Matio 7 - Nouveau Testament en Ngienboum

Tà pi tú melɔ̌’ pʉ̀a, tà pi gwá’a lÿɔ́g

¹ Tà pi ńnéŋe ńtúu *melɔ̌’ pʉ̀a, ḿbɔ́g Ssé létúu gí *lɔ̌’.

² Á ge fó pɔ́ nà ntí gie pi lɔgɔ ńtúu *lɔ̌’ petsɔ́ pʉ̀a, tá Ssé túu *lɔ̌’ɔ gí gí. Pi zsé ngie: E Ssé ge táa ńnéŋe pɔ̀ɔn gí pɔ́ pá’ pi zɔɔn ńnéŋe yé petsɔ́ pʉ̀a

³ Á piŋ ńgÿo lêkɔ́ ɔ̀ ne ńgyá mùɔ méfùbe pǐŋ gie e gwě lejÿɔ́g fɛ́ gù, tá kúme núŋe lejÿɔ́g gù, ɔ̀ piŋ ńké tè ne ńgyà wɔ́?

⁴ Ńgwɔ́ ɔ̀ gÿo lêkɔ́, tá ńgɔɔn né fɛ́ gù ngie: Àfɛ́, cʉ́’ mèŋ n kẅile fùbe pǐŋ yɛ̂ gie ee lejÿɔ́g gù lɛ̂, ńgwáa gɔɔn, éfó le ne ńgyá kúmo gẅie á nuŋe tsɛ̀ɛ shú wɔ́?

⁵ Ànkwoŋ menÿɔ́g! Vɔg ńkẅile kúmo gẅie aa lejÿɔ́g gù, tà ne ńcwoŋo ńgyá jʉ’ tá ńku’u lékẅile fùbe pǐŋ á tsɛ̀ɛ lejÿɔ́g fɛ́ gù.

⁶ Tà pi náa mmó gie aa yé Ssé, á mbwó ngwé. Tà pi ma’a tɔgɔ́ tsye gí á mvfò mekúnɔ́ɔn. Pɔ́ ge neŋte nê mekwó é piŋ sele nnɛ́ lúmte gẅí.

Á poŋo lékag tʉ̀ ńgÿo mmó

⁷ Pi lúɔ, e Ssé ge náa mbwó pi. Pi fa’, e Ssé ge gÿo pi gyá. Pi kwá’te ncwò ndá, à ge tsɔ́’ ńná né pi.

⁸ Nyìŋ lúɔ mmó, mbà mé ge náa mbwó yé, éfa’, mbà à ge gyá, ḿbiŋ ńkwá’te ncwò ndá, mbà mé ge tsɔ́’ e ná né yé.

⁹ Pi pɛ̀ ńgwɔ́ metá penkʉ́, míŋ wɔ̌ tsetsɛ̀ɛ pi lɔɔn ńdúɔ mbelég, mbà à ge náa tóon né yé?

¹⁰ Míŋ wɔ̌ lúɔ mbab ssó, mbà à ge gwoon nnú ńnáa mbwó yé?

¹¹ Pi pie pi fʉ̀’ nò tɛ’ zsé léna shúm mbòŋo á mbwó gubé gí, tà ngʉ̀a shÿɔ́’ɔ ná Tá gẅi gẅie aa tÿǒ lepwó? À ge ná shúm mbòŋo mbwó pʉ̀a pie pɔ́ lǔɔ mbwó yé.

¹² Àmmó gie pi ne ńtsɔɔn ngie mé gÿo ná pi la, pi gÿo kwà’ yɛ̌ gí ná petsɔ́ pʉ̀a. Pi lɔɔn ńgÿo pú’u, mbà á ge gwɔ́ mmó gie *lepʉ̌ Mǒsê mbɔɔ meŋwà’ne pà *ntsẅì nkʉ̀ Ssé zɛ́te

Memánzsè mépʉ́a

¹³ Pi cʉ́’ʉ léfa’a mánzsè tÿǒ lepwó, ḿpfó pɔ́ nà ncwò nká’ gẅie é kʉ́mte kʉmtě. Ncwò nká’ gẅie é gú’ tɛ’, é gee pɔ́ né lá’ legwé. Mánzsè gẅie à gee lá’ legwé gú’ tɛ’, lelÿò pʉ̀a né ḿpfó pɔ́ wɛ̌.

¹⁴ Tá ncwò nká’ gẅie é gee lá’ letsẅɛ́ temi, kʉ́mte kʉmtě. Mánzsè piŋ ńtege tege, pà pfó wɛ̌ té gyɔ́ɔn.

Mé zsé tÿǒ nà mentɔ̌ɔn mé

¹⁵ Pi laga twó gí nà pʉ̀a pie é cÿɔɔ nò ngie pɔ́ ee pà *ntsẅì nkʉ̀ Ssé. Pɔ́ gwaa tóo lejʉ́ŋ pi ḿma’ *ngùb *njʉ̀njÿò tá nkwaŋá wɔ́b gwɔ́ pɔ́ we menɔ́ɔn ngẅi.

