Lukase 9 - Nouveau Testament en Ngienboum

Yěsô tǔm pʉ̀a ntsɔ̀b pʉ́a nê legém

¹ Yěsô gÿo ńcú’te pʉ̀a ntsɔ̀b pʉ́a nê legém, ńná metʉ̀ mbwo pɔ́b, pɔ́ ku’u lélɔg lezíŋ sé ńjwoŋ *messé tepòŋ ntsèm mie é pue pʉ̀a, mbɔɔ légÿo meguɔ zeŋe.

² Ńdêen ńké ńtúmo wɔ́b ngie pɔ́ gʉa shwóŋ pá’ nò *lefùɔ Ssé áa pú’u, ńgíŋ ńgÿo megàŋa guɔ zeŋe,

³ ńgíŋe ńgɔɔn né pɔ́b ngie: Tà pi gwɔ gʉa ńgẅiin mmó. Tà nyìŋ tẅi’i tÿǒ, tà nyìŋ píi pɔ̀ɔn, tà nyìŋ tsẅága mmó léjÿó, tà nyìŋ pí nkáb, tà nyìŋ ma’ menzsǒ mémbʉ́a.

⁴ Pi gʉa tà ńkúu jʉ’, mé gɔɔn ngie pi lá’a tsɛ̀ɛ yɛ̌ ndá wɔ́, pi ke ńtsẅé pɔ́ ndá ŋwɛ́ tà ńdá’ ńgʉa.

⁵ Nzɔ̌ nzɔ̌ gie pi kǔ wó mé lʉ́’ʉ lékúe gẅí, pi fó wó, ńgwɔ gʉa ḿbú’u pfepfɔ́b mekwò pi lélɔg shwóŋó wɔ́b ngie á cʉ́’ʉ ńdíe pɔ́ wɔ́b.

⁶ Pɔ́ lêen ńké ńgʉa, ńkʉ́’ʉ melá’ melá’, ńgiŋe ńtsẅii Nkʉ̀ Mbòŋo gẅie é fóo mbwo Ssé, ńgíŋe ně ńgÿo megàŋa guɔ zeŋe.

Fùɔ Herôd jǔ’ mé kíme Yěsô, além yé tsɔ́’ɔ

⁷ Fùɔ *Herôd gẅie à lɔ̌ɔn sá’a pàga ngwòŋ Galilea jú’ mé kíme nò nà mefà’ mie mé ne fa’a nà lezíŋ Yěsô, á gege yé tɛ’, ńzɔɔn ńgwaa gwɔ́, epʉ̀a ne ńgɔɔn ngie Yěsô ŋwɛ́ aa Jâŋ gẅie à kéen ńzím.

⁸ Petsɔ́ pʉ̀a ne ngie aa *Elîɛ gẅie à giŋé ńkẅɛ, petsɔ́ gɔɔn yɔ́b ngie aa tsɔ̌ *ntsẅì nkʉ̀ Ssé we fʉ̀’e mvfò gẅie à giŋé ńkwɔ́’.

⁹ *Herôd ne ńgɔɔn yé ngie: Á gʉa ná Jâŋ, mbà mèŋ n zɔ la tsẅi mé zá’a twó yé. Wɔɔn nyìŋ piŋ ńgwɔ́ pɔ́ wɔ̌ gẅie mèŋ n ju’u mé gɔɔn menò ná yé pɔ́ nzẅìŋ wɔɔn? Ńdêen ńké ne fa’a légyá Yěsô tá ńzsé.

Yěsô jÿɔ̌g pʉ̀a ntsá’ yétʉ̀a

¹⁰ Megàŋ ntúm Yěsô piŋ nzèm, ḿbíte pá’ pɔ́ lɔ̌g fa’ pú’u, éshwóŋó yé. Yěsô jú’, ḿbiŋ faga wɔ́b, pâ pɔ̌ tsẅe nùɔ, ńgʉa lê shÿó tÿǒsoŋo Mbetsayida.

¹¹ Alá’ zsé, ńcʉ́me nzèm ye. Á meen ńzẅíŋ, ńgíŋe shwóŋó wɔ́b nò nà *lefùɔ Ssé, ḿbiŋ ńgÿo pʉ̀a metsèm pie é la ne ńtsɔ́ɔn lézeŋe zeŋe.

¹² Nzèm gÿo ne síŋe, megàŋa kwò Yěsô ntsɔ̀b pʉ́a nê legém tó ńgɔɔn né yé ngie: Pege ee jʉ’ɔɔn pá’ɔɔn nkwòŋo tsẅɛ, tsẅii alá’ gʉa mémbʉ̀a éfa’ shúm ḿpfɛ́, ńgíŋe fa’a jʉ’ ye lela’á.

