Ŋwà’ne Jâg 2 - Nouveau Testament en Ngienboum

Pʉ̀a metsèm gwɔ́ pɔ́ tà’a mmó mvfò Ssé

¹ Mefɛ́ pɔ́ɔn tà pi ne ńzába ntʉ́m ná Cʉ̀apʉ̀a Yěsô Kristo wege gẅie à gẅiin máamáa legú’, ńgíŋe ńgẅiin tyɛ̀’te tsetsɛ̀ɛ pi.

² Pege gɔɔn ngie pʉ̀a mépʉ́a kǔ tsɛ̀ɛ *ndá cú’tè gí, tà’ nyìŋ jÿɔ́gɔ kwáŋ gẅie à cÿɔ́g nkáb, ḿma’ menzsǒ nkáb. Wetsɔ̌ ma’ yé pɔ́ metsyàg nzsǒ.

³ Pi tÿɔ́g menÿɔ́g ná nyìŋ gẅie à ma’ menzsǒ nkáb, nyìŋ gẅi gɔɔn né ye ngie à jʉ’ʉ melÿò yɔɔn, mbà! Tóo ńnéŋe jʉ’ɔɔn, ḿbiŋ ńgɔɔn nê fÿɔg ngie gyá jʉ’ ńtyé wó, ńké tè pú’u wɔ́ ɔ̀ tó ńtém ntsẅɛ̀’ jù ssé, á ngʉ̀ŋe mmó gie n tÿɔ́g mekwò mɔ́ɔn mǒ lɔɔn.

⁴ Pi lɔɔn ńgÿo pú’u, pi lě ńdɔgɔ ńgẅiin tyɛ̀’te tsetsɛ̀ɛ pi wɔ́? Pi lě ńdɔgɔ pɔ́ nkwaŋá tepòŋ ńdíe pʉ̀a éfa’a pì wɔ́?

⁵ Mefɛ́ pɔ́ɔn pe ntʉ̀ nzẅìŋ, pi jú’ mboŋó, e Ssé la tsɔ́’ pʉ̀a pie mé tóŋo tsɛ̀ɛ njÿó lê mefÿɔg, ńdɔg ńgÿo pàzáb ntʉ́m ná yé tɛ’, pɔ́ gẅiin yɔ́b jʉ’ tsɛ̀ɛ nò lefùɔ sie à la ka’a mbwo pʉ̀a pie é kwoŋo yé.

⁶ Tá ńgʉa ná pi, mbà pi kéen ńcʉŋ nzẅìŋ mefÿɔg. Tá megàŋa mmó zɔ̌ téen sẅɛ́ɛ gẅi wɔ́ le? Pɔ́ zɔ̌ téen ńgwá ńdɔgɔ gẅi ńgiŋe mendá tsǎŋ wɔ́ le?

⁷ Pɔ́ zɔ̌ téen shwóŋó tepòŋ ná Yěsô Kristo gẅie Ssé la ná lezíŋ sé né pi wɔ́ le?

⁸ Á cʉ́’ gie pi gÿo pú’u, mbà pi giŋé ná pá’ *lepʉ̌ se lÿò ná nò *lefùɔ Ssé gɔɔn, é gɔɔn ngie: «Kwoŋo fɛ́ gù nyìŋ mesoŋ pá’ ɔ̀ kwoŋo twó mbùm jú». Pi lɔgɔ pú’u, ńgÿo mboŋó.

⁹ Tá pi ké ńgẅiin tyɛ̀’te tsetsɛ̀ɛ pi, mbà pi gÿǒ nò tepòŋ. *Lepʉ̌ Ssé gwoon gẅi mélà’ mie pi fʉ̌a *lepʉ̌.

¹⁰ Nyìŋ lɔɔn ńzɔɔn ńkú’te mbʉ̌ Ssé, ńgʉa mǒ fʉa pɔ́ ndà’ tà’, mbà à pǔ fʉa pɔ́ mbʉ̌ ntsèm.

¹¹ Pú’u, nue e Ssé gẅie à la gɔɔn ngie: «Tè gÿo gÿɛ́», à la gíŋe ńgɔɔn ngie: «Tè zẅé nyìŋ». Tá ńgwɔ́ gie ɔ̀ lɔɔn tè gÿɛ́ gÿo, ḿbiŋ ńzẅé nyìŋ, mbà ɔ̀ fʉ̌a *lepʉ̌ sé fʉa.

¹² Pi gwaa ne gɔɔn nò, ńne ńgÿo pá’ pʉ̀a pie mé ge lá’ lɔg *lepʉ̌ sie é gÿo mé cʉ́’ʉ pà ndù nnɛ́ e lɔg ŋaga wɔ́b.

¹³ E Ssé ge lá’ ne tsɔ́’te mentsaŋ, á le tsɔ́ɔn mezìŋe tè tsɔ̌ɔn mezìŋe pʉ̀a wɔ́, tá ńgwɔ́ gie nyìŋ la tsɔ́ɔn mezìŋe, mbà á ge lá’ lɔg pú’u, e Ssé le yé ŋag.

