Ŋwà’ne Ngyà jʉ’ 3 - Nouveau Testament en Ngienboum

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Sardɛ̀s.

¹ Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Sardɛ̀s. Ŋwe’e ngie: Nyìŋ gẅie à gẅiin Mezẅìge Ssé sɔɔn mbʉ́a mbɔɔ mecÿɔ́’ saŋ sɔɔn mbʉ́a la, à ne ńgɔɔn ngie: Mèŋ n ne ńzsé mefà’ mí, ńne ńzsé ngie mé gwaa gɔɔn ngie pi ee ntentʉ́, mbà pi léen ńkwé.

² Pi zyeen, ńgwoon yɛ̂ pfwɔ́’ gie á ne ńgee mege kwé lɛ, ńkú’te. N gɔɔn nue mèŋ n gyá mefà’ mí gwɔ́ mvfò Ssé yɔɔn, tsoon tà’ mǒ tè nyé té gẅiin *lɔ̌’ wɔ́.

³ Pú’u la, pi ké ńkímte mmó gie mé la zí’i gẅí, ńgíŋe ńkímte ntí gie pi la lɔg ńjú’. Pi kú’te yɛ̌ mmó, ńkúbe mà gẅi. Pi lɔɔn ńnyé ńdyé lyě, mbà mèŋ n ge vege vege tó pá’ ntsǒŋ la, tà pi é le zsé fʉ̀’ gie mèŋ n ne ńtóo wɔ́.

⁴ N ké ńgɔɔn pá’ɔɔn, etsɔ́ ntá’ pʉ̀a gwɔ́ tsetsɛ̀ɛ pi tÿǒsoŋo Sardɛ̀s, mbà pɔ́ kaa lɔg ncÿǒ ńzɔ́’ menzsǒ mɔ́b wɔ́. Pɔ́ ge gÿo ma’ meféfɔ́gɔ nzsǒ, pega pɔ̌ pú ńteme kwò ńgiŋ, mélà’mie pɔ́ kǔ’ pá’ ńgwɔ́ pega pɔ̌ giŋ.

⁵ Áa pá’ nyìŋ gẅie à ge lá’ lÿɔ́’ ncù tà cʉa nò tepòŋ ge lá’ ma’ mefɔ́gɔ nzsǒ pú’u. Mèŋ m biŋ le lá’ ńzá’ lezíŋ sé tsɛ̀ɛ ŋwà’ne gie e Ssé la ŋwe’e mezíŋ pʉ̀a pie pɔ́ gẅiin le gwɔ́ tèmì tsoló wɔ́. N gÿo ńtÿé mvfò Tá wɔ̀ɔn pâ mecÿɔ́’ pé, ńgɔɔn ngie aa wɔ̀ɔn nyìŋ.

⁶ Nyìŋ lɔɔn ńgẅiin metuŋó, lélɔg ńjú’u nò, á jú’u nò gie Zẅìge Ssé ne ńgɔɔn mbwo mecú’tè pʉ̀a Kristo lɔɔn.

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Filadelfia

⁷ Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Filadelfia. Ŋwe’e ngie: Nyìŋ gẅie à fóo lejʉ́ŋ Ssé, ńgwɔ́ shwóŋò nò nénʉ́, yé gẅie à ngẅiin kí fùɔ Ndavíd, yé gẅie à tsɔ́’ ncwò ndá nyìŋ tè ku’u léjÿɔ́’ wɔ́, ńjÿɔ́’ nyìŋ tè ku’u létsɔ́’ wɔ́, à ne ńgɔɔn ngie:

⁸ Mèŋ n ne ńzsé mefà’ mí, ńne ńzsé ngie pi tè mbòŋ metʉ̀ gẅiin tá mbà pi ka kě ńkú’te shwóŋè yɔ́ɔn tà pi tè wɔ̀ɔn moŋe. À yɛ, mbà mèŋ n tsɔ̌’ ncwò ndá ńná né pi. Atsɔ̌ nyìŋ gẅie à piŋ ńku’u léjÿɔ́’ à tè wó wɔ́.

⁹ Mèŋ n ge gÿo sẅiŋ pʉ̀a pe cú’tè ye Sátà, á mbwo pi, é megàŋa cÿɔ̌ nò pie pɔ́ gɔɔn ngie pɔ́ ée pà Yuda, tá ńké ńdɔgɔ pɔ́ ncwò ńgɔɔn. Mèŋ n ge tsóte wɔ́b, pɔ́ tó ńkẅí’te mvfò pi, ńzẅíŋ ngie n kwoŋo gẅí.

¹⁰ Pá’ pi ka kú’te shwóŋè yɔ́ɔn tà pi tè kʉ́a la, mèŋ yɔ́ɔn n ge gÿo tÿɔ́’te gẅi nà fʉ̀’ gie ngɔ́’ ge gÿo tóo tsɛ̀ɛ yɔɔn njÿó ntsèm, é lʉŋte pʉ̀a mesoŋ pie ée ndùmo ssé tsetsá’.

¹¹ Mèŋ n ge tɔ́g tó. Pi kú’te mmó gie áa mbwo pi tà à tʉ ńzsé ngie tsɔ̌ nyìŋ tè kẅé gi ngú’ wɔ́.

