Lukase 4 - Nouveau Testament en Ngienboum

Sátà kwa’té Yěsô á nkwòŋo tsẅɛ

¹ Jâŋ la gwɔ́ tà ńnu’u Yěsô ntse, á fó nkʉ̀ŋ ntse Jurdeŋ ńgʉa. A Zẅìge Ndʉalʉ̌a pú ńjÿó yé, ńgÿo á gʉa lê nkwòŋo tsẅɛ,

² ńtsẅé wó lyɛ̌’ lá’ móm lekùa, à Zẅìge Ndʉalʉ̌a ne ńtÿɔ́’te yé, Sátà yé ké né ńgwá ńtóo ńkwa’te yé kwa’te. Yěsô gÿo ńnéŋe wó, ńdá’ tè mmó pfɛ́ tà á cʉ́’ nzsotě, nzyè pú ńgyáŋa yé tɛ’.

³ Sátà lêen ńtó ńgɔɔn né yé ngie: Pá’ ɔɔ Míŋ Ssé lá, lêen ńké ńtsẅi né tóon wɛ̂ ngie à sele ńcʉ́’ʉ mmó léjÿó ɔ̀ jÿó.

⁴ Yěsô tsɔ́’ɔ mbwo Sátà ngie: Mé la ŋwe’e tsɛ̀ɛ ŋwà’ne Ssé ngie: Nyìŋ tè lɔg pɔ́ ndà’ mmó gie à pfɛ̌ tá gwɔ́ wó wɔ́

⁵ Sátà lêen ńké ńkwé’e yé ńtÿɔ́gɔ tsɔ́ jʉ’ taa tÿǒ, ńtyé wó ńgÿo á pú ńgyá mengwòŋo mengwòŋ mie ée tsɛ̀ɛ njÿó tà’ legʉ̀a,

⁶ ńgɔɔn né yé ngie: Mé léen ḿbú ńná mengwòŋ mɛ̂ lé mèŋ, mèŋ m biŋ ńku’u lé pú ńná né wɔ̌wɔ́ɔ gẅie n kwǒŋ. Mèŋ n ge zɔɔn ná lefùɔ né gù, gù zɔ cʉ́’ʉ ńdɔgɔ ńgẅiin shúm mbòŋo sie ée tsòló ntsèm.

⁷ Mèŋ n gɔɔn pɔ́ ndà’ ngie ɔ̀ kẅí’te mvfò mèŋ, ńgu’te wɔ̀ɔn, e lêen ńcʉ́’ shú.

⁸ Yěsô tsɔ́’ɔ mbwó yé ngie: Mé la ŋwe’e tsɛ̀ɛ ŋwà’ne Ssé ngie: Nyìŋ gu’te pɔ́ ndà’ Tá wɔb Ssé yé gílé yé, ḿbiŋe ńjú’ pɔ́ ndà’ ncwò wé

⁹ Sátà lêen ńdɔgɔ Yěsô ńgʉa lé Yerósalem fʉ̀’ɔɔn, ńtÿɔ́gɔ yé nà ntsɔ̀’ gie ee *jʉ’ʉ Ssé, ńgɔɔn né yé ngie: Pá’ ɔɔ Míŋ Ssé la, fó jʉ’ɔɔn, ńkyɛ́, ńtyé Ssé, mélà’mie

¹⁰ mé la ŋwe’e tsɛ̀ɛ ŋwà’ne Ssé ngie: Ssé ge tsẅi mecÿɔ́’ pé tó ḿbyɛ́bte gú

¹¹ Mé la gíŋ ńŋwe’e ngie: Pɔ́ ge lɔg mbwo mɔ́b kaa gú tà ɔ́ le túu kwò ɔ́ ná tóon wɔ́

¹² Yěsô tsɔ́’ɔ mbwo Sátà ngie: Mé la gíŋ ŋwe’e tsɛ̀ɛ ŋwà’ne Ssé ngie: MÀbɔ́ɔn nyìŋ létsíŋe Tá we Ssé tsiŋé ngie à gÿo mmó ná yé.

