Ŋwà’ne Ngyà jʉ’ 20 - Nouveau Testament en Ngienboum

Anò nà ngù’ ntsá’

¹ M biŋ ńgyá atsɔ̌ *cÿɔ́’ Ssé fó tÿǒ lepwó ńne sẅɛ́’ɛ, ńgẅiin kí lɔg ńtsɔ́’ ncwò pÿé té lǎŋ, ńgíŋ ńgẅiin tsɔ̌ máamaa tsɛ̂n á pwó yé,

² ńgwoon máamáa nnù ngém ya, á yé gẅie aa nnù ya gie e la fó tàa fʉ̀’e mvfò la, yé gẅie aa ndêbele, ńgíŋ ńgwɔ́ Sátà la, ńdɔgɔ tsɛ̂n wa ńkwɛ́ɛ yé pá’ à ge ké gwɔ́ pɔ́ me nkÿo nà ngù’ ntsá’,

³ ńdeen ńké ńzé’e yé ḿma’a tsɛ̀ɛ pÿé té lǎŋ, ńdɔgɔ kí ńjÿɔ’ɔ yé tsoló, ńtse lê lìi nŋwá’ légwɔ́ gie à tè gíŋe gwá tsɛ̀ɛ mengwòŋo mengwòŋ é fʉte pʉ̀a wɔ́ tà ngù’ ntsá’ e lá’ ńku’. E lá’ ńgwɔ́ tà ńku’, mé ná’a ńkyɛ’ɛ yé ná mûɔ méfʉ̀’.

⁴ N gíŋe ńgyá melʉŋe lefùɔ tyéte. Epʉ̀a tó ńnéŋe mǒ. Mé ná metʉ̀ mbwo pɔ́b lélɔg ńtsɔ́’te ntsaŋ. Mèŋ n gyá mbɔɔ mentʉ́m pʉ̀a pie mé la gwoonte wɔ́b ńzá’ twó sɔ́b, ńtí pá’ pɔ́ zsé yɔ́b pɔ́ ndà’ nò gie Yěsô ka gÿo mé zsé, mbɔɔ nò Ssé. Mbà pɔ́ ka tè gu’te nkʉ̀’ʉ nɔ̀ɔn wɔ́, ńké tè tútú we gu’te, aliŋé nɔ̀ɔn ŋwɛ́ piŋ tè na zí yɔ́b kà nà pwó yɔ́b wɔ́. Pɔ́ fó lá’ mepfó ḿbiŋ nzèm, ńgíŋ ńgwɔ́ wó, pâ Kristo púte sá’ njÿó nà ngù’ ntsá’. Á lɔgɔ ńgwɔ́ ndùŋ mvfò *lezimé nà legwé.

⁵ Petsɔ́ mepfó ké tè fó la’ mepfó ḿbiŋ nzèm ńgíŋ ńgwɔ́ wó té gwɔ́ gie yɛ̌ ngù’ ntsá’ e kǔ’ wɔ́.

⁶ Pàshÿó mbòŋo, ée pʉ̀a pie é ge zíme nà legwé ná ndùŋ mvfò lezím, ée pʉ̀a pie ée kwà’ pe Ssé. Legwé we mbɔ́ɔntè yépʉ́a tè gíŋe ńku’u lé kíbe wɔ́b gwɔ́. Pɔ́ ge gÿo gwɔ́ pànuŋe pwɔ̀’ pe Ssé, mbɔɔ pe Kristo, pâ Kristo sá’ jÿó nà ngù’ ntsá’.

Ncù gwǎ Sátà

⁷ Mengù’ ntsá’ mɛ̌ ge gÿo gwɔ́ tà ku’, mé gʉa tsɛ̀ɛ ndá tsǎŋ gie Sátà aa tsoló la, ńkyɛ́’te metsɛ̂n ná ye ńnyé yé.

