne shwóŋó yé ńdɔg ńnéŋe, mbà ngàŋ aa ná mánzsè le gwɔ́, à gǐŋ ńgwɔ́ mánzsè mbʉ́lè.

⁷ Petsɔ́ pʉ̀a ée ná mánzsè legwé á nue pʉ̀a pie pɔ́ ńnéŋe ńtÿɔ́g ntʉ́m wɔ́b pɔ́ nà mmó gie mbùm yɔb ne shwóŋó wɔ́b ée megàŋ mbù Ssé. Pɔ́ té kú’te *lepʉ̌ Ssé wɔ́, etsɔ́ shÿó lézɔɔn ńkú’te té wɔ́ mbwo pɔ́b wɔ́.

⁸ Ngwɔ́ epʉ̀a pie mbùm yɔb zɔ ne sá’a wɔ́b zɔɔn le ku’u légÿo mmó gie á pòŋ Ssé wɔ́.

⁹ Tá á ké ńgʉa ná pi, mbà pi tè ńnéŋe nà ntí gie mbùm gi ne shwóŋó gẅi wɔ́, pi neŋé pɔ́ nà ntí gie Zẅìge Ssé ne shwóŋó gẅí, á fʉ̀’ɔɔn gie Zẅìge Ssé áa nà pi. A Zẅìge Kristo lɔɔn tè ná nyìŋ wɔ́, mbà ngàŋ tè nyìŋ Kristo wɔ́.

¹⁰ Tá Kristo lɔɔn ńké ńgwɔ́ ná pi, mbà Zẅíge yé ge gÿo pi gwɔ́ wó. Á nue e Ssé kéen gÿo pi gwɔ́ pʉ̀a pie à cʉ̌’ ńdíe wɔ́b pɔ́ gwɔ́ pɔ́ ndʉŋ ndʉŋ mvfò yé. Pi ge lá’ gwɔ́ wó, tà mbɔɔ pá’ mbab nnɛ́ gi ge tsɛ̀ kwé kwé é tí menò tepòŋ.

¹¹ À lɔɔn ńgwɔ́ gie Zẅìge Ssé gẅie à la zíme Yěsô ná legwé áa ná pi, mbà yé nyìŋ gẅie à la zíme Kristo ná legwé, ge gÿo gÿo mbùm gi gie ee ńkwé e lɔgɔ Zẅìge yé gie áa ná pi ńgwɔ́ yé wó.

¹² Pú’u la, mbà mefɛ́ pɔ́ɔn, á gʉa nà Zẅìge Ssé, mbà njǔ ee twó pege, tà ńgwɔ́ pege é le ńnéŋe pɔ́ pá’ mbùm nnɛ́ yege ne shwóŋó wégè wɔ́.

¹³ Pi lɔɔn ńnéŋe nà ntí gie mbùm nnɛ́ gi ne shwóŋó gẅí, mbà pi ge kwéte, tá ńké ńgwɔ́ gie pi lɔɔn ńdɔg metʉ̀ Zẅìge Ssé ḿbyága mà tepòŋ gẅie à fóo ná mbùm nnɛ́, mbà pi ge gwɔ́ wó.

¹⁴ Á nue pʉ̀a pie Zẅìge Ssé ne ńtsyeen wɔ́b ée púɔ Ssé.

¹⁵ A Zẅìge gie mé la ńnéŋe ná pi, zɔɔn tè Zẅìge gie á ge gÿo pi gíŋe ńgwɔ́ pɔ́ menkwɔɔn pie pɔ́ ge ne cÿɔ’ɔ cÿɔ’ wɔ́. Á gwɔ́ pɔ́ Zẅìge gie á ge gÿo pi cʉ́’ púɔ Ssé. Pege piŋ ńzẅɛ́’ɛ yɛ̌ Zẅìge, ńtóŋo yé lê Abba; á gwɔ́ ngie Tɔ̌ɔnmé.

¹⁶ Kwà’ Zẅìge ŋwɛ́ yé máŋwɛ́ ne ńgÿo pege cwoŋo ńzsé tsɛ̀ɛ ntʉ́m wégè ngie pege ee púɔ Ssé.

¹⁷ Pá’ pege ee púɔ Ssé la, pege ge lá’ gẅiin yégè mmó nà fù’ gie e Ssé la ka’a mbwo pʉ̀a pé, ńdɔgɔ ńgẅiin yégè mmó nà shúm Ssé, pega Kristo lɔgɔ ḿbú ńgẅiin. Pá’ pege ne ńzẅíŋe légyá ngɔ́’ pá’ à la zẅíŋ yé la, pega pɔ̌ ge gÿo gíŋe púte gwɔ́ tsɛ̀ɛ legú’ we.

