Lukase 3 - Nouveau Testament en Ngienboum

Jâŋ gɔ̌ɔn ngie pʉ̀a kúbe mà wɔb

^1-2 Jâŋ míŋ Sakarîɛ lá’ ńtsẅé nkwòŋo tsẅɛ tà Ssé túmo yé ngie à gʉa shwóŋó nò yé. Á gwɔ́ ngù’ ayɛ̌, mbà Kása Tibɛr gẅie à la ne sá’a ngwòŋo ngwòŋ, mbà à neŋé nà lʉŋ ngù’ ntsɔ̀b tʉ̀a lê legém. Ponte *Pilato á gwɔ́ ngúmnɔ́ɔn pàga ngwòŋ Jẅidea, *Herôd á né sá’a pàga ngwòŋ Galilea, afɛ̌ we Filib á ně sá’a Itẅiria pɔ́ Telakonid, Lisanias á ně sá’a Abilɛn. Ánɔ́ɔn pɔ́ Kaifa gwɔ́ *metándá pànùŋe pwɔ́’.

³ Jâŋ lêen ńké ńgʉa tsɛ̀ɛ melá’ mie ée nkʉŋ ntse Jurdeŋ, ńgiŋe sá’a mbwo lá’ ngie: Pɔ́ kúbe mà wɔb à nu’u wɔ́b ntse, e Ssé lege menò tepòŋ mɔ́b ńnáa mbwo pɔ́b.

⁴ Á lɔgɔ ńtswé’e nà nò gie Esǎya, *ntsẅì nkʉ̀ Ssé la ŋwe’e ngie: «Ngyè nyìŋ kwɔ̌’ fóo nkwòŋo tsẅɛ ńgɔɔn ngie: Pi nyɛte mánzsé Cʉ̀apʉ̀a, ńgÿo melyěen nzsé mé e tyé ndʉŋ ndʉŋ.

⁵ ńdẅíŋe mefú’ ntsèm mie ée mǒ, ńkwɔg mekwɛ́ lâ mekwɔ’ɔ́ ntsèm, ésiŋte meŋwɔ’ɔ́ nzsé e tyé ndʉŋ ndʉŋ, ńkwɔg melu’ú mie ée ná mánzsé ésaŋte

⁶ Tá à cʉa pú’u, pʉ̀a metsèm gyá pá’ Ssé ge gÿo pege tsẅɛ́».

⁷ Jâŋ gɔɔn pú’u, pʉ̀a tà ńgyɔ́ɔn ne ńtóo pá’ à ge nu’u wɔ́b ntse. Á ně ńgɔɔn né pɔ́b ngie: Ngẅɛ̀ mennú, pà pá’ legyè! Awɔ̌ zɔ pǐŋ shwóŋó gẅi lékÿo ngɔ́’ gie pi lyɛbté tà é ně ńgee ńgwé ná pi?

⁸ Pi kúbe pɔ́ mà, ńgÿo menò mbòŋo mie é nyɛɛ ngie pi kubé. Pi pɔ́ɔn lélɔg pɔ́ ndà’ ncwò gẅi ńgɔɔn ngie: Peg ee púɔ Ábalam. Tà mèŋ n ké shwóŋó gẅí: E Ssé ku’u lésele metóon pɔɔn ńdɔg ńgÿo ngẅɛ̀ Ábalam.

⁹ Mé ně ńzɔɔn ńdá’ ńkaa nzɔ́ɔn lélɔg ńkɔ́’ɔ yɛ̌ yɛ̌ tÿǒ wɔ́ gie á té ně ńzéme ntɔ̌ɔn mbòŋo wɔ́, éfoo Ssé kɔ́’ɔ yé ké ma’ pɔ́ mmɔ̌g.

¹⁰ Alá’ jú’, ńzɛ́te yé ngie: Tà á lɔɔn ńgwɔ́ pú’u, peg gǎ?

¹¹ Á tsɔ́’ɔ mbwo pɔ́b ngie: Nyìŋ gẅi lɔɔn ńgẅiin menzsǒ mémbʉ́a, á náa tà’ mbwo nyìŋ gẅie à zɔɔn tè tsɔ̌ gẅiin. Nyìŋ gẅie à gẅiin mmó mpfɛ̌, náa ye nyìŋ gẅie nzyè ne ńgyáŋa yé.

