Lukase 7 - Nouveau Testament en Ngienboum

Yěsô gÿǒ ménkʉ̀ tsɔ̌ tá ndá pà lÿɔ́’ ncù nkÿo we pà Roma zeŋe

¹ Yěsô gɔɔn nò mbwo lá’ tà ńtsẅé jʉ’, ḿbiŋ nzèm né Kapernawúm.

² Tsɔ̌ Tá ndá pà lÿɔ́’ ncù nkÿo we pà *Roma gwɔ́ tÿǒsoŋ ŋwɛ́, ńgẅiin ménkʉ́ we, ḿbú ńkwoŋo yé tɛ’. Ménkʉ́ we ŋwɛ́ gwɔ́, mbà à gwě guɔ, ńcʉ́’ʉ ńkwé kwě.

³ Tá ndá ncù jú’ mé ne ńkíme Yěsô, á gú melÿò pà Yuda ngie pɔ́ gʉa sẅíŋte yé, à tó ńkẅé ménkʉ́ we mbwo legwé.

⁴ Pɔ́ gʉa tà ńkúu lejʉ́ŋ Yěsô, ńcwoŋo sẅíŋte yé ńgɔɔn ngie: Tá ndá ncù gẅie à tumó wég, à ku’u nyìŋ gẅie à lɔɔn ńgwɔ́ ɔ̀ kẅéte yé.

⁵ À kwoŋo lá’a yégè kwoŋ tà mbà à la kwɛ́ *ndá cú’tè né peg.

⁶ Yěsô jú’, ńdu ssé pâ pɔ́ gʉa, ńgʉa tà ńcʉ́’ʉ lékúu mbʉ̀a tá ndá ncù, ḿbumte petsɔ́ pʉ̀a pie tá ndá ncù tǔm. Pɔ́ gɔɔn né yé ngie: Andè, tá ndá ncù yě, tè gége mbùm jù ngie ɔ̀ ge gʉa ndá ye, ngie à tsẅilé nyìŋ gẅie à lɔɔn ńgwɔ́ ɔ̀ tɔ́g tà ńkúu ndá yé lɛ.

⁷ Áa mmó gie á ně ńgÿo tá kwà’ yé tè tsɔ́’ mekwò mé ńtó ńgyá gú wɔ́. Ngie tsétsɔ́’, leen ńtyé pɛ́’ɛ, ńtsẅi lê ncwò ménkʉ we zeŋe,

⁸ ńgie à gɔɔn pá’ɔɔn ńgwɔ́ yé nzèm nyìŋ, ńjú’u ncwò we, ńgíŋ ńgẅiin yé pàlÿɔ́’ ncù nzèm yé, pɔ́ ne ńjú’u yé, ńgie à lɔɔn ńgɔɔn né tsɔ̌ ngie gʉa, á gʉa, ńgie tóo, á tó, ḿbiŋ ńgɔɔn né nkwɔ̀ɔn ye ngie gÿo pá’ɔɔn, á gÿo.

⁹ Yěsô jú’u yɔɔn shwóŋè gie á kẅɛ̌ ncwò tá ndá ncù, ńgɔ’te yé, ésele nnɛ́ ńgɔɔn mbwo lá’ gie áa nzèm yé ngie: Mèŋ shwóŋó gẅí, mbɔɔ tsɛ̀ɛ ngwòŋ pà Israel, n kaa gyá tsɔ̌ nyìŋ gẅie à zǎb ntʉ́m ná mèŋ pá’ ye wɔ́.

¹⁰ Pʉ̀a pie tá ndá ncù pà *Roma tumó wɔ́b gÿo ḿbiŋ tà ńkúu ndá, ńgyá, mbà nguɔ zeŋé.

Yěsô gÿǒ míŋ mpfɔ̌g manzwě zím

¹¹ Yɔɔn nò tɔ́g, Yěsô cʉ́me mánzsé, ńne ńgee né tÿǒsoŋ gie mé tóŋo le Nayin, pâ *ngàŋa kwò yé lâ nùɔ lá’ pú ne ńgiŋe.

¹² Pɔ́ gʉa tà ńcʉ́’ʉ lékúu tÿǒsoŋ, ńgyá, mbà mé kǎ pfó tsɔ̌ mûɔ mbàŋa, ńdɔgɔ ńgee ńtúŋo. Mbà é kaa ndà’ múɔ mbwo má we, á gwɔ́ mpfɔ̌g. Alá’ pú ńgwɔ́ nzèm yé tà ńgyɔ́ɔn.

