Lukase 19 - Nouveau Testament en Ngienboum

Yěsô pɔ́ Sakîo

¹ Yěsô kúu Yériko, ńně ńzyɛ́’ɛ tÿǒsoŋ,

² atsɔ̌ nyìŋ kẅɛ, lezíŋ sé gwɔ́ le Sakîo, á gwɔ́ tá ndá pàkẅé ncùb pà *Roma, ńgwɔ́ ngàŋa mmó tɛ’.

³ Á kẅɛ pú’u, ńně fá’a légyá yé nyìŋ gẅie Yěsô aa wɛ̌, tá à tè ne ńgyá shÿó wɔ́, mélà’mie à laa tetu’u nyìŋ, alá’ piŋ ńgwɔ́ nzèm Yěsô tɛ’.

⁴ Á kÿote ńgʉa mvfò, á nà shÿó gẅie Yěsô lɔ̌ɔn nge cʉa mǒ, ńkwɔ́’ ńzébe nà tsɔ́ tÿǒ, ḿbyɛ́b pá’ à ge gwaa cʉa à gyá yé.

⁵ Yěsô gʉa tà ńkúu jʉ’ó, ḿbʉ’ʉ twó yé ńdíe yé, ńgɔɔn ngie: Lwo sẅɛ́’ me Sakîo, á poŋ ngie, n dá’ pɔ́ ndá gù lyɛ̌’ɔɔn.

⁶ Sakîo gwôon sẅɛ́’, ńtyé ssé, ńdɔgɔ lékág ńkúe Yěsô.

⁷ Alá’ la gyá pá’ pɔ́ ye gee, ńzẅɛ́te ngie: A gẅie à gee ndá nyìŋ tepòŋ ńda’a lɛ.

⁸ Pɔ́ ye gÿo ńgwɔ́ ndá, Sakîo tyé mvfò ye ńgɔɔn ngie: Cʉ̀apʉ̀a, mèŋ n ge gabte shúm sɔ́ɔn nzsè pʉ́a, é náa tà’ nzsè mbwo pàtèmmó, ńgwɔ́ gie n dǎ lɔgɔ gáte ńkẅé mmó nyìŋ, mbà mèŋ n ge tsɔ́’ náa mbwo ngàŋ ngʉ̀a lekùa.

⁹ Yěsô jú’, ńgɔɔn ngie: E Ssé gÿǒ yɔɔn tsìŋe ndá pú ńtsẅɛ́ lyɛ̌’ɔɔn, mélà’mie Sakîo giŋé ńgwɔ́ yé tsɔ̌ míŋ Ábalam!

¹⁰ *Míŋ Nyìŋ la zɔɔn ńtó pɔ́ léfa’ pʉ̀a pie pɔ́ la kúu pyé, é gÿo pɔ́ tsẅɛ́.

Esagá nò nà megàŋa fà’ métá

¹¹ Yěsô ne ńgɔɔn nò, alá’ ne ńzẅí’te tà ńgwóon ńně ńkwaŋa ngie *lefùɔ Ssé é ge gwóon tó pɔ́ fʉ̀’ó, ńzɔɔn ńgwaa gwɔ́, mbà à gʉ̌a tà ńcʉ́’ n gee pɔ́ lékúu Yerósalem. Yěsô lɔg sagá nò ńgɔɔn né pɔ́b ngie:

¹² Atsɔ̌ mûɔ ntɔ́’ lǎ’ ńdu ssé ńgʉa tàa túm pá’ mé ge lɔgɔ yé gÿo fùɔ ntÿɔ́’ tá à piŋ nzèm, ésá’a yé pàga lá’.

¹³ Á gwaa gʉa, ńtóŋ megàŋa fà’ pé legém, ńnáa pàga nkáb gie áa tʉ̀ nzẅìŋ mbwo wɔ̌ɔwɔ́ɔ, ńgɔɔn né pɔ́b ngie: Pi cʉ́’ ńně ńtáŋa nkáb yɛ̂ tà mèŋ n dá’ ḿbiŋ,

¹⁴ ńdeen ńké ńgʉa. Tá’, pà lá’ apɛ̌, lɔg pá’ pɔ́ lɔ́ɔn ḿbʉa yé pʉa, ńtúm pʉ̀a jʉ’ gie à gee lê wó, ńgie pɔ́ gʉa ńgɔɔn ngie: Peg tè ne ńkwoŋo ngie nyìŋ wɛ̂ sá’a wég wɔ́.

¹⁵ Tá á gʉa tà ńkúu wó, mé ke ńdɔgɔ yé ńgÿo pɔ́ fùɔ, á piŋ nzèm fʉ̀’ɔɔn, ńtóŋ megàŋa fà’ pé pie à la ná ntà metʉ̌a mbwo pɔ́b la, légwɔ́ gie pɔ́ ge shwóŋó yé pá’ pɔ́ ka cʉ̌’ ńtáŋ tà é gwɔ́ pú’u.

