Lukase 15 - Nouveau Testament en Ngienboum

Esagá nò nà njʉ̀njÿò gie mé la gíŋ ńgyá

¹ *Pàkẅé ncùb pà Roma lâ petsɔ́ pʉ̀a pie mé lɔ́ɔn ńkʉ́e wɔ́b ne ńtóo metsèm, á lejʉ́ŋ Yěsô lé jú’u nò yé.

² Pà *farisay pâ *pàkyàgte lepʉ̌ Mǒsê gyá pú’u, ńné ńzẅɛte tsetsɛ̀ɛ pɔ́b ńgɔɔn ngie: Nyìŋ wɛ ne ńkúe pʉ̀a tepòŋ tà pâ pɔ̌ teme shúm ńjÿó.

³ Yěsô lêen ńké saga mbwo pɔ́b ngie:

⁴ Nyìŋ gẅi lɔɔn ńgẅiin *njʉ̀njÿò ye nkÿo, ńgʉa tsẅɛ ḿpféle, tà’ pyé, mbà à ge gǎ? Mbà à tè nyé yetsɔ́ ntsɔ̀b lepfwɔ’ɔ́ lê móm lepfwɔ’ɔ́, é gʉa fa’ gie e pyě tà gyá wɔ́?

⁵ À ge fa’ tà gyá, é pú kág, é kaa zába mekẅí yé,

⁶ é lɔg piŋ tà kúu mbʉ̀a, é tóŋ meshǔ pé mbɔɔ ngàŋ nkwɔ’ɔ́ mbʉ̀a, é gɔɔn né pɔ́b ngie: Pege kág ńtí pá’ n gyǎ *njʉ̀njÿò yɔ̀ɔn mie e kà pyě.

⁷ Áa pú’u, tá mèŋ shwóŋó gẅí: Tà’ ngàŋ mefʉ̀a lɔɔn ńkúbe mà we, mé kága tÿǒ lepwó tɛ’, ńcʉa pá’ à lɔɔn ńgwɔ́ mé kága ná pʉ̀a ntsɔ̀b lepfwɔ’ɔ́ lê móm lepfwɔ’ɔ́ pie pɔ́ gyǎ ngie pɔ́ ée nénʉ́ tà ńgwá ńgwɔ́ pɔ́ le kúbe mà wɔb wɔ́.

Esagá nò ná pàga nkáb gie manzwě la gíŋ ńgyá

⁸ Pi gíŋe ńjú’u tsɔ́, manzwě lɔɔn ńgẅiin nkáb ye pàg legém, tà’a pàg pyé, mbà à ge gǎ? Mbà à tè lyɛɛ lâm, é jÿɔg ndá, é ta’ kʉ̀ŋe, é pʉ́le fa’ tà lá’ gyá wá?

⁹ À ge gyá, é tóŋ mesǒ pé mbɔɔ ngàŋ nkwɔ’ɔ́ mbʉ̀a, é gɔɔn né pɔ́b ngie: Pi tó pege kág ńtí pá’ n gyǎ pàga nkáb yɔ́ɔn gie á ka pyě.

¹⁰ Tà mèŋ shwóŋó gẅí: Á gíŋe ńgwɔ́ pɔ́ pú’u, *mecÿɔ́’ Ssé kág ńtí tà’ nyìŋ tepòŋ wémɔ’ɔ́ gẅie à kubé mà we.

Esagá nò ná múɔ gẅie tá we la gíŋe ńgyá yé

¹¹ Yěsô gíŋe ńgɔɔn ngie: Atsɔ̌ mámbàŋa lǎ’ ńgẅiin gubé yé mbàŋa yépʉ́a.

¹² We nkʉ́ ńnéŋe tà ńgɔɔn né yé ngie: Tɔ̌ɔnmé, gʉa nà shúm ségè, ńná wɔ̀ɔn tÿɔgɔ́ fʉ̀’ɔɔn. Tá we fó ńdɔg shúm sé ńgaba wɔ́b mépʉ́a,

¹³ é gwaa cʉa lyɛ̌’ shÿɔ́’ɔ tsɔ́ wɔ́, múɔ wá sẅiŋ sé shúm, ńdɔg nkáb ńgʉa lê túm, ńkúu zɔ́gɔ tepòŋ, ḿbú ńcʉŋte nkáb ya,

¹⁴ ńcʉŋte nkáb tà é gwɔ mag, gwáŋa gwe tsɛ̀ɛ wɛ̌ ngwòŋ. Á zye lézága ye mpfɛ̌.

¹⁵ Ńtebe tà ńgʉa ńkúu fà’ mbwo tsɔ̌ nyìŋe lá’ ŋwɛ́. Á túmo yé nká’ lépyɛ́b mekúnɔ́ɔn.

¹⁶ Á gʉa ne ḿbyɛ́bɛ, ńnéŋe té pfɛ́ɛ mmó, nzyè pú ńgyáŋa* yé, tà á tsɔ́ɔn shúm mekúnɔ́ɔn, tá nyìŋ tè tsoon fùbe nà shúm mekúnɔ́ɔn né yé ná.

