Malékuse 14 - Nouveau Testament en Ngienboum

Mekěm ne fa’a shÿó lézẅé Yěsô

¹ É gÿo ne ńcʉ́’ʉ ńzága lyɛ̌’ sépʉ́a mé jÿó línɔ́ɔn gie mé lɔ́ɔn ńtóŋo le *Páskà, ńgwɔ́ melyɛ̌’ mie mé lɔ́ɔn ḿpfɛ́ɛ *mbelég té mvòŋ. *Metándá pànùŋe pwɔ́’ pâ *pàkyàgte lepʉ̌ Mǒsê ne fa’a shÿó pá’ pɔ́ ge shúte gwoon Yěsô, é zẅé yé,

² ńkwaŋa tsetsɛ̀ɛ pɔ́b ngie: Á té poŋ ngie á gwɔ́ nà lyɛ’ɛ́ línɔ́ɔn wɔ́, ḿbɔ́gɔ lá’ létág jʉ’.

Tsɔ̌ manzwě lɔgɔ́ laméndɔ́ɔn ńzɔ́’ɔ Yěsô

³ Yěsô gÿo ńgwɔ́ Mbetáni, á ndá Símo gẅie mé lɔ́ɔn ńtóŋo yé ngie ngàŋ nkà’ pǎb, ńnéŋe ssé ńně ḿpfɛ́ɛ mmó, atsɔ̌ manzwě kú yé ndá, ńgẅiin ndóŋ tsɔ́ laméndɔ́ɔn mbòŋo gie mé la lɔ́gɔ tsɔ́ twó legǐ ńgÿo á piŋ ńcÿɔ́g nkáb tɛ’. Á lɔg ńtó, ńtyé lejʉ́ŋ Yěsô, ḿbwɔ́’ ndóŋ ŋwɛ́, ḿpfɛte laméndɔ́ɔn nà twó Yěsô.

⁴ Tsɔ́ pʉ̀a pie é laa jʉ’ó gyá á pÿága wɔ́b, pɔ́ zẅɛ́te ńgɔɔn ngie: À sěen ńcʉŋte yɔɔn laméndɔ́ɔn mélà’a kɔ́?

⁵ Mé ně ńgwɔ́ pé’e sẅiŋ, mbà mé kẅé mbɔɔ *mendenie nkÿo tà náa mbwo mepóŋ. Ńgɔɔn pɛ́’ɛ̀, ńzye lézẅɛ́te ńtí manzwě ŋwɛ́.

⁶ Tá Yěsô gɔɔn ngie: Pi kyɛɛ yé ńnyé, pi zẅɛte mélà’a kɔ́? À gÿǒ pɔ́ nò mbòŋo ná mèŋ.

⁷ Pi ge ne gyá mepóŋ pɔ́ fʉ̀’ ntsèm, ńgwɔ́ gie pi lɔɔn ńkwoŋ pɔ́ fʉ̀’e kɔ́ wɔ́, pi gÿo nò mbòŋo ná pɔ́b. Tá ńgʉa ná mèŋ, mbà pege tè gwɔ́ pɔ́ fʉ̀’ ntsèm wɔ́.

⁸ Manzwě wɔɔn gÿǒ yé mmó gie à ku’u légÿo, ńtʉ́ʉ njÿó ńdɔgɔ laméndɔ́ɔn ńzɔ́’ɔ wɔ̀ɔn, tá mé táa ńnéŋe wɔ̀ɔn tsɛ̀ɛ lesyè.

⁹ Mèŋ shwóŋó gẅí, kwà’ nénʉ́, nzɔ̌ nzɔ̌ wɔ́ gie mé ge lá’ tsẅi nkʉ̀ mbòŋo wɔ̀ɔn tsɛ̀ɛ njÿó wɔ́, mé ge lá’ gíŋe ne gɔɔn mmó gie manzwě wɔɔn gÿǒ é lɔg kímte yé.

Jẅidas sẅiŋé Yěsô

¹⁰ Atsɔ̌ tà’ nyìŋ ná pʉ̀a Yěsô ntsɔ̀b pʉ́a lê legém, lezíŋ sé gwɔ́ Jẅidas Iskariod piŋ ńgʉa ńgyá *mentándá pànùŋe pwɔ́’, pâ pɔ̌ kwaŋte pá’ à ge gÿo tá sẅiŋe Yěsô mbwo pɔ́b.

