Matio 17 - Nouveau Testament en Ngienboum

Yěsô ne ńnyɛɛ shʉ́shÿɔ́g we mbwó tsɔ̌ ngàŋa kwò yé

¹ É cʉa lyɛ̌’ ntɔgɔ́, Yěsô faga Piɛ, ńgÿo Jâg, ńgÿo Jâŋ á gwɔ́ fɛ́ Jâg, ńdɔgɔ wɔ́b ńgʉa ńkwɔ́’ɔ nà tsɔ̌ mâ lekwɛ́. Pâ pɔ́ gwɔ́ jʉ’ó gíle pɔ́b.

² Pɔ́ gyá àliŋé Yěsô pú sele mvfò pɔ́b, eshÿó wé ŋwʉŋe pá’ nèm la. Menzsǒ mé pú fɔ́g tà ńkyɛ’ jʉ’.

³ Pɔ́ gyá, mbà Mǒsê pɔ́ *Elîɛ vegé vege ńkẅɛ, pâ Yěsô ne shwóŋe.

⁴ Piɛ leen ḿvege vege, ńgɔɔn mbwó Yěsô ngie: Cʉ̀apʉ̀a, á pǒŋ pá’ pege ee jʉ’ɔɔn lɔɔn. Zẅíŋe mèŋ n juŋ *mentàb méntá, tà’ gwɔ́ jù, tà’ gwɔ́ ye Mǒsê, yetsɔ́ gwɔ́ ye *Elîɛ.

⁵ Á nyé ńgɔɔn gɔɔn, etsɔ́ melɔ́ɔn, mie é ŋwʉŋe ŋwʉŋe sẅɛ́’ ńkábte wɔ́b, ngyè nyìŋ fó tsɛ̀ɛ wó ńgɔɔn ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág, pi jú’ ncwò wé.

⁶ *Ngàŋa kwò Yěsô gwóon ńjú’u yɔɔn nò, ńgwe ssé, ésɔb shÿó wɔ́b ssé, ḿbú ne ḿbɔ́gɔ tɛ’.

⁷ Yěsô tó, ńzába pwó ná pɔ́b, ńgɔɔn ngie: Pi lute ssé, tà pi gíŋe ḿbɔ́g.

⁸ Pɔ́ pʉ’ʉ twó yɔ́b ńnáŋte, ńcʉ́’ ńgyá pɔ́ Yěsô gíle yé.

⁹ Pâ pɔ́ gÿo ne fóo ndùm lekwɛ́ ńcwóŋo, á tsẅiŋe wɔ́b ngie, tà pɔ́ kím tà nyìŋ ndyɛ̀’ɛ lwo ńzsé mmó gie pɔ́ gyǎ, tà ndá’ ńkú fʉ̀’ gie *Míŋ Nyìŋ zimé nà legwé.

¹⁰ Pɔ́ jú’ pú’u, ńzɛ́te Yěsô ngie: Tà mélà’a kɔ́ *pàkyagte lepʉ̌ Mǒsê gɔɔn ngie *Elîɛ ge lá’ vɔg tó?.

¹¹ Yěsô tsɔ́’ ngie: Pi shwóŋó nò, à *ntsẅì nkʉ̀ Ssé *Elîɛ vɔgɔ ńtóo, lézába kɔ́ɔkɔ́ nà yé jʉ’.

¹² Tá’ tà mèŋ n ké shwóŋó gẅí, *Elîɛ kěen ńtó, epʉ̀a té yé zẅíŋ, ńnyɛɛ yé ngɔ́’ pá’ pɔ́ kwǒŋ, pɔ́ ge gÿo gíŋe nyɛɛ *Míŋ Nyìŋ ngɔ́’ pɔ́ pú’u,

¹³ ńgɔ́ɔn pú’u, *ngàŋa kwò yé leen ńké ńjú’ ngie à gɔɔn pá’a pɔ́ Jâŋ Mbabtis.

Yěsô gÿǒ tsɔ̌ múɔ gẅie aa ngwègwá’ zeŋe

¹⁴ Pɔ́ gʉa tà ńkúu jʉ’ gie lá’ laa wó, àtsɔ̌ nyìŋ tó ńkẅí’te mvfò Yěsô,

¹⁵ ńgɔɔn né yé ngie: A nde, tsétsɔ’, tsɔ́ɔn mezìŋe míŋ wɔ̀ɔn mɔɔn, aa ngwègwá’. À gyá ngɔ́’ tɛ’, à gwǎ ńgwe tsɛ̀ɛ mmɔ̌g, tà mbɔɔ tsɛ̀ɛ ntse.