¹³ Yěsô tsɔ́’ɔ mbwo pɔ́b ngie: Pi zɔ náa mmó pɔ́ pfɛ́. Pɔ́ gɔɔn ngie: Peg gẅiin mbelég jʉ’ɔɔn ndà’ mbu’ú ntʉ̀a, ńgÿo mbàŋ ssó yépʉ́a, é ke ńku’u kɔ́ nà nzẅìŋ lá’ yɔɔn?

¹⁴ Á laa pú’u, nyìŋ mesoŋ gwɔ́ ssé tɛ’, tà mbàŋa ndà’ gwɔ́ mmó ntsá’ tʉ̀a. Yěsô gɔɔn mbwo *ngàŋa kwò yé ngie pi gÿo pɔ́ ńnéŋe ssé móm ntʉ̀a, móm ntʉ̀a.

¹⁵ Pɔ́ gÿo pɔ́ ńnéŋe ssé.

¹⁶ Yěsô pí mbelég yɛ̌ mbu’ú ntʉ̀a lê messó mɛ̌ mbàŋ pʉ́a, ḿbʉ’ʉ twó yé ńdíe tÿǒ, ésíe Ssé mǒ, ńne ḿbwɔ́’te ńnáa mbwo *ngàŋa kwò yé, légwɔ́ gie pɔ́ gaba mbwo lá’.

¹⁷ Alá’ pfɛ́, ńzẅɛ́, mé lágte pfwɔ’ á lúe metǔŋ ntsɔ̀b pʉ́a nê legém.

Piɛ gɔ̌ɔn ngie Yěsô aa Nzà’nkÿo

¹⁸ Yěsô gwɔ́ tsɔ́ lyɛ̌’, pâ *ngàŋa kwò yé fag nnɛ́, ńgʉa jʉ’ gie nyìŋ tè wó wɔ́, pá’ à ge sẅíŋte Ssé. Á zɛ́te wɔ́b ngie: Alá’ aa pá’ɔɔn ńně ńgɔɔn ngie mèŋ n gee wɔ̌?

¹⁹ Pɔ́ pÿɛ ngie: Tsɔ́ pʉ̀a ne ngie ɔɔ Jâŋ Mbabtis, petsɔ́ ne ngie ɔɔ *Elîɛ, petsɔ́ ne ńgɔɔn ngie ɔɔ tsɔ̌ tà’ ná *pàntsẅì nkʉ̀ Ssé pe fʉ̀’e mvfò, gẅie à zǐm.

²⁰ Yěsô zɛ́te wɔ́b ngie: Kwà’ pi gí gɔɔn ngie mèŋ, n gee wɔ̌? Piɛ tsɔ́’ ngie: Ɔɔ *Nzà’nkÿo gẅie à foo mbwo Ssé.

²¹ Yěsô tɔ’ɔ wɔ́b tɛ’, ngie tà pɔ́ gɔɔn tà nyìŋ ndyɛ̀’ɛ jú’,

²² ḿbiŋ ńgɔɔn né pɔ́b ngie: *Míŋ Nyìŋ ge gyá ngɔ́’ tɛ’. Mekěme lá’ pâ *mentándá pànùŋe pwɔ́’ mbɔɔ *pàkyàgte lepʉ̌ Mǒsê lʉ’ʉ yé, ńgÿo mé zẅé yé, tá’ à gwɔ́ mbɔ́ɔntè lyɛ̌’ tá à zíme nà legwé.

Lecʉmé nzèm Yěsô

²³ Yěsô gÿo ńgɔɔn mbwo pʉ̀a metsèm ngie: Nyìŋ lɔɔn nge gwɔ́ wɔɔn nyìŋ, á gwága twó mbùm yé, ńkaa yé tÿǒ nkǐ ńdɔg ńzẅíŋe lékwé, tá ńcʉ́me nzèm mèŋ.

²⁴ Nyìŋ gẅie à ge zɔɔn fa’a lépɔ́ɔn we légwɔ́, zɔɔ nyìŋ gẅie à ge pyé we le gwɔ́ ŋwɛ́, tá nyìŋ gẅie à pyě we le gwɔ́ mélà’ mɔ́ɔn, mbà wɛ̌ nyìŋ ge lá’ gwɔ́ wó.

²⁵ Mé lɔɔn ńzɔɔn ḿbú ńkaa njÿó yɔɔn ntsèm ńná né nyìŋ, tá á ké ńgwɔ́ gie e ge lɔg pɔ́ twó yé, mbà á ge kẅéte yé nà kɔ́?

