Roma 7 - Nouveau Testament en Ngienboum

Efʉ̀’ gie e fóo ná nò lɔ́ɔn ndá

¹ Mefɛ́ pɔ́ɔn, pi pie pi ne ńzsé mmó gie *lepʉ̌ ée yɛ̌, pi tè ne ḿmoŋe ngie *lepʉ̌ gẅiin nò ná nyìŋ pɔ́ fʉ̀’ gie angàŋ nyé ntentʉ́ wɔ́.

² Pege pí fʉ̀’ ná manzwě nzɔ̌’. Andǔm we nyé ntentʉ́, à tè gẅiin lényé yé ńgʉa ńtsɛ́ɛ tsɔ̌ mámbàŋa pɔ́ yé zɔ́’ wɔ́, *lepʉ̌ lʉ’ pú’u. Tá andǔm we vɔg tà ńkwé, *lepʉ̌ zẅíŋ ngie aa ńgwɔ́ á gʉa ńtsɛ́ɛ tsɔ́ mámbàŋa pɔ́ yé zɔ́’.

³ Pú’u la ńgwɔ́ gie andǔm we lɔɔn ńnyé té kwé, á zɔ́’ɔ tsɔ̌ mámbàŋa, mbà mé ge tóŋo yé le ngàŋa gÿɛ́ manzwě. Tá ńké ńgwɔ́ gie andǔm we lɔɔn ńkwé, *lepʉ̌ le gíŋe ńtɔ’ɔ yé lézɔ́’ɔ tsɔ̌ mámbàŋa wɔ́. Á cʉ́’ ńgwɔ́ pɔ́ nzwě tsɔ́ nyìŋ fʉ̀’ó, á le gwɔ́ ngie à gÿo gÿɛ́ wɔ́.

⁴ Á gíŋe ńgwɔ́ pɔ́ ndʉŋ ndʉŋ pú’u, ná pi, mbà mefɛ́ pɔ́ɔn. Pi ee fʉ̀’ɔɔn ńgwɔ́ nà nò *lepʉ̌ ńgwɔ́ pɔ́ mepfó tá ńdɔgɔ nku’u pʉa Ssé, á nue pia Kristo la púte ńkwé fʉ̀’ gie à la kwé, pia *lepʉ̌ lɔg pú’u, fege légwɔ́ gie pi ge cʉ́’ gwɔ́ pɔ́ pʉ̀a tsɔ̌ nyìŋ ndyɛ̀’ɛ, é pʉ̀a Yěsô Kristo gẅie e Ssé la gÿo á zíme ná legwé. Légwɔ́ gie pege ge fa’ mefà’ mie ée me mbòŋo mbwo Ssé.

⁵ Á ka zɔɔn ńgwɔ́ fʉ̀’ gie mbùm yege zɔ ka nyě sá’a wégè, letsɔ̌ɔn légÿo nò gie á te poŋ pʉ́’te mbùm yege, a nue *lepʉ̌ tɔ́’, ńgíŋe ńkẅi’i ḿbʉ́’te wégè, pege fa’ pɔ́ mefà’ mie é ge tóŋ pɔ́ legwé é ńnéŋe ná pege.

⁶ Tá á ké ńgwɔ́ fʉ̀’ɔɔn pege cʉ́’ʉ ńgiŋe ná mánzsè *lepʉ̌ tà ńtsɔ́ɔn légwɔ́ ndʉŋ ndʉŋ wɔ́, á nue pege ee ná wɛ̌ mánzsè gẅie à kɔ̌ɔn ńdɔgɔ wégè ńgÿo megàŋa tsǎŋ, ńcʉ́’ pɔ́ mepfó. Tà peg ee fʉ̀’ɔɔn ńcʉ́’ʉ fa’a mbwo Ssé pɔ́ nà ntí ye sẅé, ńdɔgɔ metʉ̀ Zẅìge Ndʉalʉ̌a éfa’a, tà peg tè gíŋe fa’a ná ntí ye fʉ̀’e mvfò, á fʉ̀’ gie peg kɔ̌ɔn ńjú’u pɔ́ ncwò *lepʉ̌ sie mé la ŋwe’e wɔ́.

Anò lepʉ̌ pɔ́ nò tepòŋ

⁷ Mé lɔgɔ pá’ɔɔn ńgɔɔn ngie *lepʉ̌ Ssé ée mmó tepòŋ keen? Ngǎŋ á té pú’u wɔ́, a nue n ka kě fó pɔ́ nà *lepʉ̌ ŋwɛ́ tá ńzsé nò tepòŋ, é laa pé’è é té gɔɔn ngie: «Tè gẅiin kègɔ́’» wɔ́, mbà mèŋ n tè kègɔ́’ zsé.

⁸ Anò tepòŋ gie áa nà mèŋ la zẅɛ́’ pɔ́ *lepʉ̌ ŋwɛ́, ḿbʉ́’te wɔ̀ɔn, légÿo shúm tepòŋ sie ntʉ́m wɔ̀ɔn tsɔ́ɔn tà é gyɔ́ɔn gyɔ́ɔn, *lepʉ̌ la zɔɔn ńgwé’e é té wó wɔ́, mbà nò tepòŋ té gẅiin tʉ̀ wɔ́.

⁹ Á laa fʉ̀’ gie n da nyé tè zsé *lepʉ̌ Ssé, ńjú’ ńgwɔ́ pɔ́ ntentʉ́, n da piŋ ńgwɔ́ tà ńzsé, létsɔ́ɔn légÿo nò tepòŋ kúu ná mèŋ,

¹⁰ mèŋ n kwé. Á gwɔ́ pú’u, mbà *lepʉ̌ sie é kɔ’ɔ́ gÿo nyìŋ gwɔ́ wó, mbà é cʉ̌’ ńtóo ná mèŋ ńtsege wɔɔn ńnéŋ pɔ́ nà legwé.