¹⁶ Mèŋ n ně ńdɔgɔ yé ńtóo mvfò *ngàŋa kwò jú, tá’ pɔ́ té ku’u légÿo á zeŋe wɔ́.

¹⁷ Yěsô jú’ pú’u, ngie: Yee! Pi pʉ̀a ngù’ɔɔn, pi tè záb ntʉ́m nà Ssé wɔ́, ńgÿo pɔ́ nò tepòŋ, aa pá’ɔɔn pege lá’ ńnéŋe tà ńkú pɔ́ síŋe? Mèŋ n ge lá’ shÿɔgɔ ná menò mí tà kú pɔ́ síŋe? Pi lɔgɔ múɔ ŋwɛ́ ńtóo jʉ’ɔɔn ńná né mèŋ.

¹⁸ Pɔ́ lɔgɔ yé ńtó, Yěsô cÿɔ́g *ssé tepòŋ, é kẅɛɛ ná múɔ ŋwɛ́, á gwóon sẅéte pɔ́ fʉ̀’ó.

¹⁹ Pâ *ngàŋa kwò yé gÿo ńgwɔ́ gíle pɔ́b, pɔ́ zɛ́te yé ngie: Àkɔ́ ně ńgÿo, peg tè ku’u léjwoŋ *ssé tepòŋ ŋwɛ́ wɔ́?

²⁰ Á tsɔ́’ɔ mbwó pɔ́b ngie: Ee, mélà’mie pi záb ntʉ́m nà Ssé pɔ́ méjʉ’ lepile. Pi lɔɔn fó ńzáb ntʉ́m gẅi nà Ssé pɔ́ méjʉ’ pá’ lesɔ́ɔn sésɔg, mbà à lɔɔn ńgwɔ́ pi gɔɔn né lekwɛ́ sɛ̂ ngie: Tsɔ́’ɔ ńgʉa ńtyé jʉ’ʉ, é gʉa ńtyé jʉ’ó. Mbà à lɔɔn ńgwɔ́ tsɔ́ nò á le lá’ ńcʉa gẅi wɔ. [

²¹ Á gʉa nà yɛ̂ ntí *ssé tepòŋ, mbà nyìŋ lɔɔn tè zɔ́g nzyè, ńké sẅíŋte pɔ́ Ssé, tá ńjwoŋ wɔ́ é le kẅɛ.]

Yěsô giŋé ne ḿbÿé ngie à ge gÿo kwé é piŋ zím

²² Á gwɔ́ tsɔ́ lyɛ̌’, *ngàŋa kwò Yěsô pú ńcú’te Galilea, Yěsô gɔɔn né pɔb ngie: Mé ge sẅiŋe *Míŋ Nyìŋ mbwó pʉ̀a mesoŋ.

²³ Pɔ́ gÿo à kwé, a piŋ ngwɔ́ ḿbɔ́ɔnte lyɛ̌’ tá á zíme na le gwe. *Ngàŋa kwò yé jú’, ḿbú ḿmÿɔg tɛ’.

Ànò ncùb jʉ’ʉ Ssé

²⁴ Yěsô pâ *ngàŋa kwò yé gʉa tà ńkúu Kapernawúm, pàkẅé ncùb *jʉ’ʉ Ssé tó ńzɛ́te Piɛ ngie: Tá gẅi aa ntě ńnáa yé ncùb *jʉ’ʉ Ssé wɔ́ ka?.

²⁵ Piɛ tsɔ́’ ngie: Aa nâ nǎ, ńgɔɔn pú’u, ńkúu ndá, ńnyé pɔ́ tè ŋǎ’ ncwò wé, Yěsô gɔɔn né yé ngie: Símo, ɔ̀ kwǎŋ jú ngie kɔ́. Áa tsɛ̀ɛ njÿó yɔɔn pé’e, pàwɔ̌ ma’ ncùb ntÿɔ́’ lâ tsɔ́ mencùb, ńná né mefùɔ? Pàlá’ pé ka pàlá’a ntÿɔ́’ɔ?

²⁶ Piɛ tsɔ́’ ngie: Pʉ̀a lá’a ntÿɔ́’ zɔ̌ ná. Yěsô gɔɔn né yé ngie: Pʉ̀a lá’ té ńdɔgɔ ńgẅiin lénáa tsɔ́ mmó wɔ́, á té pú’u wɔ́ ka?

²⁷ Tá’ tà pɔgɔ gÿo nò pÿɔ́g pàkẅé ncùb. Gʉa ntse ḿma’ lezɔ́b. Ɔ̀ ge gwoon ndùŋ mvfò mbab ssó, é nyɛ́’ ncwò we, é gyá pàga nkáb, é kẅile lɔg gʉa ma’ yɔgɔ ncùb.