Matio 12 - Nouveau Testament en Ngienboum

Yěsô zɔ póŋo nò ná lyɛ’ɛ́ nzse pa Yuda

¹ Á gÿo ńgwɔ́ tsɔ́ lyɛ’ɛ́ nzse pa Yuda, Yěsô ne ńcʉa tsɛ̀ɛ nká’a ngesáŋ ntsíŋ, *ngàŋa kwò yé, pá’ nzyè la ne ńgyáŋa wɔ́b lá, pɔ́ giŋe sẅe ngesáŋ ḿpfɛ́ɛ.

² Tsɔ́ pʉ̀a nà pà *farisay gyá pú’u, ńgɔɔn né Yěsô ngie: Líe tá ńgyá pá’ *ngàŋa kwò jú gÿo mmó gie *lepʉ̌ té ne ńzɛ́te, ngie mé gÿo lyɛ’ɛ́ nzse pa Yuda wɔ́.

³ Yěsô tsɔ́’ɔ mbwó pɔ́b ngie: Pi laa fó ńtóŋo jʉ’e ŋwà’ne Ssé gie á la’te mmó gie fùɔ Ndavíd la gÿo wɔ́ ka? Pá’ á laa tsɔ̌ lyɛ̌’, nzyè gyáŋa wɔ́b lâ pʉ̀a pé.

⁴ Á kúu tsɛ̀ɛ *jʉ’ʉ Ssé, ḿbí mbelég gie mé nǎ mbwó Ssé, ḿpfɛ́ tà ńná yé *ngàŋa kwò yé, tá *lepʉ̌ gɔɔn ngie ndà’ *pànùŋe pwɔ́’ zɔ̌ gẅiin lépfɛ́!

⁵ Ka pi laa fó ńtóŋo tsɛ̀ɛ ŋwà’ne Mǒsê, ngie aa lyɛ’ɛ́ nzse pa Yuda, *pànùŋe pwɔ́’ pie pɔ́ gẅiin fà’ *jʉ’ʉ Ssé ké tè zẅɛte, tá á téen ńdɔgɔ ńgwɔ́ ngie pɔ́ fʉa *lepʉ̌ wɔ́.

⁶ Tà mèŋ n ké shwóŋó gẅí, tsɔ̌ nyìŋ aa jʉ’ɔɔn ḿbú ńcʉa *jʉ’ʉ Ssé.

⁷ Pi gwé’e ńzsé mmó gie jʉ’e ŋwà’ne gie á gɔɔn ngie: «Mèŋ n kwoŋo tsɔ́ɔn mezìŋe, ńcʉa pwɔ́’ gẅie mé lɔgɔ ńgu’te wɔ̀ɔn» lɔgɔ ńgɔɔn, mbà pi te zába nò twó pʉ̀a pɛ̂, pie pɔ́ kaa nò fʉa wɔ́.

⁸ Yěsô gíŋe ńgɔɔn né pɔ́b ngie: *Míŋ Nyìŋ zɔ zɔɔn ńgẅiin légɔɔn mmó gie à lɔɔn ńgwɔ́ mé gÿo nà lyɛ’ɛ́ nzse pa Yuda.

Yěsô gÿǒ nyìŋ gẅie pwó yé la kwé zeŋe

⁹ Yěsô fó jʉ’ó, ńgʉa ńkúu tsɛ̀ɛ *ndá cú’tè pɔ́b.

¹⁰ Àtsɔ̌ mámbàŋa gwɔ́ yé ndá ŋwɛ́, mbà pwó yé leen ńkwé. Pʉ̀a pie é laa ndá ne fa’a mmó gie pɔ́ ge fó mǒ lɔg sẅiŋe Yěsô, zɛ́te yé ngie: Áa nà *lepʉ̌ ségè pé’e ńgwaa we mé gÿo nyìŋ zeŋe lyɛ’ɛ́ nzse ka ngǎŋ?