²⁶ Nyìŋ lɔɔn ńkú shʉ́ légwɔ́ wɔ̀ɔn nyìŋ, mbɔɔ léshwóŋó nò yɔ́ɔn, mbà *Míŋ Nyìŋ ge lá’ kú shʉ́ lélɔgɔ yé ńgÿo we nyìŋ á fʉ̀’ gie à ge lá’ piŋ nzèm lê legú’ we gẅie aa we Ssé tà mbɔɔ mecÿɔ́’ pé.

²⁷ Pi cwoŋo ńzsé ngie, tsɔ́ ntá’ ná pʉ̀a pie pɔ́ ee jʉ’ɔɔn fʉ̀’ɔɔn té gÿo kwé té gwɔ́ gie pɔ́ lɔ̌g nÿɔ́g ńgyá *lefùɔ Ssé wɔ́.

Yěsô nyɛ̌ shʉshÿɔ́g we mbwo tsɔ́ ngàŋa kwò yé

²⁸ Yěsô gɔɔn yɔɔn nò, é gÿo ńgwɔ́ lyɛ̌’ lefɔ̌ɔn, á faga Piɛ, ńgÿo Jâŋ pɔ́ Jâg, pâ pɔ̌ kwɔ́’ɔ nà tsɔ́ lekwɔ’ɔ́ pá’ à ge tsyɛ’te Ssé,

²⁹ ńkúu wó, á ne ńtsyɛ’te Ssé, aliŋé shÿó wé pú ńkúbe, menzsǒ mé pú fɔ́g tà ńŋwʉŋe.

³⁰ Mé gyá pʉ̀a mépʉ́a kẅɛ, pâ Yěsô ne shwóŋe. Á gwɔ́ Mǒsê pɔ́ *Elîɛ,

³¹ Mbà pɔ́ lɔgɔ́ shéshÿɔ́g Ssé ńtó, pâ Yěsô ne shwóŋó nò nà nzsè Yerósalem, pá’ à ge tóo wó kwé.

³² Á gwaa gwɔ́, mbà Piɛ pâ petsɔ́ pʉ̀a pǔ ńdyé tɛ’, pɔ́ gwɔ vege, ńgyá shʉ́shÿɔ́g Yěsô ne ńkyɛ’ɛ jʉ’, Yěsô pâ pʉ̀a pá mépʉ́a tyé jʉ’ó.

³³ Pâ pɔ̌ la cʉ́’ʉ ne ńgee pɔ́ fegé, Piɛ shÿɔg shÿɔg tà ńgɔɔn né Yěsô ngie: Tá weg, pege lɔɔn ńcʉ́’ʉ ńnéŋe pɔ́ jʉ’ɔɔn, á gwɔ́ mbòŋ. Zẅíŋe peg kwɛ́ méntàb méntá, tà’ gwɔ́ gù, wetsɔ́ gwɔ́ we Mǒsê, wetsɔ́ gwɔ́ we *Elîɛ. Piɛ gɔɔn yé pú’u, à tě ńzsé mmó gie à gɔɔn wɔ́.

³⁴ Ńnyé ńgɔɔn gɔɔn, tsɔ́ melɔ́ɔn sẅɛ́’ ńkábte wɔ́b. *Ngàŋa kwò Yěsô gyá pá’ melɔ́ɔn kabté wɔ́b, ḿbú ḿbɔ́g.

³⁵ Ngyè nyìŋ fóo tsɛ̀ɛ melɔ́ɔn ŋwɛ́, ńgɔɔn ngie: Wɔɔn aa míŋ wɔ̀ɔn mie n kǎŋ, pi jú’ ncwò wé.

³⁶ Ngyè ŋwɛ́ shwóŋe tà ńtsẅé jʉ’, pɔ́ cʉ́’ ńgyá Yěsô tyé jʉ’ó pɔ́ gílé yé. *Ngàŋa kwò Yěsô la gyá mɔɔn menò pá’ɔɔn, éfó jʉ’ó, pɔ́ té lwo shwóŋó nyìŋ ndyɛ̀’ɛ wɔ́.

Yěsô zoŋó tsɔ̌ múɔ gẅie messé tepòŋ ka ne ḿbue yé

³⁷ Njÿó gÿo ńdʉ́a, Yěsô pâ *ngàŋa kwò yé yétá gwaa fó lekwɔ’ɔ́ ŋwɛ́ cwóŋ, mbà lá’ kẅɛ̌ tà ńgyɔ́ɔn ńtó ńzá’a yé.

