Malékuse 9 - Nouveau Testament en Ngienboum

¹ Yěsô gíŋe ńgɔɔn né pɔ́b ngie: Mèŋ shwóŋó gẅí, kwà’ nénʉ́, ngie: Etsɔ́ ntá’ ná pʉ̀a pie pɔ́ ée jʉ’ɔɔn fʉ̀’ɔɔn té ge gÿo kwé té gwɔ́ gie pɔ́ lɔ̌g nÿɔ́g ńgyá *Lefùɔ Ssé pá’ é tóo lê shʉ́shÿɔ́g wɔ́.

Aliŋé Yěsô selé

² É cʉa lyɛ̌’ ntɔgɔ́, Yěsô faga Piɛ ńgÿo Jâg pɔ́ Jâŋ, ńdɔgɔ wɔ́b ńgʉa ńkwɔ́’ɔ nà tsɔ̌ máa lekwɛ́. Pâ pɔ́ gwɔ́ wó gílé pɔ́b, pɔ́ gyá liŋé yé pú sele.

³ Menzsǒ mé pú ńcʉ́’ ńŋwʉŋe ŋwʉŋe, ḿbú fɔ́g tà tsɔ́ mmó gie à lɔɔn ńgwɔ́ nyìŋ lɔg sɔg nzsǒ ndùmo ssé tsetsá’ tà é fɔ́g pú’u, yɛ̌ té wó wɔ́.

⁴ *Ngàŋa kwò Yěsô pɛ̌ métá gyá, mbà *Elîɛ pɔ́ Mǒsê kẅɛ̌ ńtyé, pâ Yěsô ne shwóŋe.

⁵ Piɛ leen ḿvele vele ńgɔɔn mbwo Yěsô ngie: Tá weg, á pǒŋ pá’ pege jʉ’ɔɔn lɔɔn. Zẅíŋe peg jwóŋ *mentàb méentá, tà’ gwɔ́ gú, tà’ gwɔ́ we Mǒsê, wetsɔ́ gwɔ́ we *Elîɛ.

⁶ À lɔ̌ɔn ńcʉ́’ʉ ńgɔɔn yé pɛ́’ɛ̀, tá à tě ńzsé mmó gie à gɔɔn yɛ̌ wɔ́, mbà cÿɔ’ pǔ ńgwoon wɔ́b tɛ’.

⁷ Pɔ́ gwaa gyá, etsɔ́ melɔ́ɔn sẅɛ́’, ńkábte wɔ́b. Ngyè nyìŋ fóo tsoló ńgɔɔn ngie: Wɔɔn aa Míŋ wɔ̀ɔn, mèŋ n kwoŋo yé tɛ’. Pi jú’ ncwò wé,

⁸ ńgwaa cʉ́me, *ngàŋa kwò Yěsô té gíŋe petsɔ́ pʉ̀a ńgyá wɔ́, ndà’ wɔ́ba Yěsô zɔ̌ cʉ́’ ńgwɔ́.

⁹ Pâ pɔ́ gÿo ńne fóo ndùm lekwɛ́ ńcwóŋo, á tɔ’ɔ wɔ́b ngie tà pɔ́ keme mmó gie pɔ́ gyǎ lá, tà ńdá’ ńkú fʉ̀’ gie *Míŋ Nyìŋ zimé nà legwé.

¹⁰ Pɔ́ zẅíŋ pá’ à gɔ̌ɔn pú’u, ńké ńne ńzɛ́te tsetsɛ̀ɛ pɔ́b pɔ́ ngie: À gɔɔn ngie ńzíme nà legwé, ńzíme nà legwé ńdɔgɔ ńgɔɔn ngie kɔ́?

¹¹ Pɔ́ leen ńké ḿbiŋ ńzɛ́te Yěsô ngie: Tà *pàkyàgte lepʉ̌ Mǒsê gɔɔn ngie *Elîɛ ge lá’ vɔg tó pé’e mélà’a kɔ́?

¹² Á tsɔ́’ɔ mbwo pɔ́b ngie: «Áa nò, a*ntsẅì nkʉ̀ Ssé *Elîɛ vɔgɔ ńtóo lézába kɔ̀ɔkɔ́ɔ nà yé jʉ’», ńzɔɔn ńgwɔ gwɔ́, mbà pá’ mé la gíŋe ńŋwe’e tsɛ̀ɛ ŋwà’ne Ssé ngie: *Míŋ Nyìŋ zɔɔn ge lá’ gyá ngɔ́’ tɛ’, mé kʉ́e yé, mé ŋwe’e pú’u, ńdɔgɔ ngie kɔ́

¹³ Tá’, mèŋ shwóŋó gẅi pá’ɔɔn, mbà *Elîɛ ŋwɛ́ kéen ńtó, epʉ̀a mesoŋ gÿo ná yé pá’ pɔ́ kwǒŋ, á gwɔ́ ndʉŋ ndʉŋ pá’ mé la ŋwe’e tsɛ̀ɛ ŋwà’ne Ssé ńtí yé.