¹¹ Pɔ́ jú’, á pú ḿboŋo wɔ́b, tà pɔ́ pÿé yé nkáb gie pɔ́ ge náa mbwo yé. Jẅidas leen ńké ńzye lékwaŋa fʉ̀’ gie à ge sẅiŋe Yěsô mbwo pɔ́b tà tsɔ́ *lɔ̌’ lekẅɛ.

Yěsô pâ ngàŋa kwò yé ne ńjÿó Páskà

¹² Ndùŋ mvfò lyɛ’ɛ́ línɔ́ɔn *mbelég té mvòŋ gwɔ́ tà ńku’, ńgwɔ́ lyɛ̌’ gie mé gwaa *menjʉ̀njÿò ńdɔgɔ ńjÿó línɔ́ɔn *Páskà, *ngàŋa kwò Yěsô zɛ́te yé ngie: Ɔ̀ kwǒŋ ngie peg gʉa nzɔ̌ ńcwoŋte jʉ’, ɔ̀ jÿó *páskà wó?

¹³ Á túm *ngàŋa kwò yé yépʉ́a, ńgɔɔn né pɔ́b ngie: Pi gʉa tÿǒsoŋ, pi ge kúu wó, é gyá mámbàŋa, à gẅiin tÿóon ntse, pi cʉ́me nzèm yé,

¹⁴ tà à kúu ndá, pi kú gí, ńgɔɔn né ngàŋ ndá ngie: Tsítsà gɔɔn ngie peg zɛ́te gú ngie awe lûm ndá gẅie pâ *ngàŋa kwò yé ge jÿó *Páskà wó, aa wɛ̌ wɔ́?

¹⁵ À ge nyɛɛ gẅi máamáa lûm ndá, á ná ndêg we tÿǒ. Tà mbà mé ně ńdá’ ńtáŋte mboŋó, áa jʉ’ gie pi ge cwoŋte ségè shúm línɔ́ɔn wó.

¹⁶ *Ngàŋa kwò yé gʉa tà ńkúu tÿǒsoŋ, ńgyá kɔ̀ɔkɔ́ɔ gwɔ́ pá’ Yěsô ně ńgɔɔn. Pɔ́ cwoŋte shúm léjÿó *Páskà jʉ’ó.

¹⁷ Á gÿo ńgwɔ́ ncwò nzém, Yěsô pâ pʉ̀a pé ntsɔ̀b pʉ́a lê legém cú’te jʉ’ó,

¹⁸ ńnéŋe ssé, ńzye léjÿó mmó. Yěsô gɔɔn ngie: Mèŋ shwóŋó gẅí, kwà’ nénʉ́, atsɔ̌ tà’ nyìŋ tsetsɛ̀ɛ pi gee sẅǐŋ mèŋ, tà ńgwɔ́ pɔ́ nyìŋ gẅie peg yé teme ngwʉ̌ŋ.

¹⁹ Pɔ́ jú’, ḿbú ḿmÿag. Awɔ̌wɔ́ɔ ná pɔ́b wɔ́ zɛ́te ngie: Ńgwɔ́ á gwɔ́ wɔ̀ɔn?

²⁰ Yěsô gɔɔn né pɔ́b ngie: Mèŋ shwoŋó gẅi ngie aa tsɔ̌ tà’ nyìŋ tsetsɛ̀ɛ pi ntsɔ̀b pʉ́a lê legém, tà peg yé zɔ teme ngwʉ̌ŋ.

²¹ *Míŋ Nyìŋ ge kwé, á gwɔ́ pá’ mé la gɔɔn tsɛ̀ɛ ŋwà’né Ssé, tá’, andù tepòŋ aa nyìŋ gẅie à sẅiŋé *Míŋ Nyìŋ. Mbòŋo laa pá’ mé lɔ̌ɔn tè zyé yé wɔ́?