¹² *Pàkẅé ncùb pà Roma la tó yɔ́b pá’ mé ge nu’u wɔ́b ntse, ńzɛ́te ngie: Tsítsà, tà peg ge gÿo yég lêkɔ́?

¹³ Jâŋ tsɔ́’ɔ mbwo pɔ́b ngie: Pi kẅé ndà’ mmó gie *lepʉ̌ ne ńzɛ́te, tà pi kẅi’i.

¹⁴ Pàlÿɔ́’ ncù gíŋe ńzɛ́te yɔ́b ngie: Ńgʉa ná peg, peg ga? Á tsɔ́’ ngie: Tà pi lɔg metʉ̀ kà cÿɔ̌ nò wɔ́ ésẅɛ́ɛ nyìŋ ńkẅé nkáb ye. Pi zẅí’te pɔ́ ndà’ nkába fà’ gi.

¹⁵ Pá’ á la gwaa gwɔ́ alá’ ne ńzẅí’te *Nzà’nkÿo gẅie Ssé la ka’ la, awɔ̌wɔ́ɔ ně ńzɛ́te tsɛ̀ɛ ntʉ́m yé ngie: Kà Jâŋ lɔgɔ ńgwɔ́ pɔ́ yé wɔ́?

¹⁶ Tá á tsɔ́’ɔ mbwó pɔ́b metsèm ngie: Mèŋ n dêen ńgẅiin yɔ́ɔn pɔ́ ndà’ lénu’u gẅi tsɛ̀ɛ ntse. Tá tsɔ̌ ndÿò ne ńtóo; à cʉa wɔ̀ɔn tà mèŋ n tè ku’u lékyɛ́’ menkÿo melɔ̌ɔn mé wɔ́. À ge tó néŋ pʉ̀a mbwo Zẅìge Ndʉalʉ̌a, é néŋ pʉ̀a tsɛ̀ɛ mmɔ̌g.

¹⁷ À ge tó fÿɔ́g shúm sie mé pǔ’, é néŋ se mbòŋo nkìŋ, e cʉ́’ kʉ̀ŋe, à pÿɛɛ tsɛ̀ɛ mmɔ̌g gẅie é téen ńdá’a ḿbyé wɔ́.

¹⁸ Jâŋ ne shwóŋó nò Ssé pú’u, ńgíŋe ńnáa mentÿɔgɔ́ tà ńgyɔ́ɔn mbwo lá’.

¹⁹ Ńkag mbàa ngúmnɔ́ɔn *Herôd ńtí pá’ à la kaa *Herôdiad gẅie à laa nzwě métá we, ńgíŋ ńkaga yé ńtí tsɔ́ menò tepòŋ tà ńgyɔ́ɔn.

²⁰ *Herôd gwaa mege cÿɔb, ńtsẅi mé gwoon Jâŋ ḿma’a ndá tsǎŋ

Yěsô tǒ mé nu’u yé ntse

²¹ Jâŋ la ké ńgwɔ kú tsǎŋ, mbà á laa tsɔ́ lyɛ̌’, á nu’ pʉ̀a ntse tà é mag, Yěsô lêen ńké ńtó yé, á nu’u yé yé ntse. Á gwɔ́ tà ne ńgu’te Ssé, ncwò tÿǒ lepwó tsɔ́’ɔ ńtyé.

²² A Zẅìge Ndʉalʉ̌a sẅɛ́’, ńgwá’a kapʉŋ la, ńtyé ná ye, ngyè fóo tÿǒ lepwó ngie: Ɔ̀ɔ míŋ wɔ̀ɔn, mèŋ n kwoŋó gú tɛ’, ɔɔ wɔ̀ɔn lekág.

Pàmangʉanjʉ̀’ Yěsô

²³ Yěsô la gwɔ́ zye létsẅi Nkʉ̀ Mbòŋo, á cʉ́’ʉ méjʉ’ à gẅiin ngù’ móm tá, mé ne ńkwaŋa ngie aa míŋ Yesyɛ̂b. Yesyɛ̂b gwɔ́ míŋ Eli.

