Ŋwà’ne Jâŋ 8 - Nouveau Testament en Ngienboum

Ngàŋa gÿɛ́ manzwě

¹ Yěsô fó yé jʉ’ó, ńgʉa né lekwɔ’ɔ́ metÿǒ mèvɛ olive,

² ńgÿo ḿmʉ́ tsɛ̀ɛ mba’ámba’ ḿbiŋe jʉ’e Ssé. Alá’ ne ńtóo né lejʉ́ŋ yé, á ńnéŋe ssé, ńne ńzí’i wɔ́b mmó.

³ Pàkyàgte *lepʉ̌ Mǒsê lâ pà *farisay leen ńké ńnéŋe tà ńdɔgɔ tsɔ̌ manzwě ńtó, mbà mé kemé yé á ne ńgÿo gÿɛ́. Pɔ́ tÿɔ́gɔ yé mvfò pʉ̀a metsèm.

⁴ Ńgɔɔn mbwo Yěsô ngie: Tsítsà, mé kemé manzwě wɔɔn, á ne ńgÿo gÿɛ́.

⁵ Mǒsê la ŋwe’e tsɛ̀ɛ ŋwà’ne mbʉ̌, ńnáa mbwo pege ngie pege lɔg metóon ńtémte ntí panzwě pá’ wɔɔn ńzẅé. Ɔ̀ gɔ̌ɔn jú ngie kɔ́?

⁶ Pɔ́ gɔɔn pú’u, é gwɔ́ pɔ́ lejÿɔ’ lélɔg ńgwoon yé. Pɔ́ fa’a ndiletáŋ lélɔg sẅiŋe yé. Tá’ Yěsô ŋwé’e ssé, ńzye lélɔgɔ mûɔ tepwó we, ńŋwe’e mmó ssé.

⁷ Pɔ́ ké ne ńzɛ́te yé zɛ́te, á ńnéŋe tà ḿbʉ’ʉ nnɛ́ ńgɔɔn né pɔ́b ngie: Nyìŋ gẅie aa tsetsɛ̀ɛ pi, mbà à laa nò tepòŋ gÿo, à vɔg ńzye lélɔgɔ tóon ńtéme yé.

⁸ Ńgɔɔn pú’u, ńgíŋe ńŋwé’e ssé, ńgíŋe ńzye lélɔgɔ mûɔ tepwó we, ńkʉate mmó ssé.

⁹ Pʉ̀a jú’u yɔɔn shwóŋè, ńzye légʉate pà wémɔ’ɔ́ wémɔ’ɔ́, ńzye nà melÿò. Tà á cʉ́’ʉ Yěsô gílé yé, manzwě ke ńnyé ńtyé pɔ́ jʉ’ó.

¹⁰ Yěsô pʉ’ʉ nnɛ́, ńgɔɔn né yé ngie: Má wɔ̀ɔn, pɔ́ gwɔ́ pɔ́ nzɔ̌? Tsɔ̌ nyìŋ kaa témé gú wɔ́ ka?

¹¹ Á tsɔ́’ɔ mbwo yé ngie: Sɔɔn nyìŋ me Ndè. Yěsô gɔɔn né yé ngie: Mbɔɔ mèŋ yɔ̀ɔn, n tè téme gú wɔ́. Gʉa, tè lá’ ńgíŋ ńgÿo nò tepòŋ.

Yěsô aa kyɛ̀’ tsɛ̀ɛ njÿó

¹² Yěsô gíŋe ńzye lézí’i mmó mbwo lá’, ńgɔɔn ngie: Akyɛ̀’ gie á kyɛ’ɛ jʉ’ náa né pʉ̀a mesoŋ tsɛ̀ɛ njÿó á gwɔ́ pɔ́ mèŋ. Nyìŋ lɔɔn ńcʉ́me nzèm mèŋ, mbà ngàŋ tě ńdá’a ńgiŋe tsɛ̀ɛ nzěm wɔ́. Mbà à gẅǐin kyɛ̀’ gie áa kyɛ̀’ɛ mánzsè kwà’ le gwɔ́.