¹³ Sátà kwa’te Yěsô tà ḿmag mentí, ńgyá kékáŋ, ńnyé yé, ńgʉa, ńně ńzẅí’te fʉ̀’e ndyɛ̀’ɛ gie à ge gÿo gíŋe tóo ná yé.

Yěsô ge zye fà’ yé ngwòŋ Galilea

¹⁴ Yěsô lêen ńké ńgwaa gíŋe piŋ né Galilea, à Zẅìge Ssé ně ńnáa yé métʉ̀, á lɔgɔ nyɛɛ mefà’ Ssé. Lezíŋ sé pú saa yɛ̌ pàga ngwòŋ ŋwɛ́,

¹⁵ mélà’mie à la ne ńda’te nò Ssé á *ndá cú’tè pà Yuda, pʉ̀a metsèm ně ńgu’te yé.

Yěsô ne ńtsẅii Nkʉ̀ Mbòŋo

¹⁶ Yěsô lá’ ńnéŋe tà ḿbiŋe Nǎzarɛd, á jʉ’ gie à la gú’u wó. Alyɛ̌’ɛ nzsé yɔ́b ku’. Á gʉa *ndá cú’tè pà Yuda pá’ aa ńzɔɔn ńgee. Afʉ̀’ ku’, á lu ssé létóŋo ŋwà’ne Ssé.

¹⁷ Mé píi ŋwà’ne Esǎya *ntsẅì nkʉ̀ Ssé, ńná né yé. Á nyɛ́’ɛ nà jʉ’ gie mé la ŋwe’e wó ngie:

¹⁸ À Zẅìge Cʉ̀apʉ̀a áa ná mèŋ, mélà’mie à la zɔ́’ɔ wɔ̀ɔn, ńtúmo wɔ̀ɔn ngie n gʉa, ńtsẅi Nkʉ̀ Mbòŋo á mbwo megàŋ ngɔ́’, ńtúmo wɔ̀ɔn ngie n gʉa ńtsẅii mbwo megàŋa tsáŋa ncù ngie: Mé ge kẅile wɔ́b, ńtúmo wɔ̀ɔn ngie n gʉa, ńgÿo mefʉ̀ menÿɔ́g gyá jʉ’, ngie n gʉa, ńtág nzèm pʉ̀a pie mé ne sẅɛ́ɛ wɔ́b,

¹⁹ ńgíŋ, ńtúmo wɔ̀ɔn ngie n gʉa sá’a mbwo lá’ ngie yɔɔn ee ngù’ gie Cʉ̀apʉ̀a ge tsɔ́ɔn mezìŋe pʉ̀a pé

²⁰ Yěsô la tóŋo yɛ̌ jʉ’ tà á mag, ńkábte ŋwà’ne, ńnáa mbwo nyìŋ gẅie à fa’a ndá ŋwɛ́, ésẅɛ́’, ńnéŋé ssé lékyagte. Pʉ̀a pie é laa *ndá cú’tè pú ńtÿɔ́g menÿɔ́g ná yá, ńně ńzẅí’te.

²¹ Á lêen ńké ńzye lékyagte, ńgɔ́ɔn ngie: Menò mie pi foo lé jú’u tsɛ̀ɛ ŋwà’ne Ssé lɛ é pumté lyɛ̌’ɔɔn.

²² Pɔ́ jú’u shwóŋè gie á kẅɛɛ ncwò yé, á gwɔ poŋo wɔ́b, ńgíŋe ne ńkʉ’ʉ wɔ́b, pɔ́ zye lézẅɛ́te, ńgɔɔn ngie: Wɛ̂ te míŋ Yesyɛ̂b wɔ́ le?

