Roma 12 - Nouveau Testament en Ngienboum

Leńnéŋe gẅie e Ssé kwoŋ

¹ Mefɛ́ pɔ́ɔn, pá’ Ssé léen ḿbú ńtsɔ́ɔn mezìŋe mégè la, mèŋ n ne ńgɔɔn mbwo pi ngie pi pú ńná mbùm gi mbwo yé pá’ shúm pwɔ́’ la, ńcʉ́’ʉ ńnéŋe ńjú’u pɔ́ mbwo yé, ńgwɔ́ pɔ́ pʉ̀a pé ndà’, ńgÿo pɔ́ mmó gie á ge poŋo yé. Legÿo pú’u, aa legu’te Ssé nà ntí yé mbòŋo.

² Tà pi gÿo mí menò pá’ pʉ̀a pie ée tsɛ̀ɛ njÿó fʉ̀’ɔɔn. Pi zẅíŋ e Ssé ne ńnáa legyè se sẅé né pi ńdɔgɔ ńkúbe gi ntí lékwaŋa nò pɔ́ ntsèm, à cʉa pú’u, pi ku’u lézsé mmó gie yé Ssé ne ńkwoŋo ngie pi gÿo. Pi zsé mmó gie áa mbòŋ, ńzsé gie á poŋo yé, ńzsé gie tsɔ́ *lɔ̌’ té mǒ wɔ́.

³ Mèŋ n ge fó ná pá’ e Ssé la cʉ́’ʉ lécÿó gem yɔ́ɔn, ńtÿɔ́gɔ wɔ̀ɔn nà jʉ’e lÿò, é gɔɔn mbwo wɔ̌wɔ́ɔ tsestsɛ̀ɛ pi ngie: Tà nyìŋ kwaŋ ngie aa mmó té gwɔ́ gie aa yɛ̌. Nyìŋ gẅiin we nkwaŋá é ku’ ku’. Nyìŋ kú’te pɔ́ yé fà’ gie e Ssé la ná, ńgwɔ́ ná, éfó ná pá’ à zǎb ntʉ́m ná Kristo.

⁴ Á zɔɔn ńgwɔ́ nà mbùm nnɛ́ nyìŋ mesoŋ, mekèm gwɔ́ mǒ tà ńgyɔ́ɔn ḿbiŋ ńké tè gẅiin tà’a fà’ wɔ́

⁵ Á gíŋ ńgwɔ́ pɔ́ ndʉŋ ndʉŋ ná pá’ pege gwɔ̌ tà ńgyɔ́ɔn gyɔ́ɔn tá’, ńdɔg pá’ pege la nnɛ́ ná Kristo, ḿbú ńcú’te ńtsẅé’e ná tà’ nyìŋ, pá’ mekèm mbùm pú ńtemte, yɛ̌ wɔ́ ne ńtóonte yetsɔ́ la.

⁶ Áa yɛ̌ e Ssé cÿó gem yégè, ńnáa fù’ ye wɔ̌wɔ́ɔ á gwɔ́ pɔ́ ye ntí. Afù’ ye nyìŋ lɔɔn ńgwɔ́ léńnéŋe ńtsẅi nkʉ̀ gẅie é fóo mbwo Ssé, á gwɔ́ tsẅi, ńtswii nà ntí gie à ne ńjú’u, mbà e Ssé lɔ̌g shwóŋó yé pú’u.

⁷ Afù’ ye nyìŋ lɔɔn ńgwɔ́ lékẅéte ná mefà’, á kẅéte. A ye nyìŋ gwɔ́ lézí’i pʉ̀a mmó, á zí’i.

⁸ Afù’ ye nyìŋ gwɔ́ lékẅiŋte petsɔ́ pʉ̀a, á kẅiŋte. Nyìŋ lɔɔn ne ńnáa mmó né nyìŋ, á ná té sáŋ. Nyìŋ lɔɔn ńgwɔ́ nyìŋ gẅie à táŋte cú’tè, á táŋte tà ńzsé mmó gie à gÿo yɛ̌. Nyìŋ lɔɔn ne ńkẅéte mepóŋ, á kẅéte lê ntʉ́m mbòŋo.