⁸ À kẅɛ, légwa fʉte pʉ̀a pie ée tsɛ̀ɛ mengwòŋo mengwòŋ, á nà njÿó mesǎg lekùa. Mé tóŋ mɔɔn mengwòŋ lê Gɔg ńgíŋ ńtóŋ lê Magɔg, éfʉte wɔ́b pú’u, é cú’te wɔ́b lélɔg ńgʉa ḿma’ ncù. Pɔ́ gyɔ́ɔn pá’ memvòm sàŋasáŋa gie áa ngʉ̀ŋe ntse té pàa la.

⁹ Pɔ́ pú ńjÿó jʉ’ ntsèm ndùmo ssé tsetsá’, ńkéle mbàa jʉ’ gie pʉ̀a Ssé cú’te ńnéŋe wó, á gwɔ́ tÿǒsoŋ gie e Ssé kwoŋ tɛ’. Tá’ etsɔ́ mmɔ̌g é ké fó tÿǒ lepwó, ńtó ńtuɔ wɔ́b.

¹⁰ Sátà gẅie á kě ne fʉte wɔ́b la, mé tsó yé ḿma’a tsɛ̀ɛ gÿǒon mmɔ̌g *mekʉ̀a, á lejʉ́ŋ nkʉ̀’ʉ nɔ̀ɔn mbɔɔ lejʉ́ŋ *ntsẅì nkʉ̀ Ssé we cÿɔ̌ nò. Pɔ́ lá’a ńtsẅé wó, ńgyá ngʉ̀ngʉ̀ ntí ntí, á zsó pɔ́ tsẅɛ́’, á nà ngù’ nkɔ́ɔn lê nkɔ̌ɔn.

E Ssé ne ŋaga pʉ̀a mesoŋ nà fʉ̀’ ye nzsònzèm

¹¹ M biŋ ńgyá tsɔ̌ máamáa lʉŋe lefùɔ tyé, ńgwɔ́ féfɔ́gɔ, ńgyá mbɔɔ nyìŋ gẅie à ńnéŋe mǒ. Tsetsá’ pɔ́ lefaŋ pú fó mvfò yé ńkÿo. À yɔ́b jʉ’ té gíŋe ńgwɔ́ wó wɔ́.

¹² M biŋ ńgyá mepfó ssé, é melÿò mbɔɔ penkʉ́, pɔ́ tyéte mvfò lʉŋe lefùɔ. N gíŋ ńgyá pá’ mé nyɛ́’ɛ meŋwà’ne. Mé gÿo ńgíŋe nyɛ́’ɛ yetsɔ́, á gwɔ́ gie mé la ŋwe’e mezíŋ pʉ̀a pie pɔ́ gẅiin légwɔ́ tèmì tsoló. Mé lɔgɔ mmó gie mé la ŋwe’e tsɛ̀ɛ meŋwà’ne ńŋag mepfó ssé, ńŋaga wɔ́b pɔ́ pá’ mefà’ mɔ́b ka gwɔ̌.

¹³ Ntse té pàa ná mepfó pʉ̀a pie é la fÿɛ́ɛ ntse. Legwé mbɔɔ lá’ mepfó gíŋe ńná pɔ́b mepfó, mé ŋaga wɔ̌wɔ́ɔ ná pá’ mefà’ mé la gwɔ́.

¹⁴ Mé lêen ńké ńzé’e legwé mbɔɔ lá’ gie mepfó ée wó, ḿma’a tsɛ̀ɛ lepÿé mmɔ̌g. Lepÿé mmɔ̌g ŋwɛ́ lɔgɔ ńgwɔ́ legwé mbɔ́ɔntè yépʉ́a.

¹⁵ Wɔ̌wɔ́ɔ gẅie mé la tè gyá lezíŋ sé tsɛ̀ɛ ŋwà’ne gie mezíŋ pʉ̀a pie pɔ́ gẅiin le gwɔ́ tèmì ée tsoló wɔ́, mé ma’a yé tsɛ̀ɛ lepÿé mmɔ̌g.