¹⁶ Pi ge zsé wɔ́b nà ngÿǒ menò mɔ́b. Mé e ntě ńkába shʉ́shÿó na tÿǒ shʉ́shÿó nè wɔ́, ndʉŋ ndʉŋ pá’ à lɔɔn ńgwɔ́ mé le káb lepfo á nà tÿǒ lengɔ́ɔn wɔ́.

¹⁷ Tÿǒ mbòŋo zém pɔ́ ntɔ̌ɔn mbòŋo, tá tÿǒ tepòŋ zém pɔ́ ntɔ̌ɔn tepòŋ,

¹⁸ ńgwɔ́ tÿǒ mbòŋo le zém ntɔ̌ɔn tepòŋ wɔ́, àtÿǒ tepòŋ ké le zém ntɔ̌ɔn mbòŋo wɔ́.

¹⁹ Àtÿǒ gie á té zém ntɔ̌ɔn mbòŋo wɔ́, mé kɔ́’ ńtuɔ mmɔ̌g.

²⁰ Pú’u, pi ge gÿo gwaa zsé pʉ̀a pie é cÿɔɔ nò ngie pɔ̀ ee pà *ntsẅì nkʉ̀ Ssé, é cʉa pɔ́ ná mà wɔ́b

Legɔ́ɔn ḿbiŋ ńgÿo

²¹ Á gʉa ná pʉ̀a pie é tóŋo wɔ̀ɔn lê Cʉ̀apʉ̀a, pɔ́ metsèm zɔ̌ té lá’ jÿó pì *lefùɔ Ssé wɔ́. Ndà’ pʉ̀a pie é gÿo mmó gie Tá wɔ̀ɔn gẅie aa tÿǒ lepwó ne ńkwoŋo ngie mé gÿo.

²² Á ge lá’ gwɔ́ lyɛ̌’ gie mèŋ n ge ńtsɔ́’te mentsaŋ, pʉ̀a tà ńgyɔ́ɔn gɔɔn ngie: Cʉ̀apʉ̀a! Cʉ̀apʉ̀a! Peg lɔ̌ɔn ntě ńdɔgɔ pɔ́ lezíŋ shú éshwóŋó nò Ssé gwaa? Peg lɔ̌ɔn ntě ńdɔgɔ pɔ́ lezíŋ shú ńjwoŋo *messé tepòŋ gwaa? Peg lɔ̌ɔn ntě ńdɔgɔ pɔ́ lezíŋ shú ńgÿo ndaa gyá nò gwaa?

²³ Mèŋ n deen ńké ńgɔɔn né pɔ́b ngie: Mèŋ tè gẅi zsé, pi ee pàfʉate menò, pi fó lejʉ́ŋ mèŋ ńtsíŋte nnɛ́

Lepwǒon ndá aa ntí pʉ́a

²⁴ Nyìŋ lɔɔn ńtó ńtsɛ́ɛ wɔ̀ɔn, ńzẅí’te shwóŋò yɔ́ɔn, ńgÿo pá’ á ne ńzɛ́te, mbà ngàŋ gwá’a tsɔ̌ nzsè nò wá gẅie, à la cʉ́’ʉ lékwɛ́ ndá yé, ńtúŋo jʉ’ tà ńgyá máa tóon, ńtÿɔ́g ndá ndùm wɔ́.

²⁵ Mbʉ̀ŋ gÿo ńdú, ngʉa ntse tó, fefà cʉ’ʉ, ńtéme nà ndá. Ndá tè gwe, mélà’mie mé la tÿɔ́g ndá ná tóon.

²⁶ Tá nyìŋ gẅie à ju’ú shwóŋò yɔ́ɔn, à tè gÿo pá’ n gɔ̌ɔn wɔ́, mbà ngàŋ gwá’a gʉ̀gʉ̀ nyìŋ gẅie à la kwɛ́ ndá yé té túŋo cÿó.

²⁷ Mbʉ̀ŋ gÿo ńdú, tsìtsyɛ̀ tó, fefà cʉ’ʉ ńtéme nà ndá ayɛ̌, é keme ḿbʉle ssé.

Ntí gie Yěsô lɔg ńzí’i pʉ̀a mmó

²⁸ Yěsô zí’i pʉ̀a mɔ̀ɔn menò tà ńtsẅé jʉ’, àlá’ pú mɔ̂ɔn ye ntí lézí’i pʉ̀a mmó,

²⁹ mélà’mie à lɔ̌ɔn ntě ńgÿo pá’ *pàkyagte lepʉ̌ Mǒsê wɔ́. À lɔ̌ɔn ńzí’i tà ńzsé mmó gie à gÿo yɛ̌.