Roma 2 - Nouveau Testament en Ngienboum

Entí gie e Ssé ge lá’ lɔg zá’ mentsaŋ pʉ̀a mésoŋ

¹ Ńgwɔ́ nyìŋ zye letúu *lɔ̌’ pʉ̀a pie é gÿo yɛ̌ ntí menò, gù gẅie ngwɔ́ ɔ̀ tú, zsé ngie ńgwɔ́ ɔ̀ lényé té gwé jú ntsaŋ gwé wɔ́, tà pá’ ɔ̀ lɔɔn zɔɔn ńgwɔ́ pɔ́ wɔ wɔ̌. Pú’u ńtí nue ɔ̀ ne ńtúu *lɔ̌’ pʉ̀a tá’ ńgíŋe ne ńgÿo jú pɔ́ pá’ pɔ́b ńdɔgɔ sele ńtúu pɔ́ ndʉ̀ ńdɔgɔ ńkwɛ́ mbùm jù.

² Pege zɔɔn ńzsé ngie Ssé gwɔ́ tà ne ńŋága pʉ̀a pie pɔ́ gÿo yɛ̌ ntí menò, ńŋága wɔ́b pɔ́ pá’ menò mɔ́b ne ńzɛ́te.

³ Gù gẅie ɔ̀ túu *melɔ̌’ pʉ̀a pie pɔ́ gÿo yɛ̌ ntí menò, ḿbiŋe ne ńgÿo jù pɔ́ pá’ pɔ́b, ɔ̀ kwǎŋ ngie ɔ̀ ge gǎ tá tsẅɛ́ tà Ssé lénéŋ ngʉ̀ngʉ̀ twó gù wɔ́?

⁴ Ɔ̀ ne gÿo pú’u, ńcʉ́’ʉ ńdɔgɔ ńgwága Ssé gwǎg, nne ngie à gẅiin pòŋo ntʉ́m, à té lwo ńcÿɔ́g wɔ́, à gẅiin kwɔ́gɔ nnɛ́. Ɔ̀ɔ pú’u, ɔ̀ té ne ńzsé ngie à gẅiin pòŋo ntʉ́m nzèm gù pú’u, pɔ́ lélɔg ńgÿo ɔ̀ kúbe mà wɔ́ ka?

⁵ Ɔ̀ ne ńdʉ’ʉ léju’u nò, ɔ̀ té ne ńkwoŋo lékúbe mà gù wɔ́, ɔ̀ lɔgɔ pú’u, ńtóŋte máamáa ngʉ̀ngʉ̀ gẅie e Ssé ge gÿo ńnéŋe twó gù, á nà lyɛ̌’ gie à ge lá’ ně ńnéŋe ngʉ̀ngʉ̀ twó pʉ̀a. Á ge lá’a lyɛ̌’ó mé gyá pá’ Ssé ŋaga menò pɔ́ pá’ é ne ńzɛ́te.

⁶ À tsɔ́’ɔ fà’ ye wɔ̌wɔ́ɔ pɔ́ ná pa’ ngàŋ la lɔg fa’ pú’u,

⁷ é náa le gwɔ́ tèmì mbwo pʉ̀a pie pɔ́ la lɔgɔ légÿo nò mbòŋo té kʉ́a, ńně ńtsɔ́ɔn ngie e Ssé zɔ náa wɔ́b legú’, ńnáa wɔ́b mékù’, ńgÿo pɔ́ gwɔ́ tsɛ̀ɛ le gwɔ́ gẅie mé te gíŋe kwé mǒ wɔ́.

⁸ Tá á ké ńgʉa ná pʉ̀a pie pɔ́ tʉʉ twó mbwo Ssé, ńdʉ’ʉ nò gie áa nénʉ́, ńgiŋe pɔ́ ná mánzsè gẅie e Ssé tè ne ńkwoŋo wɔ́, pɔ́ gyá pá’ e Ssé gyáŋa lóŋ ná pɔ́b, mbɔɔ pá’ nò yɔ́b pÿɔ́gɔ Ssé.

⁹ Ngʉ̀ngʉ̀ ge lá’ kúu wɔ̌wɔ́ɔ nyìŋ mésoŋ wɔ́ gẅie à gÿo nò tepòŋ tà à tswág tsɔ̌. Pú’u é zye nà nyìŋ Yuda é pɔ́ɔnté kúu nà nyìŋ gẅie à tè nyìŋ Yuda wɔ́.