¹¹ Yěsô tsɔ́’ɔ mbwó pɔ́b ngie: Àwɔ̌ aa tsetsɛ̀ɛ pi pɛ́’ɛ, ńgwɔ́ gie à lɔɔn ńgẅiin mûɔ *njʉ̀njÿò pɔ́ wémɔ’ɔ́, á gwe tsɛ̀ɛ tɔ́ɔn lyɛ’ɛ́ nzse, á nyé té fó tsɛ̀ɛ wó ńgwóon ńkẅile yé?

¹² Nyìŋ mesoŋ aa mmó tʉ̀ nzẅìŋ ńcʉa *njʉ̀njÿò, pú’u lá, mé lɔɔn ńgÿo nò mbòŋo á ná nyìŋ mesoŋ lyɛ’ɛ́ nzse, mbà mé kaa *lepʉ̌ fʉa

¹³ Yěsô leen ńké ńgɔɔn mbwó kwé pwó ngie: Siŋe pwó jú, á siŋ, mé gyá á gíŋe ńtʉte pá’ yetsɔ́.

¹⁴ Á cʉa pà *farisay, pɔ́ fó *ndá cú’tè ńkẅɛ, ńcú’te fa’ shÿó pá’ pɔ́ ge gÿo tá zẅé Yěsô

Ngàŋa fà’ gẅie Ssé la tsɔ́’

¹⁵ Tá Yěsô gwɔ́ tà ńzsé, éfó jʉ’ó ńgʉa. Àlá’ cʉ́me nzèm yé tà ńgyɔ́ɔn. Á gÿo megàŋa guɔ ntsèm pie é laa tsɛ̀ɛ nùɔ lá’ zeŋe.

¹⁶ Á piŋ ńtɔ’ɔ wɔ́b tà ḿbʉ́, ngie pɔ́ pɔ́ɔn légÿo tà mé zsé nyìŋ gẅie aa wɛ̌.

¹⁷ Pú’u, ànò gie Ssé la lɔg ncwò Ntsẅì Nkʉ̀ we Esǎya ńgɔɔn, á lɔgɔ ḿbumte

¹⁸ À la gɔɔn ngie: «Wɔ̀ɔn aa ngàŋa fà’ wɔ̀ɔn mie n deen ńtsɔ́’. N kwoŋo yé tɛ’, yé zɔ gÿo ntʉ́m wɔ̀ɔn kág. Mèŋ n ge gÿo ńnéŋe Zẅìge yɔ́ɔn ná yé, à gÿo ńnyɛ ntí lesá’a lá’ gie ee ndʉŋ ndʉŋ mbwó melá’ mie e té pà Israel wɔ́.

¹⁹ À tè gÿo fa’ ntsaŋ wɔ́, é ké le gɔɔn nò tà ngyè yé kwɔ́’ɔ tÿǒ wɔ́. Mé ké le jú’ á tyé metwó nzsè ńnáa shwóŋò wɔ́.

²⁰ À tě ńdá’a ḿbwɔ́’ɔ kekà’a gie á tʉ́ŋe wɔ́, é ké le pyág mmɔ̌g nà lâm gẅie à gee ḿbyě wɔ́, é ké lá’ gÿo pɔ́ pú’u, tà ntí lesá’a lá’ gie ee ndʉŋ ndʉŋ e jÿó mânyìŋ ntsèm.

²¹ Mengwòŋ ntsèm tsɛ̀ɛ njÿó cʉ́’ʉ ńdɔgɔ pɔ́ yé ńnéŋe».

Yěsô ne fóo ná pʉ̀a, ńjwoŋo messé tepòŋ

²² Mé lɔgɔ tsɔ̌ nyìŋ ńtóo mvfò Yěsô, mbà *ssé tepòŋ leen ńgÿo á fʉ, ńgíŋ ńcʉ́’ʉ támbǎ’. Yěsô gÿo nyìŋ ŋwɛ́ zeŋe, ńgwóon ńzye leshwóŋe, mbɔɔ légyá jʉ’ mboŋó.