Legú’ gẅie mé ne ńzẅí’te

¹⁸ Mèŋ n zɔɔn ne ńkwaŋa ngie, ngɔ́’ gie pege ee fʉ̀’ɔɔn ne ńgyá e pú tè ku’u tsɔ́ mmó nà legú’ gẅie Ssé ge gÿo gÿo pege gyá wɔ́.

¹⁹ Akɔ́ɔkɔ́ɔ gie Ssé la nyɛte zɔɔn ḿbú ne ńzẅí’te tɛ’ légyá fʉ̀’ gie e Ssé ge gÿo mé gyá legú’ púɔ pé.

²⁰ Kɔ̀ɔkɔ́ɔ gie e Ssé la nyɛte léen ńgwe ná mbwo metʉ̀ mie é lɔgɔ wɔ́b ńgÿo shúm té ndyèen, pú’u ńké tè kwoŋ kwoŋ tá ńgwɔ́ shúm té ndyèen wɔ́, e Ssé zɔ zẅǐŋ pɔ́ cʉ́’ pú’u, á nue à la kwoŋ ngie pɔ́ ńnéŋe ne ńzẅí’te mmó.

²¹ Á gwɔ́ ngie tsɔ́ lyɛ̌’ ge lá’ ku’, à fó ndá nkwɔɔn ńkẅile kɔ̀ɔkɔ́ɔ gie à la nyɛte, tsɔ́ mmó le gíŋe ńdʉ́ʉ mǒ wɔ́, akɔ́ɔkɔ́ wɔ́ pú ńgwɔ́ jʉ’ gie púɔ Ssé ée wó tsɛ̀ɛ legú’, atsɔ́ mmó té jʉ’ó kwé, atsɔ́ ké tè lʉ́.

²² Pege zɔɔn ne ńzsé ngie akɔ́ɔkɔ́ɔ gie e Ssé la nyɛte, tà ńkú fʉ̀’ɔɔn á ne ńtsẅii, ńgyá ngɔ́’ pá’ manzwě gẅie à gee ne ńzyé.

²³ Eshúm ŋwɛ́ zɔ̌ té ńtsẅii gílé pɔ́b wɔ́. Pege yégè pie Ssé la lɔgɔ Zẅìge yé ńgÿo pege gẅiin ntwó mmó nà shúm sie à la ka’a léná né pege, pege yégè giŋé ńgwɔ́ tsɛ̀ɛ ntʉ́m pege ńtsẅii pɔ́ pú’u, ńne ńzẅí’te lyɛ̌’ gie Ssé ge lɔgɔ wégè gÿo púɔ pé ndà’ ndà’, pege gẅiin mbùm yé sẅé, ńtsẅɛ́ ngɔ́’.

²⁴ Pege ee fʉ̀’ɔɔn, mbà pege ka tsẅɛ́, tá pege nyě tè gyǎ shúm ntsèm lê nÿɔ́g. Pege zɔɔn ńdɔg nÿɔ́g ńgyá shúm sie pege ka ne ńzẅí’te, pege é le gíŋe ńzẅí’te wɔ́, á nue é ně ńdá’ ńgwɔ́ mbwo pege. Ngwɔ́ wɔ̌ zɔɔn ńnéŋe ne ńzẅí’te mmó gie à ne ńgyá?

²⁵ Tá’ pá’ pege ne ńzẅí’te mmó gie pege tè ne ńgyá wɔ́ la, pege lɔgɔ kwɔgɔ nnɛ́ ńnyɛte ńzẅí’te.

²⁶ Lézẅí’te ŋwɛ́ giŋé ńgwɔ́ pɔ́ ndʉŋ ndʉŋ pá’ Zẅìge Ssé tó ńkẅéte wégè pie pege kʉ́a kʉ̌a. Pege tè zsé lésẅíŋte Ssé nà ntí gie á ne ńzɛ́te wɔ́, à Zẅìge Ssé sẅíŋte Ssé nà twó ségè, à we létsẅi pá’ nyìŋ tsẅii la tɔ́gɔ mmó gie ńgwɔ́ pege gɔɔn mbwo Ssé.

²⁷ E Ssé zsé mmó gie áa tsɛ̀ɛ ntʉ́m pʉ̀a mesoŋ, à zsé mmó gie Zẅìge yé ne ńgɔɔn, a Zẅìge Ssé zɔɔn sẅíŋte Ssé nà twó pʉ̀a Ssé pɔ́ nà ntí gie Ssé ne ńkwoŋo.

²⁸ Pege giŋé ne ńzsé ngie menò mie é gÿo pʉ̀a pie pɔ́ ne ńkwoŋo Ssé, e Ssé gÿo mɛ̌ menò gÿo pɔ́ nò mbòŋo ná pɔ́b, á wɔ́b gẅie à la tsɔ́’ɔ nà ntí gie à la tʉ́ njÿó ńkwaŋ.

