Ŋwà’ne Ngyà jʉ’ 2 - Nouveau Testament en Ngienboum

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Efeso

¹ Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Efeso. Ŋwe’e ngie: Nyìŋ gẅie à gẅiin mecÿɔ́’ saŋ sɔɔn mbʉ́a nà lɔ̌ɔn pwó yé ye tʉ̀ la, yé gẅie à gwɔ giŋ, melâm sɔɔn mbʉ́a mie mé la lɔgɔ tʉ̌ gɔ̂l ńnyɛte é tÿɔ́’ɔ yé ńnéŋe soŋ la, à ne ńgɔɔn ngie:

² Mèŋ n ne ńzsé mefà’ mí, ńne ńzsé gẅi letéŋe zì’i, ńzsé pá’ pi kag tʉ̀ pú’u, ńzsé pá’ pi tè kwoŋo légwɔ́ gie pia pʉ̀a pie é gẅiin ssé ntʉ́m e teme kwò wɔ́, ńne ńzsé pá’ pi kéen ńdʉŋte pʉ̀a pie pɔ́ gɔɔn ngie pɔ́ ée megàŋ ntúm Yěsô tá ńgwɔ́ pɔ́ pà gwaa ńkú, tà ńzsé ngie pɔ́ gwɔ́ pɔ́ megàŋa cÿɔ̌ nò.

³ Pi ne ńkaga tʉ̀. Pi ka gyá ngɔ́’ ńtí wɔ̀ɔn, ńké tè kʉ́a.

⁴ Tá’, mèŋ n ké ńne ńda’a gẅi ńtí nò gie pi cʉ’ʉ́ ńkwoŋo wɔ̀ɔn pá’ pi laa nzyeté ńkwoŋo wɔ̀ɔn pú’u wɔ́.

⁵ Pi ké ńkímte jʉ’ gie pi la tyé wó tá ńgwe ssé, ńkúbe mà gẅi ńgíŋe fa’ mefà’ mie pi lɔ̌ɔn fa’a. Tà á té pú’u wɔ́, mbà mèŋ n dɔɔn ńgwaa tó, pi nyé pɔ́ tè kúbe mà, mbà mèŋ n ge kaa gẅi lâm, é kúbe jʉ’ yé.

⁶ Tá’, ammó gie mèŋ n ne ńgyá ngie pi ee mǒ ńne ńgÿo mboŋó, áa pá’ mefà’ pʉ̀a ná nùɔ gie mé tóŋo lê Nikolayide é ne ḿbÿɔ́gɔ gẅi ndʉŋ ndʉŋ pá’ é pÿɔ́gɔ wɔ̀ɔn yɔ́ɔn.

⁷ Nyìŋ lɔɔn ńgẅiin metuŋó, á jú’u nò gie Zẅìge Ssé ne ńgɔɔn mbwo mecú’tè pʉ̀a Kristo lɔɔn. Mèŋ n ge gÿo ná ntɔ̌ɔn gẅie éfóo ná tÿǒ gie á gÿo mé gwɔ́ wó, á mbwo nyìŋ gẅie à lÿɔ̌’ ncù tà ńcʉa nò tepòŋ, à jÿó. Yɛ̌ tÿǒ áa tsɛ̀ɛ nká’a Ssé.

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Smirne

⁸ Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋ Smirne. Ŋwe’e ngie: Nyìŋ gẅie aa ndùŋ mvfò, ńgwɔ́ nzsònzèm, nyìŋ gẅie à la kwé ḿbiŋ ńgíŋ fóo lá’ mepfó, à ne ńgɔɔn ngie:

⁹ Mèŋ n ne ńzsé ngʉ̀ngʉ̀ gi, ńne ńzsé ngie pi gwɔ́ pɔ́ mepóŋ, tá’, ńké ńgwɔ́ nà lezsě Ssé ńgwɔ́ ngàŋa mmó. Mèŋ n giŋé ńne ńzsé ngie pʉ̀a pie pɔ́ gɔɔn ngie pɔ́ ée pà Yuda, tá ńké ńdɔgɔ pɔ́ ncwò ńgɔɔn, pɔ́ ne ńkíme lezíŋ sí té poŋ. Pɔ́ gwɔ́ pɔ́ pʉ̀a pe cú’tè ye Sátà.

¹⁰ Áa nénʉ́ ngie pi ge gyá ngɔ́’, tá’, tà pi ké ḿbɔ́g. Pi zsé ngie Sátà ge ma’ tsɔ́ pʉ̀a pí ndá tsǎŋ lélɔg ńdʉŋte gẅi ńgyá. Pi gyá ngʉ̀ngʉ̀ gyǎ é lyɛ̌’ lá’ legém. Pi ké ńzsé pɔ́ ndà’ wɔ̀ɔn, tà mbɔɔ pá’ mé lɔɔn ńne ńzẅéte gẅi ńtí pú’u. Mèŋ n ge lá’ tɔ’ ngú’ gi, á gwɔ́ pá’ pi ge lá’a gwɔ́ pɔ́ wó.

