Lukase 16 - Nouveau Testament en Ngienboum

Esagá nò nà ngàŋa fà’ gẅie à la pá’ legyè

¹ Yěsô gíŋe saga mbwo *ngàŋa kwò yé ngie: Atsɔ̌ ngàŋa mmó lǎ’ ńgẅiin ngàŋa fà’ gẅie à pǔ ńdíe shúm sé ntsèm. Mé fó lyɛ̌’ shwóŋó yé ngie à ngàŋa fà’ ŋwɛ́ cʉ’ʉ́ ńcʉŋte shúm sé cʉŋte.

² Á tóŋo yé ńzɛ́te yé ngie: N jǔ’ mé gɔɔn ngie ɔ̀ cʉ’ʉ́ ńgÿo pɔ́ lêkɔ́ lɛ? Pʉ́le sáŋ shúm sie n da cʉ́me mbwo gù éshwóŋó wɔ̀ɔn. Mèŋ, n cʉ’ʉ́ ńnyé ńkwoŋo ngie ɔ̀ líe shúm sɔ́ɔn mɔ́.

³ Ngàŋa fà’ ŋwɛ́ jú’ ńkwaŋte ngie: Mèŋ n ge gÿo lêkɔ́ pá’ tá fà’ wɔ̀ɔn gee njwǒŋ mèŋ lɔɔn? N dɔɔn ngie n ge jʉ́’ ngwóŋ, n dɔg tʉ̀ nzɔ̌? Ńcʉ́’ʉ ngàŋ ndúɔ, mbà á ge gwɔ́ nò shʉ́ ná mèŋ.

⁴ Ńńnéŋe tà ńgɔɔn ngie: N zsě pá’ mèŋ n ge gÿo tà fʉ̀’ gie mé kẅilé wɔ̀ɔn nà fà’ la, epʉ̀a kúe wɔ̀ɔn membʉ̀a mɔ́b,

⁵ ńgÿo pú’u, ńtóŋo wɔ̌wɔ́ɔ gẅie à la gẅiin létoŋ njǔ mbwo tá fà’ we, ńzɛ́te mvɔ́g mvfò ngie, ɔɔ pá’a ńgẅiin láa gẅie ɔ̀ ge náa mbwo tá fà’ wɔ̀ɔn?

⁶ Á gɔɔn ngie n gẅiin léná mèvɛ kúm nkÿo, ngàŋa fà’ gɔɔn ngie: Ŋwà’ne gie ɔ̀ la ŋwe’e á yɔɔn, ńcʉ́’ ŋwe’e pɔ́ móm ntʉ̀a fʉ̀’ɔɔn.

⁷ Ńgɔɔn mbwo tsɔ̌ nyìŋ ngie: Ɔɔ pá’a ńgẅiin láa gẅie ɔ̀ ge náa mbwo tá fà’ wɔ̀ɔn? Á gɔɔn ngie: ngesáŋ ntsíŋ pɔ̀ɔn nkÿo. Á gɔɔn ngie: Ŋwà’ne jú yɔɔn, ńŋwe’e móm lefɔ̌ɔn fʉ̀’ɔɔn.

⁸ Tá fà’ gÿo ńgyá ntí gie ngàŋa fà’ we lɔ̌g ḿbá’ legyè pú’u, ńcʉ́’ ńzẅíŋ zẅíŋ ngie legyè sé ée wó. Yěsô ma’a twó ngie: Áa nénʉ́ ngie pʉ̀a njÿó yɔɔn zsé lépá’ legyè ńdɔg ńtáŋte menò tsetsɛ̀ɛ pɔ́b, ńtɔ́g pʉ̀a pie é záb ntʉ́m wɔ́b nà Ssé.

Á té poŋ ngie nkáb zɔ ne sá’a pʉ̀a pie ée nzèm Ssé wɔ́

⁹ Yěsô ma’a twó ngie: Pi lɔg gí shúm se yɔɔn tèpòŋ njÿó, ńkúu kwà’ shǔ gẅie é tsẅé té mì, à lá’ ńtyé fʉ̀’ gie sɛ̌ shúm ŋwɛ́ té nyé wó wɔ́, e Ssé lɔgɔ gẅi ńgʉa lá’ ye, pi tsẅé ńgwɔ́ wó.