¹³ Pà *farisay leen ńké ńgɔɔn né yé ngie: Ɔ̀ gɔɔn nò gie ɔ̀ zsé nà twó mbùm jú, ńgwɔ́ mé le zẅíŋe nò gie ɔ̀ gɔɔn ná twó mbùm jú wɔ́.

¹⁴ Yěsô tsɔ́’ɔ mbwo pɔ́b ngie: Mèŋ n tsɛ ne ńgɔɔn nò gie mèŋ n zsé nà twó mbùm yɔ́ɔn tá’, anò gie mèŋ n gɔɔn ké ńgwɔ́ nénʉ́, á nue mèŋ n ne ńzsé jʉ’ gie mèŋ n ka fó wó, ńgíŋe ńne ńzsé jʉ’ gie mèŋ n gee nê wó. Tá’ ńgʉa ná pi, mbà pi tě ne ńzsé jʉ’ gie mèŋ fóo nê wó wɔ́, ḿbiŋ ńké tě ne ńzsé jʉ’ gie mèŋ n gee né wó wɔ́.

¹⁵ Pi ŋag pʉ̀a gí pɔ́ nà ntí yé pʉ̀a mesoŋ. Á gʉa ná mèŋ, mbà mèŋ n tè ŋaga nyìŋ wɔ́.

¹⁶ N dɔɔn fó ńŋag pɔ́ ntsaŋ, mbà wɔɔn léŋag aa we nénʉ́, á nue n zɔɔn tè gílé mèŋ wɔ́. Peg Tá wɔ̀ɔn gwɔ̌. Á yé gẅie à la túmo wɔ̀ɔn.

¹⁷ Mé la ŋwe’e tsɛ̀ɛ ŋwà’ne mbʉ̌ gí ngie: Pʉ̀a mépʉ́a lɔɔn ńkẅɛ, ńgwɔ́ pàjÿó ńgyá nà nò, mbà mé ge zẅíŋ ngie áa nò.

¹⁸ Mèŋ n gee pá’ɔɔn ńgɔɔn nò gie mèŋ n zsě nà twó mbùm yɔ́ɔn, Tá wɔ̀ɔn gẅie à la túmo wɔ̀ɔn, à giŋé ne ńgɔɔn yé nò gie à zsě ná mèŋ.

¹⁹ Pɔ́ zɛ́te yé ngie: Tá gù aa nzɔ̌? Yěsô tsɔ́’ ngie: Pi tè ne ńzsé wɔ̀ɔn mɔ́, ńgíŋe tè ne ńzsé mbàa Tá wɔ̀ɔn mɔ́. Pi ka zɔɔn ńgwɔ́ pé’e ńne zsé wɔ̀ɔn, mbà pi ka giŋé ńzsé Tá wɔ̀ɔn yé.

²⁰ Yěsô la gwaa gɔɔn mɔɔn menò pá’ɔɔn, ńgwɔ́ tsɛ̀ɛ *jʉ’ʉ Ssé, ńne ńzí’i pʉ̀a nò Ssé, ńgwɔ́ ngʉ̀ŋe jʉ’ gie mé ńnéŋe nkáb gie mé náa mbwo Ssé wó. Nyìŋ ké tè yé gwoon, mélà’mie á la gwaa gwɔ́, mbà yé fʉ̀’ kaa ku’u.

Yěsô ne ńgɔɔn ngie à ge gʉa kẅɛ́te Tá we

²¹ Yěsô gíŋe ńgɔɔn né lá’ ngie: Mèŋ n ge gʉa, pi cʉ́’ ńne ńgwá fa’a wɔ̀ɔn. Tá’, é ké kwé tsɛ̀ɛ nò tepòŋ gí. Pi tè ku’u légʉa jʉ’ gie mèŋ n gee nê wó wɔ́.

²² Pʉ̀a leen ńké ńjú’ pú’u, ńgɔɔn ngie: Yé zɔ ge zẅé mbùm ye keen? Á nue à gɔ̌ɔn ngie: Pi tè ku’u légʉa jʉ’ gie mèŋ n gee nê wó wɔ́.