Yěsô jwǒŋ ssé tepòŋ ná tsɔ̌ múɔ

¹⁴ Yěsô gwaa piŋ nzèm jʉ’ gie *ngàŋa kwò yé ée wó, ńgyá alá’ pú ńtÿɔ́’ɔ wɔ́b ńnéŋe soŋ, *ngàŋa kwò yé pâ *pàkyàgte lepʉ̌ Mǒsê gwɔ́ wó ńzoŋo tsɔ́ nò.

¹⁵ Alá’ gwɔ́ tà ńgyá Yěsô kẅɛɛ ná pɔ́b, pɔ́ pú ńnɔ́ɔnte ńgʉa ńtsyɛ’te yé.

¹⁶ Á piŋ ńzɛ́te *ngàŋa kwò yé ngie pɔ́ zoŋo kɔ́ wɔ́?

¹⁷ Atsɔ̌ nyìŋ kẅɛɛ nùɔ lá’, ńtsɔ́’ɔ mbwo ye ngie: Andè, mèŋ n dɔgɔ́ míŋ wɔ̀ɔn ńtó légyá gú. Á gwɔ́, mbà *ssé tepòŋ léen ńgwoon yé, ńtsɛ́ ncwò wé.

¹⁸ E *ssé tepòŋ ŋwɛ́ lɔɔn ńgwɔ lu ssé ná yé, á gwɔ́ nzɔ̌ jʉ’ wɔ́, é tsẅí’i yé ḿma’a pɔ́ ssé, á tiŋ, éfu’ metyé, ḿpfɛ́ mesoŋ mé. Mèŋ n tǒ pá’a, ésẅíŋte *ngàŋa kwò ɔ́ ngie pɔ́ jwoŋ *ssé tepòŋ ya yɛ̌, pɔ́ té mǒ ku’.

¹⁹ Yěsô gɔɔn mbwo pɔ́b ngie: Akwò pàtè něŋ ntʉ́m nà Ssé, áa pá’ɔɔn pege lá’ ńnéŋe tà síŋe gwɔ́ tá pi záb ntʉ́m gẅi nà Ssé? Mèŋ n ge lá’ shÿɔgɔ ná menò mí tà kú pɔ́ síŋe? Pi lɔgɔ múɔ ŋwɛ́ ńtó, ńná né mèŋ.

²⁰ Mé lɔgɔ yé ńtó ńná né ye, essé tepòŋ ŋwɛ́ leen ńjú’u gyé Yěsô, ńkaa múɔ ŋwɛ́ ńtéme ssé, á kele ssé, ńzye léfu’ metyé.

²¹ Yěsô zɛ́te tá múɔ ngie: Yɔɔn guɔ áa pá’ɔɔn ńgwɔ́ ná múɔ tà fó síŋe? Á gɔɔn ngie tà fó fʉ̀’ gie mé la zyé yé.

²² Á piŋ ńgwɔ́ tà *ssé tepòŋ ŋwɛ́ gwoon yé, ńne ḿma’a yé nzɔ̌ wɔ́, ḿma’a ma’, kà tsɛ̀ɛ mmɔ̌g wɔ́, kà tsɛ̀ɛ ntse wɔ́, éfa’ pɔ́ shÿó léké ńzẅé yé zẅé. Tsétsɔ’ tsɔ́ɔn mezìŋe mɔ́ɔn, ńkẅéte wɔ̀ɔn, ńgÿo à sẅéte pá’ ɔ̀ lɔɔn ńku’.

²³ Yěsô pʉŋe yé ngie: Ɔ̀ piŋe ngie pá’ ɔ̀ lɔɔn ńku’ lêkɛ̂? Anò té cʉa nyìŋ gẅie à záb ntʉ́m nà Ssé wɔ́.

²⁴ Tá múɔ leen ńdwo ńgɔɔn ngie: Oon! Mèŋ n zǎb ntʉ́m wɔ̀ɔn nà Ssé, kẅéte wɔ̀ɔn, mèŋ n kẅi’i ńzáb ntʉ́m nà yé.

²⁵ Yěsô gyá, alá’ ne ńnɔ́ɔnte ńkẅi’i ńtóo tǒ, á cÿɔ́g *ssé tepòŋ ŋwɛ́, ńgɔɔn ngie: Gù *ssé tepòŋ gie e tsɛ́ɛ ncwò nyìŋ, ńziŋe pâ metuŋó mé, mèŋ n gwɔ gyá, mbà ɔ̀ fǒ ná múɔ wɛ̂ ńkẅɛ, ḿbɔ́ɔn lélá’ ńgíŋ ḿbiŋ nzèm ńkúu ná ye.

