Roma 11 - Nouveau Testament en Ngienboum

E Ssé kaa pà Israel gwá’a

¹ Á gwɔ́ pú’u, mèŋ n zɛ́te ngie tà áa pá’ɔɔn, mbà Ssé gwǎ’ pʉ̀a pé keen? Ngǎŋ á té pú’u wɔ́, á nue mbàa mèŋ yɔ́ɔn mèŋ n gee nyìŋ Israel, ngẅɛ̀ Ábalam, éfóo ná tsìŋe ndá Mběnjameŋ.

² E Ssé kaa gwá’ pʉ̀a pé pie à la tʉ́ njÿó ńtsɔ́’ɔ wɔ́b gwɔ́. Á ge gǎ wɔ́ pi ne ńzsé jʉ’ʉ ŋwà’ne Ssé gie áa mǒ *Elîɛ ne shwóŋó Ssé mmó gie pà Israel gÿǒ,

³ ńne ńgɔɔn ngie: «Cʉ̀apʉ̀a pɔ́ kéen ńzẅéte pà ntsẅì nkʉ̀ pú, ńtágte mekye mmɔ̌g jʉ’ gie mé tuɔ shúm wó ńdɔgɔ ńgu’te gú. Mèŋ n cʉ̌’ ńgwɔ́ pɔ́ gílé mèŋ gẅie n gee nzèm gù, pɔ́ piŋ ne fa’a lézẅé wɔ̀ɔn»

⁴ Á gɔɔn pú’u, e Ssé tsɔ́’ɔ mbwo yé ngie kɔ́? E Ssé tsɔ́’ ngie: «Mèŋ n ka tyɛ́te pʉ̀a pɔ́ɔn tà pɔ́ gwɔ́ ntsá’ sɔɔn mbʉ́a, é gwɔ́ pʉ̀a pie pɔ́ kaa kẅí’te mvfò ssé gie mé tóŋo lê Baal wɔ́».

⁵ Á gíŋe ńgwɔ́ ndʉŋ ndʉŋ pú’u, nà lyɛ̌’ɔɔn. E tsɔ́ ntá’ pʉ̀a gwɔ́ nùɔ peg pà Yuda pie e Ssé ka cÿó gem yɔ́b, ńtsɔ́’ɔ wɔ́b.

⁶ Á lɔɔn ńgwɔ́ gie e Ssé ka cÿó gem yɔ́b ńtsɔ́’ɔ wɔ́b, mbà á té ńdɔgɔ ńgwɔ́ ngie pɔ́ ka gÿo tsɔ́ mmó mbòŋo wɔ́. E Ssé ka gwé’e éfó pɔ́ nà mmó mbòŋo gie pɔ́ gÿǒ tá ńtsɔ́’ɔ wɔ́b, mbà ńgwɔ́ mé le gíŋe ngie à kɔ̌ɔn ńdɔgɔ ńcÿó gem yɔ́b wɔ́.

⁷ Áa pú’u, ńdɔgɔ ńgwɔ́ lêkɔ́? Á lɔgɔ ńgwɔ́ ngie ammó gie pà Israel la ne fa’a pɔ́ la tè gyá métsèm wɔ́. Etsɔ̌ ntá’ pʉ̀a tsetsɛ̀ɛ pɔ́b pie e Ssé la tsɔ́’ zɔ̌ la gyá. Á cʉ́’ʉ pfwɔ’ e Ssé nyé wɔ́b pɔ́ tiŋ ndʉ̀’.

⁸ Á lɔgɔ ńcʉ́me ná nò gie mé la ŋwe’e tsɛ̀ɛ ŋwà’ne Ssé ngie: E Ssé kéen ńjÿɔ́’ legyè sɔ́b Ńtsɛ́ nÿɔ́g mɔ́b, ńtɔ’ɔ wɔ́b légyá jʉ’ Ńziŋe metuŋó mɔ́b, ńtɔ’ɔ wɔ́b lé jú’u nò Tà ńkú lyɛ̌’ɔɔn.

⁹ Fùɔ Ndavíd la gíŋe ńgɔɔn yé ngie: Á poŋ ngie shúm sie pɔ́ pfɛ́ɛ é sele ńcʉ́’ lejÿɔ’, Ńcʉ́’ lekÿo sie é ge gwoon wɔ́b. Á poŋ ngie Ssé néŋ ngʉ̀ngʉ̀ twó pɔ́b.