¹⁶ Andùŋ mvfò tó, ńtyé mvfò yé ńgɔɔn ngie: Zɔɔn múɔ, n tǎŋ nkáb gie ɔ̀ la ná né mèŋ la, tà njÿó pàg legém.

¹⁷ Áfùɔ tsɔ́’ ngie, áa mboŋ, ɔɔ ngàŋa fà’ we mbòŋo. Pá’ ɔ̀ pɔ̌ɔn múɔ mémmó mboŋó la, mèŋ n ge ná metÿǒsoŋ legém ɔ̀ ne sá’a.

¹⁸ Ambɔ́ɔntè tó yé ńgɔɔn ngie: Ankwɔbɔ́, n tǎŋ nkáb gie ɔ̀ la ná né mèŋ la, tà ńjÿó pàg sétʉ̀a.

¹⁹ Afùɔ tsɔ́’ɔ mbwo yé ngie: Á gʉa ná gù, mbà mèŋ n dɔgɔ́ gú ńgÿo ngúmnɔ́ɔn gẅie ɔ̀ ge sá’ metÿǒsoŋ méntʉ̀a.

²⁰ Wetsɔ̌ tó ńgɔɔn ngie: Metʉ̌a, tà’a pàga nkáb gù wá wɔɔn, n da lɔgɔ mmó nzsǒ ńkwɛ́ ńde’e.

²¹ Ńzɔɔn ńde’e pú’u, pɔ́ mélà’mie n da ne ḿbɔ́gɔ gú pɔ̌g, ɔɔ nyìŋ ńcÿɔ́g tɛ’, ɔɔ ḿbíi mmó pɔ́ jʉ’ gie ɔ̀ kà tè wó nuŋe, ḿbiŋe ńkába mmó gie ɔ̀ kà tè pye.

²² Afùɔ tsɔ́’ɔ mbwo yé ngie: Ɔɔ nyìŋ gẅie a fa’a fa’ we tepòŋ, n ge lɔg pɔ́ ncwò ɔ́ ŋaga gú. Ɔ̀ la zsé ngie mbàŋa nò yɔ̀ɔn tʉ tɛ’, ngie mèŋ n gee ḿbíi mmó jʉ’ gie mèŋ n da tè wó nuŋe, ńtsɔ́’ɔ shúm jʉ’ gie n da tè wó pye.

²³ Mélà’a kɔ́ ɔ̀ la tè néŋ nkáb yɔɔn mbâŋ, á jʉ’ gie mèŋ n ge gwaa tó kẅé, apì zébe mǒ wɔ́?

²⁴ Ńdeen ńké ńgɔɔn mbwo pʉ̀a pie é laa jʉ’ó ngie: Pi gwoon yé, ńkẅé ye nkáb, ńnáa mbwo nyìŋ gẅie à jÿǒ legém.

²⁵ Pɔ́ zoŋ ngie: Metʉ̌a, à ně ńdá’ ńgẅiin legém!

²⁶ Afùɔ tsɔ́’ ngie: Mèŋ shwóŋó gẅí, nyìŋ lɔɔn ńkag tʉ̀ tà ńgẅiin mmó, mbà mé ge kẅi’i. Tá nyìŋ ké tè kag tʉ̀ wɔ́, mbà mé ge fóo mbwo yé kẅé mbàa méjʉ’ gẅie à gẅiin.

²⁷ Á gʉa ná megàŋ mbù pɔ́ɔn, epʉ̀a pá pie pɔ́ ka ne ńdʉ’ʉ ngie mèŋ n tè gwɔ́ fùɔ wɔb wɔ́ la, pi lɔgɔ wɔ́b ńtóo jʉ’ɔɔn, ńgwaa wɔ́b mvfò mèŋ.

Yěsô kǔ Yerósalem

²⁸ Yěsô gɔɔn yɔɔn sagá nò mbwo lá’ tà ḿmag, ńcʉa ńgwɔ́ mvfò, ńně ḿbʉʉ né Yerósalem.

²⁹ Ńgʉa tà ne ńkúu lepàa Mbedfajé pɔ́ Mbetáni, á ngʉ̀ŋe lekwɔ’ɔ́ metÿǒ mèvɛ olive, ńtúm *ngàŋa kwò yé yépʉ́a,

³⁰ ńgɔɔn né pɔ́b ngie: Pi gʉa tsɛ̀ɛ lá’ yɛ̂ gie áa mvfò pi lɛ. Pi ge kúu wó gyá múɔ nzikáse gẅie mé ně ńcʉŋ, e gwɔ́ gie nyìŋ laa mǒ ńnéŋe. Pi kyɛ́’ ńdɔg ńtó.

³¹ Pi lɔɔn ne ńkyɛ́’ɛ, nyìŋ zɛ́te gẅi ngie pi kyɛ’ɛ nzikáase yɛ mélà’akɔ́ wɔ́? Pi tsɔ́’ ngie Andè zɔ ne ńtsɔ́ɔn.