²³ Á piŋ ńgɔɔn né pɔ́b ngie: Á gʉa ná pi, mbà pi ee pà ndùmo ssé tsetsá’, mèŋ n kě ńgwɔ́ nyìŋ tÿǒ lepwó. Pi ee pʉ̀a yɔɔn njÿó, mèŋ n kě tè nyìŋ yɔɔn njÿó wɔ́.

²⁴ Áa mmó gie á ně ńgÿo tá mèŋ n gɔɔn né pi ngie: Pi ge gÿo kwé tsɛ̀ɛ menò tepòŋ mí. Á nue pi lɔɔn tè zẅíŋ ngie nyìŋ gẅie mé tóŋo yé lê N gee gwɔ́ à gwɔ́ pɔ́ mèŋ wɔ́, mbà pi ge kwé tsɛ̀ɛ menò tepòŋ mí.

²⁵ Pɔ́ zɛ́te yé ngie: Ɔ̀ gwɔ̌ pɔ́ wɔ̌? Yěsô tsɔ́’ɔ mbwo pɔ́b ngie: Mèŋ n gee nyìŋ wá gẅie n dà lá’ ńzye léshwóŋó gẅi tà fó nzyeté la.

²⁶ Mèŋ n gẅiin menò mie mèŋ n ge gɔɔn né pi tà é gyɔ́ɔn gyɔ̌ɔn, mbɔɔ mie mèŋ n ge ŋaga gẅi mǒ. Tá’ n gɔɔn mbwo pʉ̀a tsɛ̀ɛ njÿó pɔ́ mmó gie n da jú’u mbwo nyìŋ gẅie à la túmo wɔ̀ɔn. Àa ńké shwóŋó yé pɔ́ nò nénʉ́.

²⁷ Yěsô gɔɔn pá’ɔɔn, pɔ́ té zsé ngie anò gie à gɔɔn né pɔ́b, à gɔɔn pɔ́ nà Ssé Tá wɔ́.

²⁸ Yěsô leen ńké ńgɔɔn né pɔ́b ngie: Pi lɔɔn ńgÿo ńkwé’e *Míŋ Nyìŋ tà ńnáa tÿǒ, mbà pi ge leen ké zsé ngie N gee gwɔ́, à gwɔ́ pɔ́ mèŋ, é gíŋ zsé ngie mèŋ n gee ntěen ńgÿo tsɔ́ mmó pɔ́ le yɔ́ɔn twó wɔ́. N gɔɔn pɔ́ mmó gie Tá wɔ̀ɔn la zí’i wɔ̀ɔn.

²⁹ Nyìŋ gẅie à la túmo wɔ̀ɔn, peg yé zɔ gwɔ̌, à kaa nyé wɔ̀ɔn gílé mèŋ wɔ́, mélà’mie mèŋ n gee fʉ̀’ʉ kɔ́ wɔ́, ńgÿo pɔ́ mmó gie á poŋo yé.

³⁰ Yěsô gɔɔn mɔɔn menò pʉ̀a tà ńgyɔ́ɔn zye lézáb ntʉ́m ná yé.

Kwà’ ngẅɛ̀ Ábalam

³¹ Yěsô gɔɔn mbwo pà Yuda pie pɔ́ zǎb ntʉ́m ná yé ngie: Pi lɔɔn ńkú’te shwóŋè yɔ́ɔn, mbà pi ge gwɔ́ kwà’ *ngàŋa kwò yɔ́ɔn.

³² Mbà pi ge zsé nò nénʉ́, anò nénʉ́ cu’u gẅí.

³³ Pɔ́ tsɔ́’ɔ mbwo yé ngie: Peg ee pʉ̀a ná ngẅà Ábalam, peg laa zɔɔn ńgwɔ́ nkwɔɔn tsɔ̌ nyìŋ wɔ́. Ɔ̀ gǎ ńgɔɔn ngie nò nénʉ́ ge cu’u weg?

³⁴ Yěsô tsɔ́’ɔ mbwo pɔ́b ngie: Tà mèŋ shwóŋó gẅí, kwà’ nénʉ́, mânyìŋ ntsèm gẅie à gÿo nò tepòŋ, aa nkwɔɔn nò tepòŋ.

³⁵ Nkwɔɔn ee ntěen ńdá’a ńtsẅé pɔ́ mbʉ̀a wɔ́, mûɔ mbʉ̀a zɔɔ ńdá’a ńtsẅé wó.

