Ŋwà’ne Ngyà jʉ’ 16 - Nouveau Testament en Ngienboum

Mentú’ mie e Ssé lɔgɔ ńda’te ngie lóŋ we gyǎŋ.

¹ N jú’ tsɔ̌ ngyè tetʉ́ʉ fó tsɛ̀ɛ jʉ’e Ssé ńne ńgɔɔn mbwo *Mecÿɔ́’ Ssé pa sɔɔn mbʉ́a ngie: Pi gʉa ndùmo ssé tsetsá’, ḿpfɛte gyáŋa lóŋ Ssé gie áa tsɛ̀ɛ mentú’ sɔɔn mbʉ́a lɛ.

² Andùŋ mvfò gʉa ḿpfɛte ye ntú’ ndùmo ssé tsetsá’. Etsɔ̌ ntí mefʉ̌ŋ gie mé líe é vege pʉ̀a vege, ḿbiŋ ńgyáŋ pá’ɔɔn tɛ’, é kẅɛte ná pʉ̀a mesoŋ pie mé la cÿɔ’ɔ liŋé nkʉ̀’ʉ nɔ̀ɔn ná pɔ́b, pɔ́ piŋ ńne ńgu’te tútú nkʉ̀’ʉ nɔ̀ɔn ŋwɛ́.

³ Ambɔ́ɔntè yépʉ́a pfɛte ye ntú’ tsɛ̀ɛ ntse té pàa. Ntse té pàa sele ńcʉ́’ pá’ metse nyìŋ gẅie à kwě la. Akɔ́ɔkɔ́ɔ gie áa tsɛ̀ɛ ntse té pàa tà ńŋele ŋele pú ńkwé.

⁴ Ambɔ́ɔntè yétá pfɛte ye ntú’ á tsɛ̀ɛ memí mbɔɔ tsɛ̀ɛ mesá’a ntse, mentse ŋwɛ́ sele ńcʉ́’ metse.

⁵ Mèŋ n jú’ *cÿɔ́’ Ssé gẅie à la gẅiin nò ná mentse ne ńgɔɔn ngie: Gù gẅie ɔ́ɔ wó, mbà ɔ̀ laa wó, Gù gẅie ɔ́ɔ Ssé, ɔ̀ gÿo pɛ́’ɛ á gwɔ́ pɔ́ pá’ á kɔ’ɔ́ gwɔ́ pú’u, á nue, ɔ̀ gÿo pɔ́ ndʉŋ ndʉŋ.

⁶ Á nue pɔ́ la pfɛte metse pʉ̀a pú, mbɔɔ me pà Ntsẅi nkʉ̀ pú. Ɔ̀ kě ńná metse pɔ́ nú. Á gwɔ́ pá’ á kě ńne ńzɛ́te ngie mé gÿo ná pɔ́b pú’u.

⁷ N jú’ ngyè nyìŋ fóo jʉ’ gie mé nuŋe pwɔ́’ wó ńgɔɔn ngie: Cʉ̀apʉ̀a Ssé Ngàŋa tʉ̀ ntsèm, agù létsɔ́’te ntsaŋ aa nénʉ́, ḿbiŋ ńgwɔ́ ndʉŋ ndʉŋ.

⁸ Ambɔ́ɔntè lekùa pfɛte ye ntú’ ná nèm, e Ssé gÿo pá’ nèm ge lɔg mmɔ̌g tuɔ pʉ̀a mesoŋ.

⁹ Ejʉ’ lêen ńké ḿbú ńdum lum tà ńtuɔ pʉ̀a mesoŋ. Pɔ́ zoonte lezíŋ Ssé, gẅie yé zɔ gÿo tá pɔ́ gyá yɔɔn ngɔ́’ ntí ntí, ńgÿo pú’u, ńké tè kúbe mà wɔ́b ńnáa legú’ mbwo Ssé wɔ́.

¹⁰ Ambɔ́ɔntè yétʉ̀a pfɛte ye ntú’ nà lʉŋe lefùɔ nkʉ̀’ʉ nɔ̀ɔn wɛ̌. Nzěm pú ńjÿó lá’a nɔ̀ɔn ŋwɛ́. Epʉ̀a mesoŋ gyá ngɔ́’ gyǎ tà ḿpfɛ́ lʉ́me yɔ́b.