¹⁷ Á ńnéŋe tà ńkwaŋte ntʉ́m yé ngie: Ngàŋa fà’ tá wɔ̀ɔn ée mbʉ̀a ńjÿó shúm tà ńgwá’a tsɔ́, n gwɔ́ jʉ’ɔɔn ńkwé nzyè lá!

¹⁸ Mèŋ n ge fóo jʉ’ɔɔn gʉa, é piŋ nzèm lê mbʉ̀a tá wɔ̀ɔn, é tó gɔɔn né yé ngie: Tá wɔ̀ɔn, n ka gÿo nò tepòŋ nà Ssé, ńgÿo ná gù.

¹⁹ Pú’u, n tè gíŋe ńku’u gẅie à lɔɔn ńgwɔ́ ɔ̀ tóŋ lê míŋ ɔ̀ wɔ́. Fó ńdɔgɔ wɔ̀ɔn ńgÿo tsɔ̌ ngàŋa fà’ ɔ̀ lâ.

²⁰ Ńkwaŋ pú’u, ńcʉ́me mánzsé, ńně ḿbiŋe nê mbʉ̀a pɔ́b. Tá we tyé ńgyá yé, tà á nyé pɔ́ ngʉ̀a shʉ̀shʉ̀a, mezìŋe mé kúu yé, á nɔ́ɔnte yé, ésiŋte yé, ngie: Wɔɔn aa gú lá?

²¹ Múɔ gɔɔn né tá we ngie: Tɔ̌ɔnmé, n ka gÿo nò tepòŋ nà Ssé, ńgÿo ná gù, n tè gíŋe ńku’u gẅie à lɔɔn ńgwɔ́ ɔ̀ tóŋ lê míŋ gù wɔ́.

²² Tá’, tá we gɔɔn né megàŋa fà’ ngie: Pi lwo ńgʉa fa’ nzsǒ mbòŋo ńdɔg ńtó ḿma’a ná yé, ńdíe kwáŋ shÿɔ́gɔ ná múɔ tepwó we, éfa’ melɔ̌ɔn shÿɔ́gɔ mekwò yé.

²³ Pi fa’a mûɔ fòŋ gẅie à fǎŋ tɛ’ la, ńzẅé pege pfɛ́, ńkág,

²⁴ ńtí pá’ míŋ wɔ̀ɔn mɔɔn à ka kwě, à zǐm, à ka pyě, n giŋé ńgyá yé. Á gɔɔn pú’u, pɔ́ zye lékág.

²⁵ Á gwaa gwɔ́, míŋ we we lÿò gwɔ́ nká’, ńgÿo ne ḿbiŋe, ńgʉa tà ńcʉ́’ʉ lékúu mbʉ̀a, ńjú’ mé gwɔ́ wó ńzɔbɔ ńzíŋe.

²⁶ Á tóŋo tsɔ̌ ngàŋa fà’, ńzɛ́te yé ngie: Akɔ́ áa mbʉ̀a?

²⁷ Ngàŋa fà’ gɔɔn ngie: Mémá gù zɔ cʉ̌’ ńtó tà ńgwɔ́ pɔ́ ntentʉ́, tá gù zẅě mûɔ fòŋ gẅie à fǎŋ tɛ’ la, mé ne ńdɔgɔ ńkága.

²⁸ Andyè we jú’ pú’u, ḿbú ńgyáŋa lóŋ tà ńdʉ’ʉ lékúu ndá. Tá we kẅɛɛ pǐ ḿbú’ mbwó mbwo yé ngie à kúu ndá.

²⁹ Á tsɔ́’ɔ mbwo yé ngie: Tɔ̌ɔn, mèŋ fa’á mbwo gù ngù’ shÿɔ́’ɔ? N dǎ ké fʉa *lepʉ̌ shú? Tà ɔ̀ lǎ fó ńnáa wɔ̀ɔn mûɔ mvfó ndà’ ngie pega meshǔ pɔ́ɔn zẅé ńdɔg ńkág?

³⁰ Míŋ ɔ̀ gẅie pâ mekwàla kéen ḿpfɛ́ nkáb jù, à lěen ńtó, ɔ̀ gwóon ńzẅé mûɔ fòŋ gẅie à fáŋ tɛ’ ńtí yé?

³¹ Tá we gɔɔn ngie, míŋ wɔ̀ɔn, pɔgɔ zɔɔ ńzɔ́gɔ. Akɔ́ɔkɔ́ɔ wɔ́ gie n gẅiin wɔ́ áa jú.

³² Tá’, á kɔ’ɔ́ ḿboŋ ngie pege kág kwà’ mboŋó, mélà’mie afɛ̌ gù wɔɔn à ka kwě, à zimé nà legwé, à kà pyě, mèŋ n gǐŋ ńgyá yé.