Ŋwà’ne Ngyà jʉ’ 13 - Nouveau Testament en Ngienboum

Anò menkʉ̀’ʉ menɔ̀ɔn mépʉ́a

¹ Mèŋ m biŋ ńgyá tsɔ̌ nkʉ̀’ʉ pà nɔ̀ɔn fóo tsɛ̀ɛ ntse té pàa ńkẅɛ, ńgẅiin metwó sɔɔn mbʉ́a, ńgẅiin mendóŋ legém, yɛ̌ yɛ̌ ndóŋ wɔ́ gẅiin cÿɔ́’ɔ lefùɔ, mbà mé ŋwe’é lezíŋ sie mé lɔgɔ ńzoonte Ssé zoonte á ná yɛ̌ yɛ̌ twó yé wɔ́.

² Nɔ̀ɔn gẅie n da gyá à la gwɔ́ pɔ́ pá’ ŋɔ́ɔn ŋʉ́, mekwò mé gwɔ́ pá’ me tsɔ́ máamáa tsò, ncwò wé gwɔ́ pá’ we pú’ ntʉ̀. Máamáa nnù ngém wa ná metʉ̀ mé mbwo yé, ńnáa lʉŋe lefùɔ yé né yé, ńnyé lésá’ pʉ̀a mbwo yé.

³ Atsɔ̌ tà’ ná twó sé la gwɔ́ pɔ́ pá’ fʉ̀’ gie mé ka néŋ fʉ̌ŋ mǒ tà ńgwɔ́ é zẅé yé zẅé la, tá fʉ̌ŋ ŋwɛ́ gie e kɔ̌ɔn ńgwɔ́ gie ńgwɔ́ é zẅé yé zẅé gwɔ́ mbà e kéen ńtʉ. Epʉ̀a ndùmo ssé tsetsá’ gyá pú’u, ḿbú ḿmɔɔn, ńzẅɛ ńcʉ́me nzèm yé.

⁴ Pɔ́ gu’te nnù ngém ya, á nue à ka nyé lésá’ pʉ̀a á mbwo nɔ̀ɔn, ńne ńgu’te nɔ̀ɔn, ńgɔɔn ngie: À wɔ̌ gẅiin tʉ̀ pá’ nɔ̀ɔn? Ńgwɔ́ wɔ̌ ma’a yé lê ncù?

⁵ Mé ná ncwò gẅie à ge lɔg fwɔ’te meshwóŋè ngwág, mbɔɔ pá’ à ge lɔg zoonte Ssé né yé, ńnyé yé pá’ à ge sá’ sé lefùɔ á nà mesaŋ ntsɔ̀b pʉ́a lê móm lekùa.

⁶ Nɔ̀ɔn ŋwɛ́ zye léshwóŋó té poŋ ná Ssé, ńzoonte lezíŋ Ssé, ńzoonte jʉ’ gie e Ssé ńnéŋe wɔ́, ńzoonte mbɔɔ pʉ̀a pie pɔ́ ńnéŋe tÿǒ lepwó.

⁷ Mé nyé yé ngie à gʉa ḿma’ pʉ̀a Ssé lê ncù ma’ tà ńcʉa wɔ́b, ńnyé yé ngie à sá’ mengẅɛ̀ ntsèm, ngie à sá’ pʉ̀a ntí ntí, ngie à sá’ pàshwóŋó meshwóŋè ntí ntí, ngie à sá’ mengwòŋ ntsèm.

⁸ Pʉ̀a metsèm pie ée ndùmo ssé tsetsá’ ge gÿo kẅí’te mvfò yé, é gu’te yé. Mé gɔɔn ngwòŋ pʉ̀a metsèm pie mé la tè ŋwe’e lezíŋ sɔ́b á tsɛ̀ɛ ŋwà’ne le gwɔ́ wó, tà fó fʉ̀’ gie njÿó la zye wɔ́. Aŋwà’ne ŋwɛ́ áa ye mûɔ *Njʉ̀njÿò gẅie mé la zẅé yé.

⁹ Nyìŋ lɔɔn ńgẅiin metuŋó lélɔg ńjú’u nò, á jú’.

