Ŋwà’ne Jâŋ 9 - Nouveau Testament en Ngienboum

Nyìŋ gẅie mé la gwaa zyé yé á gwɔ́ fʉ̀ menÿɔ́g

¹ Yěsô gÿo ne ńcʉa tsɔ́ jʉ’, ńgyá tsɔ̌ fʉ̀ menÿɔ́g, mbà mé la zyé yé á gwɔ́ pɔ́ fʉ̀.

² *Ngàŋa kwò Yěsô zɛ́te yé ngie: Tsítsà, wɔɔn nyìŋ gwaa kẅɛɛ lepfòm, ńgwɔ́ fʉ̀ menÿɔ́g pá’ɔɔn, mbà wɔ̌ gÿo nò tepòŋ? Yé kà má we, kà tá we?

³ Yěsô tsɔ́’ ngie: Á té gwɔ́ pɔ́ ngie yé kà pʉ̀a pie é la zyé yé la fʉa tsɔ́ nò wɔ́. Àa fʉ̀ á gwɔ́ pɔ́ ngie e Ssé cʉa ná yé ńdá’te mefà’ mé.

⁴ Á ne ńzɛ́te ngie, njÿó lɔɔn ńnyé wó pá’ɔɔn, pege fà’ mefà’ nyìŋ gẅie à la túmo wɔ̀ɔn. Nzèm ge síŋ, atsɔ̌ nyìŋ le gíŋe ńku’u léfa’a fà’ wɔ́.

⁵ Afʉ̀’ gie mèŋ n nyé tsɛ̀ɛ njyó, mèŋ, n gwɔ́ kyɛ̀’ɛ njÿó.

⁶ Yěsô gɔɔn pú’u, ńtsɔ́g metyé ssé, ńtyɛ́bte tsetsá’ ńdɔg ńzɔ́’te menÿɔ́g fʉ̀.

⁷ Ńgɔɔn né yé ngie: Gʉa sɔgɔ tsɛ̀ɛ gÿǒon ntse Siloé. Siloé lɔgɔ ńgɔɔn ngie Letúm. Afʉ̀ menÿɔ́g gʉa wó é sɔg shÿó wé, ńgwaa pìŋ nzèm ńne ńgyá jʉ’.

⁸ Megàŋ nkwɔ’ɔ́ mbʉ̀a pé, lâ pʉ̀a pie pɔ́ ka ne ńgyá pá’ à lúɔ ndúɔ gyá yé fʉ̀’ɔɔn ńgɔɔn ngie: Wɛ̂ tè nyìŋ gẅie à kɔ̌ɔn ńgwá ńnéŋe ssé ńdúɔ ndúɔ wâ?

⁹ Pʉ̀a ne ńgɔɔn ngie aa yé, petsɔ́ gɔɔn ngie ngǎŋ, à sẅé yé sẅé, nyìŋ ŋwɛ́ ne ńgɔɔn ngie: Aa kwà’ mèŋ.

¹⁰ Pɔ́ zɛ́te yé ngie: Menÿɔ́g mú gÿǒ lêkɔ́ tá ńnyɛ́’ɛ?

¹¹ Á tsɔ́’ ngie nyìŋ gẅie mé tóŋo yé le Yěsô, à tyɛbté tsetsá’, ńdɔg ńzɔ́’te menÿɔ́g mɔ́ɔn, ńgɔɔn né mèŋ ngie n gʉa Siloé é sɔg shÿó wɔ̀ɔn, mèŋ n gʉa wó sɔg shyó wɔ̀ɔn, ńdeen ńké ńgyá jʉ’.

¹² Pɔ́ zɛ́te yé ngie: Nyìŋ ŋwɛ́ aa nzɔ̌? Á tsɔ́’ ngie, mèŋ, n kaa zsé.

Pà farisay ne ńzɛ́te fʉ̀ menÿɔ́g nò

¹³ Mé gwóon ńdɔgɔ nyìŋ gẅie á ke ńgwɔ́ fʉ̀ menÿɔ́g la, ńgʉa mvfò nùɔ pà *farisay.

¹⁴ Ńgwaa gwɔ́ pú’u, mbà Yěsô ně ńgwaa tyɛ́bte tsetsá’, é lɔg gÿo menÿɔ́g nyìŋ ŋwɛ́ nyɛ́’ɛ, á gwɔ́ *lyɛ’ɛ́ nzsè pà Yuda.