³⁶ Áa pú’u, tá ńgwɔ́ gie múɔ lɔɔn ńkẅile gẅi ndá nkwɔɔn, mbà pi ge fó wó kẅɛ, kwà’ nénʉ́.

³⁷ Mèŋ n né ńzsé ngie pi ee ngẅɛ̀ Ábalam, tá’ pi ne fa’a lézẅé wɔ̀ɔn, á nue pi ne ńdʉ’ʉ shwóŋè yɔ́ɔn lʉ’.

³⁸ Mèŋ n kě ńgɔɔn pɔ́ mmó gie n dà gyá mbwo Tá wɔ̀ɔn, tá pi piŋe ńgÿo gí pɔ́ mmó gie pi la jú’u mbwo tá gẅi.

³⁹ Pɔ́ tsɔ́’ɔ mbwo yé ngie: Tá wèg aa Ábalam. Yěsô gɔɔn né pɔ́b ngie: Pi gwé’e ńgwɔ́ púɔ Ábalam, mbà pi gÿo pá’ yé.

⁴⁰ Mèŋ shwoŋó gẅi nò nénʉ́ gie mèŋ n ka jú’u mbwo Ssé, pi piŋ ńgwɔ́ fʉ̀’ɔɔn ńne fa’a lézẅé wɔ̀ɔn, mbà Ábalam la tè pú’u gÿo.

⁴¹ Pi fa’a pɔ́ mefa’ gẅi tá, pɔ́ tsɔ́’ɔ mbwo yé ngie: Peg tè púɔ gÿɛ́ wɔ́, peg gẅiin pɔ́ tà’ Tá wémɔ’ɔ́, á gwɔ́ Ssé.

⁴² Yěsô gɔɔn né pɔ́b ngie: E Ssé kě pé’e ńgwɔ́ tá gẅi, mbà pi kwoŋo wɔ̀ɔn. Mèŋ n da zɔɔn fó pɔ́ mbwo Ssé ńtó. N gwaa gwɔ́ jʉ’ɔɔn yé zɔ̌ tsẅi. Mèŋ n zɔ la tè záb ngie mèŋ n ge tó wɔ́, yé zɔ la túmo wɔ̀ɔn.

⁴³ Pi piŋ ńké tè ne ńjú’u shwóŋè yɔ́ɔn mɔ́ mélà’a kɔ́? Áa nue pi tè ku’u lézẅí’te shwóŋè yɔ́ɔn mɔ́.

⁴⁴ Agẅi tá aa Sátá, pi piŋ né ńkwoŋo légÿo mmó gie à né ńtsɔ́ɔn. Á gʉa ná yé, mbà tà fó nzyeté, á gwɔ́ pɔ́ nzẅè nyìŋ. À laa mé ńgiŋe tsɛ̀ɛ nò nénʉ́ wɔ́. Ńtí nue à tè nò nénʉ́ tsɛ̀ɛ ntʉ́m yé gẅiin, tà tsoon lǎg. À gwɔ̌ tà ne ńcÿɔ nò, á gwɔ́ pɔ́ kwà’ shwóŋè yé, á nue aa ngàŋa cÿɔ nò, ńgwɔ́ nyìŋ gẅie yé zɔ la nuŋe cÿɔ nò.

⁴⁵ Tá ńgʉa ná mèŋ, pi tě ńzába ntʉ́m ná mèŋ wɔ́, mélà’mie mèŋ shwóŋó nò nénʉ́.

⁴⁶ Awɔ̌ ná pi lɔɔn ńgwɔ́ á la’te nò tepòŋ gie mèŋ n dǎ gÿo? N dɔɔn ńgwɔ́ gie mèŋ shwóŋó nò nénʉ́, mbà pi piŋ ńké tě ńzẅíŋe wɔ́ mélà’a kɔ́?

⁴⁷ Nyìŋ gẅie aa nyìŋ Ssé à zẅí’te shwóŋè Ssé. Pi piŋ tě ńzẅí’te shwóŋè yɔ́ɔn mɔ́, mélà’mie pi tè pʉ̀a Ssé wɔ́.