¹³ Cʉ̀apʉ̀a Yěsô gyá mpfɔ̌g ŋwɛ́, mezìŋe mé kúu yé, á gɔɔn né yé ngie: Tè gíŋe ńdʉa,

¹⁴ ńgɔɔn pú’u, ésẅɛ’te nnɛ́, ńtó ńkíbe nkùm mpfó, pʉ̀a pie é la kaa tyé, Yěsô gɔɔn ngie: Mûɔ shùm, n tsẅǐ ngie ɔ̀ zyeen.

¹⁵ Á lêen ńgwóon ḿbʉ’ʉ nnɛ́ ńnéŋe ńnéŋe, ńzye léshwóŋe, Yěsô kíbe yé ńnáa mbwo má we.

¹⁶ Alá’ gie á laa ssé la gyá, ecÿɔ’ gwoon wɔ́b métsèm, pɔ́ gu’te Ssé, ńgɔɔn ngie: Máamáa *ntsẅì nkʉ̀ Ssé tǒ lá’ peg, e Ssé tǒ ńkẅéte pʉ̀a pé.

¹⁷ Mé la lɔg menò mie Yěsô gÿǒ ḿbú saa pàga ngwòŋ Jẅidea, tà mbɔɔ metsɔ́ melá’ shÿó jʉ’ó.

Megàŋ ntúm Jâŋ Mbabtis

¹⁸ *Megàŋa kwò Jâŋ Mbabtis jú’ yɔ́b mɔɔn menò ntsèm, ńtó, ḿbíte shwóŋó yé. Jâŋ tsɔ́’ pʉ̀a mépʉ́a tsetsɛ̀ɛ pɔ́b,

¹⁹ ńtúmo wɔ́b ngie pɔ́ gʉa ńzɛ́te Yěsô ngie aa *Nzà’nkÿo gẅie mé ka ne ńzẅí’te kà mé gíŋe ńzẅí’te pɔ́ tsɔ̌ nyìŋ ndyɛ̀’ɛ wɔ́?

²⁰ Pɔ́ gʉa tà ńkúu lejʉ́ŋ Yěsô, ńgɔɔn né yé ngie: Jâŋ Mbabtis, tumó wég ngie peg tó ńzɛ́te ɔ́ ngie ɔɔ pá’ɔɔn ńgwɔ́ *Nzà’nkÿo gẅie mé ka ne ńzẅí’te keen, kà mé gíŋe ńzẅí’te pɔ́ tsɔ̌ nyìŋ ndyɛ̀’ɛ wɔ́?

²¹ Á la gwaa gwɔ́, Yěsô ne ńzoŋo meguɔ tà ńgyɔ́ɔn, ńně siŋte *melɔ̌’ ntí ntí, ńně ńjwoŋo *messé tepòŋ mie é pue pʉ̀a, ńně ńgÿo pafʉ̀ menÿɔ́g gyá jʉ’.

²² Á tsɔ́’ɔ mbwo pɔ́b ngie: Pi gʉa ḿbíte shwóŋó Jâŋ á mmó gie pi gyǎ, mbɔɔ gie pí jǔ’ mé gɔɔn, éshwóŋó yé ngie mefʉ̀ menÿɔ́g ne ńgyá jʉ’ mboŋó, pàpwɔ́’te mekwò ne ńgiŋe mboŋó, megàŋ nkà’ ne ńzeŋe, pàmbǔ’ metuŋó ne ńjú’u jʉ’, mepfó ne ńzyeen, mefÿɔg ne ńjú’u Nkʉ̀ Mbòŋo.

²³ Ashÿó mbòŋo aa nyìŋ gẅie à tè kʉ́a lezáb ntʉ́m ná mèŋ wɔ́.

²⁴ Megàŋ ntúm Jâŋ Mbabtis gʉa, Yěsô cʉ́’ ńgɔɔn nò ńtíi Jâŋ á mbwo lá’ gie áa jʉ’ó, ńzɛ́te wɔ́b ngie: Á kaa fʉ̀’e Jâŋ pi gʉa nkwòŋo tsẅɛ ńgyá kɔ́? Á kekà’a gie fèfà ne ńnʉ’te lá? Ngǎŋ.

²⁵ Tà pi kɔ̌ɔn ńgee pɔ́ ńgyá kɔ́? Á nyìŋ gẅie à ma’ menzsǒ nkáb lá? Tá’ pàma’ yɛ̌ ntí menzsǒ, ḿbiŋ ńgẅiin shúm meshúm ńnéŋe pɔ́ nɔ’.

²⁶ Tà pi kɔ̌ɔn ńgee ńgyá pɔ́ kɔ́? Á *ntsẅì nkʉ̀ Ssé lá? Oon tà mèŋ n ké shwóŋó gẅí, à kaa wɛ̌ tà ńcʉa mbɔɔ *ntsẅì nkʉ̀ Ssé!