²³ Yěsô tsɔ́’ɔ mbwo pɔ́b ngie: Pi ge gÿo pɛ́’ɛ tà sag né mèŋ ngie: Angÿò meffo zoŋo twó mbùm yé, ńgie mmó gie mèŋ n ka gÿo Kapernawúm, n gíŋe ńgÿo jʉ̀’ɔɔn á lá’ peg, tá pi zẅíŋe wɔ̀ɔn.

²⁴ Yěsô gíŋe ńgɔɔn né pɔ́b ngie: Tà mèŋ n ké shwóŋó gẅi nénʉ́, mé ee ntě ńzẅíŋe nò *ntsẅì nkʉ̀ Ssé lá’ pɔ́b wɔ́.

²⁵ Tà mèŋ shwóŋó gẅí, kwà’ nénʉ́, á laa fʉ̀’ ye *Elîɛ, *ntsẅì nkʉ̀ Ssé, mepfɔ̌g pànzwě gwɔ́ tsɛ̀ɛ ngwòŋ pà Israel tɛ’. Mbʉ̀ŋ lá’ ńnéŋe ngù’ tá nê mesaŋ ntɔgɔ́ té lú, tà máamáa gwáŋa gwe tsɛ̀ɛ lá’a pà Israel ntsèm.

²⁶ Tá, e Ssé ké ńdá’ te túmo *Elîɛ mbʉ̀a tsɔ́ wɔb wɔ́, ńtsẅi, á kẅɛ ńgʉa pɔ́ ndá mpfɔ̌g manzwě Serepta á tsɛ̀ɛ ngwòŋ Sidoŋ.

²⁷ Á lá’ ńgwɔ́ nà fʉ̀’ ye *ntsẅì nkʉ̀ Ssé Elizé, megàŋ nkà’ pǎb gwɔ́ tsɛ̀ɛ ngwòŋ pà Israel tà ńgyɔ́ɔn, Elizé la ké tè gÿo tsɔ̌ tà’ ná pɔ́b zéŋe wɔ́, tà ńdí ndà’ Naaman nyìŋ Siria

²⁸ Pʉ̀a metsèm pie é laa *ndá cú’tè jú’ pú’u, lóŋ wɔb ffó.

²⁹ Pɔ́ pú ńdu ssé metsèm, ńgwoon Yěsô ńdɔgɔ yé fó tÿǒsoŋ, ńkẅɛ tà ńkúu nà twó lekwɔ’ɔ́, á jʉ’ gie mé la kwɛɛ tÿǒsoŋ yɔ́b wó, ńně fa’a letsó yé ḿma’a tsɛ̀ɛ kòon.

³⁰ Tá Yěsô tɔ́gɔ tsetsɛ̀ɛ pɔ́b, ńgʉa.

Yěsô gÿǒ tsɔ̌ nyìŋ gẅie e Ssé tepòŋ ee ná yé zéŋe

³¹ Yěsô gÿo pú’u, ńcwóŋ ńgʉa né Kapernawúm, á gwɔ́ tsɔ́ tÿǒsoŋ nà pàga ngwòŋ Galilea. *Alyɛ’ɛ́ nzsé yɔ́b kú’, á ne ńzí’i pʉ̀a nò Ssé.

³² Mé pu ḿmɔɔn ye ntí lezi’í pʉ̀a mmó, mélà’mie e Ssé la ne ńnáa yé metʉ̀ tá á lɔgɔ ńgɔɔn nò.

³³ Atsɔ̌ nyìŋ gwɔ́ yé *ndá cú’tè ŋwɛ́, tsɔ̌ *Ssé tepòŋ gwɔ́ ná yé, ńnéŋe tà ńtsóte yé, á lɔg ngyè tetʉ́ʉ ńně ńga’te ńgɔɔn ngie:

³⁴ Yěsô mûɔ Nǎzarɛd, pege gẅiin kɔ́? Ɔ̀ ka fɔ̌ɔn ńtó pɔ́ lépyága wég ka? Mèŋ n ne ńzsé ɔ́, ɔ̀ foo lejʉ́ŋ Ssé, ńgwɔ́ míŋ we.