²⁶ E *ssé tepòŋ ŋwɛ́ tsẅi’i múɔ ḿma’a ssé, ńgÿo á ga’te, éfó ná yé ńkẅɛ. Á cʉ́’ ńnuŋo ssé ńgÿo pɔ́ pá’ pfó nyìŋ la, tà mé ne ńgɔɔn pɔ́ ngie à kwě.

²⁷ Tá’, Yěsô kú’te pwó yé ńkẅéte yé, ńgÿó á lu ssé ńtyé tyé.

²⁸ Yěsô pâ *ngàŋa kwò yé gÿo ḿbiŋ tà ńkúu ndá, ńgwɔ́ gílé pɔ́b, pɔ́ zɛ́te yé ngie: Akɔ́ ně ńgÿo tá peg tè ku’u léjwoŋ yɔɔn *ssé tepòŋ ŋwɛ́ wɔ́?

²⁹ Yěsô gɔɔn né pɔ́b ngie: Mé lɔg pɔ́ ndà’ lésẅíŋte Ssé tá ńdɔg ńgÿo yɛ̌ ntí *ssé tepòŋ fó ná nyìŋ ńkẅɛ.

Yěsô giŋé ńgɔɔn ntí legwé gie à ge kwé yɛ̌

³⁰ Pâ Yěsô fó wó ńne ńgee, ńcʉa tsɛ̀ɛ ngwòŋ Galilea, á piŋ ńké tè ne ńkwoŋo ngie mé zsé jʉ’ gie aa wó wɔ,

³¹ ńně ńzí’i *ngàŋa kwò yé mmó, ńne shwóŋó ngie: Mé ge sẅiŋe *Míŋ Nyìŋ mbwo pʉ̀a mesoŋ pɔ́ gÿo à kwé. Tá’, e gwaa gwɔ́ lyɛ̌’ tá à zím.

³² Á gɔɔn pú’u, *ngàŋa kwò yé ké tè jú’ mboŋó wɔ́, tá ḿbiŋ ne ḿbɔ́gɔ lé zɛ́te yé nò mǒ.

Legwɔ́ ndÿò aa legǎ?

³³ Pɔ́ gʉa tà ńkúu Kapernawúm, ńkúu ndá, Yěsô zɛ́te wɔ́b ngie: Pi kɔ’ɔ́ ńgiŋe mánzsè ńzoŋo kɔ́ pé’e?

³⁴ Pɔ́ té tsɔ́b, á nue pɔ́ kɔ’ɔ́ mánzsè, ńne ńzoŋo fa’a nyìŋ gẅie aa tsetsɛ̀ɛ pɔ́b ńgwɔ́ ndÿò wɔb metsèm.

³⁵ Yěsô leen ńké ńnéŋe ssé, ńtóŋ *ngàŋa kwò yé ntsɔ̀b pʉ́a nê legém, éshwóŋó wɔ́b ngie: Nyìŋ gẅi lɔɔn ne fa’a létyé ńgwɔ́ mvɔ́g mvfò, mbà á poŋ ngie à zẅíŋe légwɔ́ nzèm, éfa’a mbwo pʉ̀a metsèm,

³⁶ ńgɔɔn pú’u, ńtóŋo mûɔ mémúɔ, ńtyé pɔ́ mvfò pɔ́b, ńkaa yé ńgẅiin, ńdeen ńké ńgɔɔn ngie:

³⁷ Nyìŋ lɔg lezíŋ sɔ́ɔn, ńkúe mûɔ memûɔ pá’ wɔɔn lɔɔn, mbà ngàŋ kúe pɔ́ wɔ̀ɔn. Nyìŋ piŋ ńkúe wɔ̀ɔn, mbà ngàŋ tě ńkúe pɔ́ ndà’ wɔ̀ɔn mɔ́, à kúe pɔ́ nyìŋ gẅie à la túmo wɔ̀ɔn.

Nyìŋ gẅie à toonte pɔ́ ngàŋa tág

³⁸ Jâŋ ńnéŋe tà ńgɔɔn né Yěsô ngie: Tá weg, peg ně ńgyá tsɔ̌ nyìŋ ne ńdɔgɔ lezíŋ shú ńjwoŋo *messé tepòŋ ná pʉ̀a, peg fa’a létɔ’ɔ yé, mélà’mie à tè yé nzèm gù pá’ peg wɔ́.

³⁹ Yěsô tsɔ́’ ngie: Tà pi tɔ’ɔ yé légÿo pú’u, à lɔɔn ńgwɔ́ nyìŋ le lɔg lezíŋ sɔ́ɔn, ńgÿo nò mmɔɔn mmɔɔn, ḿbiŋ ńgwóon ńkíme wɔ̀ɔn tepòŋ wɔ́.