Anò shúm léjÿó ndʉalʉ̌a

²² Pâ pɔ̌ ne ńjÿó shúm léjÿó, Yěsô pí mbelég, ńná ndǎg mbwo Ssé, ḿbwɔ́’té ńgwaa náa mbwo pɔ́b, ńgɔɔn ngie: Pi kɔ. Yɔɔn ee mbùm nnɛ́ yɔ̀ɔn,

²³ ńgíŋe ńkaa ntú’ melù’, ńná ndǎg mbwo Ssé, ńnáa mbwo pɔ́b, pɔ́ pú ńnú wɔ́b métsèm.

²⁴ Á gɔɔn né pɔ́b ngie: Mɔɔn ée metse mɔ́ɔn, é metse mie Ssé lɔgɔ ńgwaa *kʉ̀a, é pfɛte nà twó pʉ̀a tà ńgyɔ́ɔn.

²⁵ Mèŋ shwóŋó gẅí, kwà’ nénʉ́, Mèŋ n tě ńdá’a ńgíŋe ńnú mɔɔn melù’ wɔ́, tà lá’ cʉ́’ʉ núu pɔ́ me sẅé á fʉ̀’ gie Ssé zɔ cʉ’ʉ́ sá’a njÿó.

²⁶ Pâ pɔ̌ leen ńké ńzɔb mentse ńdɔg ńgu’te Ssé. Afʉ̀’ ku’, pɔ́ kẅɛ, ńgʉa ne ndùm lekwɔ’ɔ́ metÿǒ mèvɛ olive.

Yěsô gɔ̌ɔn ngie Piɛ ge gÿo moŋe yé

²⁷ Pɔ́ ne ńgee, Yěsô gɔɔn né pɔ́b ngie: Pi metsèm ge gwá’a wɔ̀ɔn, é kÿo. À lɔgɔ ḿbumte pá’ mé la ŋwe’e ngie e Ssé gɔ̌ɔn ngie: «Mèŋ n ge lá’ zẅé mbyɛ̀b mvfó, *menjʉ̀njÿò mé saa tsẅɛ».

²⁸ Yěsô gíŋe ńgɔɔn ngie: Mèŋ n ge gÿo gwɔ́ tà zíme nà legwé, é vɔgɔ Galilea zẅí’te gẅí.

²⁹ Piɛ gɔɔn né yé ngie: Petsɔ́ pʉ̀a lɔɔn ńgwá’a gú ńkÿo metsèm, mbà à lɔɔn ńgwɔ́ mèŋ n de ɔ́ gwá’.

³⁰ Yěsô tsɔ́’ɔ mbwo yé ngie: Tà mèŋ n ké shwóŋó gú, kwà’ nénʉ́, mênkɔ́’ ge gÿo gwaa ye à toŋo tǒŋ lêtsẅɛ́’ lyɛ̌’ɔɔn ngʉ̀a mbʉ́a, mbà ɔ̀ moŋé wɔ̀ɔn ngʉ̀a ntá.

³¹ Piɛ gíŋe ḿbʉŋe mbwo yé kwà’ lê metʉ̀ ngie: Mé lɔɔn fó ḿbúte wɔ́gɔ́ ńne ńdɔgɔ ńgee pɔ́ ńzẅé, mbà à lɔɔn ńgwɔ́ n de gú moŋe. Yetsɔ́ *ngàŋa kwò yé metsèm gíŋe ńgɔɔn yɔ́b pɔ́ pú’u.

Yěsô aa tsɛ̀ɛ nká’a Getsémane ńně sẅíŋte Ssé

³² Yěsô pâ *ngàŋa kwò yé gʉa tà ńkúu tsɔ́ jʉ’ gie mé tóŋo le Getsémane, á gɔɔn né pɔ́b ngie: Pi ńnéŋe jʉ’ɔɔn, n gʉa sẅíŋte Ssé.

³³ É faga Piɛ, ńgÿo Jâg pɔ́ Jâŋ, pâ pɔ̌ gʉa. Á zye lé jú’ pá’ cÿɔ’ gwoon yé, legwé pfɛ́ɛ yé,

³⁴ ńdeen ńké ńgɔɔn né pɔ́b ngie: Ntʉ́m wɔ̀ɔn ée pá’ɔɔn ńně ḿmÿɔgɔ pɔ́ nà ntí gie ńgwɔ́ n kwé kwě. Pi ńnéŋe jʉ’ɔɔn, ḿbɔ́ɔn nyìŋ légwá’a lÿɔg ńdyé,