²⁴ Eli gwɔ́ míŋ Matad. Matad gwɔ́ míŋ Lěvi. Lěvi gwɔ́ míŋ Melshi. Melshi gwɔ́ míŋ Janay. Janay gwɔ́ míŋ Yesyɛ̂b.

²⁵ Yesyɛ̂b gwɔ́ míŋ Matatias. Matatias gwɔ́ míŋ Amos. Amos gwɔ́ míŋ Nawum. Nawum gwɔ́ míŋ Esli. Esli gwɔ́ míŋ Nagay.

²⁶ Nagay gwɔ́ míŋ Maad. Maad gwɔ́ míŋ Matatias. Matatias gwɔ́ míŋ Séméen. Séméen gwɔ́ míŋ Joseg. Joseg gwɔ́ míŋ Joda.

²⁷ Joda gwɔ́ míŋ Joanaŋ. Joanaŋ gwɔ́ míŋ Résa. Résa gwɔ́ míŋ Zorobabel. Zorobabel gwɔ́ míŋ Salatiɛl. Salatiɛl gwɔ́ míŋ Neri.

²⁸ Neri gwɔ́ míŋ Melshi. Melshi gwɔ́ míŋ Adi. Adi gwɔ́ míŋ Kosam. Kosam gwɔ́ míŋ Elmandam. Elmandam gwɔ́ míŋ Er.

²⁹ Er gwɔ́ míŋ Yěsô. Yěsô gwɔ́ míŋ Eliezɛr. Eliezɛr gwɔ́ míŋ Jorim. Jorim gwɔ́ míŋ Matad. Matad wɔ̀ míŋ Lěvi.

³⁰ Lěvi gwɔ́ míŋ Simeon. Simeon gwɔ́ míŋ Jẅida. Jẅida gwɔ́ míŋ Yesyɛ̂b. Yesyɛ̂b gwɔ́ míŋ Jonam. Jonam gwɔ́ míŋ Eliakím.

³¹ Eliakím gwɔ́ míŋ Méléa. Méléa gwɔ́ míŋ Mena. Mena gwɔ́ míŋ Matata. Matata gwɔ́ míŋ Nataŋ. Nataŋ gwɔ́ míŋ Ndavíd,

³² Ndavíd gwɔ́ míŋ Jesé. Jesé gwɔ́ míŋ Obed. Obed gwɔ́ míŋ Booz. Booz gwɔ́ míŋ Sala. Sala gwɔ́ míŋ Naason.

³³ Naason gwɔ́ míŋ Aminadab. Aminadab gwɔ́ míŋ Admin. Admin gwɔ́ míŋ Arni. Arni gwɔ́ míŋ Esrom. Esrom gwɔ́ míŋ Fares. Fares gwɔ́ míŋ Jẅida,

³⁴ Jẅida gwɔ́ míŋ Yakwɔ́b. Yakwɔ́b gwɔ́ míŋ Esâg. Esâg gwɔ́ míŋ Ábalam. Ábalam gwɔ́ míŋ Tara. Tara gwɔ́ míŋ Nashor.

³⁵ Nashor gwɔ́ míŋ Serug. Serug gwɔ́ míŋ Rago. Rago gwɔ́ míŋ Faleg. Faleg gwɔ́ míŋ Heber. Heber gwɔ́ míŋ Sala.

³⁶ Sala gwɔ́ míŋ Kaynam. Kaynam gwɔ́ míŋ Arfazad. Arfazad gwɔ́ míŋ Sem. Sem gwɔ́ míŋ Noá. Noá gwɔ́ míŋ Lameg.

³⁷ Lameg gwɔ́ míŋ Matusala. Matusala gwɔ́ míŋ Henɔg. Henɔg gwɔ́ míŋ Jarɛd. Jarɛd gwɔ́ míŋ Malélél. Malélél gwɔ́ míŋ Kaynam.

³⁸ Kaynam gwɔ́ míŋ Enos. Enos gwɔ́ míŋ Sɛd. Sɛd gwɔ́ míŋ Adam. Adam gwɔ́ gẅie Ssé la pwóon ye.