¹⁰ Á poŋ ngie e Ssé tsɛ́ nÿɔ́g mɔ́b tà pɔ́ le gíŋe jʉ’ ńgyá wɔ́, Ńgÿó pɔ́ gyá ngɔ́’ tà nkà’ wɔ́b cʉ́’ ńŋwé’e ŋwé’e fʉ̀’ ntsèm.

¹¹ Ngɔ̂ɔn ngiembɔɔn, pá’ pà Israel la gwɔ́ tà ńtúu kwò yɔ́b ná Kristo ḿbú ńgwe Ssé la, á laa pú’u, ńgwɔ́ pɔ́ ndà’ ndà’ la? Ngǎŋ á té pú’u wɔ́. Tá’ á la fó pɔ́ pá’ pɔ́ tǔ kwò yɔ́b, tá pʉ̀a pie é té pà Israel wɔ́ zẅɛ́’ ńtsẅɛ́. E Ssé lɔ̌ɔn ńgÿo pá’ɔɔn légwɔ́ gie pʉ̀a Israel ge záb lejÿɔ́g mǒ, é kwɔ́’ɔ lóŋ.

¹² Á lɔɔn ńgwɔ́ gie á la fó ná pá’ pɔ́ tǔ kwò yɔ́b, njÿó ntsèm zẅɛ́’ ńgẅiin fù’ gie á fóo mbwo Ssé, éfóo ná pá’ pɔ́ gwě ssé, epʉ̀a pie pɔ́ té pà Yuda wɔ́ zẅɛ́’ ńgẅiin fù’, mbà Ssé ge lá’ gwɔ́ tà pʉ’ʉ wɔ́b métsèm, afù’ á le mege ńgá’ wɔ́?

Letsẅɛ́ we pʉ̀a pie é té pà Yuda wɔ́

¹³ Anò gie n ge gɔɔn fʉ̀’ɔɔn lɔɔn, n gɔɔn mbwo pi pie pi tè pà Yuda wɔ́. E Ssé la túmo wɔ̀ɔn mbwo pʉ̀a pie é té pà Yuda wɔ́. Atwó fà’ gie Ssé la ńná né mèŋ, mèŋ n néŋ mekù’ mǒ.

¹⁴ Méŋ n ké ńgwɔ́ ne fa’a tsetsɛ̀ɛ pi, ńne ńtsɔ́ɔn ngie mefɛ́ pɔ́ɔn pà Yuda gyá mefà’ Ssé ná pi lóŋ wɔb kwɔ́’, ńzsé ngie n ge gÿo e Ssé fó mǒ ńgÿo etsɔ́ ntá’ tsetsɛ̀ɛ pɔ́b tsẅɛ́.

¹⁵ E Ssé la zɔɔn ńgwɔ́ tá ńtÿɔ́gɔ wɔ́b nzèm tá ńgÿo yé Ssé pâ pʉ̀a mesoŋ tsɛ̀ɛ njÿó mag mbù, à ge piŋ lá’ gwɔ́ tà gíŋe líe wɔ́b á gwɔ́ lêkɔ́? À gwɔ́ kwà’ légíŋ ńgwɔ́ wó á mbwo pʉ̀a pie é la zɔɔn ńkwé.

¹⁶ Nyìŋ lɔɔn ńzɔɔn ḿvɔg ńnáa ndùŋ mvfò kème mbelég mbwo Ssé, mbà mbelég ntsèm ntsèm e gwɔ́ pɔ́ yé Ssé. Menŋàŋ tà’a tÿǒ lɔɔn ńgwɔ́ mbwo Ssé, mbà mbwó tÿǒ gíŋ ńgwɔ́ pɔ́ mbwo yé.

¹⁷ Alá’a pà Israel áa pá’ tÿǒ mèvɛ olive nyìŋ, mbà ngàŋ ka kɔ́’ tsɔ́ mbwó mǒ ńgwá’. Gù gẅie ɔ̀ tè nyìŋ Yuda wɔ́, ɔ̀ gwɔ́ pá’ pwó tÿǒ mèvɛ olive gie á gwɔ́ pɔ́ mbím, mbà mé ka lɔgɔ gú ńtó ńdaa nùɔ mbwó mie é ka nyě ńgwɔ́ nà tÿǒ ŋwɛ́. Ɔ̀ɔ nà fʉ̀’ɔɔn ńne ńzẅɛ́’ɛ metse tÿǒ mie é ne fóo ná menŋàŋ ńkúu ná pia pɔ̌ métsèm.