¹⁰ Á ké ńgʉa nà nyìŋ gẅie à gÿo nò mbòŋo, e Ssé náa legú’ né ye, ńná mékù’ lé ye, ńgíŋ náa yé mbʉ́lè, ńcʉ́’ʉ lé ná, ńzye nà nyìŋ Yuda ḿbɔ́ɔnte, ńnáa mbwo nyìŋ gẅie à tè nyìŋ Yuda wɔ́,

¹¹ á nue e Ssé te gẅiin tyɛ̀’te tsetsɛ̀ɛ pʉ̀a mésoŋ wɔ́.

¹² Epʉ̀a pie é té pà Yuda wɔ́, é té *lepʉ̌ Mǒsê zsé. Tá’ ńké gÿo nò tepòŋ, ńgwe pɔ́ ntsaŋ, tà mbɔɔ pá’ nò *lepʉ̌ té cʉa mǒ wɔ́. Tá á ké ńgʉa nà pʉ̀a pie pɔ́ gwaa gÿo nò tepòŋ, ńně ńzsé *lepʉ̌ Mǒsê, pɔ́ gwe ntsaŋ, ńtí sɛ̌ *lepʉ̌.

¹³ Á nue nyìŋ zɔɔn tè jú’ *lepʉ̌ Ssé jǔ’ ndà’ ńcʉ́’ʉ nyìŋ gẅie aa mvfò Ssé ńgwɔ́ ndʉŋ ndʉŋ wɔ́. Nyìŋ jǔ’ ḿbiŋ ńgÿo pá’ é zɛ́te tá ńcʉ́’ʉ wɛ̌ nyìŋ.

¹⁴ Pʉ̀a pie é té pà Yuda wɔ́, ḿbiŋ tè *lepʉ̌ Mǒsê zsé, gwá gÿo mmó gie sɛ̌ *lepʉ̌ ne ńzɛ́te, tà ńgÿo pɔ́ tè gwɔ́ gie mé zi’í wɔ́b. Mbùm yɔ́b zɔ lɔgɔ pú’u, ńzí’i wɔ́b ménò mie ée nà *lepʉ̌ tà mbɔɔ pá’ pɔ́ té *lepʉ̌ gẅiin.

¹⁵ Pɔ́ lɔgɔ pú’u, ńnyɛ́ ngie mefà’ mie *lepʉ̌ ne ńzɛ́te ngie me fa’, e Ssé la ŋwe’e tsɛ̀ɛ ntʉ́m wɔ́b, tà mbùm yɔb ne ńzẅíŋe ngie áa nò. Nkwaŋá wɔ́b gʉa fʉ̀’ gie é ge ŋǎg pɔ́b, ńdɔg pɔ́ mefà’ ŋwɛ́ ńŋága wɔ́b, ńgʉa fʉ̀’ gie é gee tàg nzèm yɔb ńgíŋ ńdɔg pɔ́ mɛ̌ ńtág.

¹⁶ Wɔɔn aa pá’ Nkʉ̀ Mbòŋo nò Ssé gẅie mèŋ n da’te ńgɔɔn pá’ e Ssé ge lá’ zá’ ntsaŋ wɔ̌wɔ́ɔ. Á ge lá’ gwɔ́ yɛ̌ lyɛ̌’, e Ssé tsẅii mbwo Yěsô Kristo, à ŋág pʉ̀a nà kɔ̀ɔkɔ́ɔ wɔ́ gie áa lelyěen tsɛ̀ɛ ntʉ́m pɔ́b.

Pà Yuda é gẅiin lepʉ̌ Mǒsê tá ḿbiŋe ńgwé nà lepʉ̌ gwé

¹⁷ Á gʉa ná gù, ɔ̀ ne ńnyɛte ńgɔɔn ngie ɔ́ɔ nyìŋ Yuda, ńne ńŋá’te ngie ɔ̀ fó ná pá’ ɔ̀ kú’te *lepʉ̌ Mǒsê pú’u, ńgwɔ́ nyìŋ Ssé,

¹⁸ ńzsé mmó gie Ssé ne ńkwoŋo, mbà á ka fó ná pá’ mé ka zí’i gú *lepʉ̌ ɔ̀ zsé mmó gie áa mbòŋ.