⁴⁰ Nyìŋ gẅie à kaa nò yégè tága, aa wege nyìŋ.

⁴¹ Mèŋ shwóŋó gẅí, kwà’ nénʉ́, nyìŋ lɔɔn ńgwaa náa méjʉ’ʉ ntse né pi, ńnáa, mélà’mie pi ee pʉ̀a pɔ́ɔn, mbà wé ntsɔ’ɔ́ fà’ téen ńdá’a ḿbyé wɔ́.

Ammó gie à lɔɔn ńgwɔ́ á gÿo nyìŋ pɔ́ Ssé fege

⁴² Tá’, nyìŋ gẅie à ké ńtsóte tsɔ̌ tà’ nyìŋ nà mecʉ̀cʉ̀ŋ pɔ́ɔn pie pɔ́ záb ntʉ́m ná mèŋ, légwɔ́ gie à ge fʉa nò, mbà ngɔ́’ gie e ge lá’ kúu ngàŋ, e ge gwɔ́ gie e pǔ ńgyɔ́ɔn, tà mvfò gwɔ́ ndà’ pá’ à lɔɔn ńgwɔ́ mé cʉŋe máamáa tóon lóŋ ngàŋ, ḿma’a yé tsɛ̀ɛ mí.

⁴³ Apwó ɔ́ zɔ lɔɔn ne ńtsóte gú ńnéŋe tsɛ̀ɛ mefʉ̀a, ɔ̀ zá’ ńgwá’, mbòŋo ee gú légwɔ́ kème pwó, tá ńké ńdá’ ńgwɔ́ wó, ńcʉa gú légẅiin mbwó mbʉ́a, tá ḿbiŋ ńkúu tsɛ̀ɛ jʉ’ gie mmɔ̌g ée wó, ńgwɔ́ gẅie é téen ńdá’a ḿbyé tsɔ́ lyɛ̌’ wɔ́,

⁴⁴ [á jʉ’ gie mentẅintẅɛ mie ée ntěen ńkwé wɔ́ pfɛ́ mepfó pʉ̀a wó. Mmɔ̌g gẅie é kÿó wó, é téen ńdá’a ḿbyé wɔ́.]

⁴⁵ Akwò jú zɔ lɔɔn ne ńtsóte gú ńnéŋe tsɛ̀ɛ mefʉ̀a, ɔ̀ zá’ ńgwá’, mbòŋo gú légwɔ́ kème kwò tá ńdá’ ńké ńgwɔ́ wó, ńcʉa gú légẅiin mekwò mú mémbʉ́a tá mé ma’a gú tsɛ̀ɛ mmɔ̌g,

⁴⁶ [á jʉ’ gie mentẅintẅɛ mie ée ntěen ńkwé wɔ́ pfɛ́ mepfó pʉ̀a wó. Mmɔ̌g gẅie é kÿó wó, é téen ńdá’a ḿbyé wɔ́,]

⁴⁷ ḿbiŋ ńgwɔ́ gie lejÿɔ́g shú zɔ ne ńtsóte ɔ́, ɔ̀ fʉa nò, ɔ̀ tsɔ́’ ńgwá’, mvfò ee gú légwɔ́ pyè lejÿɔ́g tá ńké ńkúu nà nò *Lefùɔ Ssé, ńcʉa pá’ à lɔɔn ńgwɔ́ ɔ̀ gẅiin menÿɔ́g mú mémbʉ́a mé piŋ ḿma’a gú tsɛ̀ɛ jʉ’ʉ mmɔ̌g,

⁴⁸ «á jʉ’ gie mentẅintẅɛ mie ée ntěen ńkwé wɔ́ pfɛ́ mepfó pʉ̀a wó. Mmɔ̌g gẅie é kÿó wó, é téen ńdá’a ḿbyé wɔ́».

⁴⁹ Pi zsé ngie mmɔ̌g ge lá’ táŋte mawɔ̌wɔ́ɔ ndʉŋ ndʉŋ pá’ mé lɔgɔ ngwáŋ ńtáŋte shúm pwɔ́’.

⁵⁰ Ngwáŋ ée ssé ńgwɔ́ mmó mbòŋo tá’, é lɔɔn ńgwɔ́ tà é té ńnyé ne ńdʉme wɔ́ mé gíŋe ńdɔgɔ kɔ́ ńgÿo tá é gíŋe ńdʉm? Á poŋ ngie kwà’ ngwáŋ mbòŋo gwɔ́ lóŋ pi, pú’u, asẅétè gwɔ́ tsetsɛ̀ɛ pi.