²⁹ Á nue pʉ̀a pie e Ssé la tʉ́ njÿó ńtsɔ́’ɔ wɔ́b, à la gíŋe ntʉ́ njÿó ńzáb ngie mémmó ge lá’ ne kúbe ná pɔ́b kubé, tà pɔ́ sẅé Míŋ we. À cʉa pú’u, Míŋ we gwɔ́ mûɔ ndÿò á nùɔ mefɛ́ pé pie é gyɔ́ɔn.

³⁰ Pʉ̀a pie e Ssé la tʉ́ njÿó ńtsɔ́’ɔ wɔ́b, á lêen ńgíŋe ńtóŋ pɔ́ wɔ́b, ńtóŋo wɔ́b ńgíŋe ńcʉ́’ʉ ńdíe wɔ́b pɔ́ gwɔ́ pɔ́ ndʉŋ ndʉŋ mvfò yé, á té ku’ pɔ́ ndà’ pú’u wɔ́, à la gíŋe ńnáa legú’ mbwo pɔ́b.

Nkwòŋe Ssé fǎŋ tɛ’

³¹ Ngwɔ́ pege gíŋe ńkẅi’i kɔ́ nà nò gie pege gɔɔn lɔɔn? Pá’ e Ssé ee nà yégè gwǒŋ la, aa ńgwɔ́ wɔ̌ ku’u ná pege?

³² Yé gẅie à la tè pɔ́ɔn kwà’ Míŋ we légyá ngɔ́’ wɔ́, yé gẅie à la gÿo mé zẅé yé ńtí wégè métsèm, á ge gǎ tá á le gíŋe ńcÿó pɔ́ gem yégè ńdɔg pɔ́ yé ńná setsɔ́ shúm ntsèm né pege wɔ́?

³³ Awɔ́ lɔɔn ńgwɔ́ á sẅiŋ pʉ̀a pie Ssé la tsɔ́’ɔ wɔ́b? Angàŋ tè wó wɔ́, á nue Ssé zɔ ka lɔgɔ wɔ́b ńgÿo pʉ̀a pie à cʉ̌’ ńdíe wɔ́b pɔ́ gwɔ́ pɔ́ ndʉŋ ndʉŋ mvfò yé,

³⁴ ńgwɔ́ wɔ́ ku’u légɔɔn ngie ntsaŋ jÿǒ wɔ́b? Angàŋ tè wó wɔ́, á nue Yěsô Kristo la kwé nà twó sɔ́b á té zso pú’u wɔ́ á gÿo ńzím. À ńnéŋe nà gwoŋó pwó Ssé ye tʉ̀, ńne sẅíŋte yé nà twó ségè.

³⁵ Tá tsɔ́ mmó áa wó gie ngwɔ́ á fege wega Kristo tà á le gíŋe ńkwoŋo wégè wɔ́? Ngɔ́’ lá? Lepǔ’ mbùm lá? Mé lékʉ́e wégè lá? Nzyè lá? Apóŋ lá? E shúm sie é vege wégè lá? Ka legwé?

³⁶ Á lɔgɔ ńgwɔ́ mmó gie mé la ŋwe’e tsɛ̀ɛ ŋwà’ne Ssé ngie: «Áa lyɛ̌’ ntsèm legwé ne ńnÿɔgɔ weg nÿɔg ńtí gú. Mé ne ńdíe wég pá’ *menjʉ̀njÿò mie mé gee ngwǎ la».

³⁷ Tá’ á ké ńgʉa ná shúm sɛ̌ ntsèm, pege gwɔ́ pà tántʉ̀, pà cʉa sɛ̌ shúm ńzẅɛ́’ɛ nyìŋ gẅie à la kwoŋo wégè.

³⁸ Mèŋ n zɔɔn ne ńcwoŋo ńzsé ngie, atsɔ́ mmó gie à lɔɔn ńgwɔ́ á fege wega Ssé á té wó wɔ́, tá pá’ à lɔɔn ńgwɔ́ pɔ́ legwé, ńgwɔ́ pɔ́ ngɔ́’ gie e tswé’e nà le gwɔ́, éfó ńgwɔ́ pɔ́ *mecÿɔ́’ Ssé, ńgwɔ́ pɔ́ shúm sie é sá’a njÿó, ńgwɔ́ pɔ́ yɔɔn fʉ̀’ʉ njÿó ka pɔ́ gie á ge gÿo tá tó wɔ́,

³⁹ ńgwɔ́ pɔ́ metʉ̀ ntí ntí mie ée tsɛ̀ɛ njÿó, é mie ée tÿǒ, kà mie ée tsɛ̀ɛ ssé wɔ́, ńgwɔ́ pɔ́ tsɔ́ mmó ndyɛ̀’ɛ gie Ssé la pwóon, mbà tsɔ́ mmó té ńdá’a ńku’u létáte Ssé lékwoŋo wégè wɔ́. À la cʉa ná Yěsô Kristo, a Cʉ̀apʉ̀a wege, ńnyɛ ngie à kwoŋo wégè.