¹⁸ Tè ké ńdɔg pú’u, ńŋá’te mvfò mbwó mie mé ka *kɔ̌’. Ɔ̀ lɔɔn ne ńkwaŋa léŋá’te, ɔ̀ zsé ngie gù zɔ tè ne ńjÿɔ́gɔ menŋàŋ wɔ́, menŋàŋ zɔ̌ ne ńjÿɔ́gɔ gú.

¹⁹ Ndyɛ̌’ tsɔ́ ɔ̀ jú’ pá’ɔɔn ńgɔɔn ngie mé la kɔ́’ mɛ̌ mbwó ńgwá’ légwɔ́ gie mé ge laa gú nà tÿǒ.

²⁰ Oon mé la ké ńkɔ́’ɔ wɔ́b ńgwá’, á gwɔ́, mélà’mie pɔ́ kaa záb ntʉ́m ná Kristo wɔ́. Ɔ̀ piŋ ńgwɔ́ jʉ’ó, mélà’mie ɔ̀ zǎb ntʉ́m ná Kristo, tá’ tè ké ńŋá’te, tà ńcʉ́’ pú’u, ɔ̀ lag pɔ́ twó jú.

²¹ Á nue á lɔɔn ńgwɔ́ gie e Ssé la kɔ́’ kwà’ mbwó yɛ̌ tÿǒ ńgwá’, mbà à lɔɔn ńgwɔ́ á gíŋe ńkɔ́’ɔ gú jú pɔ́ pú’u.

²² Zsé ngie e Ssé lɔɔn ńgwɔ́ gie e gẅiin pòŋo ntʉ́m, mbà e giŋé ńcÿɔ́g. E la cÿɔ́g pʉ̀a pie pɔ́ la gwe ssé. E piŋ ne ńgẅiin pòŋo ntʉ́m ná gù. Tá’ á ne ńzɛ́te ngie ɔ̀ ké ne ńkẅi’i ńgÿo pɔ́ mmó gie á poŋo yé, tà á té pú’u wɔ́, mbà e ge zá’a gú jú gwá’ pá’ pwó tÿǒ la.

²³ Á gʉa nà pà Yuda, mbà pɔ́ lɔɔn ńgwá’a tʉʉ twó, ńzáb ntʉ́m ná Kristo, mbà à ge laa wɔ́b nà jʉ’ gie pɔ́ la zɔɔn ńgwɔ́ wó. Á nue yé Ssé gẅiin metʉ̀ lélaa wɔ́b sẅé sẅé.

²⁴ Ɔ̀ la zɔɔn ńgwɔ́ pɔ́ pwó tÿǒ mèvɛ olive ye mbím. E Ssé zá’a gú, ńtó ńdaa nà tÿǒ mèvɛ olive ye nká’, é gwɔ́ nkʉ̀’ʉ nò. Á ké ńgʉa ná pà Yuda, mbà pɔ́ laa mbwó tÿǒ mèvɛ olive ye nká’. E Ssé lɔɔn ḿbiŋ ńge piŋe wɔ́b nà tÿǒ ŋwɛ́, mbà á ge zeŋe tɛ’, á nue pɔ́ la zɔɔn fó pɔ́ mǒ.

Á ge gÿo gwaa zsote e Ssé gÿo pà Israel tsẅɛ́

²⁵ Mefɛ́ pɔ́ɔn, mèŋ n ne ńkwoŋo ngie pi zsé mmó gie áa ná yɔɔn nò, mbà á la zɔɔn ńgwɔ́ pɔ́ lelyěen, ḿbɔ́gɔ gẅi lékwaŋ ngie pi ee pàzsé nò. Yɛ̌ mmó áa ngie atsɔ́ gwǒŋo pà Israel ne ńtʉʉ twó mbwo Ssé fʉ̀’ɔɔn, tá á ké lěen ńdá’a ńgwɔ́ pɔ́ pú’u wɔ́. Pɔ́ ge tʉʉ twó tà kú fʉ̀’ gie pʉ̀a metsèm pie e Ssé la tsɔ́’, é piŋ tè pà Yuda wɔ́, ge cʉ́me nzèm yé.