³² Epʉ̀a pie à tumó wɔ́b leen ńgʉa tà ńkúu wó, ńgyá kɔ̀ɔkɔ́ɔ gwɔ́ pɔ́ pá’ Yěsô ně shwóŋó wɔ́b.

³³ Pɔ ne ńkyɛ́’ɛ megàŋ nzikáase ŋwɛ́ gɔɔn ngie: Pi kyɛ́’ɛ mûɔ nzikáase yɛ̂ mélà’a kɔ́?

³⁴ Pɔ́ tsɔ́’ ngie: Andè zɔ ne ńtsɔ́ɔn.

³⁵ Pɔ́ lɔg nzikáasè ńtó tà ńkúu lejʉ́ŋ Yěsô, ńzáb menzsǒ fÿɔ́g mɔ́b nkà’ ye, ńgÿo á kwɔ́’ ńnéŋe ndùmó.

³⁶ Yěsô ne ńgee, epʉ̀a ne saŋte menzsǒ mɔ́b ndùm mánzsè, á gíŋe ndùmó.

³⁷ Á gʉa tà ne fóo lekwɛ́ metÿǒ olive ńcwoŋo, *ngàŋa kwò yé gie é laa nzèm ye tà ńgwɔ́ pɔ́ lá’ zye lékág, ńdɔg ngyè tetʉ́ʉ ńgu’te Ssé nà menò mmɔɔn mmɔɔn mie pɔ́ lǎ gyá Yěsô gÿo,

³⁸ ńně ńgɔɔn ngie: Mbʉ́lè gwɔ́ ne fùɔ gẅie à tóo nà lezíŋ Cʉ̀apʉ̀a. e Ssé ee tÿǒ lepwo ńgwɔ́ ngàŋ mbʉ́lè, agù’te gwɔ́ mbwo yé gẅie aa tàa tÿǒ lepwó.

³⁹ Tsɔ́ pà *farisay pie é laa yɔ́b jʉ’ó, fóo nùɔ lá’, ńgɔɔn né Yěsô ngie: Tsítsà, gÿo *ngàŋa kwò ɔ́ láŋte!

⁴⁰ Yěsô tsɔ́’ ngie: Mèŋ shwóŋó gẅí: Pɔ́ lɔɔn ńdáŋte, mbà metóon ge pége jʉ’!

⁴¹ Yěsô gʉa tà ne ńkúu Yerósalem, ńdíe tÿǒsoŋ ńzye lélʉa,

⁴² ńně ńgɔɔn ngie: Pi pà Yerósalem, pi ee lyɛ̌’ɔɔn, pi tè ne ńzsé mmó gie ńgwɔ́ á náa gẅi mbʉ́lè wɔ́, á ké yɛ̂, mbà á lyěen menÿɔ́g pi lɛ.

⁴³ Atsɔ́ fʉ̀’ ge gÿo gwɔ́, megàŋ mbù pí tó, ńkwɛ́ nká’ ńdɔg ńkíle gẅí, éfóo meshÿó meshÿó tó nẅé’e gẅí.

⁴⁴ Pɔ́ ge gÿo tó, é gwɔ’ɔ gẅi lâ gubé gí ntsèm, é gíŋe tágte tÿǒsoŋ gí tà pɔ́ le nyé tóon á gíŋe ńzɛ́be nà tsɔ̌ wɔ́. Á zɔɔn ńgwɔ́ pú’u, mélà’mie pi kaa zsé fʉ̀’ gie e Ssé too légÿo nò mbòŋo ná pi wɔ́.

Yěsô ne ńjwoŋo pà táŋa metʉ̌a tsɛ̀ɛ jʉ’ʉ Ssé

⁴⁵ Yěsô fóo jʉ’ó, ńgʉa tà ńkúu tsɛ̀ɛ *jʉ’ʉ Ssé, ńzye létág pàsẅiŋ shúm,

⁴⁶ ńně ńgɔɔn né pɔ́b ngie: Áa tsɛ̀ɛ ŋwà’ne Ssé, e Ssé gɔɔn ngie: «Ndá yɔ̀ɔn ge gÿo gwɔ́ ndá sẅíŋtè. Tá pi léen sele ńdɔg ńgÿo nkʉ̀a metsǒŋ».

⁴⁷ Yěsô piŋ ńgwɔ́ lyɛ̌’ ntsèm, ńně ńgwɔ́ pɔ́ tsɛ̀ɛ *jʉ’ʉ Ssé ńzí’i pʉ̀a nò Ssé, *metándá pànùŋe pwɔ́’, pâ *pàkyàgte lepʉ̌ Mǒsê mbàa *mekěm pà Yuda ne fa’a shÿó légÿo mé zẅé yé.

⁴⁸ Tá fá’ shÿó kékáŋ, mélà’mie alá’ ntsèm la ne ńtéŋe letwoŋó tɛ’ ńzẅí’te nò gie Yěsô gɔɔn.