Roma 6 - Nouveau Testament en Ngienboum

Lécʉ́’ʉ mpfò nà nò tepòŋ, ḿbiŋ ńdɔgɔ Kristo ńgwɔ́ ntentʉ́

¹ Tà à pá’ɔɔn pege gÿo lêkɔ́? Pege ké ńkẅí’i ńgÿo pɔ́ nò tepòŋ légwɔ́ gie e Ssé ge lɔgɔ lélege mefʉa wege, mé kwa’ ńgyá pá’ à ne ńcÿó gem pʉ̀a keen?

² Ngǎŋ! Ńgwɔ́ pege é le pú’u, gÿo. Pá’ á zɔɔn ńgwɔ́ nà légÿo nò tepòŋ, mbà pege léen ńkwé lá, ńgwɔ́ pege gǎ tá ńgíŋe ne ńgÿo pɔ́ nò tepòŋ?

³ Pi legé ngie á gʉa ná pege metsèm pie mé la nu’u wégè ntse, pege lɔgɔ ńdaa nnɛ́ ná Yěsô Kristo, lénu’u wégè ntse ŋwɛ́ lɔgɔ ńda’te ngie pega pɔ̌ la púte ńkwé tà’ legwé ka?

⁴ Pá’ á la fó nà kẅé ntse, pega pɔ̌ púte ńkwé, mé gíŋe ḿbúte wega pɔ̌ ńtúŋ, légwɔ́ gie pá’ e Ssé Tá la lɔg metʉ̀ mie é gẅiin legú’, ńgÿo Kristo zíme ná legwé la, pege yégè ge cʉ́’ gwɔ́ pɔ́ tsɛ̀ɛ le gwɔ́ we sẅé.

⁵ Á zɔɔn pá’a, mbà pege la kwé legwé gẅie à sẅé we, ńdɔg pú’u, pega pɔ̌ pumo ná tà’a nò á gíŋe ńgwɔ́ pɔ́ pá’ pega pɔ̌ ge gÿo gíŋe pumo ná lézíme nà legwé.

⁶ Tà pege lege ngie: Mé la púte Kristo laa nzẅìŋe nyìŋ gẅie à laa ná pege ńkíme nà tÿǒ nkǐ, légwɔ́ gie metʉ̀ mmó gie á laa ná pege, ńtsóte wégè pege gÿo nò tepòŋ, é ge mag pege é le gíŋe ńgwɔ́ menkwɔɔn nò tepòŋ wɔ́.

⁷ Nyìŋ zɔɔn ńgwɔ́ tà ńkwé, à tè gíŋe ńku’u légÿo tsɔ́ mmó wɔ́, nkÿo nò tepòŋ fó ná yé ńkyɛ́’ɛ.

⁸ Pá’ pega Kristo la púte ńkwé la, á lɔgɔ ńgwɔ́ ngie pega pɔ̌ ge gÿo é púte gwɔ́ wó.

⁹ Peg cwoŋo ne ńzsé ngie Kristo la vɔg tà ńzíme nà legwé, à tè lá’ gíŋe kwé wɔ́. Legwé tè gíŋe ńgẅiin tsɔ́ nò ná yé wɔ́.

¹⁰ Kristo la kwé, ńkwé pɔ́ tà’ légʉa, á nà menò tepòŋ pʉ̀a. Àa fʉ̀’ɔɔn ńgwɔ́ wó pɔ́ léná mekù’ Ssé.

¹¹ Mbɔɔ pi gí, pi líe twó mbùm gí pá’ pʉ̀a pie pɔ́ ée nà nò tepòŋ, ńcʉ́’ pɔ́ mepfó. Pi cʉ́’ ńgwɔ́ pɔ́ pʉ̀a pie é lɔg pá’ pɔ́ la nnɛ́ ná Kristo, ńcʉ́’ ńgẅiin pɔ́ ntí ye sẅé pá’ pɔ́ ge fa’a fà’ Ssé.

¹² Pú’u la, á té ne ńzɛ́te ngie anò tepòŋ gíŋe sá’ mbùm nnɛ́ gi gie e ge gÿo kwé wɔ́, pi pɔ́ɔn légíŋe ńnyé mbùm gi é tsóte gẅi ńnéŋe tsɛ̀ɛ kegɔ́’.

¹³ Tà pi gíŋe ńdɔg mekèm mbùm mí ńgÿo nò tepòŋ pá’ mé lɔgɔ shúm ncù ńgÿo menò tepòŋ. Tà ńcʉ́’ pú’u, pi pú ńnyé mbùm gi mbwo Ssé ńgwɔ́ kwà’ pʉ̀a pie é ka kwě ḿbiŋ ńzím. Pi lɔg mekèm mbùm mí ńgÿo shúm sie pi ge lɔg gÿo mmó gie áa ndʉŋ ndʉŋ.

¹⁴ Anò tepòŋ zɔɔn tě ńdá’a ńgíŋe ńgẅiin gẅi wɔ́, á nue pi cʉ’ʉ́ ńgiŋe ná mánzsè *lepʉ̌ wɔ́, pi cʉ’ʉ́ ńgiŋe pɔ́ ná mánzsè gẅie e Ssé ne ńcʉa mǒ ńcÿó gem gí, pi ne gÿo mmó gie áa ndʉŋ ndʉŋ.