Yěsô pɔ́ Ábalam

⁴⁸ Epʉ̀a leen ńké ńgɔɔn né Yěsô ngie: Peg lɔɔn ńtóŋo gú ngie nyìŋ Samalîɛ, mbà peg kaa fʉa. Mbɔɔ légɔɔn ngie ssé tépoŋ ee ná gù.

⁴⁹ Yěsô tsɔ́’ɔ mbwó pɔ́b ngie: E *ssé tepòŋ tè ná mèŋ wɔ́. Mèŋ n gÿo yɔ́ɔn pɔ́ mekù’ Tá wɔ̀ɔn. Pi piŋ ńké tè ne ńgÿo mekù’ mɔ́ɔn mɔ́.

⁵⁰ Mèŋ, n tě ne fa’a pɔ́ wɔ̀ɔn legú’ wɔ́. Atsɔ̌ nyìŋ ndyɛ̀’ɛ zɔ ne fa’a wɔ̀ɔn legú’, yé zɔ ge zá’ ntsaŋ.

⁵¹ Tà mèŋ shwóŋó gẅí, kwà’ nénʉ́, nyìŋ lɔɔn ńgiŋe nà shwóŋè gie mèŋ n gɔ̌ɔn, mbà ngàŋ tě ńdá’a ńkwé wɔ́.

⁵² Epʉ̀a gɔɔn né Yěsô ngie: Áa nà fʉ̀’ɔɔn, mbà peg zsě ngiessé tepòŋ ee ná gú. Ábalam la kwé, pà *ntsẅì nkʉ̀ Ssé gíŋe ńkwé yɔ́b, ɔ̀ piŋ ne ńgɔɔn ngie: Nyìŋ lɔɔn ńgiŋe nà shwóŋè jú, á le lá’ ńkwé wɔ́.

⁵³ Ńzsé ngie ɔ̀ lɔgɔ fáŋa ńcʉa tá wèg Ábalam keen? À la kwé, pà *ntsẅì nkʉ̀ Ssé gíŋe ńkwéte yɔ́b. Ɔ̀ kwǎŋ ngie ɔ́ɔ kɔ́ mmó?

⁵⁴ Yěsô tsɔ́’ɔ mbwo pɔ́b ngie: Mèŋ n zɔ tè fa’a wɔ̀ɔn legú’ wɔ́, mèŋ n dɔɔn ńgÿo pú’u, awɔ̀ɔn legú’ le tsɔ́ nò wɔ́. Nyìŋ gẅie à náa legú’ wɔ̀ɔn aa Tá wɔ̀ɔn. Pi ne ńgɔɔn gí ngie aa Ssé gi.

⁵⁵ Ńké tè ne ńzsé yé wɔ́, mèŋ n kě ne ńzsé yé. N dɔɔn ngie mèŋ n tè ne ńzsé yé wɔ́, mbà mèŋ n ge cʉ́’ʉ ngàŋa cÿɔ nò pá’ pi. Tá’ mèŋ n né zsé yé, ḿbiŋe ne ńgiŋe nà shwóŋè yé.

⁵⁶ Ntʉ́m tá gẅi Ábalam la ne ńkága ngwòŋ fʉ̀’ ntsèm gie à la tsɔ́ɔn légyá fʉ̀’ gie mèŋ n ge gÿo tó. À la ké ńgyá, ńkág tɛ’.

⁵⁷ Pà Yuda leen ńké ńgɔɔn né Yěsô ngie: Gù gẅie ɔ̀ fǒ nyé pɔ́ tè gẅiin ngù’ móm ntʉ̀a, ɔ̀ ka gyá Ábalam lá?

⁵⁸ Yěsô tsɔ́’ɔ mbwo pɔ́b ngie: Tà mèŋ shwóŋó gẅí, kwà’ nénʉ́, Ábalam la gwaa gwɔ́ wó, ńgwɔ́ N gee gwɔ́.

⁵⁹ Pɔ́ jú’ pú’u, ńdag metóon lélɔg ńtémte Yěsô ńzẅé. Á sele nnɛ́ ḿbyé, éshú fó tsɛ̀ɛ *jʉ’ʉ Ssé ńkẅɛ.