²³ Àlá’ ntsèm pú ńgyá ḿmɔɔn tɛ’, ńgɔɔn ngie: Ndyɛ̀’ tsɔ́ aa nyìŋ na ngẅɛ fùɔ Ndavíd wɛ̌.

²⁴ Tá’ pʉ̀a *farisay, jú’ pú’u, ńgɔɔn ngie: Bɛlzebùl, tándá *messé tepòŋ zɔ́ gÿo tá Yěsô ku’u léjwoŋ *messé tepòŋ.

²⁵ Yěsô zsé nkwaŋá wɔ́b, ńgɔɔn né pɔ́b ngie: Epʉ̀a tà’a lá’ lɔɔn sele ńdÿɔ́’ ncù tsetsɛ̀ɛ pɔ́b, mbà yɛ̌ lá’ ge pyé. Epʉ̀a tà’a tÿǒsoŋ ka tà’a tsìŋe ndá wɔ́ piŋ sele ńdÿɔ́’ ncù tsetsɛ̀ɛ pɔ́b, mbà yɛ̌ tÿǒsoŋ ka yɛ̌ tsìŋe ndá wɔ́ ge pyé.

²⁶ Lefùɔ se Sátà gíŋe ńgwɔ́ pɔ́ kwà’ pú’u, epʉ̀a pé lɔɔn fagte, ńzye lesele ńdÿɔ́’ ncù tsetsɛ̀ɛ pɔ́b, mbà lefùɔ sé ge pyé.

²⁷ Pi gɔ̌ɔn ngie n dɔgɔ pɔ́ metʉ̀ Bɛlzebùl tá ńdɔgɔ ńjwoŋo *messé tepòŋ, tà pá’ pí pʉ̀a gíŋe ńjwoŋo yɔ́b *messé tepòŋ li, pɔ́ piŋe ńdɔgɔ yɔ́b metʉ̀ nzɔ̌ tá ńjwoŋo? Kwà’ pʉ̀a pí ŋwɛ́ nyɛɛ gẅi ngie pi gɔɔn pɛ́’ɛ éfʉa fʉa.

²⁸ Tá ńgʉa nà mèŋ, mbà mèŋ n dɔgɔ pɔ́ metʉ̀ Zẅìge Ssé tá ńjwoŋo. Á lɔgɔ ńnyɛɛ ngie e Ssé ně ńdá’ ńtó, tà ńgwɔ́ fùɔ á tsɛ̀ɛ yɔɔn njÿó.

²⁹ Tà à lɔɔn ńgwɔ́ nyìŋ gÿo lêkɔ́ tá ḿbwɔ́’ ndá tántʉ̀, ńkaa shúm sé té gwɔ́ gie à vɔg ńkwɛ́ɛ yé? À vɔg tà ńkwɛ́ɛ yé, á ku’u lékúu ndá ḿbú ńkaa shúm sé ntsèm.

³⁰ Nyìŋ lɔɔn ńdʉ’ pá’ peg yé ge gwɔ́ lê nò, mbà à lɔgɔ ńcʉŋe nò yɔ́ɔn, nyìŋ piŋ ńdʉ’ʉ lékẅéte wɔ̀ɔn, peg yé cú’te pʉ̀a pɔ́ɔn, mbà à cʉ́’ʉ ńtága wɔ́b ésaa sa.

³¹ Pú’u, tá mèŋ n gɔɔn né pi ngie à lɔɔn ńgwɔ́ Ssé lá’ ḿbú ńdege meno tepoŋ pʉ̀a mesoŋ ntsèm, ńnáa mbwó pɔ́b, tà mbɔɔ meshwóŋe ntsèm mie pɔ́ lɔgɔ ńzoonte yé. Tá nyìŋ ké ńzoonte Zẅìge Ssé, mbà mé téen ńdá’a ńdege ńnáa mbwó yé wɔ́.

