Matio 4 - Nouveau Testament en Ngienboum

Sátà kwa’té Yěsô

¹ À Zẅìge Ssé fó jʉ’ó, ńdɔgɔ Yěsô ńgee nkwòŋo tsẅɛ, pá’ Sátà ge kwa’te yé.

² Á ńnéŋe wó lyɛ̌’ lá’ móm lekùɔ té pfɛ́ɛ mmó tà nzyè gyáŋa yé.

³ Sátà tó ńkwa’te yé, ńgɔɔn ngie: Pá’ ɔɔ Míŋ Ssé lá, leen ńké ńtsẅi né metóon pɛ̂ ngie é sele ńcʉ́’ʉ mmó léjÿó ɔ̀ jÿó.

⁴ Yěsô tsɔ́’ ngie: Mé la ŋwe’e tsɛ̀ɛ ŋwà’ne Ssé ngie: «Nyìŋ tè lɔg pɔ́ ndà’ mmó gie à pfɛ́ɛ tá ńgwɔ́ wó wɔ́ À lɔg pɔ́ yɛ̌ shwóŋó wɔ́ gie á kẅɛɛ ncwò Ssé».

⁵ Sátà lɔgɔ Yěsô ńgʉa lê tÿǒsoŋ Yerósalem, ńtÿɔ́gɔ yé nà ntsɔ́’ gie ee *jʉ’ʉ Ssé,

⁶ ńgɔɔn né yé ngie: Pá’ ɔɔ Míŋ Ssé lá, kyɛ́ɛ ńtyé ssé, mélà’mie mé la ŋwe’e tsɛ̀ɛ ŋwà’ne Ssé ngie: «Ssé ge shwóŋ mecÿɔ́’ pé pá’ pɔ́ ge gÿo ná gù, pɔ́ ge lɔg mbwó mɔ́b kaa gú tà ɔ̀ le túu kwò jú ná tóon wɔ́».

⁷ Yěsô tsɔ́’ɔ mbwó yé ngie: Mé la gíŋ ŋwe’e tsɛ̀ɛ ŋwà’ne Ssé ngie: «MÀbɔ́ɔn nyìŋ létsíŋe Cʉapʉa Ssé ye tsíŋe ngie à gÿo mmó ná yé»

⁸ Sátà gíŋe ńdɔgɔ yé ńgʉa, ńtÿɔ́gɔ yé ndùm tsɔ̌ lekwɛ́ sie é gʉa taa tÿǒ, ńtyé wó, ńnyɛɛ yé mengwòŋo mengwòŋ mie ee tsɛ̀ɛ njÿó mbɔɔ mmó gie pɔ́ lɔgɔ fáŋa,

⁹ ńgɔɔn né yé ngie: Ɔ̀ lɔɔn ńkẅí’te mvfò mèŋ ńgu’te wɔ̀ɔn, m bú ńná né gu.

¹⁰ Yěsô gɔɔn né yé ngie: Sátà, fó lejʉ́ŋ mèŋ sẅɛ’te nnɛ́, mélà’mie mé la ŋwe’e tsɛ̀ɛ ŋwà’ne Ssé ngie: «Nyìŋ gu’te pɔ́ ndà’ Cʉ̀apʉ̀a Ssé gíle yé ḿbiŋ ńjú’ pɔ́ ndà’ ncwò wé».

¹¹ Sátà leen ńké ńnyé Yěsô. *Mecÿɔ́’ Ssé tó, ne ńkẅéte yé.

Yěsô piŋé Galilea ńzye fà’ yé

¹² Mé la ńnéŋe Jâŋ ndá tsǎŋ, Yěsô gÿo ńjú’, ńgʉa lê Galilea,

¹³ ńkúu Nǎzarɛd ńcʉa cʉa ńgʉa ńnéŋe Kapernawúm. Á gwɔ́ tÿǒsoŋ ńgwɔ́ ngʉ̀ŋe letʉŋ Galilea, á lá’ gie Zabuloŋ pɔ́ Neftali tÿɔ́’te yé ńnéŋe soŋ.