¹¹ N da jú’ sɛ̌ *lepʉ̌, nò tepòŋ gie áa ná mèŋ gyá shÿó ńdɔg *lepʉ̌ ŋwɛ́ ńdʉte wɔ̀ɔn, mèŋ n gÿo nò tepòŋ, anò tepòŋ cʉa mǒ ńzẅé wɔ̀ɔn.

¹² *Lepʉ̌ lɔgɔ pú’u, éfóo mbwo Ssé, anò gie é tsẅi ngie mé gÿo gíŋe fó yé pɔ́ mbwo Ssé, ńgwɔ́ nò gie áa ndʉŋ ndʉŋ, ńgwɔ́ gie áa ḿboŋ.

¹³ Tà áa pú’u pá’ɔɔn ńdɔgɔ ńgɔɔn ngie ammó gie áa mbòŋ kéen ńtóo ná mèŋ ńcʉ́’ pɔ́ legwé keen? Ngǎŋ á té pú’u wɔ́. Anò tepòŋ zɔ̌ la gÿo n kwé, anò tepòŋ la kwa’ ńnyɛ ngie á té poŋ. Á la zẅɛ́’ɛ mmó gie áa mbòŋ ńdɔg ńgÿo mèŋ n kwé, ńdɔg pú’u, ńcʉa nà mmó gie e Ssé la tsẅi ngie mé gÿo, ńkẅɛɛ kwà’ máamáa nò tepòŋ.

Nò tepòŋ léen ńjÿó nyìŋ mesoŋ

¹⁴ Pege zɔɔn ne ńzsé ngie *lepʉ̌ fó mbwo Ssé. Tá á ké ńgʉa ná mèŋ, nyìŋ mesoŋ, mèŋ fege fege, mbà mé la sẅiŋe wɔ̀ɔn n cʉ́’ nkwɔɔn nò tepòŋ.

¹⁵ N zɔɔn kwa’ tè ne ńzsé mmó gie mèŋ n gÿo wɔ́. Ammó gie mèŋ n ne ńkwoŋo, mèŋ n tè yɛ̌ gÿo, n gÿo pɔ́ mmó gie mèŋ n tè kwòŋ.

¹⁶ Á lɔɔn ńgwɔ́ gie mèŋ n tè kwoŋo mmó gie mèŋ n gÿo wɔ́, mbà mèŋ n dɔgɔ pú’u, ńzẅíŋe ngie *lepʉ̌ ée mbòŋ.

¹⁷ Pú’u la, mèŋ n zɔ tě ńdɔgɔ ńgÿo mɛ̌ menò wɔ́, nò tepòŋ gie á léen ńjÿó wɔ̀ɔn zɔ̌ gÿo.

¹⁸ Mèŋ n ne ńzsé ngie nò mbòŋo léen tè wɔ̀ɔn jÿó, n gɔɔn wɔ̀ɔn nyìŋ mesoŋ gẅie mèŋ fege fege. N tsɔ́ɔn légÿo nò mbòŋo fʉ̀’ ntsèm tá ńké tè ku’u légÿo wɔ́.

¹⁹ Mèŋ n tè gÿo nò mbòŋo gie mèŋ n tsɔ̌ɔn légÿo wɔ́, mèŋ n gÿo pɔ́ nò tepòŋ gie mèŋ n tè tsɔ́ɔn.

²⁰ Á lɔɔn ńgwɔ́ gie mèŋ n gÿo mmó gie mèŋ n tè tsɔ́ɔn légÿo wɔ́, mbà mèŋ n zɔ tě ńgÿo wɔ́, à nò tepòŋ gie á léen ńjÿó wɔ̀ɔn zɔ̌ gÿo.

²¹ N dɔgɔ pú’u, ńgyá ngie áa ngwòŋ fʉ̀’ ntsèm, n ngie kɔ tà mèŋ n gÿo nò mbòŋo, esɔ́ɔn *lepʉ̌ gwɔ́ ngie mèŋ n gÿo pɔ́ nò tepòŋ.

²² Mèŋ n ge kwà’ tsɛ̀ɛ ntʉ́m mèŋ, *lepʉ̌ Ssé poŋo wɔ̀ɔn tɛ’.

²³ Tá á gʉa tsɛ̀ɛ mbùm mèŋ, n gyá tsɔ́ *lepʉ̌ gwɔ́ wó, ésie é ńnéŋe ńdɔg ncù, ḿma’ *lepʉ̌ sie legyè sɔ́ɔn kwa’ ńzẅíŋ, ńgÿó mèŋ n cʉ́’ʉ ngàŋa tsǎŋ *lepʉ̌ nò tepòŋ gie á léen ńjÿó wɔ̀ɔn.

²⁴ N tè pá’ɔɔn ńgwɔ́ pɔ́ shÿó tepòŋ wɔ́, àwɔ́ ge lá’ fó tsɛ̀ɛ yɔɔn mbùm nnɛ́ gie e tóŋo legwé ńnéŋe ná mèŋ é kẅile wɔ̀ɔn?

²⁵ E Ssé zɔ ge tóo tsoló kẅile wɔ̀ɔn. Á cʉa ná Cʉ̀apʉ̀a wege Yěsô Kristo, agù’te gwɔ́ mbwo yé. Áa pú’u, legyè sɔ́ɔn ne shwóŋó wɔ̀ɔn ngie n kú’te *lepʉ̌ Ssé, tá mbab nnɛ́ nyìŋ mesoŋ gie mèŋ n gẅiin ne ńtsóte wɔ̀ɔn n kú’te pɔ́ *lepʉ̌ nò tepòŋ.