²⁷ Jâŋ zɔɔn ńgwɔ́ nyìŋ gẅie Ssé la cʉ́’ʉ légɔɔn nò ná yé, ńtsẅi mé ŋwe’e ngie: «Jú’u, mèŋ n ge túmo mántúm wɔ̀ɔn, à vɔg ńtó, ńně ńnyɛte mánzsé ɔ̀ tá ɔ̀ tó».

²⁸ Yěsô gíŋe ńkẅi’i ńgɔɔn ngie: Mèŋ shwóŋó gẅí, atsɔ̌ nyìŋ laa zɔɔn ńgwɔ́ wó tà ńtɔ́gɔ Jâŋ Mbabtis wɔ́. Tá á ké yɔɔn, mbà nyìŋ gẅie à zyě fʉ̀’ɔɔn légyá nò *lefùɔ Ssé, à lɔɔn fó ńzɔɔn ńkɔ́g kɔ́g pɔ́ lêkɔ́ wɔ́, mbà aa shÿó mbòŋo ńcʉa Jâŋ lɔɔn.

²⁹ Pʉ̀a metsèm la zẅí’te nò Jâŋ, tà mbɔɔ pàkẅé ncùb pà *Roma, ńgɔɔn ngie: E Ssé ne ńkwoŋo légÿo peg tsẅɛ́! Ńgɔɔn pú’u, ńgÿo Jâŋ nu’u wɔ́b ntse.

³⁰ Tá ńgʉa ná pà *farisay, pâ pàkyàgte mbʉ̌ Ssé, mbà pɔ́ la gwá’a yɔ́b yɛ̌ nò gwǎ’, tá á gwɔ́ gie Ssé la nyɛte ńtíi wɔ́b, ńgwá’ pú’u, pɔ́ té zẅíŋ Jâŋ nu’u wɔ́b ntse wɔ́.

³¹ Yěsô gíŋe ńgɔɔn ngie: Tà mèŋ n ge lɔgɔ kɔ́ pí fʉ̀’ ná pʉ̀a pie ée tsɛ̀ɛ njÿó fʉ̀’ɔɔn? Pɔ́ ee pé’e sẅé pà wɔ̌?

³² Pɔ́ leen ńgwá’a gubé gie pɔ́ ńnéŋe ndùmo gyɛ̌, ńně ńzɔbɔ tsetsɛ̀ɛ pɔ́b ńtuu ńkẅé ngie: Peg ka pú’ leluŋó, pi tè zíŋ. Peg ka tú legwé, pi tè lʉa.

³³ Wɛ̂ aa kwà’ pá’ mé la gÿo ná Jâŋ Mbabtis. À ka tǒ, à tè mmó pfɛ́, à tè melù’ nú, pi gɔɔn ngie aa pʉ̀a.

³⁴ *Míŋ Nyìŋ kéen ńtó yé fʉ̀’ɔɔn, ńně ḿpfɛ́ɛ mmó, ḿbiŋe ńnúu melù’, pi gɔɔn ngie mé líe yé tá ńgyá, nyìŋ wɛ̂ gwɔ́ pɔ́ mpfɛ̀ɛ mmó, ńgwɔ́ nnù melù’, ńgwɔ́ sǒ pàkẅé ncùb pà *Roma, mbɔɔ we petsɔ́ pʉ̀a tepòŋ.

³⁵ Tá pʉ̀a metsèm pie é zẅiŋé yɔɔn zsé nò lɔgɔ nyɛɛ ngie à gÿo menò mbòŋo Ssé.

Yěsô gʉ̌a ndá Símo, á gwɔ́ nyìŋ farisay

³⁶ Atsɔ̌ nyìŋ *farisay gÿo ńtóŋo Yěsô ngie à tó pɔ́ yé jÿó mmó. Yěsô tó tà ńkúu ndá, ńnéŋe ssé léjÿó mmó.

³⁷ Atsɔ̌ manzwě gwɔ́ tÿǒsoŋ, ńgwɔ́ káa tÿǒ manzwě, ńjú’ ngie Yěsô aa ndá nyìŋ *farisay, ńcwoŋte laméndɔ́ɔn tsɛ̀ɛ múɔ méndáŋ gẅie à gwɔ́ pɔ́ tóon ńdɔg ńtó,

³⁸ ńkuu ndá, ńtyé nzèm Yěsô, á ngʉ̀ŋe mekwò mé, ńzye lélʉa, ńdʉa lʉa tà ntse nÿɔ́g mé kẅɛ ńcʉ́mte na mekwò Yěsô. Mé gwɔ gyá manzwě ŋwɛ́ ne ńdɔgɔ menòŋo twó mé ńtsí’i mekwò Yěsô, ńtɔ́ɔn ésiŋte ńdɔgɔ laméndɔ́ɔn yɛ̌ ńzɔ́’ɔ.