³⁸ Nyìŋ leen fó nùɔ lá’ sẅíŋte yé lê ngyè tetʉ́ ngie: Andè tsétsɔ́’, líe míŋ wɔ̀ɔn mɔɔn ńgyá, aa mûɔ mbàŋa, ńgwɔ́ ndà’ yé mbwo mèŋ.

³⁹ Tsɔ̌ *ssé tepòŋ ńnéŋe tà ńgwoon yé, á gá’te, ńgwe, ḿbʉ́’, ḿpfɛ́ ncwò wé, éfu’ metyé. E gwoon yé, ńdá’ ńgwɔ kyɛɛ yé nyé, ḿbú ḿbwɔ́’te yé tɛ’.

⁴⁰ Mèŋ sẅiŋté *ngàŋa kwò ɔ́ ngie pɔ́ jwoŋ ssé ayɛ̌, tá pɔ́ pú te mǒ ku’.

⁴¹ Yěsô jú’ pú’u, ngie: Wɛ̌ɛ! Pʉ̀a ngù’ yɔɔn, pi tè záb ntʉ́m nà Ssé wɔ́, ńgÿo pɔ́ nò tepòŋ. Aa pá’ɔɔn pege lá’ ńnéŋe tà ńkú pɔ́ síŋe, mèŋ shÿɔgɔ nà menò mi? Lɔgɔ míŋ ɔ̀ ŋwɛ́ ńtó lé jʉ’ɔɔn.

⁴² Tá múɔ ne ńdɔgɔ yé ńtóo, essé tepòŋ ŋwɛ́ gíŋe ńgwoon yé ńtéme ssé, á pʉ́’ lê tʉ̀. Yěsô leen ńcÿɔ́g *ssé tepòŋ ŋwɛ́, á kyɛɛ múɔ ńnyé á sẅéte. Yěsô kíbe pwó yé, ńnáa yé né tá we.

⁴³ Alá’ gie á laa jʉ’ó, gyá yɔɔn nò, ḿmɔɔn pá’ metʉ̀ Ssé lɔg fáŋ pú’u. Alá’ ne ńgɔ’te menò mie Yěsô gÿǒ. Á gÿo ńgɔɔn mbwo *ngàŋa kwò yé ngie:

Yěsô giŋé shwóŋ ntí legwé gie à ge kwé yɛ̌

⁴⁴ Pi cwoŋo ńjú’u nò gie n gee ngɔ̌ɔn lɔɔn mboŋó, ḿbiŋ ńkímte. Mé ne ńgee sẅǐŋ *Míŋ Nyìŋ mbwo pʉ̀a mesoŋ.

⁴⁵ Tá *ngàŋa kwò yé té cwoŋo ńjú’u yɔɔn nò mboŋó wɔ́, mbà tsɔ́ mmó jÿɔ̌’ legyè sɔ́b légwɔ́ gie pɔ́ té jú’ wɔ́. Atsɔ̌ nyìŋ wɔb ké tè shÿɔg tà ńzɛ́te yé ngie ɔ̀ fa’a légɔɔn ngie kɔ́ wɔ́, mélà’mie pɔ́ la cʉ́’ʉ ḿbɔ́gɔ pɔ̌g.

Awɔ̌ aa pé’e ńgwɔ́ kwà’ ndÿò?

⁴⁶ Etsɔ̌ ntsaŋ lêen ńké ńnéŋe tà sá’a tsetsɛ̀ɛ *ngàŋa kwò Yěsô, pɔ́ ne fa’a nyìŋ gẅie aa tsetsɛ̀ɛ pɔ́b ńgwɔ́ ndÿò.

⁴⁷ Yěsô zsé nkwaŋá gẅie ée ntʉ́m pɔ́b, ńtóŋo mûɔ mémúɔ, ńtÿɔ́gɔ lejʉ́ŋ yé,

⁴⁸ ńgɔɔn mbwo *ngàŋa kwò yé ngie: Nyìŋ lɔg lezíŋ sɔ́ɔn, ńkúe mûɔ mémúɔ wɔɔn, mbà ngàŋ kúe pɔ́ wɔ̀ɔn. Nyìŋ piŋ ńkúe wɔ̀ɔn, mbà à tě ńkúe pɔ́ wɔ̀ɔn ndà’ wɔ́, à kúe pɔ́ nyìŋ gẅie à la túmo wɔ̀ɔn. Pi zsé mboŋó ngie nyìŋ gẅie aa tsetsɛ̀ɛ pi à tè nyɛ nnɛ́ wɔ́ zɔɔ kwà’ ndÿò

Nyìŋ lɔɔn tè nò Yěsô tág, mbà à kẅete yé kẅéte

⁴⁹ Jâŋ lêen ńké ńgɔɔn né Yěsô ngie: Tá weg, peg ně ńgyá tsɔ̌ nyìŋ ne ńdɔgɔ lezíŋ shú ńjwoŋo *messé tepòŋ ná pʉ̀a, peg fa’a létɔ’ɔ yé, mélà’mie à tè yé nzèm gù pá’ peg wɔ́.

