Roma 5 - Nouveau Testament en Ngienboum

Pega Ssé ńnéŋe mboŋó

¹ Pá’ à la cʉa nà lezǎb ntʉ́m nà Yěsô Kristo, e Ssé cʉ́’ ńdíe wégè pege gwɔ́ pɔ́ ndʉŋ ndʉŋ mvfò yé la, pega Ssé ee fʉ̀’ɔɔn ńnéŋe mboŋó, ńzẅɛ́’ɛ Cʉ̀apʉ̀a wege Yěsô Kristo.

² Yé Yěsô zɔ la tsɔ́’ɔ mánzsè tá Ssé cÿó gem yégè pá’ɔɔn, ta à cʉ̌’ ńgwaa ńgwɔ́ pɔ́ né pégè pú’u éfó nà pá’ pege zǎb ntʉ́m ná yé Yěsô. Pege ee pá’ɔɔn lékag gwɔ́ ntʉ́m pege tɛ’, á nue pege neŋé ne ńzẅí’te pá’ Ssé ge gÿo gab shúm sie ée nà legú’ we, é ná ségè.

³ Á té gwɔ́ pɔ́ ndà’ pú’u wɔ́, peg giŋé ńgẅiin lékag tà mbɔɔ fʉ̀’ gie peg ne ńgyá ngɔ́’, ńně ńzsé ngie e ngɔ́’ ge gÿo peg shÿɔg.

⁴ Léshÿɔg ge gÿo pege cÿɔgte. À cʉa pú’u, pege ńnéŋe ne ńzẅí’te ngie ammó gie shwóŋè Ssé ne ńgɔɔn, yé Ssé ge gÿo à pumte nà pege.

⁵ Pege kě těen ńzẅí’te pú’u, pɔ́ jʉ’e sẅɛ̀ɛ wɔ́, á nue Ssé kéen fó nà Zẅìge yé gie à ka nǎ né pege, ńnyɛɛ wege pá’ɔɔn tɛ’ ngie à kwoŋo wégè.

⁶ Á gwɔ́ pá’ á kaa fʉ̀’ gie pege ka zɔɔn ńnyé pɔ́ pàtè metʉ̀, Kristo tóo nà fʉ̀’ gie e Ssé lá záb, ńkwé nà twó pʉ̀a tepòŋ.

⁷ Á zɔɔn ńtʉ tɛ’ tá nyìŋ mésoŋ zẅíŋe lékwé nà twó wetsɔ̌, tà mbɔɔ pá’ wɛ̌ nyìŋ lɔɔn ńgwɔ́ pɔ́ nyìŋ gẅie à kú’te *lepʉ̌. Ndyɛ̀’ ńgwɔ́ nyìŋ zẅíŋe lékwé ńtí nyìŋ gẅie à gÿo menò mbòŋo.

⁸ Tá’ pi lêen ńké ńgyá ntí gie Ssé la lɔg ńnyɛ pá’ á kwoŋo wege pú’u, aa pá’ Kristo la tó ńkwé nà twó ségè tà pege zɔɔn ńnyé ńgwɔ́ pɔ́ pʉ̀a tepòŋ.

⁹ Áa nà fʉ̀’ɔɔn, mbà metse mé kéen ńgÿo e Ssé cʉ́’ʉ ńdíe wégè pege gwɔ́ ndʉŋ ndʉŋ mvfò yé, ńgwɔ́ kɔ́ piŋ ńgÿo tà Kristo lá’ ńnyé té gÿo pege tsẅɛ ngɔ́’ gie e ge lá’ fó nà pá’ e Ssé ne ńgyáŋa lóŋ?

¹⁰ Pega Ssé ka zɔɔn ńgwɔ́ pɔ́ megàŋ mbù, tá Ssé lɔg pá’ Míŋ we kwé, ḿmag mbù wegá pɔ̌. Á ge piŋ gwɔ́ nà fʉ̀’ɔɔn, à gaa wɔ́ ńdɔg pá’ Míŋ we gwɔ́ pɔ́ wó, ńgÿo pege tsẅɛ́ ngɔ́’ tsẅɛ́!

¹¹ Pege těen ńdɔgɔ pɔ́ ndà’ yɛ̌ nò ńka’te wɔ́, pege giŋé ńka’te ńtí pá’ Ssé kéen ńcʉa nà nò Cʉ̀apʉ̀a wege Yěsô Kristo ńgÿo mbù gẅie é kaa tsetsɛ̀ɛ pega Ssé mag.

Anò Adam pɔ́ yé Kristo

¹² Anò tepòŋ la gwaa kúu tsɛ̀ɛ njÿó, ńcʉa pɔ́ nà tà’ nyìŋ mésoŋ wémɔ’ɔ́, gẅie à la fʉa nò, lezíŋ sé gwɔ́ lê Adam. Á nò tepòŋ la lɔgɔ legwé ńtó. Legwé lêen ńké ńkúu nà ngẅɛ̀ nyìŋ mésoŋ ntsèm, á nue pʉ̀a metsèm laa pú’u, ńdɔgɔ fʉa nò.

¹³ E Ssé la zɔɔn ńgwaa ńná *lepʉ̌ né Mǒsê, mbà nò tepòŋ léen ndà’ ńkúu tsɛ̀ɛ njÿó. Á laa fʉ̀’ gie *lepʉ̌ la nyé tè gwɔ̌ wó, e Ssé tè sáŋa nò tepòŋ pʉ̀a mesoŋ wɔ́.