³⁵ Yěsô cÿɔ́g yɛ̌ *ssé tepòŋ, ńgɔɔn né yé ngie: Láŋte, éfó ná nyìŋ wɛ ńkẅɛ. E *ssé tepòŋ yá sáa nyìŋ wá, ḿma’a ssé á tsetsɛ̀ɛ pʉ̀a, ńdêen ńké fó ná yé ńkẅɛ té gÿo mmó ná yé.

³⁶ Pʉ̀a metsèm lá gyá pú’u, ḿbú ńcÿɔ’, ńzye lésele ńzɛ́te tsetsɛ̀ɛ pɔ́b ngie: Ashwóŋè ndÿò wɔɔn áa pá’ɔɔn ńgwɔ́ lêkɔ́ lɛ? Á tʉ tʉ tà ńtsẅii nò mbwo *messé tepòŋ pɔ́ fóo ná nyìŋ ńkẅɛɛ!

³⁷ Lezíŋ sé léen ḿbú saa yɛ̌ pàga ngwòŋ.

Yěsô gÿǒ megàŋa gùɔ tà ńgyɔ́ɔn zeŋe

³⁸ Yěsô kẅɛɛ ndá cú’te, ńgee mbʉ̀a Símo, ńgwaa kúu wó, mbà tsɔ̌ ntʉ̀ nnɛ́ kà gwoon mákẅi’ Símo. Mé sẅíŋte Yěsô ngie à kẅéte yé.

³⁹ Á tó ńŋwé’e ngʉ̀ŋe kǔ, ńdɔg tʉ̀ ńgɔɔn nò, ennɛ́ jú’ ńzá’a. Mákẅi’ Símo ŋwɛ́ gwoon ńdu ssé, ńnyɛte shúm ńdɔg ńdye wɔ́b.

⁴⁰ Nzèm la gwaa síŋ, pʉ̀a pie megàŋa gùɔ ntí ntí laa mendá pɔ́b lɔ́gɔ wɔ́b ńtó. Yěsô zába mbwó ná wɛ̌wɛ̌ ngùɔ wɔ́, á sẅéte.

⁴¹ *Messé tepòŋ ne ńgwaa fóo nà lelÿò é kẅɛɛ, ńga’te ńgɔɔn ngie: Ɔ̀ɔ Míŋ Ssé. Tá’ Yěsô cÿɔ́gɔ wɔ́b, à tè zẅíŋ ngie pɔ́ gɔɔn nò wɔ́, mélà’mie pɔ́ la zsé ngie Yěsô aa *Nzà’nkÿo pù’ gẅie Ssé la ka’a mbwo pʉ̀a mesoŋ.

Yěsô tsẅǐ Nkʉ̀ Mbòŋo Jẅidea

⁴² Njÿó gÿo ńdʉ́a, Yěsô fó tÿǒsoŋ ńkẅɛ, ńně ńdɔgɔ ye nkwòŋo tsẅɛ ńgee, alá’ kẅɛ ńzye lémwoon jʉ’ fa’a yé, ńgyá yé, éfa’a lékú’te yé ngie tà á nyé wɔ́b, ńgʉa.

⁴³ Tá Yěsô gɔɔn né pɔ́b ngie: N gẅiin légíŋe ńgʉa nà metsɔ́ metÿǒsoŋ, ńtsẅi Nkʉ̀ Mbòŋo gẅie Ssé ka túmo wɔ̀ɔn ntẅǐ, légÿo pʉ̀a mesoŋ zsé ngie yɔɔn aa fʉ̀’ gie Ssé zyě lényɛ lefùɔ sé,

⁴⁴ ńgɔɔn pú’u, ńzye légiŋe tsɛ̀ɛ *mendá cú’tè pà Yuda, á tsɛ̀ɛ ngwòŋ Jẅidea ńtsẅii Nkʉ̀ Mbòŋo.