¹⁰ Nyìŋ lɔɔn ńgwɔ́ gẅie mé la záb ngie à ge lá’ gwɔ́ pu’u ncù, mbà à ge lá’ gwɔ́ pɔ́ wɛ̌. Nyìŋ gẅie mé la záb ngie mé ge lá’ lɔg nně ncù, é zẅé yé, mé ge lá’ lɔg pɔ́ yɛ̌ zẅé yé. Yɔɔn nò lɔgɔ ńgɔɔn ngie pʉ̀a pie ée pe Ssé gẅiin léshÿɔg, ńké ńne ńzába pɔ́ ntʉ́m nà Ssé.

¹¹ Mèŋ m biŋ ńgyá wetsɔ̌ nkʉ̀’ʉ nɔ̀ɔn ne fóo tsɛ̀ɛ tsetsá’ ńkẅɛɛ. Mendóŋ mé gwɔ́ mémbʉ́a pá’ me mûɔ *Njʉ̀njÿò, tá á ne ńgɔɔn nò pá’ máamáa nnù ngém la.

¹² À la gẅiin metʉ̀ ndùŋ mvfò nɔ̀ɔn, lélɔg ńgÿo menò, á nà lezíŋ sé, ńne ńgÿo mânyìŋ ntsèm ndùmo ssé tsetsá’ kẅí’te mvfò ndùŋ mvfò nɔ̀ɔn, ńgu’te yé. Á nɔ̀ɔn wá gẅie fʉ̌ŋ laa ná yé tà ńgwɔ́ pɔ́ gie à ńgwɔ́ é zẅé yé zẅě ḿbiŋ ńtʉ la.

¹³ Wɔɔn nɔ̀ɔn ḿbɔ́ɔnte yépʉ́a pú ńgÿo memáa menò mmɔɔn mmɔɔn, tá ńgÿo mmɔ̌g fó tÿǒ lepwó sẅɛ́’ɛ ndùmo ssé tsetsá’, mânyìŋ ntsèm tyé ne ńgyá.

¹⁴ Á lɔg pá’ mé la náa yé metʉ̀ lélɔg ńgÿo menò mmɔɔn mmɔɔn á nà lezíŋ wetsɔ̌ nɔ̀ɔn wa, ńdÿɔgte pʉ̀a mesoŋ pie ée ndùmo ssé tsetsá’, ngie pɔ́ pwóon tútú ńdɔg ńgu’te nɔ̀ɔn gẅie mé la lɔg nně ncù ńnéŋ fʉ̌ŋ ná yé tá à tè kwé la. Wɛ̌ tútú à gwɔ́ gẅie à sẅé nɔ̀ɔn ŋwɛ́.

¹⁵ Mé gíŋe ńnáa yé metʉ̀ pá’ à ge gÿo tútú gẅie mé lɔ̌g fʉ’te nɔ̀ɔn ŋwɛ́, à ŋele, ńzsé ngie tútú ŋwɛ́ ge ku’u légɔɔn nò, é ku’u lézẅéte pʉ̀a metsèm pie pɔ́ kaa zẅíŋe légu’te yé tútú wɔ́.

¹⁶ Nɔ̀ɔn we mbɔ́ɔntè yépʉ́a gÿo ná ntí gie wɔ̌wɔ́ɔ, ge gẅiin liŋé á nà pwó yé kà ná zǐ yé wɔ́. Tà mbɔɔ pá’ à lɔɔn ńgwɔ́ pɔ́ mênkʉ́, á ndÿò, á ngàŋa mmó, á mbóŋ, á ndù nnɛ́, á nkwɔɔn.

¹⁷ Nyìŋ lɔɔn ńgwɔ́ á le júu mmó, kà lésẅiŋ wɔ́ té gwɔ́ gie à gẅiin yɛ̌ liŋé gie ée lezíŋ ndùŋ mvfò nɔ̀ɔn ŋwɛ́, ńgíŋe ńdɔgɔ ńgwɔ́ menómbà mie é cú’te ńgwɔ́ lezíŋ sé wɔ́.

¹⁸ Á poŋ ngie e pʉ̀a cwoŋo ńkwaŋte mboŋó. Nyìŋ lɔɔn ńgẅiin legyè á liŋ menómbà mie é cú’te ńdɔgɔ ńda’te lezíŋ nɔ̀ɔn. Yɛ̌ nómbà lɔgɔ ńgwɔ́ lezíŋ tsɔ̌ nyìŋ mesoŋ. Áa ntsɔ̀b ntɔgɔ́ lê móm ntɔgɔ́ nzèm nkÿo ntɔgɔ́ (666).