⁵⁰ Yěsô tsɔ́’ ngie: Tà pi tɔ’ɔ yé légÿo pú’u. Nyìŋ gẅie à kaa nò yégè tága aa wege nyìŋ.

Tsɔ́ pà Samalîɛ lʉ’ʉ́ Yěsô lá’ pɔ́b

⁵¹ Afʉ̀’ gie Ssé ge kaa Yěsô lɔg piŋ ne tÿǒ lepwó gÿo ńku’, Yěsô gyá ngie á zebé pá’ à ge gʉa Yerósalem, ńdêen ńké ńdu ssé ńcʉ́me mánzsé té pɔ́g,

⁵² ńgwaa gʉa, ḿvɔg ńtúm pʉ̀a, pɔ́ gʉa tà ńkúu tsɛ̀ɛ tsɔ́ lá’a Samalîɛ, ńdúɔ jʉ’ tá á tó.

⁵³ Pàlá’ ŋwɛ́ jú’ ngie Yěsô cʉa ńgee ne Yerósalem, ńdʉ’ʉ lé náa jʉ’ mbwo ye.

⁵⁴ Tsɔ́ *ngàŋa kwò yé yépʉ́a, á Jâg pɔ́ Jâŋ gÿo ńjú’, ńgɔɔn né Yěsô ngie: Tá weg, tà ɔ̀ zẅǐŋ ngie peg zɛ́te mmɔ̌g, efó tÿǒ lepwó sẅɛ́’, ńtó ḿbyág pʉ̀a apɛ̌?

⁵⁵ Yěsô sele nnɛ́ ńdíe wɔ́b, ńcÿɔ́gɔ wɔ́b [ ngie pi kaa zsé nkwaŋá gẅie é tsóte gẅi wɔ́.

⁵⁶ Pi zsé ngie *Míŋ Nyìŋ kà te tó légÿo pʉ̀a mesoŋ kúu pyé wɔ́, à la tó pɔ́ légÿo pɔ́ tsẅɛ́]. Pâ pɔ̌ cʉ́’ ńgʉa pɔ́ le tsɔ́ lá’a ndyɛ̀’ɛ, ńdúɔ jʉ’.

Nyìŋ gwaa cʉ́me nzèm Yěsô ḿbú ńgwá’a kɔ̀ɔkɔ́ɔ wɔ́

⁵⁷ Pɔ́ gwɔ́ mánzsé ńne ńgee, tsɔ̌ nyìŋ tó, ńgɔɔn né Yěsô ngie: Ɔ̀ ge gʉa nzɔ̌ wɔ́, mèŋ n ké ńgwɔ́ pɔ́ nzèm gù.

⁵⁸ Yěsô tsɔ́’ɔ mbwo yé ngie: Membândum gẅiin membÿé lélyeen wó, meshʉ́ŋ piŋ ńgẅiin menkʉ̀a mɔ́b, tá’ *Míŋ Nyìŋ tè gẅiin jʉ’ gie ngwɔ́ á zẅɛte wó wɔ́.

⁵⁹ Yěsô gɔɔn mbwo wetsɔ̌ nyìŋ ngie: Cʉ́me nzèm mèŋ, pɔgɔ zɔ cʉ́’ʉ ńgiŋe. Angàŋ gɔɔn ngie: Andè, cʉ́’ mèŋ n zɔɔn ńgʉa ńtúŋo tá wɔ̀ɔn.

⁶⁰ Yěsô tsɔ́’ɔ mbwo yé ngie: Nyé mepfó pɔ́ túŋ mepfó pɔ́b. Ɔ̀ gẅiin pɔ́ légʉa shwóŋ pá’ nò *lefùɔ Ssé áa pú’u.

⁶¹ Wetsɔ̌ nyìŋ gíŋe ńgɔɔn né Yěsô ngie: Tá weg, mèŋ n gee cʉ́me nzèm gù. Tá’, ké ńcʉ́’ n zɔɔn ńgʉa ńde’e pʉ̀a tsiŋe ndá yég tá ńtó.

⁶² Yěsô gɔɔn né yé ngie: Nyìŋ lɔɔn ńzye léjʉ́’ ngwóŋ, tá ḿbiŋ ne ńdíe nzèm, mbà à tè nyìŋ gẅie à ku’u léfa’a nà nò *lefùɔ Ssé wɔ́.