Malékuse 1 - Nouveau Testament en Ngienboum

Anò Jâŋ Mbabtist

¹ Nzyetè Nkʉ̀ Mbòŋo Yěsô Kristo gẅie aa Míŋ Ssé, e yɔɔn

² E la zye pá’ Ssé la gɔɔn tsɛ̀ɛ ŋwà’ne *ntsẅì nkʉ̀ we Esǎya ngie: «Jú’u, mèŋ n ge túmo mántúm wɔ̀ɔn à gwɔ́ mvfò ńně ńkɔ́’ɔ nzsè jù, ɔ ne ńtóo.

³ Ngyè nyìŋ kwɔ̌’ fó nkwòŋo tsẅɛ, ńgɔɔn ngie: Pi nyɛte mánzsè Cʉ̀apʉ̀a, ńgÿo melyěen nzsè mé e tyé ndʉŋ ndʉŋ»!

⁴ Jâŋ gÿo ńnéŋe tà ńkẅɛɛ nkwòŋo tsẅɛ, ńně sá’a mbwo lá’ ngie pɔ́ kúbe mà wɔ́b, ńgÿo à nú’u wɔ́b ntse, e Ssé lege menò tepòŋ mɔ́b ńnáa mbwo pɔ́b.

⁵ Pʉ̀a tà ńgyɔ́ɔn leen ńké fóo tsɛ̀ɛ pàga ngwòŋ Jẅidea ńtóo, lelÿò fóo Yerósalem ńtóo ńgyá Jâŋ, ńzẅíŋe menò tepòŋ mɔ́b, á nú’u wɔ́b tsɛ̀ɛ ntse Jurdeŋ.

⁶ Jâŋ laa nkwòŋo tsẅɛ, ḿma’ nzsǒ, mbà mé la lɔg menòŋ kamel ḿbá’, ńdɔgɔ *ngùb nɔ̀ɔn ńtʉ́me zẅɛ̌’ yé. À lɔ̌ɔn ḿpfɛ́ɛ ngǐm ḿbiŋe ńjÿó nŋwá’a tsẅɛ.

⁷ À lɔ̌ɔn ńgɔɔn mbwo lá’ ngie: Atsɔ̌ nyìŋ aa nzèm mèŋ ńně ńtóo, à cʉa wɔ̀ɔn, mèŋ fó tè ku’u mbɔɔ léŋwé’e Ssé, ńkyɛ́’ menkÿo melɔ̌ɔn mé wɔ́.

⁸ Mèŋ n deen ńgẅiin yɔ́ɔn pɔ́ ndà’ lénu’u gẅi tsɛ̀ɛ ntse. Tá’ á ké ńgʉa ná yé, mbà à ge tó ńnéŋe gẅi pɔ́ mbwo Zẅìge Ndʉalʉ̌a.

Yěsô zyě fà’ yé

⁹ Á laa nà lyɛ̌’ ásɛ̌, Yěsô leen ńké fó Nǎzarɛd, á tsɛ̀ɛ pàga ngwòŋ Galilea ńtó, ńgyá Jâŋ, á nu’u yé tsɛ̀ɛ ntse Jurdeŋ.

¹⁰ Yěsô ně fóo ntse ńkẅɛɛ, ńgyá ncwò tÿǒ lepwó gwóon ńtsɔ́’ɔ ńtyé, Zẅìge Ndʉalʉ̌a sẅɛ́’, ńgwɔ́ pá’ kàpʉ̀ŋ lá, ńtó ńtyé ná yé.

¹¹ Ngyè fó tÿǒ lepwó ngie: Ɔɔ míŋ wɔ̀ɔn, mèŋ n kwoŋo ɔ́ tɛ’, n záb ntʉ́m wɔ̀ɔn ná gù.

¹² À Zẅìge tóo ná Yěsô pá’ɔɔn, ńtsó yé, á gʉa lê nkwòŋo tsẅɛ.

¹³ Pâ menɔ̀ɔn zɔ̌ gwɔ́ wó, ńnéŋe ńnéŋe lyɛ’ɛ́ lá’ móm lekùa, Sátà gwáa ńtóo ńtsóte yé ngie à fʉa nò. *Mecÿɔ́’ Ssé ne ńdíe yé.

Anò gie Yěsô lɔ̌ɔn ńzí’i pʉ̀a

¹⁴ Mé la gwɔ́ tà ńgwoon Jâŋ ńnéŋe ndá tsǎŋ, Yěsô gʉa nê Galilea. À lɔ̌ɔn ńtsẅii nkʉ̀ mbòŋo gẅie é fóo mbwo Ssé ńgɔɔn ngie:

¹⁵ Afʉ̀’ áa pá’ɔɔn, mbà á kǔ’ tà Ssé ge zye lényɛ Lefùɔ sé. Pi kúbe mà gẅí, ḿbiŋ ńzẅíŋ nkʉ̀ mbòŋo wɔɔn ŋwɛ́.