¹⁴ Tà mbɔɔ pú’u, éfó nà fʉ̀’e Adam ńgʉa ńkúu nà fʉ̀’e Mǒsê, legwé gẅiin pʉ̀a mesoŋ gẅiin mbɔɔ pie pɔ́ la tè gÿo nò tepòŋ pá’ Adam gẅie à la fʉa *lepʉ̌ sie e Ssé la ná né yé wɔ́. À nò Adam sẅé yé nyìŋ gẅie à lɔ̌ɔn ge lá’ tá tó.

¹⁵ Tá’ à lɔɔn ńgwɔ́ mé le lɔgɔ mmó gie á fó nà mefʉa Adam ḿbí fʉ̀’ nà nzẅìŋ fù’ gie e Ssé ne ńgába mbwo pʉ̀a pɔ́ sẅɛ̀ɛ sẅɛ̀ɛ wɔ́, mefʉa tà’ nyìŋ wémɔ’ɔ́ la gÿo legwé kúu nà mânyìŋ ntsèm tá’, ntí gie e Ssé la tsɔ́ɔn pʉ̀a ńcÿó gem yɔ́b pú’u, piŋ ḿbú fáŋ ńcʉa wɛ̌ légwɔ́ tɛ’. À fù’ gie á la fó nà tà’ nyìŋ gẅie aa Yěsô Kristo, e Ssé lɔg ńcÿó gem pʉ̀a tà ńgyɔ́ɔn á pú ńgẅiin nzẅìŋ tɛ’.

¹⁶ Ammó gie e Ssé náa, la fa’a fà’ mboŋó. À yé fà’ á té pá’ ye nò tepòŋ wɔ́. Nò tepòŋ gie wɔɔn tà’ nyìŋ wémɔ’ɔ́ la fʉa, la gÿo pʉ̀a metsèm gwé ntsaŋ. Tá’ e Ssé gwɔ́ tà ńcÿo gem pʉ̀a, á gwaa gwɔ́, mbà pɔ́ zɔɔn fʉa menò tɛ’ tá’, yé Ssé cʉ́’ ńdíe wɔ́b pɔ́ gwɔ́ pɔ́ ndʉŋ ndʉŋ mvfò yé, ntsaŋ e té gíŋe ńgwoon wɔ́b gwɔ́,

¹⁷ pá’ tà’ nyìŋ mesoŋ wémɔ’ɔ́ la fʉa nò, legwé fó nà yé ńgẅiin nyìŋ mesoŋ pɔ́ tè vʉ’ʉ tsɔ̌, tá’ wetsɔ̌ nyìŋ gẅie àa Yěsô Kristo, à yé fà’ gwɔ́ ndyɛ̀’ɛ. Epʉ̀a pie e Ssé tsɔ́ɔn mezìŋe mɔ́b tɛ’ ńcÿó gem yɔ́b, à cʉ̌’ ńdíe wɔ́b pɔ́ gwɔ́ pɔ́ ndʉŋ ndʉŋ mvfò ye. Pɔ́ ge cʉa nà Yěsô é gwɔ́ wó, e piŋ gwɔ́ pá’ mefùɔ la é tíi Kristo.

¹⁸ Pá’ pege gyǎ ngie á la fó nà nò gie tà’ nyìŋ fʉ̌a, á Adam, pʉ̀a metsèm kwéte kwéte la, á gíŋ ńgwɔ́ pɔ́ ndʉŋ ndʉŋ pá’ tà’ nyìŋ wémɔ’ɔ́, á Yěsô Kristo la gÿo mmó gie e Ssé ne ńkwoŋo, pʉ̀a tà ńgyɔ́ɔn ńnéŋe ńcʉa mǒ ńtsẅɛ́ ntsaŋ, ńgwiin le gwɔ́ tèmì.

¹⁹ Ndʉŋ ndʉŋ pá’ tà’ nyìŋ mesoŋ la lʉ’ʉ lé jú’ ncwò Ssé, anùɔ lá’ fó mǒ ńcʉ́’ ngàŋ mefʉa la, tà’ nyìŋ wémɔ’ɔ́ la jú’ ncwò Ssé, á fó mǒ anùɔ lá’ lá’ ńcʉ́’ pʉ̀a pie e Ssé líe wɔ́b pɔ́ gwɔ́ ndʉŋ ndʉŋ mvfò yé.

²⁰ Tá á piŋ ńgʉa nà *lepʉ̌, mbà Ssé lɔ̌ɔn zába légwɔ̀ gie pʉ̀a ge fó mǒ é gyá nzẅìŋ gẅie pɔ́ lɔg ńgÿo nò tepòŋ pú’u. Pá’ menò tepòŋ ne ńgyɔ́ɔn lêkɔ́ wɔ́ e Ssé ne ńtsɔ́ɔn mezìŋe pʉ̀a ńcÿó gem yɔ́b tà ńtɔ́gɔ ntí.

²¹ Á cʉa pú’u, e Ssé lɔg pá’ à tsɔ́ɔn mezìŋe mɔ́b, yé zɔ̌ cʉ́’ ńgẅiin wɔ́b, ńgÿo pɔ́ cʉ́’ pʉ̀a pie ee ndʉŋ ndʉŋ mvfò yé, á lɔgɔ sẅé pá’ nò tepòŋ la gÿo legwé gẅiin pʉ̀a mesoŋ, ńzẅéte wɔ́b. E Ssé tsɔ́ɔn mezìŋe mégè ńcÿó gem yégè pú’u, pege zẅɛ́’ɛ Cʉ̀apʉ̀a Yěsô Kristo tá ńgẅiin le gwɔ́ tèmì.