¹⁴ Á gwɔ́ pú’u, tá nò gie Esǎya *ntsẅì nkʉ̀ Ssé la gɔɔn lɔg ḿbumte. À la gɔɔn ngie:

¹⁵ «Pi pà Zabuloŋ mbɔ́ɔ pi pà Neftali, pi pie pi ee ngʉ̀ŋe ntse, ńgwɔ́ nà yetsɔ̌ nzǐŋ ntse Jurdeŋ, pi pʉ̀a Galilea, pi pie pi lâ pʉ̀a pie e té Ssé zsé neŋé

¹⁶ Pi pie pi ka neŋé tsɛ̀ɛ nzěm, gi njÿó kwǎ’ ńdʉ́a. Nèm sǎ’ tà ne ńtʉ́a ná pʉ̀a pie e ka neŋé tsɛ̀ɛ ngwòŋ gẅie ssé nzěm we legwé à kaa wó».

¹⁷ Yěsô gwɔ́ Kapernawúm pú’u, ńzye léshwóŋó nò Ssé, ńně ńgɔɔn ngie: Pi kúbe mà gẅi, á nue àfʉ̀’ gie Ssé ge nyɛ lefùɔ sé tsoté tà ne ḿbɔ́ɔnte

Yěsô tsɔ̌’ pʉ̀a lekùɔ ńdɔg ńgÿo ngàŋa kwò yé

¹⁸ Yěsô gÿo ne ńgiŋe ngʉ̀ŋe letʉŋ Galilea, ńgyá Símo gẅie mé gíŋ ńtóŋo yé ngie Piɛ, mbɔɔ Ndeléya gẅie aa fɛ́ Símo ŋwɛ́. Pɔ́ ne ma’a lekÿò ntse.

¹⁹ Yěsô gɔɔn né pɔ́b ngie: Pi tó, ńcʉ́me nzèm mèŋ, n dɔgɔ gẅi ńgÿo pàfà’ pʉ̀a mesoŋ.

²⁰ Pɔ́ gwóon ńnyé menkÿò ńcʉ́me nzèm yé.

²¹ Mé ná’a ńzye ńgiŋ, Yěsô gyá Jâg pɔ́ Jâŋ, é gwɔ́ gubé Zebede, pâ tá wɔb pú ńgwɔ́ tsɛ̀ɛ kanú’ ńne ńnyɛte menkÿò mɔ́b, á tóŋo wɔ́b.

²² Pɔ́ gwóon ńnyé kanú’ mbɔɔ tá wɔb ńcʉ́me nzèm yé.

²³ Yěsô gÿo ne ńgwá ńgiŋe jʉ’ ntsèm tsɛ̀ɛ Galilea, ńzí’i pʉ̀a nò Ssé tsɛ̀ɛ *mendá cú’tè pà Yuda, ésá’a nkʉ̀ mbòŋo gẅie é shwóŋó pʉ̀a pá’ *lefùɔ Ssé ee pú’u, ńně ńgÿo nyìŋ gẅie à gẅiin pɔ́ yɛ̌ ntí guɔ wɔ́ ka yɛ̌ ntí *lɔ̌’ wɔ́, zeŋe

²⁴ Á gwɔ́ pú’u, mé lɔg lezíŋ sé ésa ngwòŋ Siria ntsèm. Mé ne ńdɔgɔ pʉ̀a metsèm pie meguɔ ntí ntí laa ná pɔ́b, é pʉ̀a pie *messé tepòŋ la ne ḿbue wɔ́b, mbɔɔ pàgwe gwá’, lâ megàŋa kwʉ́’te ńtóo, Yěsô gÿo pɔ́ zeŋe.

²⁵ Àlá’ menùɔ menùɔ fô Galilea, éfô tsɛ̀ɛ metÿǒsoŋ legém, éfô Yerósalem, éfô Jẅidea tà mbɔɔ ná yetsɔ̌ nzǐŋ ntse Jurdeŋ, ńcʉ́me nzèm yé.