Ŋwà’ne Ngyà jʉ’ 4 - Nouveau Testament en Ngienboum

Ntí gie mé lɔg ńgu’te Ssé á tÿǒ lepwó

¹ N gyá sɔɔn shúm tà ńtsẅé jʉ’, e Ssé gíŋe ńnyɛ́’ nÿɔ́g mɔ́ɔn, n gwɔ gyá, mbà mé tsɔ̌’ tsɔ́ ncwò ndá á tÿǒ lepwó. N deen ńké ńgíŋe ńjú’ nyìŋ gẅie à la zɔɔn ńgɔɔn nò né mèŋ, ngyè ye gwɔ́ pɔ́ pá’ ngyè ntàŋ la, á gɔɔn né mèŋ ngie: Kwɔ́’ɔ tà ńkúu jʉ’ɔɔn, mèŋ n nyɛɛ gú mmó gie á ge pɔ́ɔnte tó.

² A Zẅìge Ssé lêen ńgwoon wɔ̀ɔn, n gwóon ńgyá tsɔ́ lʉŋe lefùɔ tyé tÿǒ lepwó, atsɔ̌ nyìŋ ńnéŋe mǒ.

³ À la ŋwʉŋe pɔ́ pá’ tsɔ̌ ntí metóon pie ée pe tʉ̀ nzẅìŋ, mé tóŋo tsɔ̌ lê Jaspe, ńtóŋo wetsɔ̌ lê Sardoine la. Nkwòŋ nnù ngém kéle lʉŋe lefùɔ ŋwɛ́ ńnéŋe soŋ ńne ŋwʉŋe pá’ tsɔ̌ ntí tóon tʉ̀ nzẅìŋ gẅie mé tóŋo lê Emerod.

⁴ Etsɔ́ melʉŋe lefùɔ ntsɔ̀b lekùa lê móm mbʉ́a la kéle yɛ̌ lʉŋe lefùɔ ńnéŋe soŋ. Melÿò ntsɔ̀b lekùa lê móm mbʉ́a néŋte mǒ, ḿma’ mefɔ́gɔ nzsǒ, ńtɔ’ mecÿɔ́’ɔ lefùɔ mie mé la lɔgɔ tʉ̌ gɔ̂l ńnyɛte.

⁵ Menne mbʉ̀ŋ la ne fóo ná lʉŋe lefùɔ ńkẅɛɛ. Mengyè pʉ̀a ne fóo mǒ ńkwɔ́’ɔ. Lefàŋ ne fóo mǒ ḿvɛ́te. Melâm sɔɔn mbʉ́a tyéte mvfò lʉŋe lefùɔ, ńne ńkÿó, ńdɔgɔ ńgwɔ́ Mezẅìge sɔɔn mbʉ́a mie ée me Ssé.

⁶ Ajʉ’ gie á laa mvfò lʉŋe lefùɔ, á laa pá’ ntse letʉŋ sie é tyé lê kěm, ńne síi pá’ tsɔ̌ ntí tóon gie e gwɔ̌ pɔ́ pá’ gyá shÿó mé tóŋo lê kristal. Á gwɔ́ soŋ jʉ’ gie lʉŋe lefùɔ tyé wó, etsɔ̌ ntí menɔ̀ɔn, ńgwɔ́ tà ńgwɔ́ lekùa tyé ńkéle lʉŋe lefùɔ ńnéŋe soŋ. Menÿɔ́g pú ńgwɔ́ ná pɔ́b, á mvfò mbɔɔ nzèm.

⁷ Andùŋ mvfò ná pɔ́b la gwɔ́ pɔ́ pá’ pú’ ntʉ̀ la, ambɔ́ɔntè yépʉ́a gwɔ́ pɔ́ pá’ mûɔ fòŋ gẅie aa ndúm, ambɔ́ɔntè yétá gẅiin shÿó wé, é gwɔ́ pɔ́ pá’ we nyìŋ mesoŋ la, ambɔ́ɔntè lekùa gwɔ́ pɔ́ pá’ gúm ndóŋ gẅie à ne ńzie la.

⁸ Mbɔɔ wɛ̌ wɔ́ nà menɔ̀ɔn ŋwɛ́ lekùa la gẅiin mbabá mé ntɔgɔ́, menÿɔ́g gwɔ́ mǒ jʉ’ ntsèm, á nzème pǐ mbɔɔ nzème tsoló. Pɔ́ ne ńzɔbɔ té kʉ́a á fʉ̀’ʉ zsó mbɔɔ tsẅɛ́’, ńgɔɔn ngie: Ndʉalʉ̌a, Ndʉalʉ̌a, Ndʉalʉ̌a, aa Cʉ̀apʉ̀a Ssé Ngàŋa tʉ̀ ntsèm, á gẅie à laa wó, aa wó, à piŋ ńne ńtóo.

⁹ Á gwɔ́ ngwòŋ fʉ̀’ ntsèm gie menɔ̀ɔn pɔɔn lekùa ne ńzɔbɔ, ńdɔgɔ ńnáa legú’, ńdɔgɔ ńnáa mekù’, ńdɔgɔ ńnáa ndǎg mbwo nyìŋ gẅie à ńnéŋe nà lʉŋe lefùɔ ńgwɔ́ pɔ́ wó ngù’ nkɔ́ɔn nê nkɔ̌ɔn,

¹⁰ melÿò pá ntsɔ̀b lekùa lê móm mbʉ́a, ésẅɛ́’ ńkẅí’te mvfò nyìŋ gẅie à ńnéŋe nà lʉŋe lefùɔ, ńgu’te yé nyìŋ gẅie aa ńgwɔ́ pɔ́ wó ngù’ nkɔ́ɔn nê nkɔ̌ɔn, ńtsɔ́’ mecÿɔ́’ɔ lefùɔ twó pɔ́b, ńgwɔ́ nùŋe mvfò lʉŋe lefùɔ, ńne ńgɔɔn ngie:

¹¹ Ɔ̀ɔ nyìŋ gẅie ɔ̀ ku’ me Cʉ̀apʉ̀a weg, ńgwɔ́ Ssé yeg, ɔ̀ ku’ pá’ à lɔɔn ńgwɔ́ mé náa legú’ mbwo gù, ńná mekù’ mbwo gù, pá’ à lɔɔn ńgwɔ́ gù zɔ̌ gẅiin metʉ̀. Á nue ɔ̀ la gÿo kɔ̀ɔkɔ́ɔ á gwɔ́ wó, gù zɔ la kwoŋ tá sɛ̌ shúm kẅɛɛ tsɛ̀ɛ njÿó, gù zɔ piŋ ńne ńkwoŋo tá é gwɔ́ wó.