¹¹ Nyìŋ lɔɔn ńgẅiin metuŋó, lélɔg ńjú’u nò, á jú’u nò gie Zẅìge Ssé ne ńgɔɔn mbwo mecú’tè pʉ̀a Kristo lɔɔn. Nyìŋ gẅie à lÿɔ̌’ ncù tà ńcʉa nò tepòŋ, lekwě nà mbɔ́ɔntè yépʉ́a à tè lá’ kíbe yé wɔ́.

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Pɛrgame

¹² Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Pɛrgame. Ŋwe’e ngie: Nyìŋ gẅie à gẅiin nně ncù yá gie e sẅité, ńgíŋ ńgwɔ́ mengʉ́ŋ mémbʉ́a la, à ne ńgɔɔn ngie:

¹³ Mèŋ n ne ńzsé jʉ’ gie pi ńnéŋe wó. Alʉ̀ŋe lefùɔ Sátà tyé jʉ’ó tá’, n ké ńne ńzsé ngie pi cwoŋó ńcʉŋe pɔ́ ná mèŋ. Pi laa nyé lézáb ntʉ́m ná mèŋ wɔ́, tà mbɔɔ ná melyɛ̌’ mie mé la zẅé Antipas á mbʉ̀a pi, á nà jʉ’ gie Sátà ńnéŋe wó. Antipas laa nyìŋ ńgɔɔn yé pɔ́ ndà’ nò gie à zsě ná mèŋ.

¹⁴ Tá’, n ké ńgẅiin tsɔ́ mmó gie mèŋ n ne ńda’a gẅi mǒ. Etsɔ́ pʉ̀a ée mbʉ̀a pi ńne ńzába ntʉ́m nà ndɔgtelé Mbalam. Mé gɔɔn Mbalam wá gẅie à la shwóŋó Mbalag, pá’ Mbalag ge lʉ’ lejÿɔ’, pà Israel gwe mǒ. À la tsóte wɔ́b pɔ́ pfɛ́ɛ pfwɔ́’ɔ mbàb gie mé lɔ̌g ńgwá’ messé, mbàŋa lâ pànzwě tsetsɛ̀ɛ pɔ́b é gíŋe ḿbumte wɔ̌wɔ́ɔ pâ pɔ̌ nuŋe nuŋe.

¹⁵ Etsɔ́ pʉ̀a gíŋe ńgwɔ́ mbʉ̀a pi gí pie pɔ́ ne ńjú’u ndɔgtelé pʉ̀a pie ée nà nùɔ gie mé tóŋo lê Nikolayide.

¹⁶ Pi ké ńkúbe mà gẅi, tà á té pú’u wɔ́, mbà ntyě té ge sag tá mèŋ n tóo mbʉ̀a pi wɔ́, é tó lɔg nně ncù gie e kẅɛɛ ncwò mèŋ, é ma’a wɔ́b lê ncù.

¹⁷ Nyìŋ lɔɔn ńgẅiin metuŋó, lélɔg ńjú’u nò, á jú’u nò gie Zẅìge Ssé ne ńgɔɔn mbwo mecú’tè pʉ̀a Kristo lɔɔn. N ge lá’ náa mána gẅie aa lelyěen, mbɔɔ féfɔ́gɔ kwá’a, á mbwo nyìŋ gẅie à lÿɔ̌’ ncù tà ńcʉa nò tepòŋ, mbà mé ŋwe’é lezíŋ sẅé ná kwá’a ŋwɛ́, é gwɔ́ sie tsɔ̌ nyìŋ tè zsé tà ndí ndà’ nyìŋ gẅie mé nǎ kwá’a ŋwɛ́ mbwo yé.

Nkʉ̀ gẅie é gee mbwo cú’tè pʉ̀a Kristo gie áa tÿǒsoŋo Tiatire

¹⁸ Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Tiatire. Ŋwe’e ngie: Míŋ Ssé gẅie menÿɔ́g mé kyɛ’ɛ jʉ’ pá’ lʉ́me mmɔ̌g lá, mekwò mé gwɔ́ pá’ tʉ̌ nʉ̀ la, à ne ńgɔɔn ngie:

¹⁹ Mèŋ n ne ńzsé mefà’ mí, ńne ńzsé pá’ pi gẅiin nkwòŋe tsetsɛ̀ɛ pi pú’u, ńne ńzsé pá’ pi záb ntʉ́m ná mèŋ pú’u, ńne ńzsé pá’ pi ńnéŋe twó fa’a fà’ lê kwɔ́gɔ nnɛ́ pú’u, ńne ńzsé ngie mefà’ mie pi ee fʉ̀’ɔɔn ńne fa’a gyɔ́ɔn ńcʉa me fʉ̀’e mvfò.