¹² Nyìŋ gẅie à ge lÿɔ́’ ncù tà cʉa nò tepòŋ, Mèŋ n ge gÿo lɔgɔ ngàŋ é tÿɔ́g ntóon nà jʉ’e Ssé yɔ̀ɔn, angàŋ le lá’ fóo jʉ’ó, ńgʉ́a tsɔ́ jʉ’ wɔ́. Mèŋ n ge gÿo ŋwe’e lezíŋ Ssé yɔ̀ɔn á ná ngàŋ, é gíŋ ŋwe’e lezíŋ tÿǒsoŋ ye Ssé yɔ̀ɔn á nà ngàŋ. Yɛ̌ tÿǒsoŋ gwɔ́ Yerósalem ye sẅé gie á fóo tÿǒ lepwó, á lejʉ́ŋ Ssé yɔ̀ɔn, ésẅɛ́’ɛ. Mèŋ n ge gíŋ ŋwe’e mbɔɔ lezíŋ sɔ́ɔn se sẅé á ná ngàŋ.

¹³ Nyìŋ lɔɔn ńgẅiin metuŋó, lélɔg ńjú’u nò, á jú’u nò gie Zẅìge Ssé ne ńgɔɔn mbwo mecú’tè pʉ̀a Kristo lɔɔn!

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Laodisé

¹⁴ Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Laodisé. Ŋwe’e ngie: Nyìŋ gẅie lezíŋ sé ée lê *Amen, á gwɔ́ njÿò ńgyá we tè kubé shwóŋè, gẅie à gɔɔn nò gie áa nénʉ́, gẅie yé zɔ nzyeté nà kɔ̀ɔkɔ́ɔ gie e Ssé la nyɛte, à ne ńgɔɔn ngie:

¹⁵ Mèŋ n ne ńzsé mefà’ mí. Pi tè sẅé, ńké tè tween. Pi gɔ̌ɔn ngie pi ge fó sẅé sẅé à gaa, éfó tween tween à gaa.

¹⁶ Pá’ pi ne ḿbÿɛ́ɛ pÿɛ̌ pá’ ntse gẅie mé zẅɛ’té zẅɛ́’te la, ńké tè sẅé, ńké tè tween la, pi ge fóo ncwò mèŋ kẅɛ pá’ zè’e la.

¹⁷ Pá’ pi ne ńgɔɔn ngie pi ee ngàŋa mmó, ńgie pi kéen ńgẅiin nkáb tà é gyɔ́ɔn, tà pi cʉ’ʉ́ ńzága tsɔ́ mmó wɔ́ la, pá’ pi ké tè ńne ńzsé ngie pi ee ngàŋ ngɔ́’ tà ńgwɔ́ mé tsɔ́ɔn mezìŋe mí tsɔ̌ɔn wɔ́ la, mbɔɔ pá’ pi tè ne ńzsé ngie pi ee mefÿɔg, ńgwɔ́ pà fʉ̀ menÿɔ́g, ńtyéte té jÿɔ́g nzsǒ wɔ́ la,

¹⁸ mèŋ n ge ké shwóŋó gẅi ngie pi tóo mbwo mèŋ, ńjúu tʉ̌ gɔ̂l gie mé kéen ńdɔg mmɔ̌g ńkẅile ncÿǒ mǒ ntsèm, ńdeen ńké ńgwɔ́ ngàŋa mmó fʉ̀’ó, ńgíŋe ńjú mefɔ́gɔ nzsǒ mbwo mèŋ, ńzsé ngie pi ge gẅiin nzsǒ gie pi ge ma’, eshʉ́ le gíŋe ńkúu gẅi ngie pi tyeté té jÿɔ́g nzsǒ wɔ́. Pi ge gíŋe júu ffo menÿɔ́g mbwo mèŋ, é ńnéŋe nà menÿɔ́g mí légwɔ́ gie pi ge gyá jʉ’.

¹⁹ Mèŋ n gʉa ná pʉ̀a pie mèŋ n kwoŋo wɔ́b, ńkaga wɔ́b métsèm, ńcúa mbɔɔ cǔa. Pú’u la, pi zeŋe nnɛ́ éfa’a fà’, ḿbiŋ ńkúbe mà gẅi.

²⁰ Mèŋ wɔɔn, mbà mèŋ n tǒ ńtyé ńne ńkwá’te ncwò ndá, ńgwɔ́ gie nyìŋ lɔɔn ńjú’ ngyè yɔ̀ɔn, ńtsɔ́’ ncwò ndá, mbà mèŋ n ge kúu ndá ngàŋ, é ńnéŋe ssé peg ngàŋ pfɛ́ɛ mmó, angàŋ piŋ ńnéŋe ssé peg yé pfɛ́ɛ mmó.

²¹ Á ge gÿo gʉa ná nyìŋ gẅie à lÿɔ̌’ ncù tà ńcʉa nò tepòŋ, mèŋ n zẅíŋ à ńnéŋe nà lʉŋe lefùɔ á ngʉ̀ŋe yɔ́ɔn, pá’ mèŋ yɔ́ɔn n da lÿɔ́’ ncù tà ńcʉa nò tepòŋ, Tá wɔ̀ɔn zẅíŋ mèŋ n ńnéŋe ná lʉŋe lefùɔ á ngʉ̀ŋe yé la.

²² Nyiŋ lɔɔn ńgẅiin metuŋó, lélɔg ńjú’u nò, á jú’u nò gie Zẅìge Ssé ne ńgɔɔn mbwo mecú’tè pʉ̀a Kristo lɔɔn.