¹⁶ Yěsô gÿo ne ńgiŋe ngʉ̀ŋe máa ntse gẅie ée Galilea, ńgyá mbàŋa yépʉ́a, á gwɔ́ Símo pɔ́ fɛ́ we Ndeléya. Pɔ́ ne ḿmá’a lekÿo ntse, á nue yɔ́b fà’ laa léfa’ messó.

¹⁷ Yěsô gɔɔn né pɔ́b ngie: Pi tó pege zɔ cʉ́’ʉ ńgiŋe, mèŋ n gÿo pi cʉ́’ʉ fa’a pɔ́ pʉ̀a mesoŋ.

¹⁸ Pɔ́ gwóon ńnyé menkÿo mɔ́b, ńcʉ́me nzèm yé.

¹⁹ Yěsô ná’a ńgiŋ, ńgyá tsɔ́ pʉ̀a mépʉ́a, á Jâg pɔ́ fɛ́ we Jâŋ, é gubé Zebede, pɔ́ gwɔ́ tsɛ̀ɛ kanú’ ne nyɛ́te menkÿo mɔ́b.

²⁰ Yěsô gwóon ńtóŋo wɔ́b yɔ́b, pɔ́ leen ńnyé tá wɔ́b Zebede pâ ngàŋa fà’, á tsɛ̀ɛ kanú’, ńcʉ́me nzèm yé.

Nyìŋ gẅie tsɔ̌ Ssé tepòŋ la gwoon yé, ńně ḿbue yé

²¹ Pâ pɔ́ gÿo ńgʉa Kapernawúm, á gwɔ́ *lyɛ’ɛ́ nzsè pà Yuda, Yěsô gʉa *ndá cú’tè, ńzye lézí’i pʉ̀a nò Ssé.

²² Alá’ jú’u shwóŋè yé, ḿbu ḿmɔɔn ye ntí lézí’i pʉ̀a mmó, mélà’mie à lɔ̌ɔn tě ńgÿo pá’ *pàkyàgte lepʉ̌ Mǒsê wɔ́, à lɔ̌ɔn ńzí’i tà ńzse mmó gie à gÿo yɛ̌.

²³ Á ne shwóŋe, tsɔ̌ nyìŋ gwɔ́ yé ndá ŋwɛ́, mbà tsɔ̌ *Ssé tepòŋ léen ńgwoon yé, á ńnéŋe tà ḿvege vege ńgá’te ngie:

²⁴ Yěsô, mûɔ Nǎzarɛd, pege gẅiin kɔ́? Ɔ ka fɔ̌ɔn ńtó pɔ́ lépyága wég ka? Mèŋ n ne ńzsé gú. Ɔ fóo lejʉ́ŋ Ssé, ńgwɔ́ Míŋ we.

²⁵ Yěsô cÿɔ́g yɛ̌ *Ssé tepòŋ ńgɔɔn né yé ngie: Láŋte, éfó ná nyìŋ wɛ̂ ńkẅɛ!

²⁶ E *Ssé tepòŋ ŋwɛ́ gwóon ńtɔ́ɔn ngàŋ ńcʉ́’ʉ yé lê tʉ̀, ńgwɔ fó ná yé kẅɛ, ńgá’te tɛ’.

²⁷ Á pú ńkʉ’ʉ lá’, pɔ́ mɔɔn, ńzɛ́te tsetsɛ̀ɛ pɔ́b ngie: Yɔɔn áa lêkɔ́? Áa pá’ɔɔn ńgwɔ́ pɔ́ tsɔ́ nò sẅé gie á giŋé ńkẅɛ la? À gwɔ̌ tà ńdɔgɔ tʉ̀, ńtsẅii nò mbwo *messé tepòŋ, pɔ́ jú’u ncwó we.

²⁸ Lezíŋ Yěsô gwóon saa lá’ tsɛ̀ɛ pàga ngwòŋ Galilea ŋwɛ́ ntsèm.

Yěsô ne ńzoŋo meguɔ tà ńgyɔ́ɔn

²⁹ Yěsô pâ *ngàŋa kwò yé gÿo fó *ndá cú’tè ńkẅɛ, ńgʉa nê ndá pà Símo pɔ́ Ndeléya. Pâ Jâg pɔ́ Jâŋ pú ńgwɔ́.

³⁰ Mákẅì’ Símo la nuŋe, nnɛ́ ne ńkwɔ́’ɔ yé. Yěsô kúu wó mé gwóon shwóŋó yé.

