Ŋwà’ne Jâg 4 - Nouveau Testament en Ngienboum

Lekwòŋ njÿó aa lepʉa Ssé

¹ Mencwò mencwò aa pé’e fóo nzɔ̌ tsetsɛ̀ɛ pi? Melà’ fóo nzɔ̌ tsetsɛ̀ɛ pi? Né ngie é fóo ná gi ntí letsɔ̌ɔn shúm gie ee tsɛ̀ɛ ntʉ́m gẅi ńtsóte gẅí.

² Pi tsɔ́ɔn shúm tɛ’ tá’ ńké tè ku’u légẅiin wɔ́, ńdeen ńké ńcʉ́’ ńtyé pɔ́ lézẅé nyìŋ. Pi gyá mmó ńtÿɔ́g ntʉ́m gẅi mǒ, tá tsɔ́ légẅiin à tè wó wɔ́. Pi gebe tsetsɛ̀ɛ ńgwɔ́ mencwò mencwò, ńtág melà’. Pi tě ńgẅiin mmó gie pi ne ńkwoŋo wɔ́, á nue pi tè lúɔ mbwo Ssé wɔ́.

³ !Pi zɔɔn ńdúɔ, e Ssé tè ná, mbà áa, mélà’mie pi tè zsé lélúɔ wɔ́. Pi zɔ̌ɔn ńdúɔ pɔ́ lélɔg ńgʉa ńgÿo mmó gie á ne ḿboŋo pɔ́ gẅí.

⁴ Pii pàlaŋ nzèm pʉ́a. Pi tè ne ńzsé ngie nyìŋ gẅie aa shǔ shúm njÿó, cʉ̌’ ńgwɔ́ pɔ́ ngàŋ mbù Ssé wɔ́ ka? Nyìŋ gẅie à kwoŋ shúm njÿó cʉ̌’ ńgwɔ́ pɔ́ ngàŋ mbù Ssé.

⁵ Pi kwǎŋ ngie ŋwà’ne Ssé gɔɔn ngie: E Ssé pǔ tè zẅíŋ ngie pege nyé tsɔ̌ nyìŋ á jÿó jʉ’ Zẅìge gie à la ńnéŋe ná pege wɔ pé’e, ḿmeen, meen ńgɔɔn keen?

⁶ Tá, e Ssé kě ńne ńcÿó gʉm yégè, apòŋo ntʉ́m yé nzèm pege fáŋ ńcʉa kɔ̀ɔkɔ́ɔ. Ŋwà’ne Ssé zɔɔn ńgɔɔn ngie: E Ssé lʉ’ pàŋá’te nnɛ́ lʉ’, ńké ńdɔgɔ pòŋo ntʉ́m ńdíe pʉ̀a pie é sẅí’i mbùm yɔb ńnáa ssé.

⁷ Pú’u la, pi ne ńnuŋe ssé mvfò Ssé, ńne ńdʉ’ʉ Sátà, à fó lejʉ́ŋ pi ńkÿo.

⁸ Pi sẅɛ’te nnɛ́ nê lejʉ́ŋ Ssé, à sẅɛ’te yé nnɛ́ nê lejʉ́ŋ pi. Pi megàŋ mefʉa, pi sɔg mbwó mí, pà nkwòŋ menÿɔ́g, pi kẅile ncÿǒ tsɛ̀ɛ mentʉ́m mí.

⁹ Pi zsé ngie pi ee megàŋ ngɔ́’, ńdúŋ legwé ńdʉa. Á ne ńzɛ́te ngie gẅi légẅe sele ńcʉ́’ʉ lélʉa, agẅi lekág sele ńcʉ́’ʉ lémÿɔg.

¹⁰ Pi sẅí’i mbùm gí ńnáa ssé mvfò Cʉ̀apʉ̀a, à pʉ’ʉ gẅí.

Tà nyìŋ ŋaga fɛ́ we

¹¹ Mefɛ́ pɔ́ɔn, tà zẅɛ́te gwɔ́ tsetsɛ̀ɛ pi. Nyìŋ lɔɔn ńzẅɛ́te ná fɛ́ we, kà ńtú pɔ́ *lɔ̌’ yé wɔ́, mbà à zẅɛ́te pɔ́ nà *lepʉ̌, ḿbiŋe ńtúu pɔ́ *lɔ̌’ lepʉ̌. Nyìŋ lɔɔn ńké ńtúu lɔ̌’ɔ lepʉ̌, mbà à tè gíŋe ńgwɔ́ nyìŋ gẅie à kú’te lepʉ̌ wɔ́, à cʉ’ʉ́ ńtúu lɔ̌’ɔ lepʉ̌ tú.

¹² E Ssé gíle yé zɔ zába *lepʉ̌, ḿbiŋe ńzá’a ntsaŋ pʉ̀a, yé gíle yé zɔ ku’u légÿo nyìŋ tsẅɛ́ kà légÿo á kwé wɔ́. Ɔ̀ kwǎŋ jú ngie ɔ́ɔ wɔ̌ tà ńtúu *lɔ̌’ fɛ́ gù?

Tà nyìŋ ŋá’te nnɛ́

¹³ Pi zẅí’te ńjú’. Pi pie pi ne ńka’a ngie: «Peg ge lɔg lyɛ̌’ɔɔn kà jǔɔ wɔ́, é gʉa tsɛ̀ɛ tÿǒsoŋ ye kikyè, é ńnéŋe wó tà’ ngù’ é táŋ sɔ̌ɔn é gẅiin nkáb».

¹⁴ Pi tè zsé pá’ lyɛ’ɛ́ lá’ jǔɔ ge gwɔ́ pú’u, mbwo pi wɔ́, !pi zsé ngie pi ee pá’ zẅɛ̌ lekʉŋ gie á kẅɛ, ńtóo léńnéŋe é syeen.

¹⁵ Pi ke’e gɔɔn pɔ́ ngie, Cʉ̀apʉ̀a lɔɔn ńzẅíŋ, mbà peg ge gwɔ́ ntentʉ́, é gÿo yɔɔn, é gÿo gi.

¹⁶ Tá pi tsẅiŋ pɔ́ kékʉ́b gẅi, ńgɔɔnte pɔ́ menò mie pi ge gÿo gÿo. Yɛ̌ ntí leŋá’te e tè poŋ.

¹⁷ Pú’u la, nyìŋ gẅie à zsé légÿo nò gie áa mbòŋ, ḿbiŋ ńké tè gÿo, à lɔgɔ ńgÿo nò tepòŋ, ńdɔgɔ ńgwe ntsaŋ.