¹⁰ Mé lɔɔn ńcʉ́me mûɔ mémmó mbwo nyìŋ, á pɔ́ɔn mboŋó, mbà á ge tó gwɔ́ gie á gyɔ́ɔn, à gíŋe ḿbɔ́ɔn pɔ́ pú’u, ńcʉ́me mûɔ mémmó mbwo nyìŋ à tè pɔ́ɔn mboŋó wɔ́, mbà á ge tó gwɔ́ ye lÿò á le pɔ́ɔn mboŋó wɔ́.

¹¹ Pi lɔɔn tè ku’u lépɔ́ɔn shúm se yɔɔn njÿó ye tepòŋ wɔ́, mbà à lɔɔn ńgwɔ́ wɔ̌ cʉ́me kwà’ shúm se tʉ̀ nzẅìŋ mbwo pi?

¹² Pi lɔɔn tè zsé lépɔ́ɔn mmó nyìŋ ndyɛ̀’ɛ wɔ́, mbà wɔ̌ ge lá’ náa gie áa kwà’ gí mbwo pi?

¹³ À lɔɔn ńgwɔ́ tsɔ̌ ngàŋa fà’ a le fa’a mbwo metá fà’ mépʉ́a wɔ́. À gÿo pú’u, mbà à ge pʉ̀a tsɔ̌, é kwoŋo tsɔ̌, ńké tè pú’u wɔ́, mbà à ge jú’ ncwò wetsɔ̌, é piŋ gwága wetsɔ̌. À lɔɔn ńgwɔ́ pi le ne ńzába ntʉ́m nà Ssé, ńgíŋe ne ńzába nà nkáb wɔ́.

Pà farisay kwoŋ nkáb ńcʉa nò Ssé

¹⁴ Yěsô gɔɔn pú’u, pà *farisay pie é laa jʉ’ó jú’, ḿbú sóon, ńgẅe yé, mélà’mie pɔ́ gɔ’ nkáb tɛ’.

¹⁵ Á gɔɔn mbwo pɔ́b ngie: Pi pɛ̂, pi zɔ̌g ḿbab pʉ̀a ngie pi ee pʉ̀a mbòŋo, tá’, e Ssé ké ńne ńzsé pá’ letʉ́m sí ée pú’u. Pi zsé ngie: Anò gie pʉ̀a mesoŋ gyá ngie áa nò tɛ’, áa mvfò Ssé ńgwɔ́ nò shʉ́.

Lefùɔ Ssé cʉa mbʉ̌ me fʉ̀’ʉ mvfò

¹⁶ Yěsô gíŋe ńgɔɔn ngie: Jâŋ ka gwaa tó, mé ne ńjú’u pɔ́ mbʉ̌ Mǒsê, pɔ́ menò *pàntsẅì nkʉ̀ Ssé, mé ée fʉ̀’ɔɔn ńne ńtsẅii Nkʉ̀ Mbòŋo ńdɔgɔ́ ḿbÿé ngie *lefùɔ Ssé zyě létó. Awɔ̌wɔ́ɔ ne ńkaga tʉ̀ lézẅíŋ ngie Ssé zɔ cʉ’ʉ́ sá’a yé.

¹⁷ Tá n ké tě ńdɔgɔ ńgɔɔn ngie *lepʉ̌ Mǒsê mǎg wɔ́, lefaŋ pɔ́ tsetsá’ ge lá’ mag tá á le tʉ, à lɔɔn ńgwɔ́ múɔ mélǎga nò lê pilé, á le lá’ ḿbyé nà *lepʉ̌ Mǒsê wɔ́.

¹⁸ Áa pú’u, tá mèŋ n dɔgɔ ńgɔɔn ngie: Nyìŋ lɔɔn ńjwoŋo nzwě we, ńzɔ́’ɔ tsɔ̌, mbà pɔ́ wéwɛ̌ gwɔ́ pɔ́ nà nò gÿɛ́. Nyìŋ gẅie à pǐŋ ńzɔ́’ɔ manzwě gẅie ndǔm we jwoŋó yé, mbà à gÿó pɔ́ gÿɛ́.

Esagá nò ná nò ngàŋ nkáb pɔ́ Nǎzalo

¹⁹ Yěsô gíŋe ńgɔɔn ngie: Tsɔ̌ ngàŋ nkáb lǎ’ ńgwɔ́ wó, ńnéŋe ḿma’a menzsǒ mie é poŋ, ḿbiŋ ńcÿɔ́g nkáb tɛ’, ńgwɔ́ lyɛ̌’ ntsèm, ńjÿó yé pɔ́ línɔ́ɔn.