¹⁵ Pà *farisay zɛ́te yé yɔ́b pá’ á ne ńcʉa pú’u, tá á ne ńgyá jʉ’. Á gɔɔn né pɔ́b ngie, á ně ńdɔgɔ tsetsá’, ńzɔ́’te menÿɔ́g mɔ́ɔn, mèŋ n gʉa sɔg. Mèŋ n gee fʉ̀’ɔɔn ńne ńgyá jʉ’.

¹⁶ Etsɔ́ ntá’ pà *farisay gɔɔn ngie, nyìŋ gẅie à gÿǒ yɛ̂ nò, e Ssé zɔ ka tè yé túm, á nue á kɔ’ɔ lyɛ’ɛ́ nzsè. Petsɔ́ pʉ̀a pɔ́b gɔɔn ngie, ńgwɔ́ nyìŋ tepòŋ gǎ tá ńgÿo yɛ̂ ntí menò mmɔɔn mmɔɔn? Afàgte leen ńké ńgwe tsetsɛ̀ɛ pɔ́b.

¹⁷ Pɔ́ gíŋe ńzɛ́te nyìŋ áwɛ̌ ngie: Ɔ̀ gɔ̌ɔn jú ngie kɔ́ ná nyìŋ gẅie à ně ńnyɛ́’ menÿɔ́g mú? Á gɔɔn ngie, aa *ntsẅì nkʉ̀ Ssé.

¹⁸ Pàsá’a lá’ pà Yuda, ké tè ne ńzẅíŋe ngie ndÿò ŋwɛ́ kɔ’ɔ́ fʉ̀ à pǐŋ ńzeŋe wɔ́. Ńtóŋo tá we pɔ́ má we,

¹⁹ ńzɛ́te wɔ́b ngie: Wɛ̂ aa míŋ gẅì gẅie pì gɔɔn ngie mé la gwaa zyé yé á gwɔ́ fʉ̀ lá? Tà à pǐŋ ńgÿo lêkɔ́ tá ńgyá jʉ’ fʉ̀’ɔɔn?

²⁰ Tá we pɔ́ má we tsɔ́’ ngie: Aa kwà’ míŋ weg, peg ne ńzsé ngie à la kẅɛ ńgwɔ́ fʉ̀ menÿɔ́g.

²¹ Tá ńgʉa ná pá’ á ně ńgÿo tá á ne ńgyá jʉ’ fʉ̀’ɔɔn, mbà peg kaa nò mǒ zsé. Ka wɔ̌ ně ńgÿo menÿɔ́g mé nyɛ́’ɛ wɔ́, mbà peg giŋé tè ne ńzsé wɔ́. Pi zɛ́te yé, à tè nyé ńgwɔ́ pɔ́ múɔ légɔɔn nò gie áa ná yé wɔ́.

²² Tá we pɔ́ má we, gwɔ́ gɔɔn pú’u, á nue pɔ́ la ne ḿbɔ́gɔ pàsá’a lá’ pà Yuda. Á gwaa gwɔ́, mbà pà Yuda ka zǎb ngie nyìŋ lɔɔn ńzẅíŋ ngie Yěsô aa *Nzà’nkÿo, mé fóo ndá cú’tè ńjwoŋo ngàŋ.

²³ Áa mmó gie á gÿo tá we pɔ́ má we gɔɔn ngie pi zɛ́te yé, à tè nyé ńgwɔ́ pɔ́ múɔ wɔ́.

²⁴ Pà *farisay gíŋe ńtóŋo nyìŋ gẅie à kaa fʉ̀ la, ńgɔɔn né yé ngie, tyé mvfò Ssé, éshwóŋó nò nénʉ́. Peg ne ńzsé ngie nyìŋ wɛ̂ aa nyìŋ tepòŋ.

²⁵ Á tsɔ́’ɔ mbwo pɔ́b ngie: Mèŋ n kaa zsé kà aa nyìŋ tepòŋ wɔ́, kà à tè nyìŋ tepòŋ wɔ́ wɔ́. Ayɔ́ɔn mmó gie mèŋ n ne ńzsé, gwɔ́ pɔ́ ngie, mèŋ n kaa fʉ̀ menÿɔ́g, mèŋ n ge fʉ̀’ɔɔn ńne ńgyá jʉ’.

²⁶ Pɔ́ zɛ́te yé ngie: À ně ńgÿo lêkɔ́ ná gù? À ně ńgÿo lêkɔ́ tá menÿɔ́g mú nyɛ́’ɛ?