³⁵ ńgɔɔn pú’u, ńná’a ńgʉa mvfò, ńgwe ssé ńne sẅíŋte Ssé ńgɔɔn ngie kà à lɔɔn ńgwɔ́ e Ssé pe’e yɔɔn fʉ̀’ tepòŋ wɔ́, á pe’e,

³⁶ ńne ńgɔɔn ngie: Abba, Tá wɔ̀ɔn, atsɔ́ nò té gú cʉa. Pe’e yɔɔn ngɔ́’ gie e tóo ná mèŋ lɔɔn. Tá’, tè gÿo pɔ́ wɔ̀ɔn lekwòŋ, gÿo pɔ́ gù.

³⁷ Yěsô sẅíŋte Ssé pú’u, ḿbiŋ nzèm lejʉ́ŋ *ngàŋa kwò yé, ńgyá pɔ́ ne ńdyé lyě. Á gɔɔn né Piɛ ngie: Símo, ɔ̀ lyě lá? Ɔ̀ fǒ kaa ku’u léná’a shÿɔgɔ lelɔ́g mbɔɔ ná tà’ nèm wɔ́ la?

³⁸ Tà pi gíŋe ńdyé, pi sẅíŋte Ssé ḿbɔ́g menò njÿó lékwa’te gẅi pi fʉa nò. Ntʉ́m nyìŋ tʉte tɛ’, tá’ mbùm nnɛ́ pÿɛ́ pÿɛ̌,

³⁹ ńgíŋe fó lejʉ́ŋ pɔ́b ńgʉa sẅíŋte Ssé, ńgɔɔn pɔ́ mmó gie à ně ńzɔɔn ńgɔɔn.

⁴⁰ Ńgÿo ńgíŋe ḿbiŋ nzèm, ńgyá pɔ́ nyé ńdyé lyě, mélà’mie á la gwaa gwɔ́, mbà lelɔ́g pǔ ńgwoon wɔ́b tɛ’. Pɔ́ zyeen, pɔ́ té gíŋe ńzsé nò gie pɔ́ ge shwóŋó yé wɔ́.

⁴¹ Á gʉa, ńgÿo ńgíŋe ńtóo nà mbɔ́ɔntè ngʉ̀a ntá, ńgɔɔn né pɔ́b ngie: Pi cwoŋo ńdyé, ńzẅɛte mboŋó. Á zebé. Afʉ̀’ áa pá’ɔɔn, mbà á kǔ’. Mé ge sẅiŋe *Míŋ Nyìŋ á mbwo pʉ̀a tepòŋ.

⁴² Pi lu ssé pege gʉa. Nyìŋ gẅie à sẅiŋé wɔ̀ɔn mbwo pɔ́b à wɛ̂ gẅie à tóo lɛ.

Mé gwǒon Yěsô

⁴³ Yěsô nyé ńgɔɔn gɔɔn, Jẅidas gẅie aa tsɔ̌ tà’ nà pʉ̀a pé ntsɔ̀b pʉ́a nê legém tó. Alá’ gwɔ́ nzèm ye tà ńgyɔ́ɔn, ńgẅiin menně ncù lâ mekésiŋ, ńgwɔ́ pʉ̀a pie *metándá pànùŋe pwɔ́’ pâ *pàkyàgte lepʉ̌ Mǒsê, mbɔɔ *mekěme lá’ tǔm.

⁴⁴ Á gwaa gwɔ́, mbà ngàŋ menáŋ la shwóŋó wɔ́b pá’ à ge gÿo tá pɔ́ liŋe Yěsô. Yɛ̌ liŋé gwɔ́ ngie: yé lɔɔn ńtsyɛ’te nyìŋ, ńtáŋte yé, pɔ́ zsé ngie aa yé, ńdeen ńgwóon ye, ḿbiŋ ńnyɛte ńgẅiin yé mboŋó tá ńdɔg ńgʉa.

⁴⁵ Jẅidas gwɔ́ tà ńtó tà ńkúu lejʉ́ŋ Yěsô, ngie: Andè, n tsyɛ’té, ńdeen ńgwóon ńtáŋte yé.

⁴⁶ Petsɔ́ pʉ̀a leen ńké ńgwoon Yěsô ńkú’te.