Lezǎb ntʉ́m nà Ssé ḿbiŋ fa’ mefà’

¹⁴ Mefɛ́ pɔ́ɔn, nyìŋ lɔɔn ngie à zǎb ntʉ́m wé nà Ssé, à tè fa’ méfà’ ńdɔg ńnyɛ wɔ́, mbà á ge kẅéte nà kɔ́? Tà ńgwɔ́ yɛ̌ ntí lezáb ntʉ́m nà Ssé é gÿo nyìŋ tsẅɛ́?

¹⁵ Pege gɔɔn ngie tsɔ́ fɛ́ wege we mbàŋa mbɔɔ we manzwě, pɔ́ té nzsǒ ma’, ḿbiŋ ńne ńzága mmó gie pɔ́ ge pfɛ́ɛ nà lyɛ’ɛ́ lá’,

¹⁶ atsɔ̌ nyìŋ ná pi piŋ ńgɔɔn né pɔ́b ngie: Pi lo nê kwò gí ye mbòŋo. Mbùm gí lumte. Pi pfɛ́ ńzẅɛ́, ńgɔɔn pú’u, ńké tê náa tsɔ́ mmó gie á ge kẅéte wɔ́b gwɔ́, mbà wɛ̌ légɔɔn ge kẅéte nà kɔ́?

¹⁷ Á gíŋe ńgwɔ́ pɔ́ ndʉŋ ndʉŋ pú’u, ná nyìŋ gẅie à ne ngie à záb ntʉ́m wé nà Ssé, pá’ mé lɔɔn tè ne ńgyá mefà’ mé wɔ́, mbà wɛ̌ lézáb ntʉ́m nà Ssé aa sẅɛ̀ɛ.

¹⁸ Ndyɛ̌’ ńgwɔ́ nyìŋ gɔɔn ngie: Aye tsɔ̌ nyìŋ gwɔ́ pɔ́ lézáb ntʉ́m wé nà Ssé, aye wetsɔ̌ gwɔ́ pɔ́ léfa’ mefà’. Mbà mèŋ n ge gɔɔn yɔ́ɔn mbwo yé ngie: Nyɛɛ wɔ̀ɔn pá’ à lɔɔn ńgwɔ́ ɔ̀ záb ntʉ́m nà Ssé té ne fa’a mefà’, mèŋ n dɔg mefà’ mɔ́ɔn ńnyɛɛ gú ngie n záb ntʉ́m nà Ssé.

¹⁹ Ɔ̀ ne ńzẅíŋe ngie e Ssé, ee yémɔ’ɔ́, oon áa mbòŋ, *messé tepòŋ gíŋe ńne ńzẅíŋe yɔ́b pɔ́ pú’u, tá ḿbiŋe ńne ḿvɛɛ.

²⁰ Agʉ̀gʉ̀ yɔ́ɔn, ɔ̀ kwoŋo kɔ́? Mèŋ n ge nyɛɛ gú ngie lezǎb ntʉ́m nà Ssé gẅie à tè mefà’ gẅiin áa sẅɛ̀ɛ.

²¹ E Ssé la gwaa gɔɔn ngie tá wege Ábalam aa ndʉŋ ndʉŋ mvfò yé, né ngie á cʉa pɔ́ nà mefà’ mé? Á la tè cʉa pɔ́ ná pá’ à lɔgɔ́ míŋ we Esâg ńnuŋe pwɔ́’ á jʉ’ gie mé nuŋe pwɔ́’ wó wɔ́ le?

²² Ɔ̀ lɔgɔ ńgyá ngie we lezáb ntʉ́m nà Ssé pâ mefà’ mé la púte ńgiŋe kwò. Á la fó nà mefà’ mé we lezáb ntʉ́m nà Ssé gwɔ́ wó tà ńku’.

²³ Anò gie mé la ŋwe’e ńtí yé fó pú’u, ḿbumte, mé la ŋwe’e ngie: Ábalam la záb ntʉ́m wé nà Ssé, e Ssé fó mǒ, ńcʉ́’ ńdíe yé á gwɔ́ mvfò ye, ńgwɔ́ pɔ́ ndʉŋ ndʉŋ, á tóŋo yé lê shǔ we.

²⁴ Pi lɔgɔ ńgyá ngie á cʉa pɔ́ nà mefà’ mie nyìŋ ne fa’a, tá Ssé gɔɔn ngie ngàŋ aa ndʉŋ ndʉŋ mvfò yé, tà é té gwɔ́ pɔ́ ndà’ pá’ ngàŋ zǎb ntʉ́m wé nà Ssé wɔ.

²⁵ Á la gíŋe ńgwɔ́ pɔ́ pú’u, ná Raab, káa tÿó manzwě, e Ssé la gwɔ gɔɔn ngie aa ndʉŋ ndʉŋ mvfò yé, ńcʉa pɔ́ nà mefà’ mé. Pá’ à la náa jʉ’ʉ lelyěen mbwo pʉ̀a Israel pie mé la túm, ḿbiŋ ńnyɛɛ wɔ́b nzsè gie pɔ́ ge pfó mǒ é gʉa.

²⁶ Ndʉŋ ndʉŋ pá’ Zẅìge lɔɔn tè ná mbùm nnɛ́ wɔ́, mbà e kwě la, lezǎb ntʉ́n nà Ssé, á lezáb gẅie mé té ne ńgyá mefà’ wɔ́, mbà wɛ̌ aa sẅɛ̀ɛ.