²⁷ Á tsɔ́’ ngie: Mèŋ n ně ńdá’ shwóŋó gẅí, pi tè zẅí’te. Pi kwóŋo légwɔ́ gie n gíŋe ńgɔɔn gɔɔn mélà’a kɔ́? Tsye pi ne ńtsɔ́ɔn gí lécʉ́’ *ngàŋa kwò yé ka?

²⁸ Pɔ́ leen ńké ńzye lézoonte yé, ńne ńgɔɔn ngie: Gù zɔɔ *ngàŋa kwò we, peg gwɔ́ pɔ́ *ngàŋa kwò Mǒsê.

²⁹ Peg ne ńzsé ngie Ssé la gɔɔn nò á mbwo Mǒsê, tá ńgʉa ná wɛ̂ nyìŋ, mbà peg tè ne ńzsé lefǒ sé wɔ́.

³⁰ Nyìŋ wá gɔɔn mbwo pɔ́b ngie: Pi gɔ̌ɔn pɛ́’ɛ̀, á kʉ’ʉ wɔ̀ɔn tɛ̀’ pá’ pi tè ne ńzsé lefǒ sé wɔ́. Tá, mbà à kě ńnyɛ́’ menÿɔ́g mɔ́ɔn!

³¹ Pege metsèm zsě ngie e Ssé aa tě njú’u ngyè nyìŋ tepòŋ wɔ́, tá ńgwɔ́ gie nyìŋ lɔɔn ńgÿo mekù’ Ssé, ḿbiŋ ne ńgÿo mmó gie e Ssé ne ńkwoŋo, mbà Ssé ge jú’ ngyè ye.

³² Mé laa mé ńjú’u nyìŋ gẅie à nyɛ̌’ menÿɔ́g nyìŋ gẅie mé la gwaa zyé yé á gwɔ́ fʉ̀ menÿɔ́g wɔ́ le!

³³ Nyìŋ ŋwɛ́ ně ńgwɔ́ pé’e, mbà Ssé zɔ ka tè yé túm, mbà à ně tè ku’u légÿo tsɔ́ mmó wɔ́.

³⁴ Pɔ́ tsɔ́’ɔ mbwo yé ngie, mé la lɔg pɔ́ nò tepòŋ ńzyé gú, ɔ̀ gee ńzí’i peg mmó lá! Ńdeen fó *ndá cú’tè ńjwoŋo yé ńnáa pi.

Kwà’ pàfʉ̀ menÿɔ́g

³⁵ Yěsô gÿo ńjú’ ngie pɔ́ fǒ *ndá cú’tè ńjwoŋo yé, ńgʉa ńgɔɔn né yé ngie: Ɔ̀ zǎb ntʉ́m ná *Míŋ Nyìŋ?

³⁶ Nyìŋ ŋwɛ́ tsɔ́’ ngie: Aa wɔ̌ Ndè? Tá mèŋ n záb ntʉ́m nà yé?

³⁷ Yěsô gɔɔn né yé ngie: Ɔ̀ ne ńgyá yé, yé zɔ gɔɔn nò mbwo gù pá’ɔɔn.

³⁸ Á leen ńgɔɔn ngie: Mèŋ n zǎb ntʉ́m ná gù me Cʉ̀apʉ̀a, ésẅɛ́’ ńkẅí’te ssé mvfò yé.

³⁹ Yěsô leen ńké ńgɔɔn ngie: Mèŋ, n ka tóo tsɛ̀ɛ yɔɔn njÿó ńtí tsɔ́ ŋàg, le gwɔ́ gie epʉ̀a pie é ne ńgyá jʉ’ ge gwɔ́ cʉ́’ mefʉ̀, mefʉ̀ gyá jʉ’.

⁴⁰ Etsɔ́ ntá’ pʉ̀a nà nùɔ pà *farisay pie pɔ́ laa jʉ’ó, jú’u yɔɔn nò, ńzɛ́te Yěsô ngie: Mé té ńgɔɔn gɔɔn wɔ́ ngie ɔ̀ gɔɔn mefʉ̀ pɛ́’ɛ̀ tà sáŋa wég mǒ ka?

⁴¹ Yěsô tsɔ́’ɔ mbwo pɔ́b ngie: Pi ké gwé’e ńgwɔ́ pàfʉ̀ menÿɔ́g, mbà pi tě ńdɔgɔ ńgÿo tsɔ́ nò tepòŋ wɔ́. Tá pá’ pi gɔ̌ɔn ngie: Peg ne ńgyá jʉ’ lá, menò tepòŋ mí lɔgɔ ńgwóŋo ná pi.