⁴⁷ Atsɔ̌ tà’ ná pʉ̀a pie pâ Yěsô ke ńgwɔ́, á soŋ nně ncù mbʉ́a, ḿma’ lélɔg ńkɔ́’ɔ ngàŋa fà’ *tándá pànùŋe pwɔ́’, é kẅɛ́te letuŋó sé, ńjúa.

⁴⁸ Yěsô zɛ́te pʉ̀a ŋwɛ́ ngie: Pi gwaa tó gwoon wɔ̀ɔn, ńgẅiin menně ncù lâ mekésiŋ pá’ fʉ̀’ gie pi gee ńgwoon ntsǒŋ pá’ɔɔn lêkɔ́?

⁴⁹ Mèŋ n kaa lyɛ̌’ ntsèm, ńgwɔ́ pɔ́ tsetsɛ̀ɛ pi, á *jʉ’ʉ Ssé, ńně ńzí’i pʉ̀a nò Ssé. Pi ké tè wɔ̀ɔn gwoon. Tá’, à yɔɔn nò tóo ńdɔgɔ ńgÿo mmó gie mé la ŋwe’e tsɛ̀ɛ ŋwà’ne Ssé á pumte.

⁵⁰ *Ngàŋa kwò yé gyá pá’ mé gwǒon yé, ḿbú ńgwá’a yé métsèm ńkÿo.

⁵¹ Tà á cʉ́’ pɔ́ tsɔ̌ mûɔ ngwashùm, á cʉ́me nzèm ye, mbà à lɔ̌g pe ndà’ pwó nzsǒ ḿbwóte mbùm ye. Mé gwoon yé.

⁵² Á fó mbwo pɔ́b sẅe, ńgwá’ nzsǒ ye ńkÿo té ma’ nzsǒ.

Pasá’a lá’a pa Yuda zyě léŋaga Yěsô

⁵³ Pɔ́ lɔgɔ Yěsô ńgʉa né nɔ’ *nùŋe pwɔ́’ we lÿò. Mbà *metándá pànùŋe pwɔ́’, lâ *mekěme lá’ lâ *pàkyàgte lepʉ̌ Mǒsê ně ḿbú ńcú’te wó.

⁵⁴ Piɛ zse nzèm Yěsô, tá ńké ńgwɔ́ pɔ́ ngʉ̀a shʉ̀shʉ̀a, ńgʉa yé tà ńtɔ́g ńkúu tetʉ́a *nùŋe pwɔ́’ we lÿò, ńnéŋe yé ssé á ngʉ̀ŋe mmɔ̌g gẅie pà pyɛ́bɛ *jʉ’ʉ Ssé ně nyɛte pâ pɔ̌ ně ńzɔ́gɔ.

⁵⁵ *Metándá pànùŋe pwɔ́’ pâ *petsɔ́ pàsá’a lá’ ne fa’a nò gie mé ge zába twó Yěsô tá lɔg gÿo mè zẅé yé, ńké tè ne ńgyá wɔ́.

⁵⁶ Pʉ̀a tà ńgyɔ́ɔn tÿɔ́g menò twó yé tɛ’. Mé píte tɛ’, á ké tè pumte.

^57-58 Petsɔ́ pʉ̀a lu yɔ́b ssé, ńnéŋ wɔ́b ncwò mǒ ngie: Peg la jú’ á gɔɔn ngie: À ge lá’ keme *jʉ’ʉ Ssé gie pʉ̀a mesoŋ la lɔg mbwó mɔ́b ńkwɛ́, é lɔg lyɛ̌’ sétá kwɛ́ ye ndyɛ̀’ɛ, tà é le gíŋe ńgwɔ́ gie pʉ̀a mesoŋ zɔ̌ lɔ̌g mbwó mɔ́b ńkwɛ́ wɔ́.

⁵⁹ Tà mbɔɔ pú’u, tà’ ncwò ké tè tsetsɛ̀ɛ pɔ́b kẅɛ.

⁶⁰ *Anùŋe pwɔ́’ we lÿò lu ssé tsetsɛ̀ɛ lá’, ńzɛ́te Yěsô ngie: Ɔ̀ laŋte laŋté kà? Ɔ̀ tè ne ńjú’u menò mie mé gɔɔn ná gù lɛ wɔ́ kà?