²⁶ À leen ńké ńgwɔ́ fʉ̀’ó e Ssé gÿo pà Israel metsèm pú ńtsẅɛ́. À lɔg ńcʉ́me ná pá’ mé la ŋwe’e tsɛ̀ɛ ŋwà’ne Ssé ngie: A *Nzà’nkÿo ge lá’ fó tÿǒsoŋo Sioŋ. E sele ngẅɛ̀ Yakwɔ́b pɔ́ le gíŋe ńtʉʉ twó mbwo Ssé wɔ́.

²⁷ Yɔɔn aa kʉa gie pega pɔ̌ ge lá’ gwa, á fʉ̀’ gie n ge lá’ kẅile menò tepòŋ mɔ́b.

²⁸ Pɔ́ ka lʉ’ nkʉ̀ mbòŋo, ńcʉ́’ ngàŋ mbù Ssé, pi zẅɛ́’. Tá’, pá’ e Ssé la lá’ ńtsɔ́’ɔ wɔ́b ńdɔg ńgÿo pʉ̀a pé la, à nyě ńkwoŋo wɔ́b kwoŋ ńtí pà mangʉa njʉ’ pɔ́b.

²⁹ Áa pú’u, nue e Ssé tè lɔgɔ mmó ńcÿó gem nyìŋ ńgíŋe ńkẅé wɔ́, ńké tè gɔɔn ngie à toŋó nyìŋ ḿbiŋ ńkúbe nò gie à gɔ̌ɔn wɔ́.

³⁰ Á laa tsɔ́ fʉ̀’ pi pie pi tè pà Yuda wɔ́, pi tʉʉ twó mbwo Ssé, tá á ké ńgwɔ́ fʉ̀’ɔɔn, mbà Ssé ka tsɔ́ɔn mezìŋe mí, mélà’mie pà Yuda ka tʉʉ twó mbwo yé.

³¹ Á ge gÿo gíŋe gwɔ́ pɔ́ pú’u ná pɔ́b. Pɔ́ ne ńtʉʉ twó mbwo Ssé fʉ̀’ɔɔn, á fó pú’u e Ssé ne ńtsɔ́ɔn mezìŋe mí, ńgÿo pú’u, légwɔ́ gie pɔ́ ge piŋe mbwo yé, á tsɔ́ɔn mezìŋe mɔ́b yɔ́b pá’ à ka tsɔ́ɔn mí.

³² Á nue e Ssé la nyé mânyìŋ ntsèm á pú ńtʉʉ twó mbwo yé légwɔ́ gie à ge gÿo tsɔ́ɔn mezìŋe mɔ́b pɔ́ metsèm.

Legyè Ssé kwá’ ńcʉa nyìŋ mesoŋ

³³ E Ssé kwa’ ńgẅiin pòŋo ntʉ́m nzèm pʉ̀a metsèm, ńgwɔ́ nyìŋ mesoŋ le kaa legyè Ssé wɔ́, é ke le zsé mmó gie e Ssé ne ńkwaŋa wɔ́, ngwɔ́ wɔ̌ zsé mmó gie e Ssé zǎb ngie à ge gÿo? Ngwɔ́ wɔ̌ kyagte pá’ e Ssé gÿo menò pú’u?

³⁴ Á lɔgɔ ńtsẅé’e ná pá’ ŋwà’ne Ssé gɔɔn ngie: Awɔ́ ku’u lézsé mmó gie Cʉ̀apʉ̀a ne ńkwaŋte, Awɔ́ lɔɔn ńgwɔ́ á náa yé ntÿɔgɔ́,

³⁵ Awɔ́ lǎ vɔg ńnáa mmó mbwo Ssé Légwɔ́ gie e Ssé ge gẅiin létsɔ́’ ńnáa mbwo yé.

³⁶ Kɔ̀ɔkɔ́ɔ zɔɔn fóo pɔ́ mbwo ye. Kɔ̀ɔkɔ́ɔ gwaa gwɔ́ wó yé zɔ̌ gÿo tá á gwɔ́ wó, á piŋ ńgwɔ́ pɔ́ yé. Mé gu’te yé, é mengù’u mengù’. *Amen.