⁹ Pi kwoŋ pʉ̀a mesoŋ pɔ́ lê ntʉ́m gẅi ntsèm. Pi kÿo nò tepòŋ tà fÿɔ́g mekɔ́ɔn, ńkú’te nò mbòŋo tà à tʉ̀.

¹⁰ Pi lɔg pá’ pi ee mefɛ́ mefɛ́, ńkwoŋe pi né pi, nyìŋ gẅi à vɔg ńná mekù’ fɛ́ we.

¹¹ Tà pi gwɔ́ melǒŋ, pi gwɔ́ pɔ́ megàŋa fà’. Pi lɔg ntʉ́m gẅi ntsèm éfa’a mbwo Cʉ̀apʉ̀a.

¹² Pi ńnéŋe nê lekág ńtí mmó gie pi ne ńzẅí’te. Ngɔ́’ lɔɔn ńkúu gẅí, pi shÿɔg shÿɔg. Pi ké ńne sẅíŋte pɔ́ Ssé té kʉ́a.

¹³ Ammó lɔɔn ńzága mbwo mefɛ́ pi pʉ̀a Kristo, pi kẅéte wɔ́b. Pi ńnéŋe ńkúe pà túm mboŋó.

¹⁴ Pi tsɔ́ɔn pɔ́ nò mbòŋo á nà twó pʉ̀a pie pɔ́ ne ńgÿo pi gyá ngɔ́’. Pi tsɔ́ɔn pɔ́ nò mbòŋo, tà pi tsɔ́ɔn nò tepòŋ.

¹⁵ Pʉ̀a lɔɔn ne ńkága pia pɔ̌ pú ńkág, ńne ńdʉa pia pɔ̌ pú ńdʉa.

¹⁶ Pi gẅiin tà’ ncwò tsetsɛ̀ɛ pi, tà pi tsɔ́ɔn pɔ́ mencwò fà’ melÿò, pi zẅíŋe légÿo mefà’ mie é ku’ ku’, tà pi kwaŋ ngie pi zsé nò.

¹⁷ Tà pi tsɔ́’ɔ piŋé nò tepòŋ ńnáa nò tepòŋ. Tà ńcʉ́’ pú’u, pi fa’ shÿó ńgÿo pɔ́ nò gie wɔ̌wɔ́ɔ ge gyá é zẅíŋ ngie áa mbòŋ.

¹⁸ Mbàa yɛ̌ nò wɔ́ lɔɔn ńgwɔ́ ssé, tà shÿó gwɔ́ mbwo gù, ɔ̀ gÿo pɔ́ légwɔ́ gie pia pʉ̀a métsèm ge ńnéŋe lê mbʉ́lè.

¹⁹ Pi meshǔ pɔ́ɔn, tà nyìŋ gẅi sele ńtsɔ́’ɔ nò tepòŋ gie mé gÿǒ ná yé, ńnáa tsɔ́. À nyé e Ssé zɔ lá’ ḿbÿɛ, á nue áa tsɛ̀ɛ ŋwà’ne Ssé, yé Cʉ̀apʉ̀a gɔɔn ngie: «Mèŋ n zɔ gẅiin létsɔ́’ɔ nò tepòŋ ńnáa tsɔ́, mèŋ n zɔ gẅiin ntsɔ’ɔ́ fà’ we wɔ̌wɔ́ɔ».

²⁰ À giŋé ńgɔɔn ngie: «Nzyè lɔɔn ne ńgyáŋa ngàŋ mbù gù ɔ̀ náa mmó á pfɛ́. Nzyè ntse ne ńgyáŋa yé, ɔ̀ ná ntse á nú. Ɔ̀ lɔɔn ńgÿo pú’u, mbà shʉ́ ge kúu yé, à kúbe mà we».

²¹ Tà nyìŋ cʉ́’ nò gie nyìŋ gÿǒ ná yé tsóte yé, á gÿo nò tepòŋ, tà ńcʉ́’ pú’u, á lɔgɔ légÿo nò mbòŋo, ḿbyága nò tepòŋ.