³² Nyìŋ lɔɔn shwóŋó tepòŋ ná *Míŋ Nyìŋ, mbà Ssé ge lá’ lege ńnáa mbwó yé. Tá nyìŋ ké shwóŋó tepòŋ á nà Zẅìge Ndʉalʉ̌a, mbà á gwɔ́ pɔ́ ná yɔɔn kème njÿó, mé le lege ńnáa mbwó yé wɔ́, e ké le lá’a nà tsɔ́ kème njÿó ńdege ńnáa mbwó yé wɔ́.

Mé zsé tÿǒ nà mentɔ̌ɔn mé

³³ Yěsô gíŋe ngie: Àtÿǒ lɔɔn ńgwɔ́ tÿǒ mbòŋo, mbà á ge zém pɔ́ ntɔ̌ɔn mbòŋo. Àtÿǒ ké ńgwɔ́ yé tepòŋ, mbà á ge zém pɔ́ ntɔ̌ɔn tepòŋ. Mé zɔ́ɔn ńzsé yɛ̌ tÿǒ wɔ́ pɔ́ nà mentɔ̌ɔn mé.

³⁴ Ngẅɛ̀ mennú, ńgwɔ́ pi gwɔ́ pʉ̀a tepòŋ pɛ́’ɛ, ńgɔɔn nò mbòŋo lêkɔ́? Nyìŋ gɔɔn pɔ́ nò gie áa tsɛ̀ɛ ntʉ́m yé.

³⁵ Pi zsé ngie: Nyìŋ lɔɔn ńgẅiin ntʉ́m mbòŋo, mbà á ge gẅiin ncwò mbòŋo, ńgẅiin ntʉ́m tepòŋ, mbà shwóŋó tepòŋ zɔ̌ ge kẅɛɛ ncwò ye

³⁶ Mèŋ shwóŋó gẅí: Á ge la’a lyɛ̌’ gie e Ssé tsɔ́’te metsaŋ pʉ̀a mesoŋ, wɛ̌ nyìŋ wɔ́ gẅiin lépíte megʉ̀gʉ̀ shwóŋè mie é lǎ kẅɛɛ ncwò yé.

³⁷ E Ssé ge lá’ lɔg pɔ́ nò gie á lǎ kẅɛɛ ncwò wɔ̌wɔɔ, ézá’ ntsaŋ yé, à tè gwe, á tsẅɛ́.

Yěsô lʉ’ʉ́ légÿo nò mmɔɔn mmɔɔn

³⁸ Yěsô gɔɔn yɔɔn nò tà ńtsẅé jʉ’, etsɔ́ *pàkyagte lepʉ̌ Mǒsê lâ tsɔ́ pà *farisay gɔɔn né yé ngie: tsítsà, peg ne ntsɔ́ɔn ngie ɔ̀ gÿo tà’a nò mmɔɔn mmɔɔn.

³⁹ Yěsô tsɔ́’ ngie: Pʉ̀a pie ee tsɛ̀ɛ njÿo fʉ’ɔɔn ee pʉ̀a tepòŋ, ḿbiŋ ńké ńtʉ pɔ́ twó mbwó Ssé ne ńzɛ́te ngie mé gÿo tà’a nò mmɔɔn mmɔɔn pɔ́ gyá. Tá mé téen ńge ńnyɛɛ wɔ́b tsɔ́ mmó wɔ́, tà ńdí ndà’ nò gie á la gÿo Jonase *ntsẅì nkʉ̀ Ssé.

⁴⁰ Ndʉŋ ndʉŋ pá’ Jonase la ńnéŋe tsɛ̀ɛ lepfòm máamáa ssó é lyɛ̌’ tá la; *Míŋ Nyìŋ ge lá’ gÿo yé lyɛ̌’ tá tsɛ̀ɛ tsetsá’.

⁴¹ Tà mèŋ shwóŋó gẅí, á ge lá’a lyɛ̌’ gie e Ssé ŋaga pʉ̀a mesoŋ, epʉ̀a Ninive lu ssé ńtó ńtyé, ńzába nò twó pʉ̀a pie ee tsɛ̀ɛ njÿó fʉ’ɔɔn. Á nue Jonase la gɔɔn nò mbwó pɔ́b, pɔ́ jú’, ńkúbe mà wɔb. Nyìŋ gẅie à piŋe shwóŋó gẅi nò lyɛ̌’ɔɔn pi tě ńzẅíŋe wɔ́, à cʉa Jonase.