²⁰ Tá’, mèŋ n ké ńne ńda’a gẅí, á nue Jizabel aa lejʉ́ŋ pi, pi zẅíŋe zẅǐŋ. Mánzwě áwɛ̌ ne shwóŋó pʉ̀a ngie à tsẅii nkʉ̀ gẅie éfóo mbwo Ssé, ńdɔgɔ pú’u, éfʉte ngàŋa fà’ yɔ́ɔn, ńne ńzí’i wɔ́b pá’ mbàŋa lâ pànzwě tsetsɛ̀ɛ pɔ́b lɔɔn ńkẅɛ́te wɔ̌wɔ́ɔ pâ pɔ̌ nuŋe nuŋe, mbɔɔ lépfɛ́ɛ pfwɔ́’ɔ mbab gie mé lɔ̌g ńgwá’ messé.

²¹ N ka na’á ńne ńzẅí’te zẅi’té ngie à kúbe mà we. Tá’, à tè ne ńkwoŋo lékúbe mà mpfwɔ́’ ŋwɛ́ wɔ́.

²² N kě ńgwɔ́ pá’ɔɔn, n ge tsó yé ma’a kǔ, à gyá ngɔ́’ tɛ’. N ge gíŋe gÿo e pʉ̀a pie pâ pɔ̌ gÿo nò gÿɛ́ é gyá ngɔ́’ tɛ’. Pɔ́ ge gyá, pá’ pɔ́ lɔɔn tè kúbe mà wɔb, ńkẅɛɛ nà ntí mefà’ mie pâ pɔ̌ kaa mǒ wɔ́.

²³ N ge zẅéte gubé yé. À cʉa pú’u, mecú’tè pʉ̀a Kristo ntsèm zsé ngie mèŋ n gee nyìŋ gẅie à zsé nkwaŋá pʉ̀a mesoŋ, ńgíŋe ńzsé mbɔɔ mmó gie pɔ́ ne ńtsɔ́ɔn. Mèŋ n ge gÿo fó pɔ́ nà mmó gie wɔ̌wɔ́ɔ gÿǒ, tá zsé pá’ mèŋ n ge gÿo ná ngàŋ.

²⁴ Mèŋ n ge gɔɔn nò fʉ̀’ɔɔn mbwo pi petsɔ́ pʉ̀a tsɛ̀ɛ cú’tè pʉ̀a Kristo gie áa tÿǒsoŋo Tiatire, pi pie pi tè ne ńzẅíŋe ndɔgtelé pɛ̌ pʉ̀a wɔ́, ńké tè ne fa’a lézsé mmó gie pɔ́ tóŋo lê kwà’ nò nénʉ́ gie Sátà la gÿo pɔ́ zsé wɔ́. Mèŋ n těen ńge ńzába tsɔ́ pì’ ye ndyɛ̀’ɛ twó pi wɔ́.

²⁵ Mèŋ n ne ńzɛ́te pɔ́ ndà’ ngie, ammó gie pi gẅiin, pi nyɛte ńkú’te mboŋó tà ńkú fʉ̀’ gie mèŋ n ge gÿo tó.

²⁶ Á gʉa ná nyìŋ gẅie à ge gÿo lÿɔ́’ ncù tà cʉa nò tepòŋ, á nyìŋ gẅie à ge gÿo é ké ne gÿo pɔ́ mmó gie mèŋ n da tsẅi ngie mé ne ńgÿo, á légÿo pɔ́ pú’u, tà ńkúu lyɛ’ɛ́ nzsònzèm, mbà mèŋ n ge lá’ ná metʉ̀ mbwo ye, à lɔg sá’ patè zsé Ssé.

²⁷ Angàŋ ge lá’ lɔgɔ tÿǒ tʉ̌, ésá’a wɔ́b, é cúa wɔ́b nẅɛ’ pá’ à lɔɔn ńgwɔ́ mé nẅɛ’ mekʉŋe tsá’a pú’u. N ge lá’ ná metʉ̀ mbwo ngàŋ pá’ Tá wɔ̀ɔn la ná metʉ̀ né mèŋ yɔ́ɔn,

²⁸ é gíŋe náa cÿɔ́’ saŋ gẅie à kwɔ̌’, njÿó gwóon ńdʉ́a nê ngàŋ.

²⁹ Nyìŋ lɔɔn ńgẅiin metuŋó, lélɔg ńjú’u nò, á jú’u nò gie a Zẅìge Ssé ne ńgɔɔn mbwo mecú’tè pʉ̀a Kristo lɔɔn.