Malékuse 16 - Nouveau Testament en Ngienboum

Yěsô zimé nà legwé

¹ *Alyɛ’ɛ́ nzsè pà Yuda ŋwɛ́ gÿo ńtɔ́g, Malîɛ Magdala pɔ́ Salomé, ńgÿo Malîɛ má pà Jâg, gʉa ńjúu laméndɔ́ɔn lélɔg ńzɔ́’ɔ pfó Yěsô.

² Njÿó lʉ́a, tà nèm ne sá’a, pɔ́ mʉ́ ńgʉa ne jʉ’ʉ lesyè. Á laa ndùŋ mvfò lyɛ̌’ nà ngàba lá’.

³ Pɔ́ la ne ńgiŋe, ńně ńzɛ́te tsetsɛ̀ɛ pɔ́b ngie: Tà wɔ̌ ge kúu jʉ’ó kite máa tóon ncwò lesyè né pɔ̌b wɔ́?

⁴ Ńgʉa tà ńkúu wó, ńgyá, mbà mé ně fó ncwò lesyè ńkite máa tóon ŋwɛ́.

⁵ Pɔ́ zyɛ́’ ńkúu tsɛ̀ɛ lesyè, ńgyá tsɔ̌ mûɔ ngwàshùm ńnéŋe nà gwoŋó pwó tʉ̀, ḿma’a féfɔ́gɔ nzsǒ. Pɔ́ gyá yé ḿbɔ́g tɛ’.

⁶ Tá’, á gɔɔn né pɔ́b ngie: Tà pi pɔ́g, pi fa’a Yěsô mûɔ Nǎzarɛd gẅie mé kà kime yé nà tÿǒ nkǐ la? À zimé nà legwé, à tè nyé jʉ’ɔɔn wɔ́. Pi gyá, yɔɔn áa jʉ’ gie mé kà nuŋe pfó yé wó.

⁷ Pi gʉa fʉ̀’ɔɔn shwóŋó Piɛ, pâ yetsɔ́ *ngàŋa kwò Yěsô ngie à vɔgɔ́ Galilea, ńne ńzẅíte gẅi pá’ à la shwóŋó gẅi ngie pi ge lá’ gyá yé wó la.

⁸ Panzwě ŋwɛ́ leen ḿbú ḿbɔ́g pɔ́g, ńkẅɛ ńkÿo, ḿbú ńtebe tà fó tè gíŋe ńku’u létsẅii nò mbwo nyìŋ wɔ́, mbà cÿɔ’ pǔ ńgwoon wɔ́b.

Yěsô zimé nà legwé tà mé gyá yé

⁹ Yěsô la zíme na legwé, á mba’ámba’ mvɔ́g mvfò lyɛ̌’ nà ngàba lá’, ḿvɔg ńnyɛ mbùm ye mbwo Malîɛ Magdala wá gẅie *messé tepòŋ sɔɔn mbʉ́a la gwoon yé, ńne ḿbue yé tá Yěsô kẅé yé mbwo pɔ́b la.

¹⁰ Á leen ńké ńgʉa ḿbíte shwóŋ *ngàŋa kwò Yěsô. Pɔ́ laa tsɛ̀ɛ lemÿɔg, ḿbú ne ńdʉa.

¹¹ Pɔ́ jú’ ngie à zimé nà legwé tà á gyá yé á gwɔ́ pɔ́ ntèntʉ́, pɔ́ pú tè zẅíŋ.

¹² À la gÿo pú’u, ńgíŋe ńnyɛ mbùm ye nà tsɔ̌ ntí, á mbwo tsɔ́ *ngàŋa kwò yé yépʉ́a, pɔ́ gwɔ́ mánzsè ńne ńgee né tsɛ̀ɛ mbʉ̀a.

¹³ Pɔ́ gyá yé pú’u, ḿbiŋ nzèm shwóŋ petsɔ́ pʉ̀a, pɔ́ gíŋe ńké tè yɔ́b zẅíŋ.

¹⁴ Yěsô la gÿo ńgíŋe ńnyɛ mbùm ye mbwo *ngàŋa kwò yé tsɔ̀b yémɔ’ɔ́ nê legém métsèm. Pɔ́ gwɔ́ ndá mpfɛ́ɛ mmó. Á kaga wɔ́b ná pá’ pɔ́ ně tè zẅíŋ, ńgíŋe ńdʉ’ mbɔɔ lézẅíŋe nò ncwò pʉ̀a pie à zǐm ńnyɛ mbùm ye mbwó pɔ́b.

¹⁵ Ńdeen ńké ńgɔɔn né pɔ́b ngie: Pi gʉa jʉ’ ntsèm tsɛ̀ɛ njÿó, ńtsẅi nkʉ̀ mbòŋo mbwo mbɔɔ wɛ̌ nyìŋ mesoŋ wɔ́ té vʉ’ʉ tsɔ̌.

¹⁶ Nyìŋ gẅie à zẅǐŋ la, mé nu’u yé ntse, e Ssé gÿo à tsẅɛ́. Nyìŋ gẅie à lʉ’ʉ́ lézẅíŋ lá, à ge lá’ gwe ntsàŋ.

¹⁷ Pʉ̀a pie pɔ́ zẅiŋé nò yɔ́ɔn, ge lá’ gÿo menò mmɔɔn mmɔɔn: pɔ́ ge lá’ lɔg lezíŋ sɔ́ɔn jwoŋ *messé tepòŋ mie é pue pʉ̀a, pɔ́ ge lá’ shwóŋó meshwóŋè mie pɔ́ laa zí’i,

¹⁸ pɔ́ lá’ ńdɔg mbwo mɔ́b ńgwoon nnú, ńgwɔ́ gie pɔ́ lɔɔn ńjÿó mecÿɔ́b, atsɔ́ mmó le wɔ́b gÿo, pɔ́ ge lá’ záb mbwo mɔ́b nà megàŋa guɔ pɔ́ zeŋe.

Yěsô kwɔ̌’ ne tÿǒ lepwó

¹⁹ Cʉ̀apʉ̀a Yěsô la gɔɔn mbwo pɔ́b tà ńtẅé jʉ’, e Ssé ŋá’a yé ńdɔg ńkwɔ́’ lé tÿǒ lepwó. Á ńnéŋe nà gwoŋó pwó yé ye tʉ̀.

²⁰ *Ngàŋa kwò Yěsô fó jʉ’ó, ńgʉa, ńzye léshwóŋó nò Ssé jʉ’ ntsèm. Cʉ̀apʉ̀a ne ńdíe wɔ́b, ńkẅéte wɔ́b, ńtóonte wɔ́b, pɔ́ gÿo menò mmɔɔn mmɔɔn, mie é nyɛɛ ngie shwóŋè yɔ́b fóo mbwo Ssé.