⁴² Á ge lá’a lyɛ̌’ gie e Ssé ŋaga pʉ̀a mesoŋ, máfùɔ pà Shéba lu ssé ńtó ńtyé, ńzába nò twó pʉ̀a pie ee tsɛ̀ɛ njÿó fʉ’ɔɔn, á nue a lá jú’ ngie legye fùɔ Salomo pú ńcʉa se mânyìŋ ntsèm, éfó táa lá’ yé ńdu ssé ńtó, ńdɔg nÿɔ́g mé ńgyá yé. Nyìŋ gẅie a piŋe shwóŋó gẅi nò lyɛ̌’ɔɔn pi tě ńzẅíŋe wɔ́, esé legye cʉa se fùɔ Salomo.

Menò nyìŋ gẅie à tʉʉ twó mbwó Ssé gwá’a menò nyìŋ gẅie e ssé tepòŋ kẅɛ̌ ná yé ńgíŋe ḿbiŋ

⁴³ E *ssé tepòŋ ńnéŋe ná nyìŋ tà ńgÿo ńkẅɛ, ńgwá ńgwó ná jʉ’ sie é júbe jubé, éfa’a jʉ’ gie e ge pʉle ńnéŋe wó, ḿbiŋ ńké tè gyá,

⁴⁴ ńdeen ńké ńgɔɔn ngie, á poŋ ngie m biŋ nzèm á tsɛ̀ɛ ndá yɔ̀ɔn mie n ka zɔɔn ńgwɔ́ wó, à lɔɔn ḿbiŋ nzèm ńgyá é tyé sẅɛ̀ɛ, mbà mé keen ńjÿɔg, ńtáŋte shúm tsòló,

⁴⁵ mbà à ge gʉa gú tsɔ́ *messé tepòŋ sɔɔn mbʉ́a, e gwɔ́ mie pú ńgyɔ́ɔn sóon tà ńcʉa yé, pâ pɔ́ piŋ nzèm ńkúu ná nyìŋ wa, ńdɔgɔ yé ńgÿo ndá yɔ́b. Ngɔ́’ ngàŋ pú ńgyɔ́ɔn ńcʉa pá’ e ka zɔɔn ńgwɔ́. Á ge lá’ gíŋe gwɔ́ pɔ́ pú’u, nà pʉ̀a pie ee tsɛ̀ɛ njÿó fʉ’ɔɔn pie e tepòŋ.

Má pà Yěsô pâ mefɛ́ pé ee pà wɔ̌?

⁴⁶ Yěsô lá nyé shwóŋó mbwó lá’ shwoŋó, má we pâ mefɛ́ pé tó, ńtyé pǐ ne fa’a légyá yé.

⁴⁷ Nyìŋ tó ńgɔɔn né Yěsô ngie: Má gù pâ mefɛ́ pú ee pǐ ńne ńtsɔ́ɔn légyá gú.

⁴⁸ Yěsô tsɔ́’ɔ mbwó pɔ́b ngie: Àwɔ̌ aa má wɔ̀ɔn, pàwɔ̌ gwɔ́ mefɛ́ pɔ́ɔn?

⁴⁹ Ńgɔɔn pú’u, ńdɔgɔ pwó ńnyɛ *ngàŋa kwò yé, ńgɔɔn ngie: Má wɔ̀ɔn pâ mefɛ́ pɔ́ɔn pɛ̀.

⁵⁰ Nyìŋ lɔɔn ńgÿo mmó gie Tá wɔ̀ɔn gẅie aa tÿǒ lepwó ne ńkwoŋo, mbà wɛ̌ nyìŋ aa fɛ́ wɔ̀ɔn we mámbàŋa, ńgwɔ́ we manzwě, ńgwɔ́ má wɔ̀ɔn.