¹¹ Ngʉ̀ngʉ̀ yɔb mbɔɔ mefʉ̌ŋ mɔ́b gÿo pɔ́ zoonte Ssé gẅie aa tÿǒ lepwó, tá’ ńké tè kúbe mà wɔb, ńgwá’ mefà’ tepòŋ mɔ́b wɔ́.

¹² Ambɔ́ɔntè ntɔgɔ́ pfɛte ye ntú’ tsɛ̀ɛ tsɔ̌ máamáa mí gẅie mé tóŋo lê Efalate. Ntse mí ŋwɛ́ júm, ńtsɔ́’ nzsè mbwo mefùɔ pie éfóo Sá’ nèm.

¹³ N gyá tsɔ̌ *ssé tepòŋ fóo ncwò máa nnùngém ńkẅɛ, yetsɔ̌ fóo ncwò nkʉ̀’ʉ nɔ̀ɔn ńkẅɛ, yetsɔ̌ fóo ncwò *ntsẅì nkʉ̀ Ssé we cÿɔ̌ nò ńkẅɛ, tà pɔ́ gwɔ́ metá, ńgwɔ́ pɔ́ pá’ metetɔ́’ la,

¹⁴ ée pú’u, ńgwɔ́ messe tepòŋ mie é gÿo menò mmɔɔn mmɔɔn. Pɔ́ ge gʉa gyá mefùɔ pie ée ndùmo ssé tsetsá’ ntsèm, légwɔ́ gie pɔ́ ge cú’te wɔ́b lɔg zẅí’te ncù gẅie é ge lá’ gwɔ́ ná máamáa lyɛ’ɛ́ lá’ gie, e Ssé ngàŋa tʉ̀ ntsèm ge lá’ ŋag pʉ̀a mesoŋ.

¹⁵ Cʉ̀apʉ̀a gɔɔn ngie: Pi ké ńzsé ngie, mèŋ n ge tó pá’ ntsǒŋ la. Ashÿó mbòŋo aa nyìŋ gẅie mèŋ n ge gwɔ tó, á le ne ńdyé wɔ́, menzsǒ mé gwɔ́ ná yé, ḿbɔ́gɔ pá’ à ge lu ssé giŋ té jÿɔ́g nzsǒ, eshʉ́ kúu yé.

¹⁶ *Messé tepòŋ pɛ̌ lêen ńké ńcú’te mefùɔ nà tsɔ́ jʉ’ gie mé tóŋo ná shwóŋè pà Heber ngie: Amagedoŋ.

¹⁷ *Cÿɔ́’ Ssé mbɔ́ɔntè sɔɔn mbʉ́a pfɛte ye ntú’ tÿǒ tsɛ̀ fÿɔ́g. Etsɔ̌ ngyè tetʉ́ʉ fóo ná lʉŋe lefùɔ gie áa tsɛ̀ɛ jʉ’e Ssé ńkẅɛ, ńgɔɔn ngie: Á zsoté

¹⁸ Menně mbʉ̀ŋ kyɛ’ jʉ’, mé jú’ mengyè pʉ̀a mesoŋ, lefaŋ vɛ́te ngʉ̀a ngʉ̀a. Atsetsá’ pú ńcʉ’ʉ tɛ’, tà mbà tà fó pá’ nyìŋ mesoŋ aa ndùmo ssé tsetsá’, á laa zɔɔn ńcʉ’ʉ pú’u wɔ́.

¹⁹ Máamáa tÿǒsoŋ wɛ̌ shʉ́ate nzsè tá. Metÿǒsoŋ mie ée ngwòŋo ngwòŋ é keme. E Ssé lêen ńké ńkímte máamáa tÿǒsoŋo Mbabilonia, ńgÿo á nú ntú’ melù’ gyáŋa lóŋ yé gie á pú ńgá’.

²⁰ Melá’ mie ntse la kéle ńnéŋe soŋ épú shú ńkúu ntse. Mé té gíŋe ńgyá mekwɛ́ mie ée ndùmo ssé tsetsá’ wɔ́.

²¹ Memáa megẅì mie à ńgwɔ́ tà’ jÿó kílo móm lekùa, fó tÿó ńgwete ná pʉ̀a mesoŋ. Epʉ̀a mesoŋ zoonte Ssé, ńtí ngɔ́’ gie pɔ́ gyǎ, é fóo nà megẅì, á nue yɛ̌ ngɔ́’ la pú ńtʉ tɛ’.