Lécʉ̌’ nkwɔɔn ná légÿo mmó gie á pòŋ Ssé

¹⁵ Pú’u, ńdɔgɔ ńgɔɔn ngie kɔ́? Mé lɔgɔ ńgɔɔn ngie pege gÿo menò tepòŋ, á nue pege cʉ’ʉ́ ńgiŋe ná mánzsè *lepʉ̌ wɔ́, ńcʉ́’ʉ ńgiŋe pɔ́ ná gẅie e Ssé cʉa mǒ ńcÿó gem yégè, ńdɔgɔ wégè ńgÿo pʉ̀a pé keen? Ngǎŋ ńgwɔ́ pege le pú’u gÿo.

¹⁶ Tà pi ké ńdege ngie nyìŋ lɔɔn ńzẅíŋ nkwɔɔn nyìŋ pá’ à ge ne jú’u ncwò ngàŋ, mbà à cʉ̌’ nkwɔɔn ngàŋ. Á lɔgɔ ńgwɔ́ ngie pi lɔɔn ne ńjú’u ncwò nò tepòŋ, mbà pi cʉ̌’ nkwɔɔn nò tepòŋ, á gÿo pi kwé, ńké ńgwɔ́ gie pi lɔɔn ne ńjú’u ncwò Ssé, mbà pi ge cʉ́’ nkwɔɔn Ssé, à gÿo pi gÿo mmó gie áa ndʉŋ ndʉŋ mvfò yé.

¹⁷ Pege ké sie Ssé, mélà’mie pi laa tsɔ́ fʉ̀’ ńgwɔ́ nkwɔɔn nò tepòŋ, pi ee fʉ̀’ɔɔn, mbà pi kéen ńdɔg ntʉ́m gẅi ntsèm, ńzẅíŋe mmó gie mé ka zí’i gẅí. Á gwɔ́ gie á ne ńzɛ́te ngie pi vɔg ńzsé,

¹⁸ á nue e Ssé kéen ńkyɛ́’ nkÿo nò tepòŋ ná pi, pi ee fʉ̀’ɔɔn ńcʉ́’ nkwɔɔn nò gie áa ndʉŋ ndʉŋ.

¹⁹ Meŋ n dɔɔn ńgwɔ́ gie m bǐ fʉ̀’ ná menò mie é ne ńcʉate tsetsɛ̀ɛ pʉ̀a mesoŋ, mbà mèŋ n dɔgɔ fa’a légÿo pi cwoŋo ńjú’, á nue nyìŋ mesoŋ pÿɛ́ pÿɛ̌. Pi la lɔg mekèm mbùm mí ńgÿo nkwɔɔn menò ncÿǒ laa ye menò lɔg ńtág jʉ’. Mɛ̌ menò gwɔ́ mie é gÿo mé tʉʉ twó mbwo Ssé tʉ. Ndʉŋ ndʉŋ pú’u, pi gwɔ́ fʉ̀’ɔɔn ńcʉ́’ ńdɔg mekèm mbùm mí ŋwɛ́ ńgÿo pɔ́ nkwɔɔn gie é fa’a mbwo mmó gie áa ndʉŋ ndʉŋ mvfò Ssé, à lêen ńké fó pú’u, léńnéŋe gẅi gwɔ́ we Ssé.

²⁰ Á laa fʉ̀’ gie pi la nyé nkwɔɔn nò tepòŋ, légÿo mmó gie áa ndʉŋ ndʉŋ mvfò Ssé á té tsɔ́ nò ná pi gẅiin.

²¹ Pi la jÿó kɔ́ pì ná yɛ̌ ntí mefà’? Pi ee fʉ̀’ɔɔn ńcʉ́’ ńkwaŋ mɛ̌ mefà’ éshʉ́ kúu gẅi mǒ kú, mélà’mie é gwaa mag ńná pɔ́ legwé.

²² Tá’ pá’ á ké ḿbiŋ ńgwɔ́ fʉ̀’ɔɔn, mbà Ssé kéen ńkyɛ́’ nkÿo nò tepòŋ ná pi, pi cʉ́’ nkwɔɔn ye la, apì gie á ne ńkẅɛɛ áa pá’ Ssé ne ńkẅéte gẅi pi ne ńgẅiin tsẅé pʉ̀a pé, á ge gÿo cʉ́’ʉ lécʉ́me pi gẅiin le gwɔ́ tèmì,

²³ a nue mmó gie nò tepòŋ lɔ́g ḿbéen fà’a nyìŋ, á gwɔ́ pɔ́ ngàŋ lekwé, tá afù’ gie e Ssé náa mbwo nyìŋ pɔ́ sẅɛɛ sẅɛɛ, á gwɔ́ pá’ ngàŋ zẅɛ̌’ pá’ á la nnɛ́ ná Cʉ̀apʉ̀a wege Yěsô Kristo, ńgẅiin le gwɔ́ tèmì.