³⁹ Nyìŋ *farisay gẅie à ně ńtóŋo Yěsô gyá pú’u, ńkwáŋte ntʉ́m yé ngie, nyìŋ wɔɔn gwe’e ńgwɔ́ kwà’ *ntsẅì nkʉ̀ Ssé, mbà à zsě lii manzwě gẅie à zába pwó ná ye lɛ, mbà à zsě ngie aa manzwě tepòŋ.

⁴⁰ Yěsô gwóon ńgɔɔn né yé ngie: Símo, pɔgɔ gẅiin shwóŋè. Á gɔɔn ngie: Tsítsà, n ne ńjú’u.

⁴¹ Yěsô gɔɔn ngie, atsɔ̌ nyìŋ lǎ’ ne ńkʉ́a njǔ mbwo pʉ̀a mépʉ́a, mvɔ́g mvfò gẅiin létsɔ́’ medenie nkÿo tʉ̀a, mbɔ́ɔntè gẅiin yé létsɔ́’ ndà’ móm ntʉ̀a.

⁴² À la kʉ́a, ńgyá pɔ́ té ku’u létoŋ wɔ́, á gɔɔn ngie à te lá’ gíŋe kʉ́a nkáb ŋwɛ wɔ́, ḿbú nyé mbwo pɔ́b. Ɔ̀ gyǎ jú ngie wɛ̌ nyìŋ ná pɔ́b mépʉ́a à ge kwoŋo ngàŋ nkáb ŋwɛ́ tɛ’?

⁴³ Símo tsɔ́’ ngie: N kwǎŋ ngie à ge gwɔ́ nyìŋ gẅie ye njǔ la gyɔ́ɔn. Yěsô gɔɔn ngie: Ɔ̀ shwóŋó nò.

⁴⁴ MÀbiŋ sele nnɛ́, ńdíe manzwě wá, ńgíŋ ńgɔɔn né Símo ngie: Ɔ̀ ne ńgyá manzwě wɔɔn, mèŋ n ně ńdá’ ńkúu ndá wɔɔn, ɔ̀ kaa náa wɔ̀ɔn ntse lɔg sɔg mekwò wɔ́, tá manzwě wɔɔn lɔ̌g ntse nÿɔ́g mé sɔg mekwò mɔ́ɔn, ḿbiŋ ńdɔg menòŋo twó mé ńtsí’i.

⁴⁵ Ɔ̀ kaa tsyɛ’te wɔ̀ɔn, ésiŋte wɔ̀ɔn mɔ́. Tá á gʉa ná yé, mbà tà fó pá’ à ně ńkúu ndá yɔɔn, à ne siŋte mekwò mɔ́ɔn té kʉ́a.

⁴⁶ Ɔ̀ ně fó te lɔgɔ méjʉ’ʉ mèvɛ ńzɔ́’ɔ twó yɔ́ɔn mɔ́, tá à kě ńdɔgɔ laméndɔ́ɔn ńzɔ́’ mekwò mɔ́ɔn.

⁴⁷ Á cʉa pú’u, tá mèŋ shwóŋó ɔ́ ngie, manzwě wɔɔn nyɛɛ yɔɔn ntí nkwòŋo pá’ɔɔn, mélà’mie mé pú ńdege menò tepòŋ mé mie é ke ńgyɔ́ɔn tɛ’, ńnáa mbwó yé. Tá ńgʉa ná nyìŋ gẅie à gyǎ ngie menò tepòŋ mé mie mé legé ké tè tsẅe ńgyɔ́ɔn tɛ’ wɔ́, mbà ye nkwòŋe ge gíŋ gwɔ́ pɔ́ méjʉ’.

⁴⁸ Yěsô lêen ńké ńgɔɔn mbwó manzwě wá ngie: E Ssé legé menò tepòŋ mú ńnáa mbwo gu.

⁴⁹ Epʉ̀a pie pâ pɔ̌ laa ndá ńně ńjÿó shúm jú’, ńzye lézẅɛ́te tsetsɛ̀ɛ pɔ́b ngie: Wɔɔn nyìŋ à gwɔ́ pɔ́ wɔ̌ tà ńgɔɔn ngie Ssé legé menò tepòŋ nyìŋ?

⁵⁰ Yěsô gíŋe ńgɔɔn né manzwě ŋwɛ́ ngie: Ɔ̀ tsẅɛ̌ ndòon menò tepòŋ mú, mélà’mie ɔ̀ zǎb ntʉ́m ɔ́ ná mèŋ. Gʉa lê sẅétè.