¹⁹ Ɔ̀ kwà’ ne ńgyá nà jú twó ngie ɔ́ɔ nyìŋ gẅie à kíbe pwó mefʉ̀ menÿɔ́g, ńne ńkyɛ’ɛ pʉ̀a pie ée tsɛ̀ɛ nzěm,

²⁰ ńně ńzí’i mmó mbwo pɔ́b megʉ̀gʉ̀ nà nò Ssé, ńgwɔ́ tsítsà mecʉ̀cʉ̀ŋ nà nò gie áa nénʉ́, mélà’mie ɔ̀ ne ńzsé, ɔ̀ lɔg pá’ ɔ̀ zsé *lepʉ̌, ńgẅiin zsé nò gie áa nénʉ́.

²¹ Á yɛ tà ḿboŋ. Tá’ mélà’a kɔ́ gù gẅie ɔ̀ ne ńzí’i petsɔ́ pʉ̀a mmó, ɔ̀ té gÿo pá’ yɛ̌ mmó ně ńzɛ́te wɔ́? Ɔ̀ ne sá’a mbwo lá’ ngie tà mé jʉ, ḿbiŋ ne ńjʉʉ.

²² Ɔ̀ ne ḿbʉ́ʉ ngie tà mé gÿo gàb, ḿbiŋ ne gÿo gàb, ńne ngie tà mé gu’te messé, ḿbiŋe ńgee nà mejʉ’ mie mé gu’te wɔ́b wó, ńjʉʉ shúm sie mé lɔ̌g ńgu’te wɔ́b.

²³ Gù gẅie ɔ̀ ne ńŋá’te tɛ’ ngie ɔ̀ zsé *lepʉ̌ Ssé, ḿbiŋe fʉa *lepʉ̌ ŋwɛ́, ɔ̀ lɔgɔ pú’u, ńzoonte Ssé.

²⁴ Mé la zɔɔn ńŋwe’e tsɛ̀ɛ ŋwà’ne Ssé ngie: Pʉ̀a pie é té pà Yuda wɔ́ ne ńzoonte lezíŋ Ssé, á ké fó pɔ́ né pi.

²⁵ Áa nénʉ́ ngie ɔ̀ lɔɔn ńgiŋe ná pá’ *lepʉ̌ ne ńzɛ́te, mbà le gwɔ́ gẅie mé la pú’u gú pá’ ɔ̀ ge gwɔ́ nyìŋ Ssé à ge kẅéte. Tá ńké té giŋe ná pá’ *lepʉ̌ ně ńzɛ́te wɔ́, mbà mé la tsɛ ḿbú’u gú tá’, ɔ̀ ge cʉ́’ gwɔ́ pɔ́ pá’ nyìŋ gẅie mé la tè yé pú’ la,

²⁶ ḿbiŋ ńgwɔ́ gie pʉ̀a pie mé la tè wɔ́b pú’, giŋe ná pá’ *lepʉ̌ ně ńzɛ́te, mbà Ssé tè cʉ́’ líe wɔ́b gẅie mé la té wɔ́b pú’ pɔ́ pá’ pʉ̀a pie mé kéen ḿbú’u wɔ́b gwɔ́ ka?

²⁷ Pʉ̀a pie mé la zyé wɔ́b mé té wɔ́b pú’, pɔ́ piŋ ne ńgÿo mmó gie *lepʉ̌ Ssé ne ńzɛ́te, pɔ́ zɔ ge lá’ tú *melɔ̌’ mí, pi pie pi fʉ̌a sɛ̌ *lepʉ̌, tá mbà mé la ŋwe’e ńná né pi, pi gíŋ ńgwɔ́ pʉ̀a pie mé la pú’u wɔ́b.

²⁸ Mé zɔɔn tè gwɔ́ zsé kwà’ nyìŋ pà Yuda, á nyìŋ Ssé, ńdɔg pɔ́ mmó gie mé ne ńgyá nà ye á nzème pǐ wɔ́, lézsé nyìŋ gẅie mé la pú’u yé á té gwɔ́ pɔ́ ndà’ légyá pá’ mé la zá’a jʉ’ʉ nnɛ́ yé wɔ́.

²⁹ Tá’ kwà’ nyìŋ Yuda, á nyìŋ Ssé, á gwɔ́ pɔ́ nyìŋ gẅie mé la pú’u yé pɔ́ tsɛ̀ɛ tʉ́m ye. Á gwɔ́ lepú’ gẅie a Zẅìge Ssé zɔ gÿo, tà à tè gwɔ́ pɔ́ gẅie à fóo ná pá’ mé la ŋwe’e tsɛ̀ɛ *lepʉ̌ wɔ́. Wɛ̂ zɔɔ nyìŋ gẅie e Ssé zɔ ná mekù’ mé tà pʉ̀a mésoŋ zɔ té ná.