²⁰ Atsɔ̌ mbóŋ gwɔ́ yé wó, lezíŋ sé gwɔ́ le Nǎzalo. Mefʉ̌ŋ pú ńgwɔ́ ná yé tɛ’, á nuŋe ncwò ndá ngàŋ nkáb ŋwɛ́,

²¹ ńně ńtsɔ́ɔn ngie kà à lɔɔn ńgwɔ́ ngàŋ nkáb pfɛ́ɛ mmó tà mé gwá’a pfwɔ́’, á lagte wɔ́, tá’, ńnuŋe jʉ’ó, ngwé zɔ̌ ne ńtóo ńdaŋa mefʉ̌ŋ mé.

²² Ngàŋ ngɔ́’ gÿo ńkwé, *mecÿɔ́’ Ssé tó ńkaa yé, ńgʉa ńnéŋe lejʉ́ŋ Ábalam. Ngàŋ nkáb gÿo ńkwé yé, mé kaa yé ńtúŋ.

²³ Á kúu lá’ mepfó, ḿbú ne ńgyá ngɔ́’ tɛ’, ḿma’ lejÿɔ́g ngʉ̀a shʉ̀shʉ̀a, ńgyá Ábalam, Nǎzalo ńnéŋe lejʉ́ŋ ye.

²⁴ Ngàŋ nkáb zye léga’te ngie: Tá wɔ̀ɔn Ábalam, tsɔ́ɔn mezìŋe mɔ́ɔn, ńtúmo Nǎzalo, à cÿɔ’ɔ múɔ tepwó we á nà ntse ńdɔg ńtó, ńcʉ́me nà lʉ́m yɔ́ɔn. Á nue m bǔ ńne ńgyá ngɔ́’ tsɛ̀ɛ mmɔ̌g wɔɔn tɛ’.

²⁵ Ábalam tsɔ́’ɔ mbwo yé ngie: Míŋ wɔ̀ɔn, kímte pá’ ɔ̀ ka nyé tsɛ̀ɛ njÿó ńgwɔ́ tsɛ̀ɛ fù’, Nǎzalo ne ńgyá ngɔ́’, á piŋ ńgwɔ́ fʉ̀’ɔɔn, Nǎzalo gwɔ́ tsɛ̀ɛ fù’, ɔ̀ ne ńgyá ngɔ́’.

²⁶ Á zɔɔn ńgwaa gwɔ́, máamáa sém gwɔ́ tsetsɛ̀ɛ pege, tà ńgwɔ́ gie nyìŋ lɔɔn fó jʉ’ɔɔn éfa’a légʉa jʉ’ɛ, á le ku’, éfó jʉ’ɛ fa’a létóo jʉ’ɔɔn, á le ku’.

²⁷ Ngàŋ nkáb gɔɔn né yé ngie: Tá wɔ̀ɔn, e sẅiŋte gú, ńdyɛ́’ ɔ̀ túmo Nǎzalo, á gʉa mbʉ̀a peg.

²⁸ Á nue mefɛ́ pɔ́ɔn pe mbàŋa ée mbʉ̀a métʉ̀a. Mèŋ n tsɔ́ɔn ngie Nǎzalo piŋ ńkága tuŋó yɔ́b, ńnáa wɔ́b ntÿɔ́gɔ́ ḿbɔ́gɔ pá’ pɔ́ ge lá’ gíŋe tó kú yɔ́b tsɛ̀ɛ yɔɔn jʉ’e ngɔ́’.

²⁹ Ábalam tsɔ́’ɔ mbwo yé ngie, mefɛ́ pú gẅiin ŋwà’ne Mǒsê, ńgíŋe ńgẅiin me *pàntsẅì nkʉ̀ Ssé. Pɔ́ jú’ ntÿɔgɔ́ gẅie ée tsɛ̀ɛ wó.

³⁰ Ngàŋ nkáb gɔɔn ngie: Ngǎŋ, mbà tá wɔ̀ɔn Ábalam, áa nò tá’, nyìŋ lɔɔn fó lá’ mepfó ḿbiŋ ńtó shwóŋó wɔ́b, mbà pɔ́ ge jú’, é kúbe mà wɔ́b.

³¹ Tá Ábalam gɔɔn né yé ngie: Pɔ́ lɔɔn tè jú’u shwóŋè Mǒsê mbɔɔ ye *pàntsẅì nkʉ̀ Ssé wɔ́, mbà nyìŋ zɔɔn ńzím zím, ńtó shwóŋó wɔ́b pɔ́ kɔ́ wɔ́, pɔ́ le zẅíŋ.