³¹ Á sẅɛ’te nnɛ́ ńtyé lejʉ́ŋ yé, ńkíbe pwó yé, ńgÿo á lu ssé. Nnɛ́ zá’a, á gʉa ńnyɛte shúm ńdɔg ńdye wɔ́b.

³² Ncwò nzém gÿo ńgwɔ́, tà mbà nèm pyě, pʉ̀a jʉ’ó kaa megàŋa guɔ ntsèm, mbɔɔ pʉ̀a pie tsɔ́ *messé tepòŋ la ne ḿbue wɔ́b, ńdɔg ńtó ńgyá Yěsô.

³³ Pʉ̀a tÿǒsoŋ ŋwɛ́ metsèm cú’te ncwò ndá.

³⁴ Yěsô gÿo meguɔ ntí ntí ná pʉ̀a tà ńgyɔ́ɔn mag, ńgíŋe ńjwoŋ *messé tepòŋ, éfóo ná pʉ̀a ńkẅɛɛ. À lɔ̌ɔn tě ńzẅíŋe tà tsɔ̌ *Ssé tepòŋ ŋwɛ́ gɔɔn nò wɔ́, mélà’mie pɔ́ la ne ńzsé nyìŋ gẅie aa wɛ̌.

Yěsô shwoŋó nò Ssé á Galilea

³⁵ Njÿó la gÿo ne ńdʉ́a, tà jʉ’ nyé síŋe sǐŋ, Yěsô lu ssé, éfó ndá ńkẅɛ, ńgʉa lê nkwòŋo tsẅɛ, ńzye lésẅíŋte Ssé.

³⁶ Símo pâ yetsɔ́ *ngàŋa kwò Yěsô cʉ́’ nzèm ne fa’a yé,

³⁷ ńgwɔ́ tà ńgyá yé, ńgɔɔn né yé ngie: Pʉ̀a metsèm ne fa’a gú.

³⁸ Yěsô tsɔ́’ɔ mbwo pɔ́b ngie: Pege gíŋe ńgʉa jʉ’ʉ ndyɛ̀’ɛ, á tsɛ̀ɛ metsɔ́ melá’ mie ée shÿó jʉ’ó, mèŋ shwóŋó nò Ssé mbɔɔ wó, ée nkẅɛ̌ ndá wɔ̀ɔn.

³⁹ Á gɔɔn pú’u, ńgwá ńgiŋe jʉ’ ntsèm tsɛ̀ɛ pàga ngwòŋ Galilea ntsèm, ńkúu tsɛ̀ɛ *mendá cú’tè, éshwóŋó nò Ssé, ńkúu ńjwóŋo *messé tepòŋ mie é pue pʉ̀a.

Yěsô gÿǒ tsɔ́ ngàŋ nkà’ zeŋe

⁴⁰ Atsɔ̌ ngàŋ nkà’ gÿo ńtó ńkẅí’te mvfò Yěsô, ésẅíŋte yé, ńgɔɔn ngie: Ɔ lɔɔn ńkwoŋ, mbà ɔ ku’u légÿo n zeŋe.

⁴¹ Mezìŋe mé kúu Yěsô, á tsege pwó ńkíbe yé, ńgɔɔn ngie: Mèŋ n kwǒŋ pú’u, zeŋe.

⁴² Nkà’ gwóon ḿmaga ná yé, á zeŋe.

⁴³ Yěsô leen ngie, à gʉa, ńně ńtɔ́’ɔ yé tɛ’,

⁴⁴ ńgɔɔn ngie: Pɔ́ɔn léshwóŋó nyìŋ tsɔ́ nò. Gʉa ńnyɛ pɔ́ mbùm ɔ mbwo nùŋe pwɔ́’, ḿbiŋ ńnuŋe pwɔ́’ gẅie *lepʉ̌ Mǒsê ne ńzɛ́te mbwo nyìŋ gẅie nkà’ é magá ná yé, gÿo pú’u, pʉ̀a metsèm leen ńké ńzsé ngie ɔ zeŋe.

⁴⁵ Tá á gʉa, ńdeen ńgwá ńdɔgɔ nò ŋwɛ́ sá jʉ’. Á gwɔ gwɔ́ tà Yěsô tě ńgíŋe shʉ̀a shʉ̀a, ńkúu tsɔ́ tÿǒsoŋ wɔ́, ńcʉ́’ʉ ńzso pɔ́ mánzsè, á jʉ’ gie pʉ̀a té wó wɔ́. Mé ké ńně fóo jʉ’ ntsèm, ńtóo tǒ, ńgyá yé.