⁶¹ Yěsô láŋte laŋté, à tè tsɔ́b. *Nùŋe pwɔ́’ we lÿò gɔɔn né yé ngie: Ɔɔ *Nzà’nkÿo, á Míŋ Ssé?

⁶² Yěsô tsɔ́’ ngie: Mèŋ n ge wɛ̌. Pi ge gÿo gyá «*Míŋ Nyìŋ ńnéŋe nà gwoŋó pwó tʉ̀ Ssé gẅie tsɔ́ nò té yé cʉa». É gíŋe gyá à fóo tsɛ̀ɛ melɔ́ɔn tÿǒ lepwó ńtóo.

⁶³ *Nùŋe pwɔ́’ we lÿò jú’ pú’u, ésele *shʉate menzsǒ mé, ńgɔɔn ngie: Pege giŋé fa’a pɔ́ yɛ̌ ntí pà njÿò ńgyá?

⁶⁴ Pi jǔ’ pá’ à kaŋá lʉŋe Ssé pɛ́’ɛ̀, ńkwaŋ gí ngie kɔ́? Pʉ̀a metsèm gɔɔn ngie: À gwɔ́ pɔ́ nyìŋ gẅie à lɔɔn ńgwɔ́ mé zẅé yé zẅé.

⁶⁵ Petsɔ́ pʉ̀a zye létsɔg metyé ná ye, ńkwɛ́ shÿó we, ńně ńcúa yé, ńgɔɔn né ye ngie: Lɔgɔ nò *ntsẅì nkʉ̀ Ssé jú yɛ̌, ńkeme nyìŋ gẅie à cǔa gú. Pàpyɛ́bɛ nɔ’ɔ *nùŋe pwɔ́’ we lÿò ne ńcúa metuŋó mé.

Piɛ moŋé Yěsô

⁶⁶ Piɛ ńnéŋe tetʉ́a né mecwoŋó, atsɔ̌ tà’ ná panzwě pie pɔ́ lɔ́ɔn fa’a nɔ’ *nùŋe pwɔ́’ we lÿò tó.

⁶⁷ Piɛ ne ńzɔ́gɔ mmɔ̌g, á cwoŋo ńdíe yé tà ńgɔɔn né yé ngie: Mbɔɔ gù jú, pi Yěsô Nǎzarɛd wɛ ke ńgwɔ́ nùɔ.

⁶⁸ Piɛ moŋe, ńgɔɔn ngie: Mèŋ, n kaa zsé, ḿbiŋ tè ne ńjú’u mmó gie ɔ̀ fa’a légɔɔn wɔ́, éfó tsìŋe ssé, ńgʉa né ncwò nká’, [mênkɔ́’ tóŋ].

⁶⁹ Manzwě ŋwɛ́ gÿo ńgíŋe ńgyá yé, ńzye léshwóŋ pʉ̀a pie pâ pɔ̌ laa jʉ’ó ngie: Nyìŋ wɛ, aa tsɔ̌ nyìŋ wɔb.

⁷⁰ Piɛ gíŋe ḿmoŋe moŋe. Mé ná’a ńnéŋe, epʉ̀a pie pɔ́ laa jʉ’ó, gíŋe ńgɔɔn yɔ́b né Piɛ ngie: Á té nò fa’ fa’ wɔ́, ɔɔ tsɔ̌ nyìŋ wɔ́b. Ɔ̀ zɔɔn ńgwɔ́ jú nyìŋ Galilea.

⁷¹ Á leen ńké ńzye légɔɔn ngie, e Ssé zẅé wɔ̀ɔn, à zeŋe yɔ́ɔn mé, mèŋ n tè ne ńzsé nyìŋ gẅie pi kíme yé wɔ́.

⁷² Tà’ mênkɔ́’ gwóon ńgíŋe ńtóŋ, é lɔgɔ ńgwɔ́ ngʉ̀a mbʉ́a. Piɛ leen ńkímte pá’ Yěsô ně ńgɔɔn né yé ngie: Mênkɔ́’ ge gÿo gwɔ ye à tóŋo tǒŋ ngʉ̀a mbʉ́a, mbà ɔ̀ moŋé wɔ̀ɔn ngʉ̀a ntá. Piɛ gwóon fó tetʉ́a ńkẅɛ, ńdʉa.